অজাতসত্তুউপাসকত্তপটিৰেদনাকথা

২৫০. রাজা তত্থ তত্থ সাধুকারং পৰত্তেন্তো আদিমজ্ঝপরিযোসানং সক্কচ্চং সুত্ৰা ‘‘চিরং ৰতম্হি ইমে পঞ্হে পুথূ সমণব্রাহ্মণে পুচ্ছন্তো, থুসে কোট্টেন্তো ৰিয কিঞ্চি সারং নালত্থং, অহো ৰত ভগৰতো গুণসম্পদা, যো মে দীপসহস্সং জালেন্তো ৰিয মহন্তং আলোকং কত্ৰা ইমে পঞ্হে ৰিস্সজ্জেসি. সুচিরং ৰতম্হি দসবলস্স গুণানুভাৰং অজানন্তো ৰঞ্চিতো’’তি চিন্তেত্ৰা বুদ্ধগুণানুস্সরণসম্ভূতায পঞ্চৰিধায পীতিযা ফুটসরীরো অত্তনো পসাদং আৰিকরোন্তো উপাসকত্তং পটিৰেদেসি. তং দস্সেতুং ‘‘এৰং ৰুত্তে রাজা’’তিআদি আরদ্ধং.

তত্থ অভিক্কন্তং, ভন্তেতি অযং অভিক্কন্তসদ্দো খযসুন্দরাভিরূপঅব্ভনুমোদনেসু দিস্সতি. ‘‘অভিক্কন্তা ভন্তে, রত্তি, নিক্খন্তো পঠমো যামো, চিরনিসিন্নো ভিক্খুসঙ্ঘো’’তিআদীসু (অ. নি. ৮.২০) হি খযে দিস্সতি. ‘‘অযং মে পুগ্গলো খমতি, ইমেসং চতুন্নং পুগ্গলানং অভিক্কন্ততরো চ পণীততরো চা’’তিআদীসু (অ. নি. ৪.১০০) সুন্দরে.

‘‘কো মে ৰন্দতি পাদানি, ইদ্ধিযা যসসা জলং;

অভিক্কন্তেন ৰণ্ণেন, সব্বা ওভাসযং দিসা’’তি. (ৰি. ৰ. ৮৫৭);

আদীসু অভিরূপে. ‘‘অভিক্কন্তং ভো, গোতমা’’তিআদীসু (পারা. ১৫) অব্ভনুমোদনে. ইধাপি অব্ভনুমোদনেযেৰ. যস্মা চ অব্ভনুমোদনে, তস্মা ‘সাধু সাধু ভন্তে’তি ৰুত্তং হোতীতি ৰেদিতব্বো.

ভযে কোধে পসংসাযং, তুরিতে কোতূহলচ্ছরে;

হাসে সোকে পসাদে চ, করে আমেডিতং বুধোতি.

ইমিনা চ লক্খণেন ইধ পসাদৰসেন, পসংসাৰসেন চাযং দ্ৰিক্খত্তুং ৰুত্তোতি ৰেদিতব্বো. অথৰা অভিক্কন্তন্তি অভিকন্তং অতিইট্ঠং অতিমনাপং অতিসুন্দরন্তি ৰুত্তং হোতি.

এত্থ একেন অভিক্কন্তসদ্দেন দেসনং থোমেতি, একেন অত্তনো পসাদং. অযঞ্হেত্থ অধিপ্পাযো, অভিক্কন্তং ভন্তে, যদিদং ভগৰতো ধম্মদেসনা, ‘অভিক্কন্তং’ যদিদং ভগৰতো ধম্মদেসনং আগম্ম মম পসাদোতি. ভগৰতোযেৰ ৰা ৰচনং দ্ৰে দ্ৰে অত্থে সন্ধায থোমেতি. ভগৰতো ৰচনং অভিক্কন্তং দোসনাসনতো, অভিক্কন্তং গুণাধিগমনতো. তথা সদ্ধাজননতো, পঞ্ঞাজননতো, সাত্থতো, সব্যঞ্জনতো, উত্তানপদতো, গম্ভীরত্থতো, কণ্ণসুখতো, হদযঙ্গমতো, অনত্তুক্কংসনতো, অপরৰম্ভনতো, করুণাসীতলতো, পঞ্ঞাৰদাততো, আপাথরমণীযতো, ৰিমদ্দক্খমতো, সুয্যমানসুখতো, ৰীমংসিযমানহিততোতি এৰমাদীহি যোজেতব্বং.

ততো পরম্পি চতূহি উপমাহি দেসনংযেৰ থোমেতি. তত্থ নিক্কুজ্জিতন্তি অধোমুখঠপিতং হেট্ঠামুখজাতং ৰা. উক্কুজ্জেয্যাতি উপরি মুখং করেয্য. পটিচ্ছন্নন্তি তিণপণ্ণাদিছাদিতং. ৰিৰরেয্যাতি উগ্ঘাটেয্য. মূল়্হস্স ৰাতি দিসামূল়্হস্স. মগ্গং আচিক্খেয্যাতি হত্থে গহেত্ৰা ‘‘এস মগ্গো’’তি ৰদেয্য, অন্ধকারেতি কাল়পক্খচাতুদ্দসী অড্ঢরত্তঘনৰনসণ্ডমেঘপটলেহি চতুরঙ্গে তমে. অযং তাৰ অনুত্তানপদত্থো. অযং পন সাধিপ্পাযযোজনা. যথা কোচি নিক্কুজ্জিতং উক্কুজ্জেয্য, এৰং সদ্ধম্মৰিমুখং অসদ্ধম্মে পতিতং মং অসদ্ধম্মা ৰুট্ঠাপেন্তন. যথা পটিচ্ছন্নং ৰিৰরেয্য, এৰং কস্সপস্স ভগৰতো সাসনন্তরধানা পভুতি মিচ্ছাদিট্ঠিগহনপটিচ্ছন্নং সাসনং ৰিৰরন্তেন, যথা মূল়্হস্স মগ্গং আচিক্খেয্য, এৰং কুম্মগ্গমিচ্ছামগ্গপ্পটিপন্নস্স মে সগ্গমোক্খমগ্গং আৰিকরোন্তেন, যথা অন্ধকারে তেলপজ্জোতং ধারেয্য, এৰং মোহন্ধকারনিমুগ্গস্স মে বুদ্ধাদিরতনরূপানি অপস্সতো তপ্পটিচ্ছাদকমোহন্ধকারৰিদ্ধংসকদেসনাপজ্জোতধারকেন ময্হং ভগৰতা এতেহি পরিযাযেহি পকাসিতত্তা অনেকপরিযাযেন ধম্মো পকাসিতোতি.

এৰং দেসনং থোমেত্ৰা ইমায দেসনায রতনত্তযে পসন্নচিত্তো পসন্নাকারং করোন্তো এসাহন্তিআদিমাহ. তত্থ এসাহন্তি এসো অহং. ভগৰন্তং সরণং গচ্ছামীতি ভগৰা মে সরণং, পরাযনং, অঘস্স তাতা, হিতস্স চ ৰিধাতাতি. ইমিনা অধিপ্পাযেন ভগৰন্তং গচ্ছামি ভজামি সেৰামি পযিরুপাসামি, এৰং ৰা জানামি বুজ্ঝামীতি. যেসঞ্হি ধাতূনং গতিঅত্থো, বুদ্ধিপি তেসং অত্থো. তস্মা গচ্ছামীতি ইমস্স জানামি বুজ্ঝামীতি অযম্পি অত্থো ৰুত্তো. ধম্মঞ্চ ভিক্খুসঙ্ঘঞ্চাতি এত্থ পন অধিগতমগ্গে সচ্ছিকতনিরোধে যথানুসিট্ঠং পটিপজ্জমানে চতূসু অপাযেসু অপতমানে ধারেতীতি ধম্মো, সো অত্থতো অরিযমগ্গো চেৰ নিব্বানঞ্চ. ৰুত্তঞ্চেতং – ‘‘যাৰতা, ভিক্খৰে, ধম্মা সঙ্খতা, অরিযো অট্ঠঙ্গিকো মগ্গো তেসং অগ্গমক্খাযতী’’তি (অ. নি. ৪.৩৪) ৰিত্থারো. ন কেৰলঞ্চ অরিযমগ্গো চেৰ নিব্বানঞ্চ. অপি চ খো অরিযফলেহি সদ্ধিং পরিযত্তিধম্মোপি. ৰুত্তঞ্হেতং ছত্তমাণৰকৰিমানে –

‘‘রাগৰিরাগমনেজমসোকং, ধম্মমসঙ্খতমপ্পটিকূলং;

মধুরমিমং পগুণং সুৰিভত্তং, ধম্মমিমং সরণত্থমুপেহী’’তি. (ৰি. ৰ. ৮৮৭);

এত্থ হি রাগৰিরাগোতি মগ্গো কথিতো. অনেজমসোকন্তি ফলং. ধম্মমসঙ্খতন্তি নিব্বানং. অপ্পটিকূলং মধুরমিমং পগুণং সুৰিভত্তন্তি পিটকত্তযেন ৰিভত্তা ধম্মক্খন্ধাতি. দিট্ঠিসীলসংঘাতেন সংহতোতি সঙ্ঘো, সো অত্থতো অট্ঠ অরিযপুগ্গলসমূহো. ৰুত্তঞ্হেতং তস্মিঞ্ঞেৰ ৰিমানে –

‘‘যত্থ চ দিন্নমহপ্ফলমাহু, চতূসু সুচীসু পুরীসযুগেসু;

অট্ঠ চ পুগ্গলধম্মদসা তে, সঙ্ঘমিমং সরণত্থমুপেহী’’তি. (ৰি. ৰ. ৮৮৮);

ভিক্খূনং সঙ্ঘো ভিক্খুসঙ্ঘো. এত্তাৰতা রাজা তীণি সরণগমনানি পটিৰেদেসি.