উচ্ছেদৰাদৰণ্ণনা

৮৪. উচ্ছেদৰাদে সতোতি ৰিজ্জমানস্স. উচ্ছেদন্তি উপচ্ছেদং. ৰিনাসন্তি অদস্সনং. ৰিভৰন্তি ভাৰৰিগমং. সব্বানেতানি অঞ্ঞমঞ্ঞৰেৰচনানেৰ. তত্থ দ্ৰে জনা উচ্ছেদদিট্ঠিং গণ্হন্তি, লাভী চ অলাভী চ. লাভী অরহতো দিব্বেন চক্খুনা চুতিং দিস্ৰা উপপত্তিং অপস্সন্তো, যো ৰা চুতিমত্তমেৰ দট্ঠুং সক্কোতি, ন উপপাতং; সো উচ্ছেদদিট্ঠিং গণ্হাতি. অলাভী চ ‘‘কো পরলোকং ন জানাতী’’তি কামসুখগিদ্ধতায ৰা. ‘‘যথা রুক্খতো পণ্ণানি পতিতানি ন পুন ৰিরুহন্তি, এৰমেৰ সত্তা’’তিআদিনা তক্কেন ৰা উচ্ছেদং গণ্হাতি. ইধ পন তণ্হাদিট্ঠীনং ৰসেন তথা চ অঞ্ঞথা চ ৰিকপ্পেত্ৰাৰ ইমা সত্ত দিট্ঠিযো উপ্পন্নাতি ৰেদিতব্বা.

৮৫. তত্থ রূপীতি রূপৰা. চাতুমহাভূতিকোতি চতুমহাভূতমযো. মাতাপিতূনং এতন্তি মাতাপেত্তিকং. কিং তং? সুক্কসোণিতং. মাতাপেত্তিকে সম্ভূতো জাতোতি মাতাপেত্তিকসম্ভৰো. ইতি রূপকাযসীসেন মনুস্সত্তভাৰং ‘‘অত্তা’’তি ৰদতি. ইত্থেকেতি ইত্থং একে এৰমেকেতি অত্থো.

৮৬. দুতিযো তং পটিক্খিপিত্ৰা দিব্বত্তভাৰং ৰদতি. দিব্বোতি দেৰলোকে সম্ভূতো. কামাৰচরোতি ছ কামাৰচরদেৰপরিযাপন্নো. কবল়ীকারং আহারং ভক্খতীতি কবল়ীকারাহারভক্খো.

৮৭. মনোমযোতি ঝানমনেন নিব্বত্তো. সব্বঙ্গপচ্চঙ্গীতি সব্বঙ্গপচ্চঙ্গযুত্তো. অহীনিন্দ্রিযোতি পরিপুণ্ণিন্দ্রিযো. যানি ব্রহ্মলোকে অত্থি, তেসং ৰসেন ইতরেসঞ্চ সণ্ঠানৰসেনেতং ৰুত্তং.

৮৮-৯২. সব্বসো রূপসঞ্ঞানং সমতিক্কমাতিআদীনং অত্থো ৰিসুদ্ধিমগ্গে ৰুত্তো. আকাসানঞ্চাযতনূপগোতিআদীসু পন আকাসানঞ্চাযতনভৰং উপগতোতি, এৰমত্থো ৰেদিতব্বো. সেসমেত্থ উত্তানমেৰাতি.