৩. পঞ্হাপুচ্ছকৰণ্ণনা

৩৮৬. পঞ্হাপুচ্ছকে পাল়িঅনুসারেনেৰ সতিপট্ঠানানং কুসলাদিভাৰো ৰেদিতব্বো. আরম্মণত্তিকেসু পন সব্বানিপি এতানি অপ্পমাণং নিব্বানং আরব্ভ পৰত্তনতো অপ্পমাণারম্মণানেৰ, ন মগ্গারম্মণানি; সহজাতহেতুৰসেন পন মগ্গহেতুকানি; ৰীরিযং ৰা ৰীমংসং ৰা জেট্ঠকং কত্ৰা মগ্গভাৰনাকালে মগ্গাধিপতীনি; ছন্দচিত্তজেট্ঠকায মগ্গভাৰনায নৰত্তব্বানি মগ্গাধিপতীনীতি ফলকালেপি নৰত্তব্বানেৰ; অতীতাদীসু একারম্মণভাৰেনপি নৰত্তব্বানি; নিব্বানস্স পন বহিদ্ধাধম্মত্তা বহিদ্ধারম্মণানি নাম হোন্তীতি. এৰমেতস্মিং পঞ্হাপুচ্ছকে নিব্বত্তিতলোকুত্তরানেৰ সতিপট্ঠানানি কথিতানি. সম্মাসম্বুদ্ধেন হি সুত্তন্তভাজনীযস্মিংযেৰ লোকিযলোকুত্তরমিস্সকা সতিপট্ঠানা কথিতা; অভিধম্মভাজনীযপঞ্হাপুচ্ছকেসু পন লোকুত্তরাযেৰাতি. এৰমযং সতিপট্ঠানৰিভঙ্গোপি তেপরিৰট্টং নীহরিত্ৰা ভাজেত্ৰা দস্সিতোতি.

সম্মোহৰিনোদনিযা ৰিভঙ্গট্ঠকথায

সতিপট্ঠানৰিভঙ্গৰণ্ণনা নিট্ঠিতা.