৮. সম্মপ্পধানৰিভঙ্গো

১. সুত্তন্তভাজনীযৰণ্ণনা

৩৯০. ইদানি তদনন্তরে সম্মপ্পধানৰিভঙ্গে চত্তারোতি গণনপরিচ্ছেদো. তেন ন ততো হেট্ঠা ন উদ্ধন্তি সম্মপ্পধানপরিচ্ছেদং দীপেতি. সম্মপ্পধানাতি কারণপ্পধানা উপাযপ্পধানা যোনিসোপধানা. ইধ ভিক্খূতি ইমস্মিং সাসনে পটিপন্নকো ভিক্খু. অনুপ্পন্নানন্তি অনিব্বত্তানং. পাপকানন্তি লামকানং. অকুসলানং ধম্মানন্তি অকোসল্লসম্ভূতানং ধম্মানং. অনুপ্পাদাযাতি ন উপ্পাদনত্থায. ছন্দং জনেতীতি কত্তুকম্যতাসঙ্খাতং কুসলচ্ছন্দং জনেতি উপ্পাদেতি. ৰাযমতীতি পযোগং পরক্কমং করোতি. ৰীরিযং আরভতীতি কাযিকচেতসিকং ৰীরিযং করোতি. চিত্তং পগ্গণ্হাতীতি তেনেৰ সহজাতৰীরিযেন চিত্তং উক্খিপতি. পদহতীতি পধানৰীরিযং করোতি. পটিপাটিযা পনেতানি চত্তারিপি পদানি আসেৰনাভাৰনাবহুলীকম্মসাতচ্চকিরিযাহি যোজেতব্বানি.

উপ্পন্নানং পাপকানন্তি অনুপ্পন্নন্তি অৰত্তব্বতং আপন্নানং পাপধম্মানং. পহানাযাতি পজহনত্থায. অনুপ্পন্নানং কুসলানং ধম্মানন্তি অনিব্বত্তানং কোসল্লসম্ভূতানং ধম্মানং. উপ্পাদাযাতি উপ্পাদনত্থায. উপ্পন্নানন্তি নিব্বত্তানং. ঠিতিযাতি ঠিতত্থায. অসম্মোসাযাতি অনস্সনত্থং. ভিয্যোভাৰাযাতি পুনপ্পুনং ভাৰায. ৰেপুল্লাযাতি ৰিপুলভাৰায. ভাৰনাযাতি ৰড্ঢিযা. পারিপূরিযাতি পরিপূরণত্থায. অযং তাৰ চতুন্নং সম্মপ্পধানানং উদ্দেসৰারৰসেন একপদিকো অত্থুদ্ধারো.

৩৯১. ইদানি পটিপাটিযা তানি পদানি ভাজেত্ৰা দস্সেতুং কথঞ্চ ভিক্খু অনুপ্পন্নানন্তিআদিনা নযেন নিদ্দেসৰারো আরদ্ধো. তত্থ যং হেট্ঠা ধম্মসঙ্গহে আগতসদিসং, তং তস্স ৰণ্ণনাযং ৰুত্তনযেনেৰ ৰেদিতব্বং. যং পন তস্মিং অনাগতং, তত্থ ছন্দনিদ্দেসে তাৰ যো ছন্দোতি যো ছন্দনিযৰসেন ছন্দো. ছন্দিকতাতি ছন্দিকভাৰো, ছন্দকরণাকারো ৰা. কত্তুকম্যতাতি কত্তুকামতা. কুসলোতি ছেকো. ধম্মচ্ছন্দোতি সভাৰচ্ছন্দো. অযঞ্হি ছন্দো নাম তণ্হাছন্দো, দিট্ঠিছন্দো, ৰীরিযছন্দো, ধম্মচ্ছন্দোতি বহুৰিধো নানপ্পকারকো. তেসু ধম্মচ্ছন্দোতি ইমস্মিং ঠানে কত্তুকম্যতাকুসলধম্মচ্ছন্দো অধিপ্পেতো.

ইমং ছন্দং জনেতীতি ছন্দং কুরুমানোৰ ছন্দং জনেতি নাম. সঞ্জনেতীতি উপসগ্গেন পদং ৰড্ঢিতং. উট্ঠপেতীতি ছন্দং কুরুমানোৰ তং উট্ঠপেতি নাম. সমুট্ঠপেতীতি উপসগ্গেন পদং ৰড্ঢিতং. নিব্বত্তেতীতি ছন্দং কুরুমানোৰ তং নিব্বত্তেতি নাম. অভিনিব্বত্তেতীতি উপসগ্গেন পদং ৰড্ঢিতং. অপিচ ছন্দং করোন্তোৰ ছন্দং জনেতি নাম. তমেৰ সততং করোন্তো সঞ্জনেতি নাম. কেনচিদেৰ অন্তরাযেন পতিতং পুন উক্খিপন্তো উট্ঠপেতি নাম. পবন্ধট্ঠিতিং পাপেন্তো সমুট্ঠপেতি নাম. তং পাকটং করোন্তো নিব্বত্তেতি নাম. অনোসক্কনতায অলীনৰুত্তিতায অনোলীনৰুত্তিতায অভিমুখভাৰেন নিব্বত্তেন্তো অভিনিব্বত্তেতি নাম.

৩৯৪. ৰীরিযনিদ্দেসে ৰীরিযং করোন্তোৰ ৰীরিযং আরভতি নাম. দুতিযপদং উপসগ্গেন ৰড্ঢিতং. ৰীরিযং করোন্তোযেৰ চ আসেৰতি ভাৰেতি নাম. পুনপ্পুনং করোন্তো ৰহুলীকরোতি. আদিতোৰ করোন্তো আরভতি. পুনপ্পুনং করোন্তো সমারভতি. ভাৰনাৰসেন ভজন্তো আসেৰতি. ৰড্ঢেন্তো ভাৰেতি. সব্বকিচ্চেসু তদেৰ বহুলীকরোন্তো বহুলীকরোতীতি ৰেদিতব্বো.

৩৯৫. চিত্তপগ্গহনিদ্দেসে ৰীরিযপগ্গহেন যোজেন্তো চিত্তং পগ্গণ্হাতি, উক্খিপতীতি অত্থো. পুনপ্পুনং পগ্গণ্হন্তো সম্পগ্গণ্হাতি. এৰং সম্পগ্গহিতং যথা ন পততি তথা নং ৰীরিযুপত্থম্ভেন উপত্থম্ভেন্তো উপত্থম্ভেতি. উপত্থম্ভিতম্পি থিরভাৰত্থায পুনপ্পুনং উপত্থম্ভেন্তো পচ্চুপত্থম্ভেতি নাম.

৪০৬. ঠিতিযাতিপদস্স নিদ্দেসে সব্বেসম্পি অসম্মোসাদীনং ঠিতিৰেৰচনভাৰং দস্সেতুং যা ঠিতি সো অসম্মোসোতিআদি ৰুত্তং. এত্থ হি হেট্ঠিমং হেট্ঠিমং পদং উপরিমস্স উপরিমস্স পদস্স অত্থো, উপরিমং উপরিমং পদং হেট্ঠিমস্স হেট্ঠিমস্স অত্থোতিপি ৰত্তুং ৰট্টতি. সেসং সব্বত্থ উত্তানত্থমেৰাতি. অযং তাৰ পাল়িৰণ্ণনা.

অযং পনেত্থ ৰিনিচ্ছযকথা. অযঞ্হি সম্মপ্পধানকথা নাম দুৰিধা – লোকিযা লোকুত্তরা চ. তত্থ লোকিযা সব্বপুব্বভাগে হোতি. সা কস্সপসংযুত্তপরিযাযেন লোকিযমগ্গক্খণে ৰেদিতব্বা. ৰুত্তঞ্হি তত্থ –

‘‘চত্তারো মে, আৰুসো, সম্মপ্পধানা. কতমে চত্তারো?

ইধাৰুসো, ভিক্খু ‘অনুপ্পন্না মে পাপকা অকুসলা ধম্মা উপ্পজ্জমানা অনত্থায সংৰত্তেয্যু’ন্তি আতপ্পং করোতি; ‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’ন্তি আতপ্পং করোতি; ‘অনুপ্পন্না মে কুসলা ধম্মা অনুপ্পজ্জমানা অনত্থায সংৰত্তেয্যু’ন্তি আতপ্পং করোতি. ‘উপ্পন্না মে কুসলা ধম্মা নিরুজ্ঝমানা অনত্থায সংৰত্তেয্যু’ন্তি আতপ্পং করোতী’’তি (সং. নি. ২.১৪৫).

এত্থ চ ‘অনুপ্পন্না মে কুসলা ধম্মা’তি সমথৰিপস্সনা চেৰ মগ্গো চ. উপ্পন্না কুসলা নাম সমথৰিপস্সনাৰ. মগ্গো পন সকিং উপ্পজ্জিত্ৰা নিরুজ্ঝমানো অনত্থায সংৰত্তনকো নাম নত্থি. সো হি ফলস্স পচ্চযং দত্ৰাৰ নিরুজ্ঝতি. পুরিমস্মিং ৰা সমথৰিপস্সনাৰ গহেতব্বাতি ৰুত্তং, তং পন ন যুত্তং.

তত্থ ‘‘উপ্পন্না সমথৰিপস্সনা নিরুজ্ঝমানা অনত্থায সংৰত্তন্তী’’তি অত্থস্স আৰিভাৰত্থং ইদং ৰত্থু – একো কির খীণাসৰত্থেরো ‘মহাচেতিযঞ্চ মহাবোধিঞ্চ ৰন্দিস্সামী’তি সমাপত্তিলাভিনা ভণ্ডগাহকসামণেরেন সদ্ধিং জনপদতো মহাৰিহারং আগন্ত্ৰা ৰিহারপরিৰেণং পাৰিসি; সাযন্হসমযে মহাভিক্খুসঙ্ঘে চেতিযং ৰন্দমানে চেতিযং ৰন্দনত্থায ন নিক্খমি. কস্মা? খীণাসৰানঞ্হি তীসু রতনেসু মহন্তং গারৰং হোতি. তস্মা ভিক্খুসঙ্ঘে ৰন্দিত্ৰা পটিক্কন্তে মনুস্সানং সাযমাসভুত্তৰেলায সামণেরম্পি অজানাপেত্ৰা ‘চেতিযং ৰন্দিস্সামী’তি এককোৰ নিক্খমি. সামণেরো ‘কিং নু খো থেরো অৰেলায এককোৰ গচ্ছতি, জানিস্সামী’তি উপজ্ঝাযস্স পদানুপদিকোৰ নিক্খমি. থেরো অনাৰজ্জনেন তস্স আগমনং অজানন্তো দক্খিণদ্ৰারেন মহাচেতিযঙ্গণং আরুল়্হো. সামণেরোপি অনুপদংযেৰ আরুল়্হো.

মহাথেরো মহাচেতিযং উল্লোকেত্ৰা বুদ্ধারম্মণং পীতিং গহেত্ৰা সব্বং চেতসো সমন্নাহরিত্ৰা হট্ঠপহট্ঠো মহাচেতিযং ৰন্দতি. সামণেরো থেরস্স ৰন্দনাকারং দিস্ৰা ‘উপজ্ঝাযো মে অতিৰিয পসন্নচিত্তো ৰন্দতি; কিং নু খো পুপ্ফানি লভিত্ৰা পূজং করেয্যা’তি চিন্তেসি. থেরে ৰন্দিত্ৰা উট্ঠায সিরসি অঞ্জলিং ঠপেত্ৰা মহাচেতিযং উল্লোকেত্ৰা ঠিতে সামণেরো উক্কাসিত্ৰা অত্তনো আগতভাৰং জানাপেসি. থেরো পরিৰত্তেত্ৰা ওলোকেন্তো ‘‘কদা আগতোসী’’তি পুচ্ছি. ‘‘তুম্হাকং চেতিযং ৰন্দনকালে, ভন্তে; অতিৰিয পসন্না চেতিযং ৰন্দিত্থ; কিন্নু খো পুপ্ফানি লভিত্ৰা পূজেয্যাথা’’তি? ‘‘আম, সামণের, ইমস্মিং চেতিযে ৰিয অঞ্ঞত্র এত্তকং ধাতুনিধানং নাম নত্থি. এৰরূপং অসদিসং মহাথূপং পুপ্ফানি লভিত্ৰা কো ন পূজেয্যা’’তি? ‘‘তেন হি, ভন্তে, অধিৰাসেথ, আহরিস্সামী’’তি তাৰদেৰ ঝানং সমাপজ্জিত্ৰা ইদ্ধিযা হিমৰন্তং গন্ত্ৰা ৰণ্ণগন্ধসম্পন্নানি পুপ্ফানি গহেত্ৰা পরিস্সাৰনং পূরেত্ৰা মহাথেরে দক্খিণমুখতো পচ্ছিমমুখে অসম্পত্তেযেৰ আগন্ত্ৰা পুপ্ফপরিস্সাৰনং হত্থে ঠপেত্ৰা ‘‘পূজেথ ভন্তে’’তি আহ. থেরো ‘‘অতিমন্দানি নো, সামণের, পুপ্ফানী’’তি আহ. ‘‘গচ্ছথ, ভন্তে, ভগৰতো গুণে আৰজ্জেত্ৰা পূজেথা’’তি.

থেরো পচ্ছিমমুখনিস্সিতেন সোপানেন আরুয্হ কুচ্ছিৰেদিকাভূমিযং পুপ্ফপূজং কাতুং আরদ্ধো. ৰেদিকাভূমি পরিপুণ্ণা; পুপ্ফানি পতিত্ৰা দুতিযভূমিযং জণ্ণুপ্পমাণেন ওধিনা পূরযিংসু. ততো ওতরিত্ৰা পাদপিট্ঠিকপন্তিং পূজেসি; সাপি পরিপূরি; পরিপুণ্ণভাৰং ঞত্ৰা হেট্ঠিমতলে ৰিকিরন্তো অগমাসি; সব্বং চেতিযঙ্গণং পরিপূরি; তস্মিং পরিপুণ্ণে ‘‘সামণের, পুপ্ফানি ন খীযন্তী’’তি আহ. ‘‘পরিস্সাৰনং, ভন্তে, অধোমুখং করোথা’’তি. অধোমুখং কত্ৰা চালেসি. তদা পুপ্ফানি খীণানি. থেরো পরিস্সাৰনং সামণেরস্স দত্ৰা সদ্ধিং হত্থিপাকারেন চেতিযং তিক্খত্তুং পদক্খিণং কত্ৰা চতূসু ঠানেসু ৰন্দিত্ৰা পরিৰেণং গচ্ছন্তো চিন্তেসি – ‘যাৰ মহিদ্ধিকো ৰতাযং সামণেরো; সক্খিস্সতি নু খো ইমং ইদ্ধানুভাৰং রক্খিতুন্তি? ততো ‘ন সক্খিস্সতী’তি দিস্ৰা সামণেরং আহ – ‘‘সামণের, ত্ৰং ইদানি মহিদ্ধিকো; এৰরূপং পন ইদ্ধিং নাসেত্ৰা পচ্ছিমকালে কাণপেসকারিযা হত্থেন মদ্দিতংকঞ্জিযং পিৰিস্সসী’’তি. দহরকভাৰস্স নামেস দোসো যং সো উপজ্ঝাযস্স কথায সংৰেজেত্ৰা ‘কম্মট্ঠানং মে, ভন্তে, আচিক্খথা’তি ন যাচি; ‘অম্হাকং উপজ্ঝাযো কিং ৰদতী’তি তং পন অসুণন্তো ৰিয অগমাসি.

থেরো মহাচেতিযঞ্চ মহাবোধিঞ্চ ৰন্দিত্ৰা সামণেরং পত্তচীৰরং গাহাপেত্ৰা অনুপুব্বেন কুটেল়িতিস্সমহাৰিহারং অগমাসি. সামণেরো উপজ্ঝাযস্স পদানুপদিকো হুত্ৰা ভিক্খাচারং ন গচ্ছতি. ‘‘কতরং গামং পৰিসথ, ভন্তে’’তি পুচ্ছিত্ৰা পন ‘ইদানি মে উপজ্ঝাযো গামদ্ৰারং সম্পত্তো ভৰিস্সতী’তি ঞত্ৰা অত্তনো চ উপজ্ঝাযস্স চ পত্তচীৰরং গহেত্ৰা আকাসেনাগন্ত্ৰা থেরস্স পত্তচীৰরং দত্ৰা পিণ্ডায পৰিসতি. থেরো সব্বকালং ওৰদতি – ‘‘সামণের, মা এৰমকাসি; পুথুজ্জনিদ্ধি নাম চলা অনিবদ্ধা; অসপ্পাযং রূপাদিআরম্মণং লভিত্ৰা অপ্পমত্তকেনেৰ ভিজ্জতি; সন্তায সমাপত্তিযা পরিহীনা ব্রহ্মচরিযৰাসে সন্থম্ভিতুং ন সক্কোন্তী’’তি. সামণেরো ‘কিং কথেতি ময্হং উপজ্ঝাযো’তি সোতুং ন ইচ্ছতি, তথেৰ করোতি. থেরো অনুপুব্বেন চেতিযৰন্দনং করোন্তো কম্মুপেন্দৰিহারং নাম গতো. তত্থ ৰসন্তেপি থেরে সামণেরো তথেৰ করোতি.

অথেকদিৰসং একা পেসকারধীতা অভিরূপা পঠমৰযে ঠিতা কম্মুপেন্দগামতো নিক্খমিত্ৰা পদুমস্সরং ওরুয্হ গাযমানা পুপ্ফানি ভঞ্জতি. তস্মিং সমযে সামণেরো পদুমস্সরমত্থকেন গচ্ছতি গচ্ছন্তো পন, সক্করলসিকায কাণমক্খিকা ৰিয, তস্সা গীতসদ্দে বজ্ঝি; তাৰদেৰ ইদ্ধি অন্তরহিতা, ছিন্নপক্খো কাকো ৰিয অহোসি. সন্তসমাপত্তিবলেন পন তত্থেৰ উদকপিট্ঠে অপতিত্ৰা সিম্বলিতূলং ৰিয পতমানং অনুপুব্বেন পদুমস্সরতীরে অট্ঠাসি. সো ৰেগেন গন্ত্ৰা উপজ্ঝাযস্স পত্তচীৰরং দত্ৰা নিৰত্তি. মহাথেরো ‘পগেৰেতং মযা দিট্ঠং, নিৰারিযমানোপি ন নিৰত্তিস্সতী’তি কিঞ্চি অৰত্ৰা পিণ্ডায পাৰিসি.

সামণেরো গন্ত্ৰা পদুমস্সরতীরে অট্ঠাসি তস্সা পচ্চুত্তরণং আগমযমানো. সাপি সামণেরং আকাসেন গচ্ছন্তঞ্চ পুনাগন্ত্ৰা ঠিতঞ্চ দিস্ৰা ‘অদ্ধা এস মং নিস্সায উক্কণ্ঠিতো’তি ঞত্ৰা ‘পটিক্কম সামণেরা’তি আহ. সোপি পটিপক্কমি. ইতরা পচ্চুত্তরিত্ৰা সাটকং নিৰাসেত্ৰা তং উপসঙ্কমিত্ৰা ‘কিং, ভন্তে’তি পুচ্ছি. সো তমত্থং আরোচেসি. সা বহূহি কারণেহি ঘরাৰাসে আদীনৰং ব্রহ্মচরিযৰাসে আনিসংসঞ্চ দস্সেত্ৰা ওৰদমানাপি তস্স উক্কণ্ঠং ৰিনোদেতুং অসক্কোন্তী ‘অযং মম কারণা এৰরূপায ইদ্ধিযা পরিহীনো; ন দানি যুত্তং পরিচ্চজিতু’ন্তি. ‘ইধেৰ তিট্ঠা’তি ৰত্ৰা ঘরং গন্ত্ৰা মাতাপিতূনং তং পৰত্তিং আরোচেসি. তেপি আগন্ত্ৰা নানপ্পকারং ওৰদমানা ৰচনং অগ্গণ্হন্তং আহংসু – ‘‘ত্ৰং অম্হে উচ্চাকুলাতি মা সল্লক্খেসি. মযং পেসকারা. সক্খিস্সসি পেসকারকম্মং কাতু’’ন্তি? সামণেরো আহ – ‘‘উপাসক, গিহীভূতো নাম পেসকারকম্মং ৰা করেয্য নল়কারকম্মং ৰা, কিং ইমিনা, মা সাটকমত্তে লোভং করোথা’’তি. পেসকারকো উদরে বদ্ধসাটকং দত্ৰা ঘরং নেত্ৰা ধীতরং অদাসি.

সো পেসকারকম্মং উগ্গণ্হিত্ৰা পেসকারেহি সদ্ধিং সালায কম্মং করোতি. অঞ্ঞেসং ইত্থিযো পাতোৰ ভত্তং সম্পাদেত্ৰা আহরিংসু. তস্স ভরিযা ন তাৰ আগচ্ছতি. সো ইতরেসু কম্মং ৰিস্সজ্জেত্ৰা ভুঞ্জমানেসু তসরং ৰট্টেন্তো নিসীদি. সা পচ্ছা আগমাসি. অথ নং সো ‘অতিচিরেন আগতাসী’তি তজ্জেসি. মাতুগামো চ নাম অপি চক্কৰত্তিরাজানং অত্তনি পটিবদ্ধচিত্তং ঞত্ৰা দাসং ৰিয সল্লক্খেতি. তস্মা সা এৰমাহ – ‘‘অঞ্ঞেসং ঘরে দারুপণ্ণলোণাদীনি সন্নিহিতানি; বাহিরতো আহরিত্ৰা দাযকা পেসকারকাপি অত্থি. অহং পন একিকা; ত্ৰম্পি ‘ময্হং ঘরে ইদং অত্থি, ইদং নত্থী’তি ন জানাসি. সচে ইচ্ছসি ভুঞ্জ, নো চে ইচ্ছসি মা ভুঞ্জা’’তি. সো ‘ন কেৰলং উস্সূরে ভত্তং আহরসি, ৰাচাযপি মং ঘট্টেসী’তি কুজ্ঝিত্ৰা অঞ্ঞং পহরণং অপস্সন্তো তমেৰ তসরদণ্ডকং তসরতো লুঞ্চিত্ৰা খিপি. সা তং আগচ্ছন্তং দিস্ৰা ঈসকং পরিৰত্তি. তসরদণ্ডকস্স চ কোটি নাম তিখিণা হোতি. সা তস্সা পরিৰত্তমানায অক্খিকোটিযং পৰিসিত্ৰা অট্ঠাসি. সা উভোহি হত্থেহি ৰেগেন অক্খিং অগ্গহেসি. ভিন্নট্ঠানতো লোহিতং পগ্ঘরতি.

সো তস্মিং কালে উপজ্ঝাযস্স ৰচনং অনুস্সরি ‘ইদং সন্ধায মং উপজ্ঝাযো ‘‘অনাগতে কালে কাণপেসকারিযা হত্থেন মদ্দিতং কঞ্জিযং পিৰিস্সসী’’তি আহ. ইদং থেরেন দিট্ঠং ভৰিস্সতি. অহো দীঘদস্সী অয্যো’তি মহাসদ্দেন রোদিতুং আরভি. তমেনং অঞ্ঞে ‘‘অলং, আৰুসো, মা রোদি; অক্খি নাম ভিন্নং ন সক্কা রোদনেন পটিপাকতিকং কাতু’’ন্তি আহংসু. সো ‘‘নাহং এতমত্থং রোদামি; অপিচ খো ইদং সন্ধায রোদামী’’তি সব্বং পৰত্তিং পটিপাটিযা কথেসি. এৰং উপ্পন্না সমথৰিপস্সনা নিরুজ্ঝমানা অনত্থায সংৰত্তন্তি.

অপরম্পি ৰত্থু – তিংসমত্তা ভিক্খূ কল্যাণিযং মহাচেতিযং ৰন্দিত্ৰা অটৰিমগ্গেন মহামগ্গং ওতরমানা অন্তরামগ্গে ঝামক্খেত্তে কম্মং কত্ৰা আগচ্ছন্তং একং মনুস্সং অদ্দসংসু. তস্স সরীরং মসিমক্খিতং হোতি, মসিমক্খিতমেৰ চ একং কাসাৰং কচ্ছং পীল়েত্ৰা নিৰত্থং. ওলোকিযমানো ঝামখাণুকো ৰিয খাযতি. সো দিৰসভাগে কম্মং কত্ৰা উপড্ঢঝাযমানানং দারূনং কলাপং উক্খিপিত্ৰা পিট্ঠিযং ৰিপ্পকিণ্ণেহি কেসেহি কুম্মগ্গেন আগন্ত্ৰা ভিক্খূনং সম্মুখে অট্ঠাসি. সামণেরা দিস্ৰা অঞ্ঞমঞ্ঞং ওলোকযমানা ‘‘আৰুসো, তুয্হং পিতা, তুয্হং মহাপিতা, তুয্হং মাতুলো’’তি হসমানা গন্ত্ৰা ‘‘কো নামোসি ত্ৰং, উপাসকা’’তি নামং পুচ্ছিংসু. সো নামং পুচ্ছিতো ৰিপ্পটিসারী হুত্ৰা দারুকলাপং ছড্ডেত্ৰা ৰত্থং সংৰিধায নিৰাসেত্ৰা মহাথেরে ৰন্দিত্ৰা ‘‘তিট্ঠথ তাৰ, ভন্তে’’তি আহ. মহাথেরা অট্ঠংসু.

দহরসামণেরা আগন্ত্ৰা মহাথেরানং সম্মুখাপি পরিহাসং করোন্তি. উপাসকো আহ – ‘‘ভন্তে, তুম্হে মং পস্সিত্ৰা পরিহসথ; এত্তকেনেৰ মত্থকং পত্তম্হাতি সল্লক্খেথ. অহম্পি পুব্বে তুম্হাদিসোৰ সমণো অহোসিং. তুম্হাকং পন চিত্তেকগ্গতামত্তম্পি নত্থি. অহং ইমস্মিং সাসনে মহিদ্ধিকো মহানুভাৰো অহোসিং; আকাসং গহেত্ৰা পথৰিং করোমি, পথৰিং আকাসং; দূরং গণ্হিত্ৰা সন্তিকং করোমি, সন্তিকং দূরং; চক্কৰাল়সহস্সং খণেন ৰিনিৰিজ্ঝামি. হত্থে মে পস্সথ; ইদানি পন মক্কটহত্থসদিসা. অহং ইমেহেৰ হত্থেহি ইধ নিসিন্নোৰ চন্দিমসূরিযে পরামসিং. ইমেসংযেৰ পাদানং চন্দিমসূরিযে পাদকথলিকং কত্ৰা নিসীদিং. এৰরূপা মে ইদ্ধি পমাদেন অন্তরহিতা. তুম্হে মা পমজ্জিত্থ. পমাদেন হি এৰরূপং ব্যসনং পাপুণন্তি. অপ্পমত্তা ৰিহরন্তা জাতিজরামরণস্স অন্তং করোন্তি. তস্মা তুম্হে মঞ্ঞেৰ আরম্মণং করিত্ৰা অপ্পমত্তা হোথ, ভন্তে’’তি তজ্জেত্ৰা ওৰাদমদাসি. তে তস্স কথেন্তস্সেৰ সংৰেগং আপজ্জিত্ৰা ৰিপস্সমানা তিংস জনা তত্থেৰ অরহত্তং পাপুণিংসূতি. এৰম্পি উপ্পন্না সমথৰিপস্সনা নিরুজ্ঝমানা অনত্থায সংৰত্তন্তীতি ৰেদিতব্বা. অযং তাৰ লোকিযসম্মপ্পধানকথায ৰিনিচ্ছযো.

লোকুত্তরমগ্গক্খণে পনেতং একমেৰ ৰীরিযং চতুকিচ্চসাধনৰসেন চত্তারি নামানি লভতি. তত্থ অনুপ্পন্নানন্তি অসমুদাচারৰসেন ৰা অননুভূতারম্মণৰসেন ৰা অনুপ্পন্নানং; অঞ্ঞথা হি অনমতগ্গে সংসারে অনুপ্পন্না পাপকা অকুসলা ধম্মা নাম নত্থি. অনুপ্পন্না পন উপ্পজ্জমানাপি এতেযেৰ উপ্পজ্জন্তি, পহীযমানাপি এতেযেৰ পহীযন্তি.

তত্থ একচ্চস্স ৰত্তৰসেন কিলেসা ন সমুদাচরন্তি. একচ্চস্স গন্থধুতঙ্গসমাধিৰিপস্সনা নৰকম্মিকানং অঞ্ঞতরৰসেন. কথং? একচ্চো হি ৰত্তসম্পন্নো হোতি. তস্স দ্ৰাসীতিখুদ্দকৰত্তানি (চূল়ৰ. ২৪৩ আদযো), চুদ্দস মহাৰত্তানি (চূল়ৰ. ৩৫৬ আদযো), চেতিযঙ্গণবোধিযঙ্গণপানীযমাল়উপোসথাগারআগন্তুকগমিকৰত্তানি চ করোন্তস্সেৰ কিলেসা ওকাসং ন লভন্তি; অপরভাগে পনস্স ৰত্তং ৰিস্সজ্জেত্ৰা ভিন্নৰত্তস্স ৰিচরতো অযোনিসোমনসিকারঞ্চেৰ সতিৰোস্সগ্গঞ্চ আগম্ম উপ্পজ্জন্তি. এৰং অসমুদাচারৰসেন অনুপ্পন্না উপ্পজ্জন্তি নাম.

একচ্চো গন্থযুত্তো হোতি; একম্পি নিকাযং গণ্হাতি, দ্ৰেপি, তযোপি, চত্তারোপি, পঞ্চপি. তস্সেৰ তেপিটকং বুদ্ধৰচনং অত্থৰসেন পাল়িৰসেন অনুসন্ধিৰসেন পুব্বাপরৰসেন গণ্হন্তস্স সজ্ঝাযন্তস্স চিন্তেন্তস্স ৰাচেন্তস্স দেসেন্তস্স পকাসেন্তস্স কিলেসা ওকাসং ন লভন্তি; অপরভাগে পনস্স গন্থকম্মং পহায কুসীতস্স ৰিচরতো অযোনিসোমনসিকারসতিৰোস্সগ্গে আগম্ম উপ্পজ্জন্তি. এৰম্পি অসমুদাচারৰসেন অনুপ্পন্না উপ্পজ্জন্তি নাম.

একচ্চো পন ধুতঙ্গধরো হোতি, তেরস ধুতঙ্গগুণে সমাদায ৰত্ততি. তস্স ধুতঙ্গগুণে পরিহরন্তস্স কিলেসা ওকাসং ন লভন্তি; অপরভাগে পনস্স ধুতঙ্গানি ৰিস্সজ্জেত্ৰা বাহুল্লায আৰট্টস্স ৰিচরতো অযোনিসোমনসিকারসতিৰোস্সগ্গে আগম্ম উপ্পজ্জন্তি. এৰম্পি অসমুদাচারৰসেন অনুপ্পন্না উপ্পজ্জন্তি নাম.

একচ্চো পন অট্ঠসু সমাপত্তীসু চিণ্ণৰসী হোতি. তস্স পঠমজ্ঝানাদীসু আৰজ্জনৰসীআদীনং ৰসেন ৰিহরন্তস্স কিলেসা ওকাসং ন লভন্তি; অপরভাগে পনস্স পরিহীনজ্ঝানস্স ৰা ৰিস্সট্ঠজ্ঝানস্স ৰা ভস্সাদীসু অনুযুত্তস্স ৰিহরতো অযোনিসোমনসিকারসতিৰোস্সগ্গে আগম্ম উপ্পজ্জন্তি. এৰম্পি অসমুদাচারৰসেন অনুপ্পন্না কিলেসা উপ্পজ্জন্তি নাম.

একচ্চো পন ৰিপস্সকো হোতি; সত্তসু ৰা ৰিপস্সনাসু অট্ঠারসসু ৰা মহাৰিপস্সনাসু কম্মং করোন্তো ৰিহরতি. তস্সেৰং ৰিহরতো কিলেসা ওকাসং ন লভন্তি; অপরভাগে পনস্স ৰিপস্সনাকম্মং পহায কাযদল়্হীবহুলস্স ৰিহরতো অযোনিসোমনসিকারসতিৰোস্সগ্গে আগম্ম উপ্পজ্জন্তি. এৰম্পি অসমুদাচারৰসেন অনুপ্পন্না কিলেসা উপ্পজ্জন্তি নাম.

একচ্চো পন নৰকম্মিকো হোতি, উপোসথাগারভোজনসালাদীনি করোতি. তস্স তেসং উপকরণানি চিন্তেন্তস্স কিলেসা ওকাসং ন লভন্তি; অপরভাগে পনস্স নৰকম্মে নিট্ঠিতে ৰা ৰিস্সট্ঠে ৰা অযোনিসোমনসিকারসতিৰোস্সগ্গে আগম্ম উপ্পজ্জন্তি. এৰম্পি অসমুদাচারৰসেন অনুপ্পন্না কিলেসা উপ্পজ্জন্তি নাম.

একচ্চো পন ব্রহ্মলোকা আগতো সুদ্ধসত্তো হোতি. তস্স অনাসেৰনায কিলেসা ওকাসং ন লভন্তি; অপরভাগে পনস্স লদ্ধাসেৰনস্স অযোনিসোমনসিকারসতিৰোস্সগ্গে আগম্ম উপ্পজ্জন্তি. এৰম্পি অসমুদাচারৰসেন অনুপ্পন্না কিলেসা উপ্পজ্জন্তি নাম. এৰং তাৰ অসমুচারৰসেন অনুপ্পন্নতা ৰেদিতব্বা.

কথং অননুভূতারম্মণৰসেন? ইধেকচ্চো অননুভূতপুব্বং মনাপিযাদিভেদং আরম্মণং লভতি. তস্স তত্থ অযোনিসোমনসিকারসতিৰোস্সগ্গে আগম্ম রাগাদযো কিলেসা উপ্পজ্জন্তি. এৰং অননুভূতারম্মণৰসেন অনুপ্পন্না উপ্পজ্জন্তি নাম. লোকুত্তরমগ্গক্খণে পন একমেৰ ৰীরিযং.

যে চ এৰং অনুপ্পন্না উপ্পজ্জেয্যুং, তে যথা নেৰ উপ্পজ্জন্তি, এৰং নেসং অনুপ্পাদকিচ্চং উপ্পন্নানঞ্চ পহানকিচ্চং সাধেতি. তস্মা উপ্পন্নানং পাপকানন্তি এত্থ পন চতুব্বিধং উপ্পন্নং – ৰত্তমানুপ্পন্নং, ভুত্ৰা ৰিগতুপ্পন্নং, ওকাসকতুপ্পন্নং, ভূমিলদ্ধুপ্পন্নন্তি. তত্থ যে কিলেসা ৰিজ্জমানা উপ্পাদাদিসমঙ্গিনো – ইদং ৰত্তমানুপ্পন্নং নাম. কম্মে পন জৰিতে আরম্মণরসং অনুভৰিত্ৰা নিরুদ্ধৰিপাকো ভুত্ৰা ৰিগতং নাম. কম্মং উপ্পজ্জিত্ৰা নিরুদ্ধং ভুত্ৰা ৰিগতং নাম. তদুভযম্পি ভুত্ৰা ৰিগতুপ্পন্নন্তি সঙ্খং গচ্ছতি. কুসলাকুসলকম্মং অঞ্ঞস্স কম্মস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি. এৰং কতে ওকাসে ৰিপাকো উপ্পজ্জমানো ওকাসকরণতো পট্ঠায উপ্পন্নোতি ৰুচ্চতি. ইদং ওকাসকতুপ্পন্নং নাম.

পঞ্চক্খন্ধা পন ৰিপস্সনায ভূমি নাম. তে অতীতাদিভেদা হোন্তি. তেসু অনুসযিতকিলেসা পন অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা. অতীতক্খন্ধেসু অনুসযিতাপি হি অপ্পহীনাৰ হোন্তি. অনাগতক্খন্ধেসু, পচ্চুপ্পন্নক্খন্ধেসু অনুসযিতাপি অপ্পহীনাৰ হোন্তি. ইদং ভূমিলদ্ধুপ্পন্নং নাম. তেনাহু পোরাণা – ‘‘তাসু তাসু ভূমীসু অসমুগ্ঘাতিতা কিলেসা ভূমিলদ্ধুপ্পন্নাতি সঙ্খং গচ্ছন্তী’’তি.

অপরম্পি চতুব্বিধং উপ্পন্নং – সমুদাচারুপ্পন্নং, আরম্মণাধিগহিতুপ্পন্নং, অৰিক্খম্ভিতুপ্পন্নং, অসমুগ্ধাতিতুপ্পন্নন্তি. তত্থ সম্পতি ৰত্তমানংযেৰ ‘সমুদাচারুপ্পন্নং’ নাম. সকিং চক্খূনি উম্মীলেত্ৰা আরম্মণে নিমিত্তে গহিতে অনুস্সরিতানুস্সরিতক্খণে কিলেসা নুপ্পজ্জিস্সন্তীতি ন ৰত্তব্বা. কস্মা? আরম্মণস্স অধিগহিতত্তা. যথা কিং? যথা খীররুক্খস্স কুঠারিযা আহতাহতট্ঠানে খীরং ন নিক্খমিস্সতীতি ন ৰত্তব্বং, এৰং. ইদং ‘আরম্মণাধিগহিতুপ্পন্নং’ নাম. সমাপত্তিযা অৰিক্খম্ভিতকিলেসা পন ইমস্মিং নাম ঠানে নুপ্পজ্জিস্সন্তীতি ন ৰত্তব্বা. কস্মা? অৰিক্খম্ভিতত্তা. যথা কিং? যথা সচে খীররুক্খং কুঠারিযা আহনেয্যুং, ‘ইমস্মিং নাম ঠানে খীরং ন নিক্খমেয্যা’তি ন ৰত্তব্বং, এৰং. ইদং ‘অৰিক্খম্ভিতুপ্পন্নং’ নাম. মগ্গেন অসমুগ্ঘাতিতকিলেসা পন ভৰগ্গে নিব্বত্তস্সাপি নুপ্পজ্জিস্সন্তীতি পুরিমনযেনেৰ ৰিত্থারেতব্বং. ইদং ‘অসমুগ্ঘাতিতুপ্পন্নং’ নাম.

ইমেসু উপ্পন্নেসু ৰত্তমানুপ্পন্নং, ভুত্ৰাৰিগতুপ্পন্নং, ওকাসকতুপ্পন্নং, সমুদাচারুপ্পন্নন্তি চতুব্বিধং উপ্পন্নং ন মগ্গৰজ্ঝং; ভূমিলদ্ধুপ্পন্নং, আরম্মণাধিগ্গহিতুপ্পন্নং, অৰিক্খম্ভিতুপ্পন্নং, অসমুগ্ঘাতিতুপ্পন্নন্তি চতুব্বিধং মগ্গৰজ্ঝং. মগ্গো হি উপ্পজ্জমানো এতে কিলেসে পজহতি. সো যে কিলেসে পজহতি, তে অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা. ৰুত্তম্পি চেতং –

‘‘হঞ্চি অতীতে কিলেসে পজহতি, তেন হি খীণং খেপেতি, নিরুদ্ধং নিরোধেতি, ৰিগতং ৰিগমেতি, অত্থঙ্গতং অত্থং গমেতি, অতীতং যং নত্থি তং পজহতি. হঞ্চি অনাগতে কিলেসে পজহতি, তেন হি অজাতং পজহতি, অনিব্বত্তং অনুপ্পন্নং অপাতুভূতং পজহতি, অনাগতং যং নত্থি তং পজহতি. হঞ্চি পচ্চুপ্পন্নে কিলেসে পজহতি, তেন হি রত্তো রাগং পজহতি, দুট্ঠো দোসং, মূল়্হো মোহং, ৰিনিবদ্ধো মানং, পরামট্ঠো দিট্ঠিং, ৰিক্খেপগতো উদ্ধচ্চং, অনিট্ঠঙ্গতো ৰিচিকিচ্ছং, থামগতো অনুসযং পজহতি; কণ্হসুক্কধম্মা যুগনদ্ধা সমমেৰ ৰত্তন্তি; সংকিলেসিকা মগ্গভাৰনা হোতি…পে… তেন হি নত্থি মগ্গভাৰনা, নত্থি ফলসচ্ছিকিরিযা, নত্থি কিলেসপ্পহানং, নত্থি ধম্মাভিসমযো’তি. ‘অত্থি মগ্গভাৰনা…পে… অত্থি ধম্মাভিসমযো’তি. যথা কথং ৰিয? সেয্যথাপি তরুণো রুক্খো…পে… অপাতুভূতানেৰ ন পাতুভৰন্তি’’তি (পটি. ম. ৩.২১).

ইতি পাল়িযং অজাতফলরুক্খো আগতো; জাতফলরুক্খেন পন দীপেতব্বং. যথা হি সফলো তরুণঅম্বরুক্খো. তস্স ফলানি মনুস্সা পরিভুঞ্জেয্যুং, সেসানি পাতেত্ৰা পচ্ছিযো পূরেয্যুং. অথঞ্ঞো পুরিসো তং ফরসুনা ছিন্দেয্য. তেনস্স নেৰ অতীতানি ফলানি নাসিতানি হোন্তি, ন অনাগতপচ্চুপ্পন্নানি চ নাসিতানি; অতীতানি হি মনুস্সেহি পরিভুত্তানি, অনাগতানি অনিব্বত্তানি ন সক্কা নাসেতুং. যস্মিং পন সমযে সো ছিন্নো তদা ফলানিযেৰ নত্থীতি পচ্চুপ্পন্নানিপি অনাসিতানি. সচে পন রুক্খো অচ্ছিন্নো অস্স, অথস্স পথৰীরসঞ্চ আপোরসঞ্চ আগম্ম যানি ফলানি নিব্বত্তেয্যুং, তানি নাসিতানি হোন্তি. তানি হি অজাতানেৰ ন জাযন্তি, অনিব্বত্তানেৰ ন নিব্বত্তন্তি, অপাতুভূতানেৰ ন পাতুভৰন্তি. এৰমেৰ মগ্গো নাপি অতীতাদিভেদে কিলেসে পজহতি, নাপি ন পজহতি. যেসঞ্হি কিলেসানং মগ্গেন খন্ধেসু অপরিঞ্ঞাতেসু উপ্পত্তি সিযা, মগ্গেন উপ্পজ্জিত্ৰা খন্ধানং পরিঞ্ঞাতত্তা তে কিলেসা অজাতাৰ ন জাযন্তি, অনিব্বত্তাৰ ন নিব্বত্তন্তি, অপাতুভূতাৰ ন পাতুভৰন্তি. তরুণপুত্তায ইত্থিযা পুন অৰিজাযনত্থং ব্যাধিতানং রোগৰূপসমত্থং পীতভেসজ্জেহি চাপি অযমত্থো ৰিভাৰেতব্বো. এৰং মগ্গো যে কিলেসে পজহতি, তে অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা. ন চ মগ্গো কিলেসে ন পজহতি. যে পন মগ্গো কিলেসে পজহতি, তে সন্ধায ‘উপ্পন্নানং পাপকান’ন্তিআদি ৰুত্তং.

ন কেৰলঞ্চ মগ্গো কিলেসেযেৰ পজহতি, কিলেসানং পন অপ্পহীনত্তা যে উপ্পজ্জেয্যুং উপাদিন্নক্খন্ধা, তেপি পজহতিযেৰ. ৰুত্তম্পি চেতং ‘‘সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধেন সত্ত ভৰে ঠপেত্ৰা অনমতগ্গে সংসারে যে উপ্পজ্জেয্যুং নামঞ্চ রূপঞ্চ এত্থেতে নিরুজ্ঝন্তী’’তি (চূল়নি. অজিতমাণৰপুচ্ছানিদ্দেস ৬) ৰিত্থারো. ইতি মগ্গো উপাদিন্নতো অনুপাদিন্নতো চ ৰুট্ঠাতি. ভৰৰসেন পন সোতাপত্তিমগ্গো অপাযভৰতো ৰুট্ঠাতি. সকদাগামিমগ্গো সুগতিভৰেকদেসতো; অনাগামিমগ্গো সুগতিকামভৰতো; ৰুট্ঠাতি অরহত্তমগ্গো রূপারূপভৰতো ৰুট্ঠাতি, সব্বভৰেহি ৰুট্ঠাতিযেৰাতিপি ৰদন্তি.

অথ মগ্গক্খণে কথং অনুপ্পন্নানং উপ্পাদায ভাৰনা হোতি? কথং ৰা উপ্পন্নানং ঠিতিযাতি? মগ্গপ্পৰত্তিযা এৰ. মগ্গো হি পৰত্তমানো পুব্বে অনুপ্পন্নপুব্বত্তা অনুপ্পন্নো নাম ৰুচ্চতি. অনাগতপুব্বঞ্হি ঠানং গন্ত্ৰা অননুভূতপুব্বং ৰা আরম্মণং অনুভৰিত্ৰা ৰত্তারো ভৰন্তি – ‘অনাগতট্ঠানং আগতম্হ, অননুভূতং আরম্মণং অনুভৰামা’তি. যা চস্স পৰত্তি, অযমেৰ ঠিতি নামাতি ঠিতিযা ভাৰেতীতি ৰত্তুং ৰট্টতি. এৰমেতস্স ভিক্খুনো ইদং লোকুত্তরমগ্গক্খণে ৰীরিযং ‘‘অনুপ্পন্নানং পাপকানং অকুসলানং ধম্মানং অনুপ্পাদাযা’’তিআদীনি চত্তারি নামানি লভতি. অযং লোকুত্তরমগ্গক্খণে সম্মপ্পধানকথা. এৰমেত্থ লোকিযলোকুত্তরমিস্সকা সম্মপ্পধানা নিদ্দিট্ঠাতি.

সুত্তন্তভাজনীযৰণ্ণনা.

২. অভিধম্মভাজনীযৰণ্ণনা

৪০৮. অভিধম্মভাজনীযে সব্বানিপি সম্মপ্পধানানি ধম্মসঙ্গণিযং ৰিভত্তস্স দেসনানযস্স মুখমত্তমেৰ দস্সেন্তেন নিদ্দিট্ঠানি. তত্থ নযভেদো ৰেদিতব্বো. কথং? পঠমসম্মপ্পধানে তাৰ সোতাপত্তিমগ্গে ঝানাভিনিৰেসে সুদ্ধিকপটিপদা, সুদ্ধিকসুঞ্ঞতা, সুঞ্ঞতপটিপদা, সুদ্ধিকঅপ্পণিহিতা, অপ্পণিহিতপটিপদাতি ইমেসু পঞ্চসু ঠানেসু দ্ৰিন্নং দ্ৰিন্নং চতুক্কপঞ্চকনযানং ৰসেন দস নযা হোন্তি. এৰং সেসেসুপীতি ৰীসতিযা অভিনিৰেসেসু দ্ৰে নযসতানি. তানি চতূহি অধিপতীহি চতুগ্গুণিতানি অট্ঠ. ইতি সুদ্ধিকানি দ্ৰে সাধিপতীনি অট্ঠাতি সব্বম্পি নযসহস্সং হোতি. তথাদুতিযসম্মপ্পধানাদীসু সুদ্ধিকসম্মপ্পধানে চাতি সোতাপত্তিমগ্গে পঞ্চনযসহস্সানি. যথা চ সোতাপত্তিমগ্গে, এৰং সেসমগ্গেসুপীতি কুসলৰসেনেৰ ৰীসতি নযসহস্সানি. ৰিপাকে পন সম্মপ্পধানেহি কত্তব্বকিচ্চং নত্থীতি ৰিপাকৰারো ন গহিতোতি. সম্মপ্পধানানি পনেত্থ নিব্বত্তিতলোকুত্তরানেৰ কথিতানীতি ৰেদিতব্বানি.

অভিধম্মভাজনীযৰণ্ণনা.

৩. পঞ্হাপুচ্ছকৰণ্ণনা

৪২৭. পঞ্হাপুচ্ছকে পাল়িঅনুসারেনেৰ সম্মপ্পধানানং কুসলাদিভাৰো ৰেদিতব্বো. আরম্মণত্তিকেসু পন সব্বানিপি এতানি অপ্পমাণং নিব্বানং আরব্ভ পৰত্তিতো অপ্পমাণারম্মণানেৰ, ন মগ্গারম্মণানি; সহজাতহেতুৰসেন পন মগ্গহেতুকানি; ৰীমংসং জেট্ঠকং কত্ৰা মগ্গভাৰনাকালে মগ্গাধিপতীনি; ছন্দচিত্তজেট্ঠিকায মগ্গভাৰনায ন ৰত্তব্বানি মগ্গাধিপতীনীতি; ৰীরিযজেট্ঠিকায পন অঞ্ঞস্স ৰীরিযস্স অভাৰা ন ৰত্তব্বানি মগ্গাধিপতীনীতি ৰা ন মগ্গাধিপতীনীতি ৰা; অতীতাদীসু একারম্মণভাৰেনপি ন ৰত্তব্বানি; নিব্বানস্স পন বহিদ্ধাধম্মত্তা বহিদ্ধারম্মণানি নাম হোন্তীতি. এৰমেতস্মিং পঞ্হাপুচ্ছকে নিব্বত্তিতলোকুত্তরানেৰ সম্মপ্পধানানি কথিতানি. সম্মাসম্বুদ্ধেন হি সুত্তন্তভাজনীযস্মিংযেৰ লোকিযলোকুত্তরমিস্সকা সম্মপ্পধানা কথিতা; অভিধম্মভাজনীযপঞ্হাপুচ্ছকেসু পন লোকুত্তরাযেৰাতি. এৰমযং সম্মপ্পধানৰিভঙ্গোপি তেপরিৰট্টং নীহরিত্ৰাৰ ভাজেত্ৰা দস্সিতোতি.

সম্মোহৰিনোদনিযা ৰিভঙ্গট্ঠকথায

সম্মপ্পধানৰিভঙ্গৰণ্ণনা নিট্ঠিতা.