৯. ইদ্ধিপাদৰিভঙ্গো

১. সুত্তন্তভাজনীযৰণ্ণনা

৪৩১. ইদানি তদনন্তরে ইদ্ধিপাদৰিভঙ্গে চত্তারোতি গণনপরিচ্ছেদো. ইদ্ধিপাদাতি এত্থ ইজ্ঝতীতি ইদ্ধি, সমিজ্ঝতি নিপ্ফজ্জতীতি অত্থো. ইজ্ঝন্তি ৰা এতায সত্তা ইদ্ধা ৰুদ্ধা উক্কংসগতা হোন্তীতিপি ইদ্ধি. পঠমেনত্থেন ইদ্ধি এৰ পাদো ইদ্ধিপাদো, ইদ্ধিকোট্ঠাসোতি অত্থো. দুতিযেনত্থেন ইদ্ধিযা পাদোতি ইদ্ধিপাদো; পাদোতি পতিট্ঠা, অধিগমুপাযোতি অত্থো. তেন হি যস্মা উপরূপরিৰিসেসসঙ্খাতং ইদ্ধিং পজ্জন্তি পাপুণন্তি, তস্মা পাদোতি ৰুচ্চতি. এৰং তাৰ ‘‘চত্তারো ইদ্ধিপাদা’’তি এত্থ অত্থো ৰেদিতব্বো.

ইদানি তে ভাজেত্ৰা দস্সেতুং ইধ ভিক্খূতিআদি আরদ্ধং. তত্থ ইধ ভিক্খূতি ইমস্মিং সাসনে ভিক্খু. ছন্দসমাধিপধানসঙ্খারসমন্নাগতন্তি এত্থ ছন্দহেতুকো ছন্দাধিকো ৰা সমাধি ছন্দসমাধি. কত্তুকম্যতাছন্দং অধিপতিং করিত্ৰা পটিলদ্ধসমাধিস্সেতং অধিৰচনং. পধানভূতা সঙ্খারা পধানসঙ্খারা. চতুকিচ্চসাধকস্স সম্মপ্পধানৰীরিযস্সেতং অধিৰচনং. সমন্নাগতন্তি ছন্দসমাধিনা চ পধানসঙ্খারেহি চ উপেতং. ইদ্ধিপাদন্তি নিপ্ফত্তিপরিযাযেন ৰা ইজ্ঝনকট্ঠেন ইজ্ঝন্তি এতায সত্তা ইদ্ধা ৰুদ্ধা উক্কংসগতা হোন্তীতি ইমিনা ৰা পরিযাযেন ইদ্ধীতি সঙ্খং গতানং উপচারজ্ঝানাদিকুসলচিত্তসম্পযুত্তানং ছন্দসমাধিপধানসঙ্খারানং অধিট্ঠানট্ঠেন পাদভূতং সেসচিত্তচেতসিকরাসিন্তি অত্থো. যঞ্হি পরতো ‘‘ইদ্ধিপাদোতি তথাভূতস্স ৰেদনাক্খন্ধো…পে… ৰিঞ্ঞাণক্খন্ধো’’তি ৰুত্তং, তং ইমিনা অত্থেন যুজ্জতি. ইমিনা নযেন সেসেসুপি অত্থো ৰেদিতব্বো. যথেৰ হি ছন্দং অধিপতিং করিত্ৰা পটিলদ্ধসমাধি ছন্দসমাধীতি ৰুত্তো, এৰং ৰীরিযং…পে… চিত্তং. ৰীমংসং অধিপতিং করিত্ৰা পটিলদ্ধসমাধি ৰীমংসসমাধীতি ৰুচ্চতি.

ইদানি ছন্দসমাধিআদীনি পদানি ভাজেত্ৰা দস্সেতুং কথঞ্চ ভিক্খূতিআদি আরদ্ধং. তত্থ ছন্দঞ্চে ভিক্খু অধিপতিং করিত্ৰাতি যদি ভিক্খু ছন্দং অধিপতিং ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা সমাধিং পটিলভতি নিব্বত্তেতি, এৰং নিব্বত্তিতো অযং সমাধি ছন্দসমাধি নাম ৰুচ্চতীতি অত্থো. ৰীরিযঞ্চেতিআদীসুপি এসেৰ নযো. ইমে ৰুচ্চন্তি পধানসঙ্খারাতি এত্তাৰতা ছন্দিদ্ধিপাদং ভাৰযমানস্স ভিক্খুনো পধানাভিসঙ্খারসঙ্খাতচতুকিচ্চসাধকং ৰীরিযং কথিতং. তদেকজ্ঝং অভিসঞ্ঞূহিত্ৰাতি তং সব্বং একতো রাসিং কত্ৰাতি অত্থো. সঙ্খ্যং গচ্ছতীতি এতং ৰোহারং গচ্ছতীতি ৰেদিতব্বন্তি অত্থো.

৪৩৩. ইদানি ‘‘ছন্দসমাধিপধানসঙ্খারো’’তি এতস্মিং পদসমূহে ছন্দাদিধম্মে ভাজেত্ৰা দস্সেতুং তত্থ কতমো ছন্দোতিআদি আরদ্ধং. তং উত্তানত্থমেৰ.

উপেতো হোতীতি ইদ্ধিপাদসঙ্খাতো ধম্মরাসি উপেতো হোতি. তেসং ধম্মানন্তি তেসং সম্পযুত্তানং ছন্দাদিধম্মানং. ইদ্ধি সমিদ্ধীতিআদীনি সব্বানি নিপ্ফত্তিৰেৰচনানেৰ. এৰং সন্তেপি ইজ্ঝনকট্ঠেন ইদ্ধি. সম্পুণ্ণা ইদ্ধি সমিদ্ধি; উপসগ্গেন ৰা পদং ৰড্ঢিতং. ইজ্ঝনাকারো ইজ্ঝনা. সমিজ্ঝনাতি উপসগ্গেন পদং ৰড্ঢিতং. অত্তনো সন্তানে পাতুভাৰৰসেন লভনং লাভো. পরিহীনানম্পি ৰীরিযারম্ভৰসেন পুন লাভো পটিলাভো; উপসগ্গেন ৰা পদং ৰড্ঢিতং. পত্তীতি অধিগমো. অপরিহানৰসেন সম্মা পত্তীতি সম্পত্তি. ফুসনাতি পটিলাভফুসনা. সচ্ছিকিরিযাতি পটিলাভসচ্ছিকিরিযাৰ. উপসম্পদাতি পটিলাভউপসম্পদা এৰাতি ৰেদিতব্বা.

তযাভূতস্সাতি তেন আকারেন ভূতস্স; তে ছন্দাদিধম্মে পটিলভিত্ৰা ঠিতস্সাতি অত্থো. ৰেদনাক্খন্ধোতিআদীহি ছন্দাদযো অন্তো কত্ৰা চত্তারোপি খন্ধা কথিতা. তে ধম্মেতি তে চত্তারো অরূপক্খন্ধে; ছন্দাদযো ৰা তযো ধম্মেতিপি ৰুত্তং. আসেৰতীতিআদীনি ৰুত্তত্থানেৰ. সেসইদ্ধিপাদনিদ্দেসেসুপি ইমিনাৰ নযেন অত্থো ৰেদিতব্বো.

এত্তাৰতা কিং কথিতন্তি? চতুন্নং ভিক্খূনং মত্থকপ্পত্তং কম্মট্ঠানং কথিতং. একো হি ভিক্খু ছন্দং অৰস্সযতি; কত্তুকম্যতাকুসলধম্মচ্ছন্দেন অত্থনিপ্ফত্তিযং সতি ‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’তি ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা লোকুত্তরধম্মং নিব্বত্তেতি. একো ৰীরিযং অৰস্সযতি. একো চিত্তং, একো পঞ্ঞং অৰস্সযতি. পঞ্ঞায অত্থনিপ্ফত্তিযং সতি ‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’তি পঞ্ঞং জেট্ঠকং পঞ্ঞং ধুরং পঞ্ঞং পুব্বঙ্গমং কত্ৰা লোকুত্তরধম্মং নিব্বত্তেতি.

কথং? যথা হি চতূসু অমচ্চপুত্তেসু ঠানন্তরং পত্থেত্ৰা ৰিচরন্তেসু একো উপট্ঠানং অৰস্সযি, একো সূরভাৰং, একো জাতিং, একো মন্তং. কথং? তেসু হি পঠমো ‘উপট্ঠানে অপ্পমাদকারিতায অত্থনিপ্ফত্তিযা সতি লব্ভমানং লচ্ছামেতং ঠানন্তর’ন্তি উপট্ঠানং অৰস্সযি. দুতিযো ‘উপট্ঠানে অপ্পমত্তোপি একচ্চো সঙ্গামে পচ্চুপট্ঠিতে সণ্ঠাতুং ন সক্কোতি; অৰস্সং খো পন রঞ্ঞো পচ্চন্তো কুপ্পিস্সতি; তস্মিং কুপ্পিতে রথধুরে কম্মং কত্ৰা রাজানং আরাধেত্ৰা আহরাপেস্সামেতং ঠানন্তর’ন্তি সূরভাৰং অৰস্সযি. ততিযো ‘সূরভাৰেপি সতি একচ্চো হীনজাতিকো হোতি; জাতিং সোধেত্ৰা ঠানন্তরং দদন্তা ময্হং দস্সন্তী’তি জাতিং অৰস্সযি. চতুত্থো ‘জাতিমাপি একো অমন্তনীযো হোতি; মন্তেন কত্তব্বকিচ্চে উপ্পন্নে আহরাপেস্সামেতং ঠানন্তর’ন্তি মন্তং অৰস্সযি. তে সব্বেপি অত্তনো অত্তনো অৰস্সযবলেন ঠানন্তরানি পাপুণিংসু.

তত্থ উপট্ঠানে অপ্পমত্তো হুত্ৰা ঠানন্তরং পত্তো ৰিয ছন্দং অৰস্সায কত্তুকম্যতাকুসলধম্মচ্ছন্দেন অত্থনিব্বত্তিযং সতি ‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’তি ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, রট্ঠপালত্থেরো (ম. নি. ২.২৯৩ আদযো) ৰিয. সো হি আযস্মা ছন্দং ধুরং কত্ৰা লোকুত্তরধম্মং নিব্বত্তেসি. সূরভাৰেন রাজানং আরাধেত্ৰা ঠানন্তরং পত্তো ৰিয ৰীরিযং জেট্ঠকং ৰীরিযং ধুরং ৰীরিযং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, সোণত্থেরো (মহাৰ. ২৪৩) ৰিয. সো হি আযস্মা ৰীরিযং ধুরং কত্ৰা লোকুত্তরধম্মং নিব্বত্তেসি.

জাতিসম্পত্তিযা ঠানন্তরং পত্তো ৰিয চিত্তং জেট্ঠকং চিত্তং ধুরং চিত্তং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, সম্ভূতত্থেরো ৰিয. সো হি আযস্মা চিত্তং ধুরং কত্ৰা লোকুত্তরধম্মং নিব্বত্তেসি. মন্তং অৰস্সায ঠানন্তরপ্পত্তো ৰিয ৰীমংসং জেট্ঠকং ৰীমংসং ধুরং ৰীমংসং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, থেরো মোঘরাজা ৰিয. সো হি আযস্মা ৰীমংসং ধুরং কত্ৰা লোকুত্তরধম্মং নিব্বত্তেসি.

এত্থ চ তযো ছন্দসমাধিপধানসঙ্খারসঙ্খাতা ধম্মা ইদ্ধীপি হোন্তি ইদ্ধিপাদাপি. সেসা পন সম্পযুত্তকা চত্তারো খন্ধা ইদ্ধিপাদাযেৰ. ৰীরিযচিত্তৰীমংসসমাধিপধানসঙ্খারসঙ্খাতাপি তযো ধম্মা ইদ্ধীপি হোন্তি ইদ্ধিপাদাপি. সেসা পন সম্পযুত্তকা চত্তারো খন্ধা ইদ্ধিপাদাযেৰ. অযং তাৰ অভেদতো কথা.

ভেদতো পন ‘ছন্দো’ ইদ্ধি নাম. ছন্দধুরেন ভাৰিতা চত্তারো খন্ধা ছন্দিদ্ধিপাদো নাম. সমাধি পধানসঙ্খারোতি দ্ৰে ধম্মা সঙ্খারক্খন্ধৰসেন ছন্দিদ্ধিপাদে পৰিসন্তি; পাদে পৰিট্ঠাতিপি ৰত্তুং ৰট্টতিযেৰ. তত্থেৰ ‘সমাধি’ ইদ্ধি নাম. সমাধিধুরেন ভাৰিতা চত্তারো খন্ধা সমাধিদ্ধিপাদো নাম. ছন্দো পধানসঙ্খারোতি দ্ৰে ধম্মা সঙ্খারক্খন্ধৰসেন সমাধিদ্ধিপাদে পৰিসন্তি; পাদে পৰিট্ঠাতিপি ৰত্তুং ৰট্টতি এৰ. তত্থেৰ ‘পধানসঙ্খারো’ ইদ্ধি নাম. পধানসঙ্খারভাৰিতা চত্তারো খন্ধা পধানসঙ্খারিদ্ধিপাদো নাম. ছন্দো সমাধীতি দ্ৰে ধম্মা সঙ্খারক্খন্ধৰসেন পধানসঙ্খারিদ্ধিপাদে পৰিসন্তি; পাদে পৰিট্ঠাতিপি ৰত্তুং ৰট্টতি এৰ. তত্থেৰ ‘ৰীরিযং’ ইদ্ধি নাম, ‘চিত্তং’ ইদ্ধি নাম, ‘ৰীমংসা’ ইদ্ধি নাম…পে… পাদে পৰিট্ঠাতিপি ৰত্তুং ৰট্টতি এৰ. অযং ভেদতো কথা নাম.

এত্থ পন অভিনৰং নত্থি; গহিতমেৰ ৰিভূতধাতুকং কতং. কথং? ছন্দো, সমাধি, পধানসঙ্খারোতি ইমে তযো ধম্মা ইদ্ধীপি হোন্তি ইদ্ধিপাদাপি. সেসা সম্পযুত্তকা চত্তারো খন্ধা ইদ্ধিপাদাযেৰ. ইমে হি তযো ধম্মা ইজ্ঝমানা সম্পযুত্তকেহি চতূহি খন্ধেহি সদ্ধিংযেৰ ইজ্ঝন্তি, ন ৰিনা. সম্পযুত্তকা পন চত্তারো খন্ধা ইজ্ঝনকট্ঠেন ইদ্ধি নাম হোন্তি, পতিট্ঠানট্ঠেন পাদো নাম. ‘ইদ্ধী’তি ৰা ‘ইদ্ধিপাদো’তি ৰা ন অঞ্ঞস্স কস্সচি অধিৰচনং, সম্পযুত্তকানং চতুন্নং খন্ধানংযেৰ অধিৰচনং. ৰীরিযং, চিত্তং, ৰীমংসাসমাধিপধানসঙ্খারোতি তযো ধম্মা…পে… চতুন্নং খন্ধানংযেৰ অধিৰচনং.

অপিচ পুব্বভাগো পুব্বভাগো ইদ্ধিপাদো নাম; পটিলাভো পটিলাভো ইদ্ধি নামাতি ৰেদিতব্বো. অযমত্থো উপচারেন ৰা ৰিপস্সনায ৰা দীপেতব্বো. পঠমজ্ঝানপরিকম্মঞ্হি ইদ্ধিপাদো নাম, পঠমজ্ঝানং ইদ্ধি নাম. দুতিযততিযচতুত্থআকাসানঞ্চাযতন, ৰিঞ্ঞাণঞ্চাযতনআকিঞ্চঞ্ঞাযতননেৰসঞ্ঞানাসঞ্ঞাযতনপরিকম্মং ইদ্ধিপাদো নাম, নেৰসঞ্ঞানাসঞ্ঞাযতনং ইদ্ধি নাম. সোতাপত্তিমগ্গস্স ৰিপস্সনা ইদ্ধিপাদো নাম, সোতাপত্তিমগ্গো ইদ্ধি নাম. সকদাগামি, অনাগামি, অরহত্তমগ্গস্স ৰিপস্সনা ইদ্ধিপাদো নাম, অরহত্তমগ্গো ইদ্ধি নাম. পটিলাভেনাপি দীপেতুং ৰট্টতিযেৰ. পঠমজ্ঝানঞ্হি ইদ্ধিপাদো নাম, দুতিযজ্ঝানং ইদ্ধি নাম; দুতিযজ্ঝানং ইদ্ধিপাদো নাম, ততিযজ্ঝানং ইদ্ধি নাম…পে… অনাগামিমগ্গো ইদ্ধিপাদো নাম, অরহত্তমগ্গো ইদ্ধি নাম.

কেনট্ঠেন ইদ্ধি? কেনট্ঠেন পাদোতি? ইজ্ঝনকট্ঠেনেৰ ইদ্ধি. পতিট্ঠানট্ঠেনেৰ পাদো. এৰমিধাপি ইদ্ধীতি ৰা পাদোতি ৰা ন অঞ্ঞস্স কস্সচি অধিৰচনং, সম্পযুত্তকানং চতুন্নং খন্ধানংযেৰ অধিৰচনন্তি. এৰং ৰুত্তে পন ইদমাহংসু – চতুন্নং খন্ধানমেৰ অধিৰচনং ভৰেয্য, যদি সত্থা পরতো উত্তরচূল়ভাজনীযং নাম ন আহরেয্য. উত্তরচূল়ভাজনীযে পন ‘‘ছন্দোযেৰ ছন্দিদ্ধিপাদো, ৰীরিযমেৰ, চিত্তমেৰ, ৰীমংসাৰ ৰীমংসিদ্ধিপাদো’’তি কথিতং. কেচি পন ‘‘ইদ্ধি নাম অনিপ্ফন্না, ইদ্ধিপাদো নিপ্ফন্নো’’তি ৰদিংসু. তেসং ৰচনং পটিক্খিপিত্ৰা ইদ্ধীপি ইদ্ধিপাদোপি ‘নিপ্ফন্নো তিলক্খণব্ভাহতো’তি সন্নিট্ঠানং কতং. ইতি ইমস্মিং সুত্তন্তভাজনীযে লোকিযলোকুত্তরমিস্সকা ইদ্ধিপাদা কথিতাতি.

সুত্তন্তভাজনীযৰণ্ণনা.

২. অভিধম্মভাজনীযৰণ্ণনা

৪৪৪. অভিধম্মভাজনীযং উত্তানত্থমেৰ. নযা পনেত্থ গণেতব্বা. ‘‘ছন্দসমাধিপধানসঙ্খারসমন্নাগতং ইদ্ধিপাদং ভাৰেতী’’তি ৰুত্তট্ঠানস্মিঞ্হি লোকুত্তরানি চত্তারি নযসহস্সানি ৰিভত্তানি. ৰীরিযসমাধিআদীসুপি এসেৰ নযো. তথা উত্তরচূল়ভাজনীযে ছন্দিদ্ধিপাদে চত্তারি নযসহস্সানি ৰিভত্তানি, ৰীরিযচিত্তৰীমংসিদ্ধিপাদে চত্তারি চত্তারীতি সব্বানিপি অট্ঠন্নং চতুক্কানং ৰসেন দ্ৰত্তিংস নযসহস্সানি ৰিভত্তানি. এৰমেতং নিব্বত্তিতলোকুত্তরানংযেৰ ইদ্ধিপাদানং ৰসেন দ্ৰত্তিংসনযসহস্সপ্পটিমণ্ডিতং অভিধম্মভাজনীযং কথিতন্তি ৰেদিতব্বং.

৩. পঞ্হাপুচ্ছকৰণ্ণনা

৪৬২. পঞ্হাপুচ্ছকে পাল়িঅনুসারেনেৰ ইদ্ধিপাদানং কুসলাদিভাৰো ৰেদিতব্বো. আরম্মণত্তিকেসু পন সব্বেপেতে অপ্পমাণং নিব্বানং আরব্ভ পৰত্তিতো অপ্পমাণারম্মণা এৰ, ন মগ্গারম্মণা; সহজাতহেতুৰসেন পন মগ্গহেতুকা, ন মগ্গাধিপতিনো. চত্তারো হি অধিপতযো অঞ্ঞমঞ্ঞং গরুং ন করোন্তি. কস্মা? সযং জেট্ঠকত্তা. যথা হি সমজাতিকা সমৰযা সমথামা সমসিপ্পা চত্তারো রাজপুত্তা অত্তনো অত্তনো জেট্ঠকতায অঞ্ঞমঞ্ঞস্স অপচিতিং ন করোন্তি, এৰমিমেপি চত্তারো অধিপতযো পাটিযেক্কং পাটিযেক্কং জেট্ঠকধম্মতায অঞ্ঞমঞ্ঞং গরুং ন করোন্তীতি একন্তেনেৰ ন মগ্গাধিপতিনো. অতীতাদীসু একারম্মণভাৰেপি ন ৰত্তব্বা. নিব্বানস্স পন বহিদ্ধাধম্মত্তা বহিদ্ধারম্মণা নাম হোন্তীতি. এৰমেতস্মিং পঞ্হাপুচ্ছকে নিব্বত্তিতলোকুত্তরাৰ ইদ্ধিপাদা কথিতা. সম্মাসম্বুদ্ধেন হি সুত্তন্তভাজনীযস্মিংযেৰ লোকিযলোকুত্তরমিস্সকা ইদ্ধিপাদা কথিতা, অভিধম্মভাজনীযপঞ্হাপুচ্ছকেসু পন লোকুত্তরাযেৰাতি. এৰমযং ইদ্ধিপাদৰিভঙ্গোপি তেপরিৰট্টং নীহরিত্ৰাৰ দস্সিতোতি.

সম্মোহৰিনোদনিযা ৰিভঙ্গট্ঠকথায

ইদ্ধিপাদৰিভঙ্গৰণ্ণনা নিট্ঠিতা.