(৯.) নৰকনিদ্দেসৰণ্ণনা

৯৬০. নৰকনিদ্দেসে নৰ আঘাতৰত্থূনীতি সত্তেসু উপ্পত্তিৰসেনেৰ কথিতানি. পুরিসানং মলানীতি পুরিসমলানি. নৰৰিধাতি নৰকোট্ঠাসা নৰপ্পভেদা ৰা.

৯৬৩. তণ্হং পটিচ্চাতি তণ্হং নিস্সায. পরিযেসনাতি রূপাদিআরম্মণপরিযেসনা. সা হি তণ্হায সতি হোতি. লাভোতি রূপাদিআরম্মণপটিলাভো. সো হি পরিযেসনায সতি হোতি. ৰিনিচ্ছযো পন ঞাণতণ্হাদিট্ঠিৰিতক্কৰসেন চতুব্বিধো. তত্থ ‘‘সুখৰিনিচ্ছযং জঞ্ঞা, সুখৰিনিচ্ছযং ঞত্ৰা অজ্ঝত্তং সুখমনুযুঞ্জেয্যা’’তি (ম. নি. ৩.৩২৩) অযং ঞাণৰিনিচ্ছযো. ‘‘ৰিনিচ্ছযোতি দ্ৰে ৰিনিচ্ছযা – তণ্হাৰিনিচ্ছযো চ দিট্ঠিৰিনিচ্ছযো চা’’তি (মহানি. ১০২) এৰং আগতানি অট্ঠসততণ্হাৰিচরিতানি তণ্হাৰিনিচ্ছযো. দ্ৰাসট্ঠি দিট্ঠিযো দিট্ঠিৰিনিচ্ছযো. ‘‘ছন্দো খো, দেৰানমিন্দ, ৰিতক্কনিদানো’’তি (দী. নি. ২.৩৫৮) ইমস্মিং পন সুত্তে ইধ ৰিনিচ্ছযোতি ৰুত্তো ৰিতক্কোযেৰ আগতো. লাভং লভিত্ৰা হি ইট্ঠানিট্ঠং সুন্দরাসুন্দরঞ্চ ৰিতক্কেনেৰ ৰিনিচ্ছিনাতি – ‘এত্তকং মে রূপারম্মণত্থায ভৰিস্সতি, এত্তকং সদ্দাদিআরম্মণত্থায, এত্তকং ময্হং ভৰিস্সতি, এত্তকং পরস্স, এত্তকং পরিভুঞ্জিস্সামি, এত্তকং নিদহিস্সামী’তি. তেন ৰুত্তং ‘‘লাভং পটিচ্চ ৰিনিচ্ছযো’’তি.

ছন্দরাগোতি এৰং অকুসলৰিতক্কেন ৰিতক্কিতে ৰত্থুস্মিং দুব্বলরাগো চ বলৰরাগো চ উপ্পজ্জতি. ইদঞ্হি ইধ ছন্দোতি দুব্বলরাগস্সাধিৰচনং. অজ্ঝোসানন্তি অহং মমন্তি বলৰসন্নিট্ঠানং. পরিগ্গহোতি তণ্হাদিট্ঠিৰসেন পরিগ্গহকরণং. মচ্ছরিযন্তি পরেহি সাধারণভাৰস্স অসহনতা. তেনেৰস্স পোরাণা এৰং ৰচনত্থং ৰদন্তি – ‘‘ইদং অচ্ছরিযং ময্হমেৰ হোতু, মা অঞ্ঞস্স অচ্ছরিযং হোতূতি পৰত্তত্তা মচ্ছরিযন্তি ৰুচ্চতী’’তি. আরক্খোতি দ্ৰারপিদহনমঞ্জুসগোপনাদিৰসেন সুট্ঠু রক্খণং. অধিকরোতীতি অধিকরণং; কারণস্সেতং নামং. আরক্খাধিকরণন্তি ভাৰনপুংসকং; আরক্খহেতূতি অত্থো. দণ্ডাদানাদীসু পরনিসেধনত্থং দণ্ডস্স আদানং দণ্ডাদানং. একতোধারাদিনো সত্থস্স আদানং সত্থাদানং. কলহোতি কাযকলহোপি ৰাচাকলহোপি. পুরিমো পুরিমো ৰিরোধো ৰিগ্গহো, পচ্ছিমো পচ্ছিমো ৰিৰাদো. তুৰং তুৰন্তি অগারৰৰচনং, ত্ৰং ত্ৰন্তি অত্থো.

৯৬৪. ইঞ্জিতানীতি ইঞ্জনানি চলনানি. অস্মীতি ইঞ্জিতমেতন্তিআদীহি সব্বপদেহি মানোৰ কথিতো. অহন্তি পৰত্তোপি হি মানো ইঞ্জিতমেৰ, অযমহন্তি পৰত্তোপি, নেৰসঞ্ঞীনাসঞ্ঞী ভৰিস্সন্তি পৰত্তোপি. সেসনৰকেহিপি মানোৰ কথিতো. মানো হি ইঞ্জনতো ইঞ্জিতং, মঞ্ঞনতো মঞ্ঞিতং, ফন্দনতো ফন্দিতং, পপঞ্চনতো পপঞ্চিতং. তেহি তেহি কারণেহি সঙ্খতত্তা সঙ্খতন্তি চ ৰুচ্চতি. সেসং সব্বত্থ উত্তানত্থমেৰাতি.

নৰকনিদ্দেসৰণ্ণনা.