২. সহজাতৰারৰণ্ণনা

২৩৪-২৪২. সহজাতৰারে কুসলং ধম্মং সহজাতোতি কুসলং ধম্মং পটিচ্চ তেন সহজাতো হুত্ৰাতি অত্থো. সেসমেত্থ পটিচ্চৰারে ৰুত্তনযেনেৰ ৰেদিতব্বং. অৰসানে পনস্স ‘‘পটিচ্চত্তং নাম সহজাতত্তং, সহজাতত্তং নাম পটিচ্চত্ত’’ন্তি ইদং উভিন্নম্পি এতেসং ৰারানং অত্থতো নিন্নানাকরণভাৰদস্সনত্থং ৰুত্তং. অত্থতো হি এতে দ্ৰেপি নিন্নানাকরণা. এৰং সন্তেপি অঞ্ঞমঞ্ঞস্স অত্থনিযমনত্থং ৰুত্তা. ‘‘চক্খুঞ্চ পটিচ্চ রূপে চা’’তিআদীসু হি অসহজাতম্পি পটিচ্চ উপ্পজ্জতীতি ৰুচ্চতি. সহজাতম্পি চ উপাদারূপং ভূতরূপস্স পচ্চযো ন হোতি. ইতি পটিচ্চৰারেন সহজাতপচ্চযভাৰং, সহজাতৰারেন চ পটিচ্চাতি ৰুত্তস্স সহজাতভাৰং নিযমেতুং উভোপেতে ৰুত্তা. অপিচ তথা বুজ্ঝনকানং অজ্ঝাসযৰসেন দেসনাৰিলাসেন নিরুত্তিপটিসম্ভিদাপ্পভেদজাননৰসেন চাপি এতে উভোপি ৰুত্তাতি.

সহজাতৰারৰণ্ণনা নিট্ঠিতা.