১৮. মগ্গপচ্চযনিদ্দেসৰণ্ণনা

১৮. মগ্গপচ্চযনিদ্দেসে মগ্গঙ্গানীতি অহেতুকচিত্তুপ্পাদৰজ্জেসু সেসচিত্তেসু উপ্পন্নানি পঞ্ঞা, ৰিতক্কো, সম্মাৰাচাকম্মন্তাজীৰা, ৰীরিযং, সতি, সমাধি, মিচ্ছাদিট্ঠি, মিচ্ছাৰাচাকম্মন্তাজীৰাতি ইমানি দ্ৰাদসঙ্গানি. মগ্গস্স পন হেতুপচ্ছিমকত্তা অহেতুকচিত্তেসু মগ্গঙ্গানি ন উদ্ধটানি. তংসমুট্ঠানানন্তি ইধাপি কটত্তারূপং সঙ্গহিতমেৰ. ৰুত্তঞ্হেতং পঞ্হাৰারে – ‘‘পটিসন্ধিক্খণে ৰিপাকাব্যাকতানি মগ্গঙ্গানি সম্পযুত্তকানং খন্ধানং কটত্তা চ রূপানং মগ্গপচ্চযেন পচ্চযো’’তি. অযং তাৰেত্থ পাল়িৰণ্ণনা.

অযং পন মগ্গপচ্চযো দ্ৰাদসন্নং মগ্গঙ্গানং ৰসেন ঠিতোপি জাতিভেদতো কুসলাদিৰসেন চতুধা, কুসলাদীনঞ্চ কামাৰচরাদিভূমিভেদতো দ্ৰাদসধা ভিজ্জতীতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো. এৰং ভিন্নে পনেত্থ চতুভূমকম্পি কুসলমগ্গঙ্গং পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ, ঠপেত্ৰা রূপাৰচরং অৰসেসং আরুপ্পে সম্পযুত্তধম্মানঞ্ঞেৰ মগ্গপচ্চযেন পচ্চযোতি সব্বং ঝানপচ্চযে ৰিয ৰিত্থারেতব্বন্তি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি.

মগ্গপচ্চযনিদ্দেসৰণ্ণনা.