১. পণ্ণত্তিউদ্দেসৰারৰণ্ণনা

১-৯. ইদানি মূলযমকে দেসিতেযেৰ কুসলাদিধম্মে আযতনৰসেনাপি সঙ্গণ্হিত্ৰা খন্ধযমকানন্তরং দেসিতস্স আযতনযমকস্স ৰণ্ণনা হোতি. তত্থ খন্ধযমকে ৰুত্তনযেনেৰ পাল়িৰৰত্থানং ৰেদিতব্বং. যথেৰ হি তত্থ পণ্ণত্তিৰারো, পৰত্তিৰারো, পরিঞ্ঞাৰারোতি তযো মহাৰারা হোন্তি, তথা ইধাপি. ৰচনত্থোপি নেসং তত্থ ৰুত্তনযেনেৰ ৰেদিতব্বো. ইধাপি চ পণ্ণত্তিৰারো উদ্দেসনিদ্দেসৰসেন দ্ৰিধা ৰৰত্থিতো. ইতরে নিদ্দেসৰসেনেৰ. ‘তত্থ দ্ৰাদসাযতনানী’তি পদং আদিং কত্ৰা যাৰ নাযতনা ন মনোতি, তাৰ পণ্ণত্তিৰারস্স উদ্দেসৰারো ৰেদিতব্বো. তত্থ দ্ৰাদসাযতনানীতি অযং যমকৰসেন পুচ্ছিতব্বানং আযতনানং উদ্দেসো. চক্খাযতনং…পে… ধম্মাযতনন্তি তেসঞ্ঞেৰ পভেদতো নামৰৰত্থানং. যমকৰসেন পুচ্ছাসুখত্থঞ্চেত্থ পঠমং পটিপাটিযা অজ্ঝত্তরূপাযতনানি ৰুত্তানি. পচ্ছা বাহিররূপাযতনানি. পরিযোসানে মনাযতনধম্মাযতনানি.

যথা পন হেট্ঠা খন্ধৰসেন, এৰমিধ ইমেসং আযতনানং ৰসেন পদসোধনৰারো, পদসোধনমূলচক্কৰারো, সুদ্ধাযতনৰারো, সুদ্ধাযতনমূলচক্কৰারোতি, চত্তারোৰ নযৰারা হোন্তি. একেকো চেত্থ অনুলোমপটিলোমৰসেন দুৰিধোযেৰ. তেসমত্থো তত্থ ৰুত্তনযেনেৰ ৰেদিতব্বো. যথা পন খন্ধযমকে পদসোধনৰারস্স অনুলোমৰারে ‘রূপং রূপক্খন্ধো, রূপক্খন্ধো রূপ’ন্তিআদীনি পঞ্চ যমকানি, তথা ইধ ‘চক্খু, চক্খাযতনং; চক্খাযতনং; চক্খূ’তিআদীনি দ্ৰাদস. পটিলোমৰারেপি ‘ন চক্খু, ন চক্খাযতনং; ন চক্খাযতনং, ন চক্খূ’তিআদীনি দ্ৰাদস, পদসোধনমূলচক্কৰারস্স পনেত্থ অনুলোমৰারে একেকাযতনমূলকানি একাদস একাদস কত্ৰা দ্ৰত্তিংসসতং যমকানি. পটিলোমৰারেপি দ্ৰত্তিংসসতমেৰ. সুদ্ধাযতনৰারস্সাপি অনুলোমৰারে দ্ৰাদস, পটিলোমৰারে দ্ৰাদস, সুদ্ধাযতনমূলচক্কৰারস্সাপি অনুলোমৰারে একেকাযতনমূলকানি একাদস একাদস কত্ৰা দ্ৰত্তিংসসতং যমকানি. পটিলোমৰারেপি দ্ৰত্তিংসসতমেৰাতি এৰমিধ ছসত্ততাধিকেহি পঞ্চহি যমকসতেহি, দ্ৰিপঞ্ঞাসাধিকেহি একাদসহি পুচ্ছাসতেহি, চতুরাধিকেহি তেৰীসায অত্থসতেহি চ পটিমণ্ডিতো পণ্ণত্তিৰারস্স উদ্দেসৰারো ৰেদিতব্বো.

পণ্ণত্তিউদ্দেসৰারৰণ্ণনা.