১. পণ্ণত্তিনিদ্দেসৰারৰণ্ণনা

১০-১৭. নিদ্দেসৰারে পন হেট্ঠা খন্ধযমকস্স পণ্ণত্তিৰারনিদ্দেসে ৰুত্তনযেনেৰ অত্থো ৰেদিতব্বো. অঞ্ঞত্র ৰিসেসা. তত্রাযং ৰিসেসো – দিব্বচক্খূতি দুতিযৰিজ্জাঞাণং. পঞ্ঞাচক্খূতি ততিযৰিজ্জাঞাণং. দিব্বসোতন্তি দুতিযঅভিঞ্ঞাঞাণং. তণ্হাসোতন্তি তণ্হাৰ. অৰসেসো কাযোতি নামকাযো, রূপকাযো, হত্থিকাযো, অস্সকাযোতি এৰমাদি. অৰসেসং রূপন্তি রূপাযতনতো সেসং ভূতুপাদাযরূপঞ্চেৰ পিযরূপসাতরূপঞ্চ. সীলগন্ধোতিআদীনি ৰাযনট্ঠেন সীলাদীনংযেৰ নামানি. অত্থরসোতিআদীনিপি সাধুমধুরট্ঠেন অত্থাদীনঞ্ঞেৰ নামানি. অৰসেসো ধম্মোতি পরিযত্তিধম্মাদিঅনেকপ্পভেদোতি অযমেত্থ ৰিসেসো.

পণ্ণত্তিনিদ্দেসৰারৰণ্ণনা.