১. অসঞ্চিচ্চকথাৰণ্ণনা

৮৫৭-৮৬২. ইদানি অসঞ্চিচ্চকথা নাম হোতি. তত্থ ‘‘আনন্তরিযৰত্থূনি নাম গরূনি ভারিযানি, তস্মা অসঞ্চিচ্চাপি তেসু ৰত্থূসু ৰিকোপিতেসু আনন্তরিকো হোতী’’তি যেসং লদ্ধি, সেয্যথাপি একচ্চানং উত্তরাপথকানং; তে সন্ধায অসঞ্চিচ্চাতি পুচ্ছা সকৰাদিস্স, লদ্ধিৰসেন পটিঞ্ঞা ইতরস্স. অথ নং ‘‘যস্মা আনন্তরিযকম্মং নাম কম্মপথপ্পত্তং. যদি চ অসঞ্চিচ্চ কম্মপথভেদো সিযা, অৰসেসা পাণাতিপাতাদযোপি অসঞ্চিচ্চ ভৰেয্যু’’ন্তি চোদনত্থং অসঞ্চিচ্চপাণং হন্ত্ৰাতিআদিমাহ. ইতরো তথারূপায লদ্ধিযা অভাৰেন পটিক্খিপতি. সেসং যথাপাল়িমেৰ নিয্যাতি. ন ৰত্তব্বং মাতুঘাতকোতি পুচ্ছা পরৰাদিস্স, রোগপটিকারাদিকালে অসঞ্চিচ্চ ঘাতং সন্ধায পটিঞ্ঞা সকৰাদিস্স. ননু মাতা জীৰিতা ৰোরোপিতাতি পঞ্হেপি অসঞ্চিচ্চ ৰোরোপিতং সন্ধায পটিঞ্ঞা সকৰাদিস্সেৰ. এৰং অধিপ্পাযং পন অগ্গহেত্ৰা হঞ্চীতি লদ্ধিপতিট্ঠাপনং ইতরস্স. তং অযোনিসো পতিট্ঠাপিতত্তা অপ্পতিট্ঠিতমেৰ. পিতুঘাতকাদীসুপি এসেৰ নযো. সঙ্ঘভেদকে পন ধম্মসঞ্ঞিং সন্ধায সঙ্ঘভেদো আনন্তরিকোতি পুচ্ছা সকৰাদিস্স, ‘‘সঙ্ঘং সমগ্গং ভেত্ৰান, কপ্পং নিরযম্হি পচ্চতী’’তি ৰচনং অযোনিসো গহেত্ৰা পটিঞ্ঞা পরৰাদিস্স. পুন সব্বেতি পুট্ঠো সকপক্খে ধম্মসঞ্ঞিং সন্ধায পটিক্খিপতি, পরপক্খে ধম্মসঞ্ঞিং সন্ধায পটিজানাতি. ধম্মসঞ্ঞীতি পঞ্হদ্ৰযেপি এসেৰ নযো. ননু ৰুত্তং ভগৰতাতি সুত্তং একন্তেনেৰ ধম্মৰাদিস্স আনন্তরিকভাৰদস্সনত্থং ৰুত্তং. আপাযিকো নেরযিকোতি গাথাযপি অধম্মৰাদীযেৰ অধিপ্পেতো. ইতরো পন অধিপ্পাযং অগ্গহেত্ৰা লদ্ধিং পতিট্ঠপেতি. সা অযোনিসো পতিট্ঠাপিতত্তা অপ্পতিট্ঠিতাযেৰাতি.

অসঞ্চিচ্চকথাৰণ্ণনা.