১০. পঞ্ঞত্তানুযোগৰণ্ণনা

৬১-৬৬. ইদানি পঞ্ঞত্তানুযোগো নাম হোতি. রূপধাতুযা হি পুগ্গলৰাদী রূপিং পুগ্গলং পঞ্ঞপেতি, তথা অরূপধাতুযা অরূপিং. তস্স তং লদ্ধিং ভিন্দিতুং সব্বাপি পুচ্ছা সকৰাদিস্স, পটিঞ্ঞা চ পটিক্খেপো চ ইতরস্স. সো হি রূপীতি ৰুত্তে রূপকাযসব্ভাৰতো চেৰ তথারূপায চ পঞ্ঞত্তিযা অত্থিতায পটিজানাতি. কামীতি ৰুত্তে ৰীতরাগসব্ভাৰতো চেৰ তথারূপায চ পঞ্ঞত্তিযা নত্থিতায পটিক্খিপতি. অরূপীতি ৰুত্তেপি অরূপক্খন্ধসব্ভাৰতো চেৰ তথারূপায চ পঞ্ঞত্তিযা অত্থিতায পটিজানাতি. দ্ৰীসুপি নযেসু সত্তোতি পুগ্গলস্স ৰেৰচনৰসেন ৰুত্তং.

৬৭. ইদানি যস্মা সো ‘‘কাযে কাযানুপস্সী’’তি আগতট্ঠানে অঞ্ঞো কাযো অঞ্ঞো পুগ্গলোতি ইচ্ছতি, তস্মা তং লদ্ধিং ভিন্দিতুং কাযোতি ৰা সরীরন্তি ৰাতিআদি সকৰাদীপুচ্ছা হোতি. তত্থ কাযং অপ্পিযং করিত্ৰাতি কাযং অপ্পেতব্বং অল্লীযাপেতব্বং একীভাৰং উপনেতব্বং অৰিভজিতব্বং কত্ৰা পুচ্ছামীতি অত্থো. এসেসেতি এসো সোযেৰ. এসে এসেতিপি পাঠো. এসো এসোযেৰাতি অত্থো. একট্ঠেতি একট্ঠো. সমে সমভাগে তজ্জাতেতি সমো সমভাগো তজ্জাতিকো. ৰচনমত্তেযেৰেত্থ ভেদো. অত্থতো পন কাযোৰ এসোতি পুচ্ছতি. পরৰাদী নানত্তং অপস্সন্তো আমন্তাতি পটিজানাতি. পুগ্গলোতি ৰা জীৰোতি ৰাতি পুচ্ছাযপি এসেৰ নযো. অঞ্ঞো কাযোতি পুট্ঠো পন কাযানুপস্সনায এৰংলদ্ধিকত্তা পটিজানাতি. অঞ্ঞং জীৰন্তি পুট্ঠো পন আহচ্চ ভাসিতং সুত্তং পটিক্খিপিতুং অসক্কোন্তো অৰজানাতি. ততো পরং ‘‘আজানাহি নিগ্গহ’’ন্তিআদি উত্তানত্থমেৰ.

৬৮. পরৰাদীপক্খে পন অঞ্ঞো কাযো অঞ্ঞো পুগ্গলোতি পুট্ঠো সকৰাদী ঠপনীযপঞ্হত্তা পটিক্খিপতি, পরৰাদী ছলৰসেন পটিকম্মং করোতি. তম্পি উত্তানত্থমেৰাতি.

পঞ্ঞত্তানুযোগৰণ্ণনা নিট্ঠিতা.