১. নিযামকথাৰণ্ণনা

৪৪৫-৪৪৭. ইদানি নিযামকথা নাম হোতি. তত্থ নিযামোতি ‘‘ভব্বো নিযামং ওক্কমিতুং কুসলেসু ধম্মেসু সম্মত্ত’’ন্তি (পু. প. ১৩) ৰচনতো অরিযমগ্গো ৰুচ্চতি. যস্মা পন তস্মিং উপ্পজ্জিত্ৰা নিরুদ্ধেপি পুগ্গলো অনিযতো নাম ন হোতি, তস্মা ‘‘সো নিযামো নিচ্চট্ঠেন অসঙ্খতো’’তি যেসং লদ্ধি, সেয্যথাপি অন্ধকানং; তে সন্ধায পুচ্ছা সকৰাদিস্স, পটিঞ্ঞা ইতরস্স. ততো ‘‘যদি সো অসঙ্খতো, এৰরূপেন তেন ভৰিতব্ব’’ন্তি দীপেন্তো নিব্বানন্তিআদিমাহ. সংসন্দনপুচ্ছা উত্তানত্থাযেৰ.

অত্থি কেচীতিআদি নিযামস্স সঙ্খতভাৰদীপনত্থং ৰুত্তং. মগ্গো অসঙ্খতোতিপঞ্হে তস্স উপ্পাদনিরোধভাৰতো পটিক্খিপতীতি. নিযামো সঙ্খতোতিপঞ্হে নিরুদ্ধেপি মগ্গে নিযামস্স অত্থিতং সন্ধায পটিক্খিপতি. সোতাপত্তিনিযামোতিআদিপঞ্হেসুপি অনুলোমতো চ পটিলোমতো চ ইমিনাৰ নযেন অত্থো ৰেদিতব্বো. পঞ্চ অসঙ্খতানীতি পুট্ঠো পঞ্চন্নং অসঙ্খতানং আগতট্ঠানং অপস্সন্তো পটিক্খিপতি. দুতিযং পুট্ঠো চতুন্নং সম্মত্তনিযামানং নিযামৰচনতো নিব্বানস্স চ অসঙ্খতভাৰতো পটিজানাতি. মিচ্ছত্তনিযামপঞ্হো নিযামৰচনমত্তেন অসঙ্খততায অযুত্তভাৰদীপনত্থং ৰুত্তোতি.

নিযামকথাৰণ্ণনা.