২. পটিচ্চসমুপ্পাদকথাৰণ্ণনা

৪৪৮. ইদানি পটিচ্চসমুপ্পাদকথা নাম হোতি. তত্থ যেসং নিদানৰগ্গে ‘‘উপ্পাদা ৰা তথাগতানং অনুপ্পাদা ৰা তথাগতানং ঠিতাৰ সা ধাতু ধম্মট্ঠিততা’’তিআদিৰচনতো (সং. নি. ২.২০) ‘‘পটিচ্চসমুপ্পাদো অসঙ্খতো’’তি লদ্ধি, সেয্যথাপি পুব্বসেলিযানঞ্চ মহিসাসকানঞ্চ; তে সন্ধায পুচ্ছা সকৰাদিস্স, পটিঞ্ঞা ইতরস্স.

৪৪৯. অৰিজ্জা অসঙ্খতাতি আদযো পঞ্হা অৰিজ্জাদীনংযেৰ পটিচ্চসমুপ্পাদভাৰদস্সনত্থং ৰুত্তা. যেন পনত্থেন তত্থ একেকং অঙ্গং ‘‘পটিচ্চসমুপ্পাদো’’তি ৰুচ্চতি, সো পটিচ্চসমুপ্পাদৰিভঙ্গে ৰুত্তোযেৰ.

৪৫১. অৰিজ্জাপচ্চযা সঙ্খারাতি যা তত্থ ধম্মট্ঠিততাতিআদি যেন সুত্তেন লদ্ধি পতিট্ঠাপিতা, তস্সেৰ অত্থদস্সনেন লদ্ধিভিন্দনত্থং ৰুত্তং. অযঞ্হেত্থ অত্থো – যা অযং হেট্ঠা ‘‘ঠিতাৰ সা ধাতু ধম্মট্ঠিততা ধম্মনিযামতা’’তি ৰুত্তা ন সা অঞ্ঞত্র অৰিজ্জাদীহি ৰিসুং একা অত্থি. অৰিজ্জাদীনং পন পচ্চযানংযেৰেতং নামং. উপ্পন্নেপি হি তথাগতে অনুপ্পন্নেপি অৰিজ্জাতো সঙ্খারা সম্ভৰন্তি, সঙ্খারাদীহি চ ৰিঞ্ঞাণাদীনি, তস্মা ‘‘অৰিজ্জাপচ্চযা সঙ্খারা’’তি যা এতস্মিং পদে সঙ্খারধম্মানং কারণট্ঠেন ঠিততাতি ধম্মট্ঠিততা. তেসংযেৰ চ ধম্মানং কারণট্ঠেনেৰ নিযামতাতি ধম্মনিযামতাতি অৰিজ্জা ৰুচ্চতি. সা চ অসঙ্খতা, নিব্বানঞ্চ অসঙ্খতন্তি পুচ্ছতি. পরৰাদী লদ্ধিৰসেন পটিজানিত্ৰা পুন দ্ৰে অসঙ্খতানীতি পুট্ঠো সুত্তাভাৰেন পটিক্খিপিত্ৰা লদ্ধিৰসেনেৰ পটিজানাতি. সেসপদেসুপি এসেৰ নযো. হেট্ঠা ৰুত্তসদিসং পন তত্থ ৰুত্তনযেনেৰ ৰেদিতব্বন্তি.

পটিচ্চসমুপ্পাদকথাৰণ্ণনা.