৭. তিকপদৰণ্ণনা

৭৭. এৰং অব্ভন্তরমাতিকায সঙ্গহং দস্সেত্ৰা ইদানি বাহিরমাতিকায সঙ্গহং দস্সেতুং কুসলা ধম্মাতিআদি আরদ্ধং. তত্থ ৰেদনাত্তিকে তীহি ধাতূহীতি কাযৰিঞ্ঞাণমনোৰিঞ্ঞাণধম্মধাতূহি. সত্তহি ধাতূহীতি চক্খুসোতঘানজিৰ্হাৰিঞ্ঞাণধাতূহি চেৰ মনোধাতুধম্মধাতুমনোৰিঞ্ঞাণধাতূহি চ. ৰিপাকত্তিকে অট্ঠহি ধাতূহীতি কাযৰিঞ্ঞাণধাতুযা সদ্ধিং তাহিযেৰ. ৰিপাকধম্মধম্মা পন সংকিলিট্ঠসংকিলেসিকেহি সদ্ধিং সদিসৰিস্সজ্জনত্তা একতো গহিতা. যথা চেতে, এৰং সব্বতিকদুকপদেসু যং যং পদং যেন যেন পদেন সদ্ধিং সদিসৰিস্সজ্জনং হোতি, তং তং উপ্পটিপাটিযাপি তেন তেন সদ্ধিং গহেত্ৰা ৰিস্সজ্জিতং. তত্থ ৰুত্তানুসারেনেৰ সঙ্গহাসঙ্গহনযো ৰেদিতব্বোতি.

সঙ্গহাসঙ্গহপদৰণ্ণনা.