(১১) ১. ৰলাহকৰগ্গো

১-২. ৰলাহকসুত্তদ্ৰযৰণ্ণনা

১০১-২. ততিযপণ্ণাসকস্স পঠমে ৰলাহকাতি মেঘা. ভাসিতা হোতি নো কত্তাতি ‘‘ইদঞ্চিদঞ্চ করিস্সামী’’তি কেৰলং ভাসতিযেৰ, ন করোতি. কত্তা হোতি নো ভাসিতাতি অকথেত্ৰাৰ ‘‘ইদঞ্চিদঞ্চ মযা কাতুং ৰট্টতী’’তি কত্তা হোতি. এৰং সব্বত্থ অত্থো ৰেদিতব্বো. দুতিযং উত্তানত্থমেৰ.

৩. কুম্ভসুত্তৰণ্ণনা

১০৩. ততিযে কুম্ভাতি ঘটা. তুচ্ছো পিহিতোতি রিত্তকো পিহিতমুখো. পূরো ৰিৰটোতি উদকপুণ্ণো অপারুতমুখো. সেসদ্ৰযেপি এসেৰ নযো.

৪. উদকরহদসুত্তৰণ্ণনা

১০৪. চতুত্থে উত্তানো গম্ভীরোভাসোতিআদীসু পুরাণপণ্ণরসসম্ভিন্নৰণ্ণো কাল়উদকো গম্ভীরোভাসো নাম, অচ্ছৰিপ্পসন্নমণিৰণ্ণউদকো উত্তানোভাসো নাম.

৫-৬. অম্বসুত্তৰণ্ণনা

১০৫-৬. পঞ্চমে আমং পক্কৰণ্ণীতি আমকং হুত্ৰা ওলোকেন্তানং পক্কসদিসং খাযতি. এৰং সব্বপদানি দট্ঠব্বানি. ছট্ঠং উত্তানত্থমেৰ.

৭. মূসিকসুত্তৰণ্ণনা

১০৭. সত্তমে যো আৰাটং খণতি, ন চ তত্থ ৰসতি, সো গাধং কত্তা নো ৰসিতাতি ৰুচ্চতি. খন্তাতিপি পাঠো. ইমিনা নযেন সব্বপদানি ৰেদিতব্বানি.

৮. বলীবদ্দসুত্তৰণ্ণনা

১০৮. অট্ঠমে যো অত্তনো গোগণং মদ্দতি, ন পরগোগণং, অযং সগৰচণ্ডো নো পরগৰচণ্ডোতি এৰং সব্বপদানি ৰেদিতব্বানি. উব্বেজেতা হোতীতি ঘট্টেত্ৰা ৰিজ্ঝিত্ৰা উব্বেগপত্তং করোতি.

৯. রুক্খসুত্তৰণ্ণনা

১০৯. নৰমে ফেগ্গু ফেগ্গুপরিৰারোতি নিস্সারো ফেগ্গুরুক্খো ফেগ্গুরুক্খেহেৰ পরিৰুতো. সারপরিৰারোতি খদিরাদীহি সাররুক্খেহেৰ পরিৰুতো. এস নযো সব্বত্থ.

১০. আসীৰিসসুত্তৰণ্ণনা

১১০. দসমে আগতৰিসো ন ঘোরৰিসোতি যস্স ৰিসং আগচ্ছতি, ঘোরং পন ন হোতি, চিরকালং ন পীল়েতি. সেসপদেসুপি এসেৰ নযোতি.

ৰলাহকৰগ্গো পঠমো.