(১২) ২. কেসিৰগ্গো

১. কেসিসুত্তৰণ্ণনা

১১১. দুতিযস্স পঠমে কেসীতি তস্স নামং. অস্সদম্মে সারেতীতি অস্সদম্মসারথি. সণ্হেনপি ৰিনেতীতিআদীসু তস্স অনুচ্ছৰিকং সক্কারং কত্ৰা সুভোজনং ভোজেত্ৰা মধুরপানং পাযেত্ৰা মুদুৰচনেন সমুদাচরিত্ৰা দমেন্তো সণ্হেন দমেতি নাম, জাণুবন্ধনমুখবন্ধনাদীহি চেৰ পতোদৰিজ্ঝনকসাভিঘাতফরুসৰচনেহি চ দমেন্তো ফরুসেন দমেতি নাম, কালেন কালং তদুভযং করোন্তো সণ্হফরুসেন দমেতি নাম.

২. জৰসুত্তৰণ্ণনা

১১২. দুতিযে অজ্জৰেনাতি উজুকভাৰেন. জৰেনাতি পদৰেগেন. খন্তিযাতি অধিৰাসনক্খন্তিযা. সোরচ্চেনাতি সুচিভাৰসীলেন. পুগ্গলগুণঙ্গেসু জৰেনাতি ঞাণজৰেন. সেসমেত্থ উত্তানত্থমেৰ.

৩. পতোদসুত্তৰণ্ণনা

১১৩. ততিযে পতোদচ্ছাযন্তি ৰিজ্ঝনত্থং উক্খিত্তস্স পতোদস্স ছাযং. সংৰিজ্জতীতি ‘‘জৰো মে গহেতব্বো’’তি সল্লক্খণৰসেন সংৰিজ্জতি. সংৰেগং আপজ্জতীতি সংৰেগং পটিপজ্জতি লোমৰেধৰিদ্ধোতি লোমকূপে পতোদৰেধেন ৰিদ্ধমত্তো. চম্মৰেধৰিদ্ধোতি ছৰিচম্মং ছিন্দন্তেন পতোদৰেধেন ৰিদ্ধো. অট্ঠিৰেধৰিদ্ধোতি অট্ঠিং ভিন্দন্তেন ৰেধেন ৰিদ্ধো. কাযেনাতি নামকাযেন. পরমসচ্চন্তি নিব্বানং. সচ্ছিকরোতীতি পস্সতি. পঞ্ঞাযাতি সহৰিপস্সনায মগ্গপঞ্ঞায.

৪. নাগসুত্তৰণ্ণনা

১১৪. চতুত্থে অট্ঠিং কত্ৰাতি অট্ঠিকো হুত্ৰা. তিণৰনিন্নাদসদ্দানন্তি এত্থ তিণৰোতি ডিণ্ডিমো, নিন্নাদসদ্দোতি সব্বেসম্পি একতোমিস্সিতো মহাসদ্দো. ডংসাদীসু ডংসাতি পিঙ্গলমক্খিকা, মকসা মকসাৰ. খিপ্পঞ্ঞেৰ গন্তা হোতীতি সীলসমাধিপঞ্ঞাৰিমুত্তিৰিমুত্তিঞাণদস্সনানি পূরেত্ৰা সীঘমেৰ গন্তা হোতি.

৫. ঠানসুত্তৰণ্ণনা

১১৫. পঞ্চমে ঠানানীতি কারণানি. অনত্থায সংৰত্ততীতি অহিতায অৰড্ঢিযা সংৰত্ততি. এত্থ চ পঠমং ওপাতক্খণনমচ্ছবন্ধনসন্ধিচ্ছেদনাদিভেদং সদুক্খং সৰিঘাতং পাপকম্মং ৰেদিতব্বং, দুতিযং সমজীৰিকানং গিহীনং পুপ্ফচ্ছড্ডকাদিকম্মং সুধাকোট্টন-গেহচ্ছাদনঅসুচিট্ঠানসম্মজ্জনাদিকম্মঞ্চ ৰেদিতব্বং, ততিযং সুরাপানগন্ধৰিলেপনমালাপিল়ন্ধনাদিকম্মঞ্চেৰ অস্সাদৰসেন পৰত্তং পাণাতিপাতাদিকম্মঞ্চ ৰেদিতব্বং, চতুত্থং ধম্মস্সৰনত্থায গমনকালে সুদ্ধৰত্থচ্ছাদন-মালাগন্ধাদীনং আদায গমনং চেতিযৰন্দনং বোধিৰন্দনং মধুরধম্মকথাসৰনং পঞ্চসীলসমাদানন্তি এৰমাদীসু সোমনস্সসম্পযুত্তং কুসলকম্মং ৰেদিতব্বং. পুরিসথামেতি পুরিসস্স ঞাণথামস্মিং. সেসদ্ৰযেপি এসেৰ নযো.

৬. অপ্পমাদসুত্তৰণ্ণনা

১১৬. ছট্ঠে যতো খোতি যদা খো. সম্পরাযিকস্সাতি দেসনামত্তমেতং, খীণাসৰো পন নেৰ সম্পরাযিকস্স, ন দিট্ঠধম্মিকস্স মরণস্স ভাযতি. সোৰ ইধ অধিপ্পেতো. কেচি পন ‘‘সম্মাদিট্ঠি ভাৰিতাতি ৰচনতো সোতাপন্নং আদিং কত্ৰা সব্বেপি অরিযা অধিপ্পেতা’’তি ৰদন্তি.

৭. আরক্খসুত্তৰণ্ণনা

১১৭. সত্তমে অত্তরূপেনাতি অত্তনো অনুরূপেন অনুচ্ছৰিকেন, হিতকামেনাতি অত্থো. রজনীযেসূতি রাগস্স পচ্চযভূতেসু. ধম্মেসূতি সভাৰেসু, ইট্ঠারম্মণেসূতি অত্থো. এৰং সব্বত্থ নযো ৰেদিতব্বো. ন রজ্জতীতি দিট্ঠিৰসেন ন রজ্জতি. সেসপদেসুপি এসেৰ নযো. ন চ পন সমণৰচনহেতুপি গচ্ছতীতি সমণানং পরৰাদীনং ৰচনহেতুপি অত্তনো দিট্ঠিং পহায তেসং দিট্ঠিৰসেন ন গচ্ছতীতি অত্থো. ইধাপি খীণাসৰোৰ অধিপ্পেতো.

৮-১০. সংৰেজনীযাদিসুত্তত্তযৰণ্ণনা

১১৮-১২০. অট্ঠমে দস্সনীযানীতি পস্সিতব্বযুত্তকানি. সংৰেজনীযানীতি সংৰেগজনকানি. নৰমে জাতিভযন্তি জাতিং আরব্ভ উপ্পজ্জনকভযং. সেসপদেসুপি এসেৰ নযো. দসমে অগ্গিভযন্তি অগ্গিং পটিচ্চ উপ্পজ্জনকভযং. সেসপদেসুপি এসেৰ নযো.

কেসিৰগ্গো দুতিযো.