৬. কুসিনারসুত্তৰণ্ণনা

৭৬. ছট্ঠে উপৰত্তনেতি পাচীনগতায সালপন্তিযা উত্তরেন নিৰত্তিত্ৰা ঠিতায ৰেমজ্ঝট্ঠানে. অন্তরেন যমকসালানন্তি দ্ৰিন্নং সালরুক্খানং অন্তরে. কঙ্খাতি দ্ৰেল়্হকং. ৰিমতীতি ৰিনিচ্ছিতুং অসমত্থতা. ‘‘বুদ্ধো নু খো ন বুদ্ধো নু খো, ধম্মো নু খো ন ধম্মো নু খো, সঙ্ঘো নু খো ন সঙ্ঘো নু খো, মগ্গো নু খো ন মগ্গো নু খো, পটিপদা নু খো ন পটিপদা নু খো’’তি যস্স সংসযো উপ্পজ্জেয্য, তং ৰো ৰদামি পুচ্ছথ, ভিক্খৰেতি অযমেত্থ সঙ্খেপত্থো. সত্থুগারৰেনপি ন পুচ্ছেয্যাথাতি ‘‘মযং সত্থু সন্তিকে পব্বজিম্হ, চত্তারো পচ্চযাপি নো সত্থু সন্তকাৰ. তে মযং এত্তকং কালং কঙ্খং অকত্ৰা ন অরহাম অজ্জ পচ্ছিমে কালে কঙ্খং কাতু’’ন্তি সচে এৰং সত্থরি গারৰেন ন পুচ্ছথ. সহাযকোপি, ভিক্খৰে, সহাযকস্স আরোচেতূতি তুম্হাকং যো যস্স ভিক্খুস্স সন্দিট্ঠো সম্ভত্তো, সো তস্স আরোচেতু, অহং একস্স ভিক্খুস্স কথেস্সামি, তস্স কথং সুত্ৰা সব্বে নিক্কঙ্খা ভৰথাতি দস্সেতি. এৰং পসন্নোতি এৰং সদ্দহামি অহন্তি অত্থো. ঞাণমেৰাতি নিক্কঙ্খভাৰপচ্চক্খকরণঞাণংযেৰ এত্থ তথাগতস্স, ন সদ্ধামত্তন্তি অত্থো. ইমেসঞ্হি, আনন্দাতি ইমেসং অন্তোসাণিযং নিসিন্নানং পঞ্চন্নং ভিক্খুসতানং. যো পচ্ছিমকোতি যো গুণৰসেন পচ্ছিমকো, আনন্দত্থেরংযেৰ সন্ধাযাহ.