১. কুসিনারসুত্তৰণ্ণনা

১২৪. ততিযস্স পঠমে কুসিনারাযন্তি এৰংনামকে নগরে. বলিহরণে ৰনসণ্ডেতি এৰংনামকে ৰনসণ্ডে. তত্থ কির ভূতবলিকরণত্থং বলিং হরন্তি, তস্মা বলিহরণন্তি ৰুচ্চতি. আকঙ্খমানোতি ইচ্ছমানো. সহত্থাতি সহত্থেন. সম্পৰারেতীতি অলং অলন্তি ৰাচায চেৰ হত্থৰিকারেন চ পটিক্খিপাপেতি. সাধু ৰত মাযন্তি সাধু ৰত মং অযং. গথিতোতি তণ্হাগেধেন গথিতো. মুচ্ছিতোতি তণ্হামুচ্ছনাযযেৰ মুচ্ছিতো. অজ্ঝোপন্নোতি তণ্হায গিলিত্ৰা পরিনিট্ঠপেত্ৰা পৰত্তো. অনিস্সরণপঞ্ঞোতি ছন্দরাগং পহায সংকড্ঢিত্ৰা পরিভুঞ্জন্তো নিস্সরণপঞ্ঞো নাম হোতি, অযং ন তাদিসো, সচ্ছন্দরাগো পরিভুঞ্জতীতি অনিস্সরণপঞ্ঞো. সুক্কপক্খো ৰুত্তৰিপরিযাযেন ৰেদিতব্বো. নেক্খম্মৰিতক্কাদযো পনেত্থ মিস্সকা কথিতাতি ৰেদিতব্বা.