১০. দুতিযনিদানসুত্তৰণ্ণনা

১১৩. দসমে কম্মানন্তি ৰট্টগামিকম্মানমেৰ. ছন্দরাগট্ঠানিযেতি ছন্দরাগস্স কারণভূতে. আরব্ভাতি আগম্ম সন্ধায পটিচ্চ. ছন্দোতি তণ্হাছন্দো. যো চেতসো সারাগোতি যো চিত্তস্স রাগো রজ্জনা রজ্জিতত্তং, এতমহং সংযোজনং ৰদামি, বন্ধনং ৰদামীতি অত্থো. সুক্কপক্খে কম্মানন্তি ৰিৰট্টগামিকম্মানং. তদভিনিৰত্তেতীতি তং অভিনিৰত্তেতি. যদা ৰা তেন ৰিপাকো ঞাতো হোতি ৰিদিতো, তদা তে চেৰ ধম্মে তঞ্চ ৰিপাকং অভিনিৰত্তেতি. ইমিনা চ পদেন ৰিপস্সনা কথিতা, তদভিনিৰত্তেত্ৰাতি ইমিনা মগ্গো. চেতসা অভিনিৰিজ্ঝিত্ৰাতি ইমিনা চ মগ্গোৰ. পঞ্ঞায অতিৰিজ্ঝ পস্সতীতি সহ ৰিপস্সনায মগ্গপঞ্ঞায নিব্বিজ্ঝিত্ৰা পস্সতি. এৰং সব্বত্থ অত্থো ৰেদিতব্বো. ইমস্মিং পন সুত্তে ৰট্টৰিৰট্টং কথিতন্তি.

সম্বোধৰগ্গো পঠমো.