(১০) ৫. লোণকপল্লৰগ্গো

১. অচ্চাযিকসুত্তৰণ্ণনা

৯৩. পঞ্চমস্স পঠমে অচ্চাযিকানীতি অতিপাতিকানি. করণীযানীতি অৰস্সকিচ্চানি. যঞ্হি ন অৰস্সং কাতব্বং, তং কিচ্চন্তি ৰুচ্চতি. অৰস্সং কাতব্বং করণীযং নাম. সীঘং সীঘন্তি ৰেগেন ৰেগেন. তস্স খো তন্তি এত্থ তন্তি নিপাতমত্তং. নত্থি সা ইদ্ধি ৰা আনুভাৰো ৰাতি সা ৰা ইদ্ধি সো ৰা আনুভাৰো নত্থি. উত্তরস্ৰেতি ততিযদিৰসে. উতুপরিণামিনীতি লদ্ধউতুপরিণামানি হুত্ৰা. জাযন্তিপীতি ততিযদিৰসে নিক্খন্তসেতঙ্কুরানি হোন্তি, সত্তাহে পত্তে নীলঙ্কুরানি হোন্তি. গব্ভীনিপি হোন্তীতি দিযড্ঢমাসং পত্ৰা গহিতগব্ভানি হোন্তি. পচ্চন্তিপীতি তযো মাসে পত্ৰা পচ্চন্তি. ইদানি যস্মা বুদ্ধানং গহপতিকেন ৰা সস্সেহি ৰা অত্থো নত্থি, সাসনে পন তপ্পটিরূপকং পুগ্গলং ৰা অত্থং ৰা দস্সেতুং তং তং ওপম্মং আহরন্তি. তস্মা যমত্থং দস্সেতুকামেন এতং আভতং, তং দস্সেন্তো এৰমেৰ খোতিআদিমাহ. তং অত্থতো উত্তানমেৰ. সিক্খা পন ইধাপি মিস্সিকা এৰ কথিতা.

২. পৰিৰেকসুত্তৰণ্ণনা

৯৪. দুতিযে চীৰরপৰিৰেকন্তি চীৰরং নিস্সায উপ্পজ্জনককিলেসেহি ৰিৰিত্তভাৰং. সেসদ্ৰযেপি এসেৰ নযো. সাণানীতি সাণৰাকচেলানি. মসাণানীতি মিস্সকচেলানি. ছৰদুস্সানীতি মতসরীরতো ছড্ডিতৰত্থানি, এরকতিণাদীনি ৰা গন্থেত্ৰা কতনিৰাসনানি. পংসুকূলানীতি পথৰিযং ছড্ডিতনন্তকানি. তিরীটানীতি রুক্খতচৰত্থানি. অজিনানীতি অজিনমিগচম্মানি. অজিনক্খিপন্তি তদেৰ মজ্ঝে ফালিতং, সহখুরকন্তিপি ৰদন্তি. কুসচীরন্তি কুসতিণানি গন্থেত্ৰা কতচীরং. ৰাকচীরফলকচীরেসুপি এসেৰ নযো. কেসকম্বলন্তি মনুস্সকেসেহি কতকম্বলং. ৰালকম্বলন্তি অস্সৰালাদীহি কতকম্বলং. উলূকপক্খিকন্তি উলূকপত্তানি গন্থেত্ৰা কতনিৰাসনং.

সাকভক্খাতি অল্লসাকভক্খা. সামাকভক্খাতি সামাকতণ্ডুলভক্খা. নীৰারাদীসু নীৰারা নাম অরঞ্ঞে সযং জাতৰীহিজাতি. দদ্দুলন্তি চম্মকারেহি চম্মং লিখিত্ৰা ছড্ডিতকসটং. হটং ৰুচ্চতি সিলেসোপি সেৰালোপি কণিকারাদিরুক্খনিয্যাসোপি. কণন্তি কুণ্ডকং. আচামোতি ভত্তউক্খলিকায লগ্গো ঝামওদনো. তং ছড্ডিতট্ঠানে গহেত্ৰা খাদন্তি, ওদনকঞ্জিযন্তিপি ৰদন্তি. পিঞ্ঞাকাদযো পাকটাৰ. পৰত্তফলভোজীতি পতিতফলভোজী. ভুসাগারন্তি খলসালং.

সীলৰাতি চতুপারিসুদ্ধিসীলেন সমন্নাগতো. দুস্সীল্যঞ্চস্স পহীনং হোতীতি পঞ্চ দুস্সীল্যানি পহীনানি হোন্তি. সম্মাদিট্ঠিকোতি যাথাৰদিট্ঠিকো. মিচ্ছাদিট্ঠীতি অযাথাৰদিট্ঠি. আসৰাতি চত্তারো আসৰা. অগ্গপ্পত্তোতি সীলগ্গপ্পত্তো. সারপ্পত্তোতি সীলসারং পত্তো. সুদ্ধোতি পরিসুদ্ধো. সারে পতিট্ঠিতোতি সীলসমাধিপঞ্ঞাসারে পতিট্ঠিতো.

সেয্যথাপীতি যথা নাম. সম্পন্নন্তি পরিপুণ্ণং পরিপক্কসালিভরিতং. সঙ্ঘরাপেয্যাতি সঙ্কড্ঢাপেয্য. উব্বহাপেয্যাতি খলট্ঠানং আহরাপেয্য. ভুসিকন্তি ভুসং. কোট্টাপেয্যাতি উদুক্খলে পক্খিপাপেত্ৰা মুসলেহি পহরাপেয্য. অগ্গপ্পত্তানীতি তণ্ডুলগ্গং পত্তানি. সারপ্পত্তাদীসুপি এসেৰ নযো. সেসং উত্তানমেৰ. যং পনেত্থ ‘‘দুস্সীল্যঞ্চস্স পহীনং মিচ্ছাদিট্ঠি চস্স পহীনা’’তি ৰুত্তং, তং সোতাপত্তিমগ্গেন পহীনভাৰং সন্ধায ৰুত্তন্তি ৰেদিতব্বং.

৩. সরদসুত্তৰণ্ণনা

৯৫. ততিযে ৰিদ্ধেতি ৰলাহকৰিগমেন দূরীভূতে. দেৰেতি আকাসে. অভিৰিহচ্চাতি অভিৰিহনিত্ৰা. যতোতি যস্মিং কালে. ৰিরজন্তি রাগরজাদিরহিতং. তেসংযেৰ মলানং ৰিগতত্তা ৰীতমলং. ধম্মচক্খুন্তি চতুসচ্চধম্মপরিগ্গাহকং সোতাপত্তিমগ্গচক্খুং. নত্থি তং সংযোজনন্তি দুৰিধমেৰস্স সংযোজনং নত্থি, ইতরম্পি পন পুন ইমং লোকং আনেতুং অসমত্থতায নত্থীতি ৰুত্তং. ইমস্মিং সুত্তে ঝানানাগামী নাম কথিতোতি.

৪. পরিসাসুত্তৰণ্ণনা

৯৬. চতুত্থে ন বাহুলিকা হোন্তীতি পচ্চযবাহুল্লিকা ন হোন্তি. ন সাথলিকাতি তিস্সো সিক্খা সিথিলং কত্ৰা ন গণ্হন্তি. ওক্কমনে নিক্খিত্তধুরাতি ওক্কমনং ৰুচ্চতি অৰগমনট্ঠেন পঞ্চ নীৰরণানি, তেসু নিক্খিত্তধুরা. পৰিৰেকে পুব্বঙ্গমাতি কাযচিত্তউপধিৰিৰেকসঙ্খাতে তিৰিধেপি ৰিৰেকে পুব্বঙ্গমা. ৰীরিযং আরভন্তীতি দুৰিধম্পি ৰীরিযং পগ্গণ্হন্তি. অপ্পত্তস্সাতি ঝানৰিপস্সনামগ্গফলসঙ্খাতস্স অপ্পত্তৰিসেসস্স. সেসপদদ্ৰযেপি এসেৰ নযো. পচ্ছিমা জনতাতি সদ্ধিৰিহারিকঅন্তেৰাসিকাদযো. দিট্ঠানুগতিং আপজ্জতীতি আচরিযুপজ্ঝাযেহি কতং অনুকরোতি. যং তায জনতায আচরিযুপজ্ঝাযেসু দিট্ঠং, তস্স অনুগতিং আপজ্জতি নাম. অযং ৰুচ্চতি, ভিক্খৰে, অগ্গৰতী পরিসাতি, ভিক্খৰে, অযং পরিসা অগ্গপুগ্গলৰতী নাম ৰুচ্চতি.

ভণ্ডনজাতাতি জাতভণ্ডনা. কলহজাতাতি জাতকলহা. ভণ্ডনন্তি চেত্থ কলহস্স পুব্বভাগো, হত্থপরামাসাদিৰসেন ৰীতিক্কমো কলহো নাম. ৰিৰাদাপন্নাতি ৰিরুদ্ধৰাদং আপন্না. মুখসত্তীহীতি গুণৰিজ্ঝনট্ঠেন ফরুসা ৰাচা ‘‘মুখসত্তিযো’’তি ৰুচ্চন্তি, তাহি মুখসত্তীহি. ৰিতুদন্তা ৰিহরন্তীতি ৰিজ্ঝন্তা ৰিচরন্তি.

সমগ্গাতি সহিতা. সম্মোদমানাতি সমপ্পৰত্তমোদা. খীরোদকীভূতাতি খীরোদকং ৰিয ভূতা. পিযচক্খূহীতি উপসন্তেহি মেত্তচক্খূহি. পীতি জাযতীতি পঞ্চৰণ্ণা পীতি উপ্পজ্জতি. কাযো পস্সম্ভতীতি নামকাযোপি রূপকাযোপি ৰিগতদরথো হোতি. পস্সদ্ধকাযোতি অসারদ্ধকাযো. সুখং ৰেদিযতীতি কাযিকচেতসিকসুখং ৰেদিযতি. সমাধিযতীতি আরম্মণে সম্মা ঠপীযতি.

থুল্লফুসিতকেতি মহাফুসিতকে. পব্বতকন্দরপদরসাখাতি এত্থ কন্দরো নাম ‘‘ক’’ন্তি লদ্ধনামেন উদকেন দারিতো উদকভিন্নো পব্বতপ্পদেসো, যো ‘‘নিতম্ভো’’তিপি ‘‘নদিকুঞ্জো’’তিপি ৰুচ্চতি. পদরং নাম অট্ঠ মাসে দেৰে অৰস্সন্তে ফলিতো ভূমিপ্পদেসো. সাখাতি কুসোব্ভগামিনিযো খুদ্দকমাতিকাযো. কুসোব্ভাতি খুদ্দকআৰাটা. মহাসোব্ভাতি মহাআৰাটা. কুন্নদিযোতি খুদ্দকনদিযো. মহানদিযোতি গঙ্গাযমুনাদিকা মহাসরিতা.

৫-৭. পঠমআজানীযসুত্তাদিৰণ্ণনা

৯৭-৯৯. পঞ্চমে অঙ্গেহীতি গুণঙ্গেহি. রাজারহোতি রঞ্ঞো অরহো অনুচ্ছৰিকো. রাজভোগ্গোতি রঞ্ঞো উপভোগভূতো. রঞ্ঞো অঙ্গন্তি রঞ্ঞো হত্থপাদাদিঅঙ্গসমতায অঙ্গন্তেৰ সঙ্খং গচ্ছতি. ৰণ্ণসম্পন্নোতি সরীরৰণ্ণেন সম্পন্নো. বলসম্পন্নোতি কাযবলেন সম্পন্নো. আহুনেয্যোতি আহুতিসঙ্খাতং পিণ্ডপাতং পটিগ্গহেতুং যুত্তো. পাহুনেয্যোতি পাহুনকভত্তস্স অনুচ্ছৰিকো. দক্খিণেয্যোতি দসৰিধদানৰত্থুপরিচ্চাগৰসেন সদ্ধাদানসঙ্খাতায দক্খিণায অনুচ্ছৰিকো. অঞ্জলিকরণীযোতি অঞ্জলিপগ্গহণস্স অনুচ্ছৰিকো. অনুত্তরং পুঞ্ঞক্খেত্তং লোকস্সাতি সব্বলোকস্স অসদিসং পুঞ্ঞৰিরুহনট্ঠানং.

ৰণ্ণসম্পন্নোতি গুণৰণ্ণেন সম্পন্নো. বলসম্পন্নোতি ৰীরিযবলেন সম্পন্নো. জৰসম্পন্নোতি ঞাণজৰেন সম্পন্নো. থামৰাতি ঞাণথামেন সমন্নাগতো. দল়্হপরক্কমোতি থিরপরক্কমো. অনিক্খিত্তধুরোতি অট্ঠপিতধুরো পগ্গহিতধুরো, অগ্গফলং অরহত্তং অপ্পত্ৰা ৰীরিযধুরং ন নিক্খিপিস্সামীতি এৰং পটিপন্নো. ইমস্মিং সুত্তে চতুসচ্চৰসেন সোতাপত্তিমগ্গো, সোতাপত্তিমগ্গেন চ ঞাণজৰসম্পন্নতা কথিতাতি. ছট্ঠে তীণি চ মগ্গানি তীণি চ ফলানি, তীহি মগ্গফলেহি চ ঞাণজৰসম্পন্নতা কথিতা. সত্তমে অরহত্তফলং, অরহত্তফলেনেৰ চ মগ্গকিচ্চং কথিতং. ফলং পন জৰিতজৰেন উপ্পজ্জনতো জৰোতি চ ৰত্তুং ৰট্টতি.

৮. পোত্থকসুত্তৰণ্ণনা

১০০. অট্ঠমে নৰোতি করণং উপাদায ৰুচ্চতি. পোত্থকোতি ৰাকমযৰত্থং. মজ্ঝিমোতি পরিভোগমজ্ঝিমো. জিণ্ণোতি পরিভোগজিণ্ণো. উক্খলিপরিমজ্জনন্তি উক্খলিপরিপুঞ্ছনং দুস্সীলোতি নিস্সীলো. দুব্বণ্ণতাযাতি গুণৰণ্ণাভাৰেন দুব্বণ্ণতায. দিট্ঠানুগতিং আপজ্জন্তীতি তেন কতং অনুকরোন্তি. ন মহপ্ফলং হোতীতি ৰিপাকফলেন মহপ্ফলং ন হোতি. ন মহানিসংসন্তি ৰিপাকানিসংসেনেৰ ন মহানিসংসং. অপ্পগ্ঘতাযাতি ৰিপাকগ্ঘেন অপ্পগ্ঘতায. কাসিকং ৰত্থন্তি তীহি কপ্পাসঅংসূহি সুত্তং কন্তিত্ৰা কতৰত্থং, তঞ্চ খো কাসিরট্ঠেযেৰ উট্ঠিতং. সেসং উত্তানমেৰ. সীলং পনেত্থ মিস্সকং কথিতন্তি.

৯. লোণকপল্লসুত্তৰণ্ণনা

১০১. নৰমে যথা যথাযন্তি যথা যথা অযং. তথা তথা তন্তি তথা তথা তং কম্মং. ইদং ৰুত্তং হোতি – যো এৰং ৰদেয্য – ‘‘যথা যথা কম্মং করোতি, তথা তথাস্স ৰিপাকং পটিসংৰেদিযতেৰ. ন হি সক্কা কতস্স কম্মস্স ৰিপাকং পটিসেধেতুং. তস্মা যত্তকং কম্মং করোতি, তত্তকস্স ৰিপাকং পটিসংৰেদিযতেৰা’’তি. এৰং সন্তন্তি এৰং সন্তে. ব্রহ্মচরিযৰাসো ন হোতীতি যং মগ্গভাৰনতো পুব্বে উপপজ্জৰেদনীযং কম্মং কতং, তস্স অৰস্সং পটিসংৰেদনীযত্তা ব্রহ্মচরিযং ৰুত্থম্পি অৰুত্থমেৰ হোতি. ওকাসো ন পঞ্ঞাযতি সম্মা দুক্খস্স অন্তকিরিযাযাতি যস্মা চ এৰং সন্তে তেন কম্মাযূহনঞ্চেৰ ৰিপাকানুভৰনা চ হোতি, তস্মা হেতুনা নযেন ৰট্টদুক্খস্স অন্তকিরিযায ওকাসো ন পঞ্ঞাযতি নাম.

যথা যথা ৰেদনীযন্তি যেন যেনাকারেন ৰেদিতব্বং. তথা তথাস্স ৰিপাকং পটিসংৰেদিযতীতি তেন তেনাকারেন অস্স ৰিপাকং পচ্চনুভোতি. ইদং ৰুত্তং হোতি – যদেতং সত্তসু জৰনেসু পঠমজৰনকম্মং সতি পচ্চযে ৰিপাকৰারং লভন্তমেৰ দিট্ঠধম্মৰেদনীযং হোতি, অসতি অহোসিকম্মং নাম. যঞ্চ সত্তমজৰনকম্মং সতি পচ্চযে উপপজ্জৰেদনীযং হোতি, অসতি অহোসিকম্মং নাম. যঞ্চ মজ্ঝে পঞ্চজৰনকম্মং যাৰ সংসারপ্পৰত্তি, তাৰ অপরপরিযাযৰেদনীযং নাম হোতি. এতেসু আকারেসু যেন যেনাকারেন ৰেদিতব্বং কম্মং অযং পুরিসো করোতি, তেন তেনেৰস্স ৰিপাকং পটিসংৰেদিযতি নাম. অট্ঠকথাযঞ্হি লদ্ধৰিপাকৰারমেৰ কম্মং যথাৰেদনীযং কম্মং নামাতি ৰুত্তং. এৰং সন্তং, ভিক্খৰে, ব্রহ্মচরিযৰাসো হোতীতি কম্মক্খযকরস্স ব্রহ্মচরিযস্স খেপেতব্বকম্মসম্ভৰতো ৰাসো নাম হোতি, ৰুত্থং সুৰুত্থমেৰ হোতীতি অত্থো. ওকাসো পঞ্ঞাযতি সম্মা দুক্খস্স অন্তকিরিযাযাতি যস্মা এৰং সন্তে তেন তেন মগ্গেন অভিসঙ্খারৰিঞ্ঞাণস্স নিরোধেন তেসু তেসু ভৰেসু আযতিং ৰট্টদুক্খং ন উপ্পজ্জতি, তস্মা ওকাসো পঞ্ঞাযতি সম্মা দুক্খস্স অন্তকিরিযায.

ইদানি তং যথাৰেদনীযকম্মসভাৰং দস্সেন্তো ইধ, ভিক্খৰে, একচ্চস্সাতিআদিমাহ. তত্থ অপ্পমত্তকন্তি পরিত্তং থোকং মন্দং লামকং. তাদিসংযেৰাতি তংসরিক্খকমেৰ. দিট্ঠধম্মৰেদনীযন্তি তস্মিং কম্মেযেৰ দিট্ঠধম্মে ৰিপচ্চিতব্বং ৰিপাকৰারং লভন্তং দিট্ঠধম্মৰেদনীযং হোতি. নাণুপি খাযতীতি দুতিযে অত্তভাৰে অণুপি ন খাযতি, অণুমত্তম্পি দুতিযে অত্তভাৰে ৰিপাকং ন দেতীতি অত্থো. বহুদেৰাতি বহুকং পন ৰিপাকং কিমেৰ দস্সতীতি অধিপ্পাযো. অভাৰিতকাযোতিআদীহি কাযভাৰনারহিতো ৰট্টগামী পুথুজ্জনো দস্সিতো. পরিত্তোতি পরিত্তগুণো. অপ্পাতুমোতি আতুমা ৰুচ্চতি অত্তভাৰো, তস্মিং মহন্তেপি গুণপরিত্ততায অপ্পাতুমোযেৰ. অপ্পদুক্খৰিহারীতি অপ্পকেনপি পাপেন দুক্খৰিহারী. ভাৰিতকাযোতিআদীহি খীণাসৰো দস্সিতো. সো হি কাযানুপস্সনাসঙ্খাতায কাযভাৰনায ভাৰিতকাযো নাম. কাযস্স ৰা ৰড্ঢিতত্তা ভাৰিতকাযো. ভাৰিতসীলোতি ৰড্ঢিতসীলো. সেসপদদ্ৰযেপি এসেৰ নযো. পঞ্চদ্ৰারভাৰনায ৰা ভাৰিতকাযো. এতেন ইন্দ্রিযসংৰরসীলং ৰুত্তং, ভাৰিতসীলোতি ইমিনা সেসানি তীণি সীলানি. অপরিত্তোতি ন পরিত্তগুণো. মহত্তোতি অত্তভাৰে পরিত্তেপি গুণমহন্ততায মহত্তো. অপ্পমাণৰিহারীতি খীণাসৰস্সেতং নামমেৰ. সো হি পমাণকরানং রাগাদীনং অভাৰেন অপ্পমাণৰিহারী নাম.

পরিত্তেতি খুদ্দকে. উদকমল্লকেতি উদকসরাৰে. ওরব্ভিকোতি উরব্ভসামিকো. উরব্ভঘাতকোতি সূনকারো. জাপেতুং ৰাতি ধনজানিযা জাপেতুং. ঝাপেতুন্তিপি পাঠো, অযমেৰত্থো. যথাপচ্চযং ৰা কাতুন্তি যথা ইচ্ছতি, তথা কাতুং. উরব্ভধনন্তি এল়কঅগ্ঘনকমূলং. সো পনস্স সচে ইচ্ছতি, দেতি. নো চে ইচ্ছতি, গীৰাযং গহেত্ৰা নিক্কড্ঢাপেতি. সেসং ৰুত্তনযেনেৰ ৰেদিতব্বং. ইমস্মিং পন সুত্তে ৰট্টৰিৰট্টং কথিতন্তি.

১০. পংসুধোৰকসুত্তৰণ্ণনা

১০২. দসমে ধোৰতীতি ৰিক্খালেতি. সন্ধোৰতীতি সুট্ঠু ধোৰতি, পুনপ্পুনং ধোৰতি. নিদ্ধোৰতীতি নিগ্গণ্হিত্ৰা ধোৰতি. অনিদ্ধন্তকসাৰন্তি অনীহতদোসং অনপনীতকসাৰং. পভঙ্গূতি পভিজ্জনসভাৰং, অধিকরণীযং ঠপেত্ৰা মুট্ঠিকায পহটমত্তং ভিজ্জতি. পট্টিকাযাতি সুৰণ্ণপট্টকায. গীৰেয্যকেতি গীৰালঙ্কারে.

অধিচিত্তন্তি সমথৰিপস্সনাচিত্তং. অনুযুত্তস্সাতি ভাৰেন্তস্স. সচেতসোতি চিত্তসম্পন্নো. দব্বজাতিকোতি পণ্ডিতজাতিকো. কামৰিতক্কাদীসু কামে আরব্ভ উপ্পন্নো ৰিতক্কো কামৰিতক্কো. ব্যাপাদৰিহিংসসম্পযুত্তা ৰিতক্কা ব্যাপাদৰিহিংসৰিতক্কা নাম. ঞাতিৰিতক্কাদীসু ‘‘অম্হাকং ঞাতকা বহূ পুঞ্ঞৰন্তা’’তিআদিনা নযেন ঞাতকে আরব্ভ উপ্পন্নো ৰিতক্কো ঞাতিৰিতক্কো. ‘‘অসুকো জনপদো খেমো সুভিক্খো’’তিআদিনা নযেন জনপদমারব্ভ উপ্পন্নো ৰিতক্কো জনপদৰিতক্কো. ‘‘অহো ৰত মং পরে ন অৰজানেয্যু’’ন্তি এৰং উপ্পন্নো ৰিতক্কো অনৰঞ্ঞত্তিপটিসংযুত্তো ৰিতক্কো নাম. ধম্মৰিতক্কাৰসিস্সন্তীতি ধম্মৰিতক্কা নাম দসৰিপস্সনুপক্কিলেসৰিতক্কা. সো হোতি সমাধি ন চেৰ সন্তোতি সো অৰসিট্ঠধম্মৰিতক্কো ৰিপস্সনাসমাধি অৰূপসন্তকিলেসত্তা সন্তো ন হোতি. ন পণীতোতি ন অতপ্পকো. নপ্পটিপ্পস্সদ্ধিলদ্ধোতি ন কিলেসপটিপ্পস্সদ্ধিযা লদ্ধো. ন একোদিভাৰাধিগতোতি ন একগ্গভাৰপ্পত্তো. সসঙ্খারনিগ্গয্হৰারিতগতোতি সসঙ্খারেন সপ্পযোগেন কিলেসে নিগ্গণ্হিত্ৰা ৰারেত্ৰা ৰারিতো, ন কিলেসানং ছিন্নন্তে উপ্পন্নো, কিলেসে পন ৰারেত্ৰা উপ্পন্নো.

হোতি সো, ভিক্খৰে, সমযোতি এত্থ সমযো নাম উতুসপ্পাযং আহারসপ্পাযং সেনাসনসপ্পাযং পুগ্গলসপ্পাযং ধম্মস্সৰনসপ্পাযন্তি ইমেসং পঞ্চন্নং সপ্পাযানং পটিলাভকালো. যং তং চিত্তন্তি যস্মিং সমযে তং ৰিপস্সনাচিত্তং. অজ্ঝত্তংযেৰ সন্তিট্ঠতীতি অত্তনিযেৰ তিট্ঠতি. নিযকজ্ঝত্তঞ্হি ইধ অজ্ঝত্তং নাম. গোচরজ্ঝত্তম্পি ৰট্টতি. পুথুত্তারম্মণং পহায একস্মিং নিব্বানগোচরেযেৰ তিট্ঠতীতি ৰুত্তং হোতি. সন্নিসীদতীতি সুট্ঠু নিসীদতি. একোদি হোতীতি একগ্গং হোতি. সমাধিযতীতি সম্মা আধিযতি. সন্তোতিআদীসু পচ্চনীককিলেসৰূপসমেন সন্তো. অতপ্পকট্ঠেন পণীতো. কিলেসপটিপ্পস্সদ্ধিযা লদ্ধত্তা পটিপ্পস্সদ্ধলদ্ধো. একগ্গভাৰং গতত্তা একোদিভাৰাধিগতো. কিলেসানং ছিন্নন্তে উপ্পন্নত্তা ন সপ্পযোগেন কিলেসে নিগ্গণ্হিত্ৰা ৰারেত্ৰা ৰারিতোতি ন সসঙ্খারনিগ্গয্হৰারিতগতো. এত্তাৰতা অযং ভিক্খু ৰিৰট্টেত্ৰা অরহত্তং পত্তো নাম হোতি.

ইদানি খীণাসৰস্স সতো অভিঞ্ঞাপটিপদং দস্সেন্তো যস্স যস্স চাতিআদিমাহ. তত্থ অভিঞ্ঞা সচ্ছিকরণীযস্সাতি অভিজানিত্ৰা পচ্চক্খং কাতব্বস্স. সতি সতিআযতনেতি পুব্বহেতুসঙ্খাতে চেৰ ইদানি চ পটিলদ্ধব্বে অভিঞ্ঞাপাদকজ্ঝানাদিভেদে চ সতি সতিকারণে. ৰিত্থারতো পন অযং অভিঞ্ঞাকথা ৰিসুদ্ধিমগ্গে (ৰিসুদ্ধি. ২.৩৬৫ আদযো) ৰুত্তনযেনেৰ ৰেদিতব্বা. আসৰানং খযাতিআদি চেত্থ ফলসমাপত্তিৰসেন ৰুত্তন্তি ৰেদিতব্বং.

১১. নিমিত্তসুত্তৰণ্ণনা

১০৩. একাদসমেপি অধিচিত্তং সমথৰিপস্সনাচিত্তমেৰ. তীণি নিমিত্তানীতি তীণি কারণানি. কালেন কালন্তি কালে কালে, যুত্তকালেতি অত্থো. কালেন কালং সমাধিনিমিত্তং মনসিকাতব্বন্তিআদীসু তং তং কালং সল্লক্খেত্ৰা একগ্গতায যুত্তকালে একগ্গতা মনসিকাতব্বা. একগ্গতা হি ইধ সমাধিনিমিত্তন্তি ৰুত্তা. তত্র ৰচনত্থো – সমাধিযেৰ নিমিত্তং সমাধিনিমিত্তং. সেসপদদ্ৰযেপি এসেৰ নযো. পগ্গহোতি পন ৰীরিযস্স নামং, উপেক্খাতি মজ্ঝত্তভাৰস্স. তস্মা ৰীরিযস্স যুত্তকালে ৰীরিযং মনসিকাতব্বং, মজ্ঝত্তভাৰস্স যুত্তকালে মজ্ঝত্তভাৰে ঠাতব্বন্তি. ঠানং তং চিত্তং কোসজ্জায সংৰত্তেয্যাতি কারণং ৰিজ্জতি যেন তং চিত্তং কোসজ্জভাৰে তিট্ঠেয্য. ইতরেসুপি এসেৰ নযো. উপেক্খানিমিত্তংযেৰ মনসি করেয্যাতি এত্থ চ ঞাণজৰং উপেক্খেয্যাতি অযমত্থো. আসৰানং খযাযাতি অরহত্তফলত্থায.

উক্কং বন্ধেয্যাতি অঙ্গারকপল্লং সজ্জেয্য. আলিম্পেয্যাতি তত্থ অঙ্গারে পক্খিপিত্ৰা অগ্গিং দত্ৰা নাল়িকায ধমন্তো অগ্গিং গাহাপেয্য. উক্কামুখে পক্খিপেয্যাতি অঙ্গারে ৰিযূহিত্ৰা অঙ্গারমত্থকে ৰা ঠপেয্য, মূসায ৰা পক্খিপেয্য. অজ্ঝুপেক্খতীতি পক্কাপক্কভাৰং উপধারেতি.

সম্মা সমাধিযতি আসৰানং খযাযাতি অরহত্তফলত্থায সম্মা ঠপীযতি. এত্তাৰতা হি ৰিপস্সনং ৰড্ঢেত্ৰা অরহত্তপ্পত্তো ভিক্খু দস্সিতো. ইদানি তস্স খীণাসৰস্স অভিঞ্ঞায পটিপদং দস্সেন্তো যস্স যস্স চাতিআদিমাহ. তং হেট্ঠা ৰুত্তনযেনেৰ ৰেদিতব্বং.

লোণকপল্লৰগ্গো পঞ্চমো.