(৯) ৪. সমণৰগ্গো

১. সমণসুত্তৰণ্ণনা

৮২. চতুত্থস্স পঠমে সমণিযানীতি সমণসন্তকানি. সমণকরণীযানীতি সমণেন কত্তব্বকিচ্চানি. অধিসীলসিক্খাসমাদানন্তিআদীসু সমাদানং ৰুচ্চতি গহণং, অধিসীলসিক্খায সমাদানং গহণং পূরণং অধিসীলসিক্খাসমাদানং. সেসপদদ্ৰযেপি এসেৰ নযো. এত্থ চ সীলং অধিসীলং, চিত্তং অধিচিত্তং, পঞ্ঞা অধিপঞ্ঞাতি অযং ৰিভাগো ৰেদিতব্বো. তত্থ পঞ্চসীলং সীলং নাম, তং উপাদায দসসীলং অধিসীলং নাম, তম্পি উপাদায চতুপারিসুদ্ধিসীলং অধিসীলং নাম. অপিচ সব্বম্পি লোকিযসীলং সীলং নাম, লোকুত্তরসীলং অধিসীলং, তদেৰ সিক্খিতব্বতো সিক্খাতি ৰুচ্চতি. কামাৰচরচিত্তং পন চিত্তং নাম, তং উপাদায রূপাৰচরং অধিচিত্তং নাম, তম্পি উপাদায অরূপাৰচরং অধিচিত্তং নাম. অপিচ সব্বম্পি লোকিযচিত্তং চিত্তমেৰ, লোকুত্তরং অধিচিত্তং. পঞ্ঞাযপি এসেৰ নযো. তস্মাতি যস্মা ইমানি তীণি সমণকরণীযানি, তস্মা. তিব্বোতি বহলো. ছন্দোতি কত্তুকম্যতাকুসলচ্ছন্দো. ইতি ইমস্মিং সুত্তন্তে তিস্সো সিক্খা লোকিযলোকুত্তরা কথিতাতি.

২. গদ্রভসুত্তৰণ্ণনা

৮৩. দুতিযে পিট্ঠিতো পিট্ঠিতোতি পচ্ছতো পচ্ছতো. অহম্পি দম্মো অহম্পি দম্মোতি অহম্পি ‘‘দম্মো দম্মমানো’’তি ৰদমানো গাৰীতি. সেয্যথাপি গুন্নন্তি যথা গাৰীনং. গাৰো হি কাল়াপি রত্তাপি সেতাদিৰণ্ণাপি হোন্তি, গদ্রভস্স পন তাদিসো ৰণ্ণো নাম নত্থি. যথা চ ৰণ্ণো, এৰং সরোপি পদম্পি অঞ্ঞাদিসমেৰ. সেসং উত্তানত্থমেৰ. ইমস্মিম্পি সুত্তে তিস্সো সিক্খা মিস্সিকাৰ কথিতাতি.

৩. খেত্তসুত্তৰণ্ণনা

৮৪. ততিযে পটিকচ্চেৰাতি পঠমমেৰ. সুকট্ঠং করোতীতি নঙ্গলেন সুকট্ঠং করোতি. সুমতিকতন্তি মতিযা সুট্ঠু সমীকতং. কালেনাতি ৰপিতব্বযুত্তকালেন. সেসং উত্তানমেৰ. ইধাপি তিস্সো সিক্খা মিস্সিকাৰ কথিতা.

৪. ৰজ্জিপুত্তসুত্তৰণ্ণনা

৮৫. চতুত্থে ৰজ্জিপুত্তকোতি ৰজ্জিরাজকুলস্স পুত্তো. দিযড্ঢসিক্খাপদসতন্তি পণ্ণাসাধিকং সিক্খাপদসতং. তস্মিং সমযে পঞ্ঞত্তানি সিক্খাপদানেৰ সন্ধাযেতং ৰুত্তং. সো কির ভিক্খু অজ্জৰসম্পন্নো উজুজাতিকো অৰঙ্কো অকুটিলো, তস্মা ‘‘অহং এত্তকানি সিক্খাপদানি রক্খিতুং সক্কুণেয্যং ৰা ন ৰা’’তি চিন্তেত্ৰা সত্থু আরোচেসি. সক্কোমহন্তি সক্কোমি অহং. সো কির ‘‘এত্তকেসু সিক্খাপদেসু সিক্খন্তস্স অগরু তীসু সিক্খাসু সিক্খিতু’’ন্তি মঞ্ঞমানো এৰমাহ. অথ ভগৰা যথা নাম পঞ্ঞাস তিণকলাপিযো উক্খিপিতুং অসক্কোন্তস্স কলাপিযসতং বন্ধিত্ৰা সীসে ঠপেয্য, এৰমেৰ একিস্সাপি সিক্খায সিক্খিতুং অসক্কোন্তস্স অপরা দ্ৰেপি সিক্খা উপরি পক্খিপন্তো তস্মাতিহ ত্ৰং ভিক্খূতিআদিমাহ. সুখুমালো কির উত্তরো নাম জানপদমনুস্সো লোহপাসাদৰিহারে ৰসতি. অথ নং দহরভিক্খূ আহংসু – ‘‘উত্তর, অগ্গিসালা ওৰস্সতি, তিণং কপ্পিযং কত্ৰা দেহী’’তি. তং আদায অটৰিং গন্ত্ৰা তেন লাযিতং তিণংযেৰ করল়ে বন্ধিত্ৰা ‘‘পঞ্ঞাস করল়ে গহেতুং সক্খিস্সসি উত্তরা’’তি আহংসু. সো ‘‘ন সক্খিস্সামী’’তি আহ. অসীতিং পন সক্খিস্সসীতি? ন সক্খিস্সামি, ভন্তেতি. একং করল়সতং সক্খিস্সসীতি? আম, ভন্তে, গণ্হিস্সামীতি. দহরভিক্খূ করল়সতং বন্ধিত্ৰা তস্স সীসে ঠপযিংসু. সো উক্খিপিত্ৰা নিত্থুনন্তো গন্ত্ৰা অগ্গিসালায সমীপে পাতেসি. অথ নং ভিক্খূ ‘‘কিলন্তরূপোসি উত্তরা’’তি আহংসু. আম, ভন্তে, দহরা ভিক্খূ মং ৰঞ্চেসুং, ইমং একম্পি করল়সতং উক্খিপিতুং অসক্কোন্তং মং ‘‘পণ্ণাস করল়ে উক্খিপাহী’’তি ৰদিংসু. আম, উত্তর, ৰঞ্চযিংসু তন্তি. এৰং সম্পদমিদং ৰেদিতব্বং. ইধাপি তিস্সো সিক্খা মিস্সিকাৰ কথিতা.

৫. সেক্খসুত্তৰণ্ণনা

৮৬. পঞ্চমে উজুমগ্গানুসারিনোতি উজুমগ্গো ৰুচ্চতি অরিযমগ্গো, তং অনুস্সরন্তস্স পটিপন্নকস্সাতি অত্থো. খযস্মিং পঠমং ঞাণন্তি পঠমমেৰ মগ্গঞাণং উপ্পজ্জতি. মগ্গো হি কিলেসানং খেপনতো খযো নাম, তংসম্পযুত্তং ঞাণং খযস্মিং ঞাণং নাম. ততো অঞ্ঞা অনন্তরাতি ততো চতুত্থমগ্গঞাণতো অনন্তরা অঞ্ঞা উপ্পজ্জতি, অরহত্তফলং উপ্পজ্জতীতি অত্থো. অঞ্ঞাৰিমুত্তস্সাতি অরহত্তফলৰিমুত্তিযা ৰিমুত্তস্স. ঞাণং ৰে হোতীতি পচ্চৰেক্খণঞাণং হোতি. ইতি সুত্তেপি গাথাসুপি সত্ত সেখা কথিতা. অৰসানে পন খীণাসৰো দস্সিতোতি.

৬. পঠমসিক্খাসুত্তৰণ্ণনা

৮৭. ছট্ঠে অত্তকামাতি অত্তনো হিতকামা. যত্থেতং সব্বং সমোধানং গচ্ছতীতি যাসু সিক্খাসু সব্বমেতং দিযড্ঢসিক্খাপদসতং সঙ্গহং গচ্ছতি. পরিপূরকারী হোতীতি সমত্তকারী হোতি. মত্তসো কারীতি পমাণেন কারকো, সব্বেন সব্বং কাতুং ন সক্কোতীতি অত্থো. খুদ্দানুখুদ্দকানীতি চত্তারি পারাজিকানি ঠপেত্ৰা সেসসিক্খাপদানি. তত্রাপি সঙ্ঘাদিসেসং খুদ্দকং, থুল্লচ্চযং অনুখুদ্দকং নাম. থুল্লচ্চযঞ্চ খুদ্দকং, পাচিত্তিযং অনুখুদ্দকং নাম, পাচিত্তিযঞ্চ খুদ্দকং, পাটিদেসনিযদুক্কটদুব্ভাসিতানি অনুখুদ্দকানি নাম. ইমে পন অঙ্গুত্তরমহানিকাযৰল়ঞ্জনকআচরিযা ‘‘চত্তারি পারাজিকানি ঠপেত্ৰা সেসানি সব্বানিপি খুদ্দানুখুদ্দকানী’’তি ৰদন্তি. তানি আপজ্জতিপি ৰুট্ঠাতিপীতি এত্থ পন খীণাসৰো তাৰ লোকৰজ্জং নাপজ্জতি, পণ্ণত্তিৰজ্জমেৰ আপজ্জতি. আপজ্জন্তো চ কাযেনপি ৰাচাযপি চিত্তেনপি আপজ্জতি. কাযেন আপজ্জন্তো কুটিকারসহসেয্যাদীনি আপজ্জতি, ৰাচায আপজ্জন্তো সঞ্চরিত্তপদসোধম্মাদীনি, চিত্তেন আপজ্জন্তো রূপিযপটিগ্গহণং আপজ্জতি. সেক্খেসুপি এসেৰ নযো. ন হি মেত্থ, ভিক্খৰে, অভব্বতা ৰুত্তাতি, ভিক্খৰে, ন হি মযা এত্থ এৰরূপং আপত্তিং আপজ্জনে চ ৰুট্ঠানে চ অরিযপুগ্গলস্স অভব্বতা কথিতা. আদিব্রহ্মচরিযকানীতি মগ্গব্রহ্মচরিযস্স আদিভূতানি চত্তারি মহাসীলসিক্খাপদানি. ব্রহ্মচরিযসারুপ্পানীতি তানিযেৰ চতুমগ্গব্রহ্মচরিযস্স সারুপ্পানি অনুচ্ছৰিকানি. তত্থাতি তেসু সিক্খাপদেসু. ধুৰসীলোতি নিবদ্ধসীলো. ঠিতসীলোতি পতিট্ঠিতসীলো. সোতাপন্নোতি সোতসঙ্খাতেন মগ্গেন ফলং আপন্নো. অৰিনিপাতধম্মোতি চতূসু অপাযেসু অপতনসভাৰো. নিযতোতি সোতাপত্তিমগ্গনিযামেন নিযতো. সম্বোধিপরাযণোতি উপরিমগ্গত্তযসম্বোধিপরাযণো.

তনুত্তাতি তনুভাৰো. সকদাগামিনো হি রাগাদযো অব্ভপটলং ৰিয মচ্ছিকাপত্তং ৰিয চ তনুকা হোন্তি, ন বহলা. ওরম্ভাগিযানন্তি হেট্ঠাভাগিযানং. সংযোজনানন্তি বন্ধনানং. পরিক্খযাতি পরিক্খযেন. ওপপাতিকো হোতীতি উপ্পন্নকো হোতি. তত্থ পরিনিব্বাযীতি হেট্ঠা অনোতরিত্ৰা উপরিযেৰ পরিনিব্বানধম্মো. অনাৰত্তিধম্মোতি যোনিগতিৰসেন অনাগমনধম্মো.

পদেসং পদেসকারীতিআদীসু পদেসকারী পুগ্গলো নাম সোতাপন্নো চ সকদাগামী চ অনাগামী চ, সো পদেসমেৰ সম্পাদেতি. পরিপূরকারী নাম অরহা, সো পরিপূরমেৰ সম্পাদেতি. অৰঞ্ঝানীতি অতুচ্ছানি সফলানি সউদ্রযানীতি অত্থো. ইধাপি তিস্সো সিক্খা মিস্সকাৰ কথিতা.

৭. দুতিযসিক্খাসুত্তৰণ্ণনা

৮৮. সত্তমে কোলংকোলোতি কুলা কুলং গমনকো. কুলন্তি চেত্থ ভৰো অধিপ্পেতো, তস্মা ‘‘দ্ৰে ৰা তীণি ৰা কুলানী’’তি এত্থপি দ্ৰে ৰা তযো ৰা ভৰেতি অত্থো ৰেদিতব্বো. অযঞ্হি দ্ৰে ৰা ভৰে সন্ধাৰতি তযো ৰা, উত্তমকোটিযা ছ ৰা. তস্মা দ্ৰে ৰা তীণি ৰা চত্তারি ৰা পঞ্চ ৰা ছ ৰাতি এৰমেত্থ ৰিকপ্পো দট্ঠব্বো. একবীজীতি একস্সেৰ ভৰস্স বীজং এতস্স অত্থীতি একবীজী. উদ্ধংসোতোতিআদীসু অত্থি উদ্ধংসোতো অকনিট্ঠগামী, অত্থি উদ্ধংসোতো ন অকনিট্ঠগামী, অত্থি ন উদ্ধংসোতো অকনিট্ঠগামী, অত্থি ন উদ্ধংসোতো ন অকনিট্ঠগামী. তত্থ যো ইধ অনাগামিফলং পত্ৰা অৰিহাদীসু নিব্বত্তো তত্থ যাৰতাযুকং ঠত্ৰা উপরূপরি নিব্বত্তিত্ৰা অকনিট্ঠং পাপুণাতি, অযং উদ্ধংসোতো অকনিট্ঠগামী নাম. যো পন অৰিহাদীসু নিব্বত্তো তত্থেৰ অপরিনিব্বাযিত্ৰা অকনিট্ঠম্পি অপ্পত্ৰা উপরিমব্রহ্মলোকে পরিনিব্বাযতি, অযং উদ্ধংসোতো ন অকনিট্ঠগামী নাম. যো ইতো চৰিত্ৰা অকনিট্ঠেযেৰ নিব্বত্ততি, অযং ন উদ্ধংসোতো অকনিট্ঠগামী নাম. যো পন অৰিহাদীসু চতূসু অঞ্ঞতরস্মিং নিব্বত্তিত্ৰা তত্থেৰ পরিনিব্বাযতি, অযং ন উদ্ধংসোতো ন অকনিট্ঠগামী নাম.

যত্থ কত্থচি উপ্পন্নো পন সসঙ্খারেন সপ্পযোগেন অরহত্তং পত্তো সসঙ্খারপরিনিব্বাযী নাম. অসঙ্খারেন অপ্পযোগেন পত্তো অসঙ্খারপরিনিব্বাযী নাম. যো পন কপ্পসহস্সাযুকেসু অৰিহেসু নিব্বত্তিত্ৰা পঞ্চমং কপ্পসতং অতিক্কমিত্ৰা অরহত্তং পত্তো, অযং উপহচ্চপরিনিব্বাযী নাম. অতপ্পাদীসুপি এসেৰ নযো. অন্তরাপরিনিব্বাযীতি যো আযুৰেমজ্ঝং অনতিক্কমিত্ৰা পরিনিব্বাযতি, সো তিৰিধো হোতি. কপ্পসহস্সাযুকেসু তাৰ অৰিহেসু নিব্বত্তিত্ৰা একো নিব্বত্তদিৰসেযেৰ অরহত্তং পাপুণাতি. নো চে নিব্বত্তদিৰসে পাপুণাতি, পঠমস্স পন কপ্পসতস্স মত্থকে পাপুণাতি, অযং পঠমো অন্তরাপরিনিব্বাযী. অপরো এৰং অসক্কোন্তো দ্ৰিন্নং কপ্পসতানং মত্থকে পাপুণাতি, অযং দুতিযো. অপরো এৰম্পি অসক্কোন্তো চতুন্নং কপ্পসতানং মত্থকে পাপুণাতি, অযং ততিযো অন্তরাপরিনিব্বাযী. সেসং ৰুত্তনযমেৰ.

ইমস্মিং পন ঠানে ঠত্ৰা চতুৰীসতি সোতাপন্না, দ্ৰাদস সকদাগামিনো, অট্ঠচত্তালীস অনাগামিনো, দ্ৰাদস চ অরহন্তো কথেতব্বা. ইমস্মিং হি সাসনে সদ্ধাধুরং পঞ্ঞাধুরন্তি দ্ৰে ধুরানি, দুক্খপটিপদাদন্ধাভিঞ্ঞাদযো চতস্সো পটিপদা. তত্থেকো সদ্ধাধুরেন অভিনিৰিসিত্ৰা সোতাপত্তিফলং পত্ৰা একমেৰ ভৰং নিব্বত্তিত্ৰা দুক্খস্সন্তং করোতি, অযমেকো একবীজী. সো পটিপদাৰসেন চতুব্বিধো হোতি. যথা চেস, এৰং পঞ্ঞাধুরেন অভিনিৰিট্ঠোপীতি অট্ঠ একবীজিনো. তথা কোলংকোলা সত্তক্খত্তুপরমা চাতি ইমে চতুৰীসতি সোতাপন্না নাম. তীসু পন ৰিমোক্খেসু সুঞ্ঞতৰিমোক্খেন সকদাগামিভূমিং পত্তা চতুন্নং পটিপদানং ৰসেন চত্তারো সকদাগামিনো, তথা অনিমিত্তৰিমোক্খেন পত্তা চত্তারো, অপ্পণিহিতৰিমোক্খেন পত্তা চত্তারোতি ইমে দ্ৰাদস সকদাগামিনো. অৰিহেসু পন তযো অন্তরাপরিনিব্বাযিনো, একো উপহচ্চপরিনিব্বাযী, একো উদ্ধংসোতো অকনিট্ঠগামীতি পঞ্চ অনাগামিনো, তে অসঙ্খারপরিনিব্বাযিনো পঞ্চ, সসঙ্খারপরিনিব্বাযিনো পঞ্চাতি দস হোন্তি, তথা অতপ্পাদীসু. অকনিট্ঠেসু পন উদ্ধংসোতো নত্থি, তস্মা তত্থ চত্তারো সসঙ্খারপরিনিব্বাযী, চত্তারো অসঙ্খারপরিনিব্বাযীতি অট্ঠ, ইমে অট্ঠচত্তালীস অনাগামিনো. যথা পন সকদাগামিনো, তথেৰ অরহন্তোপি দ্ৰাদস ৰেদিতব্বা. ইধাপি তিস্সো সিক্খা মিস্সিকাৰ কথিতা.

৮. ততিযসিক্খাসুত্তৰণ্ণনা

৮৯. অট্ঠমে তং ৰা পন অনভিসম্ভৰং অপ্পটিৰিজ্ঝন্তি তং অরহত্তং অপাপুণন্তো অপ্পটিৰিজ্ঝন্তো. ইমিনা নযেন সব্বট্ঠানেসু অত্থো ৰেদিতব্বো. ইধাপি তিস্সো সিক্খা মিস্সিকাৰ কথিতা. নৰমং উত্তানত্থমেৰ. ইধাপি তিস্সো সিক্খা মিস্সিকাৰ কথিতা.

১০. দুতিযসিক্খত্তযসুত্তৰণ্ণনা

৯১. দসমে আসৰানং খযাতি এত্থ অরহত্তমগ্গো অধিপঞ্ঞাসিক্খা নাম. ফলং পন সিক্খিতসিক্খস্স উপ্পজ্জনতো সিক্খাতি ন ৰত্তব্বং.

যথা পুরে তথা পচ্ছাতি যথা পঠমং তীসু সিক্খাসু সিক্খতি, পচ্ছা তথেৰ সিক্খতীতি অত্থো. দুতিযপদেপি এসেৰ নযো. যথা অধো তথা উদ্ধন্তি যথা হেট্ঠিমকাযং অসুভৰসেন পস্সতি, উপরিমকাযম্পি তথেৰ ফরতি. দুতিযপদেপি এসেৰ নযো. যথা দিৰা তথা রত্তিন্তি যথা দিৰা তিস্সো সিক্খা সিক্খতি, রত্তিম্পি তথেৰ সিক্খতীতি অত্থো. অভিভুয্য দিসা সব্বাতি সব্বা দিসা আরম্মণৰসেন অভিভৰিত্ৰা. অপ্পমাণসমাধিনাতি অরহত্তমগ্গসমাধিনা.

সেক্খন্তি সিক্খমানং সকরণীযং. পটিপদন্তি পটিপন্নকং. সংসুদ্ধচারিযন্তি সংসুদ্ধচরণং পরিসুদ্ধসীলং. সম্বুদ্ধন্তি চতুসচ্চবুদ্ধং. ধীরং পটিপদন্তগুন্তি খন্ধধীরআযতনধীরৰসেন ধীরং ধিতিসম্পন্নং পটিপত্তিযা অন্তং গতং. ৰিঞ্ঞাণস্সাতি চরিমকৰিঞ্ঞাণস্স. তণ্হাক্খযৰিমুত্তিনোতি তণ্হাক্খযৰিমুত্তিসঙ্খাতায অরহত্তফলৰিমুত্তিযা সমন্নাগতস্স. পজ্জোতস্সেৰ নিব্বানন্তি পদীপনিব্বানং ৰিয. ৰিমোক্খো হোতি চেতসোতি চিত্তস্স ৰিমুত্তি ৰিমুচ্চনা অপ্পৰত্তিভাৰো হোতি. তণ্হাক্খযৰিমুত্তিনো হি খীণাসৰস্স চরিমকৰিঞ্ঞাণনিরোধেন পরিনিব্বানং ৰিয চেতসো ৰিমোক্খো হোতি, ন গতট্ঠানং পঞ্ঞাযতি, অপণ্ণত্তিকভাৰূপগমোযেৰ হোতীতি অত্থো.

১১. সঙ্কৰাসুত্তৰণ্ণনা

৯২. একাদসমে সঙ্কৰা নাম কোসলানং নিগমোতি সঙ্কৰাতি এৰংনামকো কোসলরট্ঠে নিগমো. আৰাসিকোতি ভারহারো নৰে আৰাসে সমুট্ঠাপেতি, পুরাণে পটিজগ্গতি. সিক্খাপদপটিসংযুত্তাযাতি সিক্খাসঙ্খাতেহি পদেহি পটিসংযুত্তায, তীহি সিক্খাহি সমন্নাগতাযাতি অত্থো. সন্দস্সেতীতি সম্মুখে ৰিয কত্ৰা দস্সেতি. সমাদপেতীতি গণ্হাপেতি. সমুত্তেজেতীতি সমুস্সাহেতি. সম্পহংসেতীতি পটিলদ্ধগুণেহি ৰণ্ণং কথেন্তো ৰোদাপেতি. অধিসল্লিখতেতি অতিৰিয সল্লিখতি, অতিৰিয সল্লিখিতং কত্ৰা সণ্হং সণ্হং কথেতীতি অত্থো.

অচ্চযোতি অপরাধো. মং অচ্চগমাতি মং অতিক্কম্ম অধিভৰিত্ৰা পৰত্তো. অহুদেৰ অক্খন্তীতি অহোসিযেৰ অনধিৰাসনা. অহু অপ্পচ্চযোতি অহোসি অতুট্ঠাকারো. পটিগ্গণ্হাতূতি খমতু. আযতিং সংৰরাযাতি অনাগতে সংৰরত্থায, পুন এৰরূপস্স অপরাধস্স দোসস্স খলিতস্স ৰা অকরণত্থাযাতি অত্থো. তগ্ঘাতি একংসেন. যথাধম্মং পটিকরোসীতি যথা ধম্মো ঠিতো, তথা করোসি, খমাপেসীতি ৰুত্তং হোতি. তং তে মযং পটিগ্গণ্হামাতি তং তৰ অপরাধং মযং খমাম. ৰুদ্ধিহেসা, কস্সপ, অরিযস্স ৰিনযেতি এসা কস্সপ বুদ্ধস্স ভগৰতো সাসনে ৰুদ্ধি নাম. কতমা? যাযং অচ্চযং অচ্চযতো দিস্ৰা যথাধম্মং পটিকরিত্ৰা আযতিং সংৰরাপজ্জনা. দেসনং পন পুগ্গলাধিট্ঠানং করোন্তো ‘‘যো অচ্চযং অচ্চযতো দিস্ৰা যথাধম্মং পটিকরোতি, আযতিং সংৰরং আপজ্জতী’’তি আহ. ন সিক্খাকামোতি তিস্সো সিক্খা ন কামেতি ন পত্থেতি ন পিহেতি. সিক্খাসমাদানস্সাতি সিক্খাপরিপূরণস্স. ন ৰণ্ণৰাদীতি গুণং ন কথেতি. কালেনাতি যুত্তপ্পযুত্তকালেন. সেসমেত্থ উত্তানত্থমেৰাতি.

সমণৰগ্গো চতুত্থো.