৯. দিট্ঠসুতাদিদস্সনৰারো

১০৩৬. পঞ্চন্নং খন্ধানং কতি দিট্ঠা, কতি সুতা, কতি মুতা, কতি ৰিঞ্ঞাতা, কতি ন দিট্ঠা ন সুতা ন মুতা ন ৰিঞ্ঞাতা…পে… সত্তন্নং চিত্তানং কতি দিট্ঠা, কতি সুতা, কতি মুতা, কতি ৰিঞ্ঞাতা, কতি ন দিট্ঠা ন সুতা ন মুতা ন ৰিঞ্ঞাতা?

১০৩৭. রূপক্খন্ধো সিযা দিট্ঠো, সিযা সুতো, সিযা মুতো, সিযা ৰিঞ্ঞাতো, সিযা ন দিট্ঠো ন সুতো ন মুতো, ৰিঞ্ঞাতো. চত্তারো খন্ধা ন দিট্ঠা ন সুতা ন মুতা, ৰিঞ্ঞাতা.

রূপাযতনং দিট্ঠং, ন সুতং ন মুতং, ৰিঞ্ঞাতং. সদ্দাযতনং ন দিট্ঠং, সুতং, ন মুতং, ৰিঞ্ঞাতং. গন্ধাযতনং… রসাযতনং… ফোট্ঠব্বাযতনং ন দিট্ঠং ন সুতং, মুতং, ৰিঞ্ঞাতং. সত্তাযতনা ন দিট্ঠা ন সুতা ন মুতা, ৰিঞ্ঞাতা.

রূপধাতু দিট্ঠা, ন সুতা ন মুতা, ৰিঞ্ঞাতা. সদ্দধাতু ন দিট্ঠা, সুতা, ন মুতা, ৰিঞ্ঞাতা. গন্ধধাতু… রসধাতু… ফোট্ঠব্বধাতু ন দিট্ঠা ন সুতা, মুতা, ৰিঞ্ঞাতা. তেরস ধাতুযো ন দিট্ঠা ন সুতা ন মুতা, ৰিঞ্ঞাতা.

তীণি সচ্চানি ন দিট্ঠা ন সুতা ন মুতা, ৰিঞ্ঞাতা. দুক্খসচ্চং সিযা দিট্ঠং, সিযা সুতং, সিযা মুতং, সিযা ৰিঞ্ঞাতং, সিযা ন দিট্ঠং ন সুতং ন মুতং, ৰিঞ্ঞাতং.

বাৰীসতিন্দ্রিযা ন দিট্ঠা ন সুতা ন মুতা, ৰিঞ্ঞাতা. নৰ হেতূ ন দিট্ঠা ন সুতা ন মুতা, ৰিঞ্ঞাতা. চত্তারো আহারা ন দিট্ঠা ন সুতা ন মুতা, ৰিঞ্ঞাতা. সত্ত ফস্সা ন দিট্ঠা ন সুতা ন মুতা, ৰিঞ্ঞাতা. সত্ত ৰেদনা… সত্ত সঞ্ঞা… সত্ত চেতনা… সত্ত চিত্তা ন দিট্ঠা ন সুতা ন মুতা, ৰিঞ্ঞাতা.