১০. তিকাদিদস্সনৰারো

১. কুসলত্তিকং

১০৩৮. পঞ্চন্নং খন্ধানং কতি কুসলা, কতি অকুসলা, কতি অব্যাকতা…পে… সত্তন্নং চিত্তানং কতি কুসলা, কতি অকুসলা, কতি অব্যাকতা?

রূপক্খন্ধো অব্যাকতো. চত্তারো খন্ধা সিযা কুসলা, সিযা অকুসলা, সিযা অব্যাকতা. দসাযতনা অব্যাকতা. দ্ৰাযতনা সিযা কুসলা, সিযা অকুসলা, সিযা অব্যাকতা. সোল়স ধাতুযো অব্যাকতা. দ্ৰে ধাতুযো সিযা কুসলা, সিযা অকুসলা, সিযা অব্যাকতা. সমুদযসচ্চং অকুসলং. মগ্গসচ্চং কুসলং. নিরোধসচ্চং অব্যাকতং. দুক্খসচ্চং সিযা কুসলং, সিযা অকুসলং, সিযা অব্যাকতং.

দসিন্দ্রিযা অব্যাকতা. দোমনস্সিন্দ্রিযং অকুসলং. অনঞ্ঞাতঞ্ঞস্সামীতিন্দ্রিযং কুসলং. চত্তারিন্দ্রিযা সিযা কুসলা, সিযা অব্যাকতা. ছ ইন্দ্রিযা সিযা কুসলা, সিযা অকুসলা, সিযা অব্যাকতা.

তযো কুসলহেতূ কুসলা. তযো অকুসলহেতূ অকুসলা. তযো অব্যাকতহেতূ অব্যাকতা. কবল়ীকারো আহারো অব্যাকতো. তযো আহারা সিযা কুসলা, সিযা অকুসলা, সিযা অব্যাকতা. ছ ফস্সা অব্যাকতা. মনোৰিঞ্ঞাণধাতুসম্ফস্সো সিযা কুসলো, সিযা অকুসলো, সিযা অব্যাকতো. ছ ৰেদনা… ছ সঞ্ঞা… ছ চেতনা… ছ চিত্তা অব্যাকতা. মনোৰিঞ্ঞাণধাতু সিযা কুসলা, সিযা অকুসলা, সিযা অব্যাকতা.

২. ৰেদনাতিকং

১০৩৯. পঞ্চন্নং খন্ধানং কতি সুখায ৰেদনায সম্পযুত্তা, কতি দুক্খায ৰেদনায সম্পযুত্তা, কতি অদুক্খমসুখায ৰেদনায সম্পযুত্তা…পে… সত্তন্নং চিত্তানং কতি সুখায ৰেদনায সম্পযুত্তা, কতি দুক্খায ৰেদনায সম্পযুত্তা, কতি অদুক্খমসুখায ৰেদনায সম্পযুত্তা?

দ্ৰে খন্ধা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি. তযো খন্ধা সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা.

দসাযতনা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি. মনাযতনং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং. ধম্মাযতনং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং, সিযা ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি.

দস ধাতুযো ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি. পঞ্চ ধাতুযো অদুক্খমসুখায ৰেদনায সম্পযুত্তা, কাযৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা. মনোৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা. ধম্মধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা, সিযা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি.

দ্ৰে সচ্চা সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা. নিরোধসচ্চং ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি. দুক্খসচ্চং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং, সিযা ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি.

দ্ৰাদসিন্দ্রিযা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি. ছ ইন্দ্রিযা সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা. তীণিন্দ্রিযা সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা. জীৰিতিন্দ্রিযং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং, সিযা ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি.

দোসো অকুসলহেতু দুক্খায ৰেদনায সম্পযুত্তো. সত্ত হেতূ সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা. মোহো অকুসলহেতু সিযা সুখায ৰেদনায সম্পযুত্তো, সিযা দুক্খায ৰেদনায সম্পযুত্তো, সিযা দুক্খমসুখায ৰেদনায সম্পযুত্তো.

কবল়ীকারো আহারো ন ৰত্তব্বো সুখায ৰেদনায সম্পযুত্তোতি পি, দুক্খায ৰেদনায সম্পযুত্তোতিপি, অদুক্খমসুখায ৰেদনায সম্পযুত্তোতিপি. তযো আহারা সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা.

পঞ্চ ফস্সা অদুক্খমসুখায ৰেদনায সম্পযুত্তা. কাযৰিঞ্ঞাণধাতুসম্ফস্সো সিযা সুখায ৰেদনায সম্পযুত্তো, সিযা দুক্খায ৰেদনায সম্পযুত্তো. মনোৰিঞ্ঞাণধাতুসম্ফস্সো সিযা সুখায ৰেদনায সম্পযুত্তো, সিযা দুক্খায ৰেদনায সম্পযুত্তো, সিযা অদুক্খমসুখায ৰেদনায সম্পযুত্তো.

সত্ত ৰেদনা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি. পঞ্চ সঞ্ঞা… পঞ্চ চেতনা… পঞ্চ চিত্তা অদুক্খমসুখায ৰেদনায সম্পযুত্তা, কাযৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা. মনোৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা.

৩. ৰিপাকত্তিকং

১০৪০. পঞ্চন্নং খন্ধানং কতি ৰিপাকা, কতি ৰিপাকধম্মধম্মা, কতি নেৰৰিপাকনৰিপাকধম্মধম্মা…পে… সত্তন্নং চিত্তানং কতি ৰিপাকা, কতি ৰিপাকধম্মধম্মা, কতি নেৰৰিপাকনৰিপাকধম্মধম্মা?

রূপক্খন্ধো নেৰৰিপাকনৰিপাকধম্মধম্মো. চত্তারো খন্ধা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা.

দসাযতনা নেৰৰিপাকনৰিপাকধম্মধম্মা. দ্ৰাযতনা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা.

দস ধাতুযো নেৰৰিপাকনৰিপাকধম্মধম্মা. পঞ্চ ধাতুযো ৰিপাকা. মনোধাতু সিযা ৰিপাকা, সিযা নেৰৰিপাকনৰিপাকধম্মধম্মা. দ্ৰে ধাতুযো সিযা ৰিপাকা সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা.

দ্ৰে সচ্চা ৰিপাকধম্মধম্মা. নিরোধসচ্চং নেৰৰিপাকনৰিপাকধম্মধম্মং. দুক্খসচ্চং সিযা ৰিপাকং, সিযা ৰিপাকধম্মধম্মং, সিযা নেৰৰিপাকনৰিপাকধম্মধম্মং.

সত্তিন্দ্রিযা নেৰৰিপাকনৰিপাকধম্মধম্মা. তীণিন্দ্রিযা ৰিপাকা. দ্ৰিন্দ্রিযা ৰিপাকধম্মধম্মা. অঞ্ঞিন্দ্রিযং সিযা ৰিপাকং, সিযা ৰিপাকধম্মধম্মং. নৰিন্দ্রিযা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা.

ছ হেতূ ৰিপাকধম্মধম্মা. তযো অব্যাকতহেতূ সিযা ৰিপাকা, সিযা নেৰৰিপাকনৰিপাকধম্মধম্মা.

কবল়ীকারো আহারো নেৰৰিপাকনৰিপাকধম্মধম্মো. তযো আহারা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা. পঞ্চ ফস্সা ৰিপাকা. মনোধাতুসম্ফস্সো সিযা ৰিপাকো, সিযা নেৰৰিপাকনৰিপাকধম্মধম্মো. মনোৰিঞ্ঞাণধাতুসম্ফস্সো সিযা ৰিপাকো, সিযা ৰিপাকধম্মধম্মো, সিযা নেৰৰিপাকনৰিপাকধম্মধম্মো. পঞ্চ ৰেদনা… পঞ্চ সঞ্ঞা… পঞ্চ চেতনা… পঞ্চ চিত্তা ৰিপাকা. মনোধাতু সিযা ৰিপাকা, সিযা নেৰৰিপাকনৰিপাকধম্মধম্মা. মনোৰিঞ্ঞাণধাতু সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা.

৪. উপাদিন্নত্তিকং

১০৪১. পঞ্চন্নং খন্ধানং কতি উপাদিন্নুপাদানিযা, কতি অনুপাদিন্নুপাদানিযা, কতি অনুপাদিন্নঅনুপাদানিযা…পে… সত্তন্নং চিত্তানং কতি উপাদিন্নুপাদানিযা, কতি অনুপাদিন্নুপাদানিযা, কতি অনুপাদিন্নঅনুপাদানিযা?

রূপক্খন্ধো সিযা উপাদিন্নুপাদানিযো, সিযা অনুপাদিন্নুপাদানিযো ৪. চত্তারো খন্ধা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

পঞ্চাযতনা উপাদিন্নুপাদানিযা. সদ্দাযতনং অনুপাদিন্নুপাদানিযং. চত্তারো আযতনা সিযা উপাদিন্নুপাদানিযা, সিযা অনুপাদিন্নুপাদানিযা. দ্ৰাযতনা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

দস ধাতুযো উপাদিন্নুপাদানিযা. সদ্দধাতু অনুপাদিন্নুপাদানিযা. পঞ্চ ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা. দ্ৰে ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

সমুদযসচ্চং অনুপাদিন্নুপাদানিযং. দ্ৰে সচ্চা অনুপাদিন্নঅনুপাদানিযা. দুক্খসচ্চং সিযা উপাদিন্নুপাদানিযং, সিযা অনুপাদিন্নুপাদানিযং.

নৰিন্দ্রিযা উপাদিন্নুপাদানিযা. দোমনস্সিন্দ্রিযং অনুপাদিন্নুপাদানিযং. তীণিন্দ্রিযা অনুপাদিন্নঅনুপাদানিযা. নৰিন্দ্রিযা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা. তযো অকুসলহেতূ অনুপাদিন্নুপাদানিযা. তযো কুসলহেতূ সিযা অনুপাদিন্নুপাদানিযা, সিযা অনুপাদিন্নঅনুপাদানিযা. তযো অব্যাকতহেতূ সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

কবল়ীকারো আহারো সিযা উপাদিন্নুপাদানিযো, সিযা অনুপাদিন্নুপাদানিযো. তযো আহারা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

পঞ্চ ফস্সা উপাদিন্নুপাদানিযা. মনোধাতুসম্ফস্সো সিযা উপাদিন্নুপাদানিযো, সিযা অনুপাদিন্নুপাদানিযো. মনোৰিঞ্ঞাণধাতুসম্ফস্সো সিযা উপাদিন্নুপাদানিযো, সিযা অনুপাদিন্নুপাদানিযো, সিযা অনুপাদিন্নঅনুপাদানিযো. পঞ্চ ৰেদনা… পঞ্চ সঞ্ঞা… পঞ্চ চেতনা… পঞ্চ চিত্তা উপাদিন্নুপাদানিযা. মনোধাতু সিযা উপাদিন্নুপাদানিযা, সিযা অনুপাদিন্নুপাদানিযা. মনোৰিঞ্ঞাণধাতু সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

৫. ৰিতক্কত্তিকং

১০৪২. পঞ্চন্নং খন্ধানং কতি সৰিতক্কসৰিচারা, কতি অৰিতক্কৰিচারমত্তা, কতি অৰিতক্কঅৰিচারা…পে… সত্তন্নং চিত্তানং কতি সৰিতক্কসৰিচারা, কতি অৰিতক্কৰিচারমত্তা, কতি অৰিতক্কঅৰিচারা?

রূপক্খন্ধো অৰিতক্কঅৰিচারো. তযো খন্ধা সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা. সঙ্খারক্খন্ধো সিযা সৰিতক্কসৰিচারো, সিযা অৰিতক্কৰিচারমত্তো, সিযা অৰিতক্কঅৰিচারো সিযা ন ৰত্তব্বো সৰিতক্কসৰিচারোতিপি, অৰিতক্কৰিচারমত্তোতিপি, অৰিতক্কঅৰিচারোতিপি.

দসাযতনা অৰিতক্কঅৰিচারা. মনাযতনং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং. ধম্মাযতনং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং, সিযা ন ৰত্তব্বং সৰিতক্কসৰিচারন্তিপি, অৰিতক্কৰিচারমত্তন্তিপি, অৰিতক্কঅৰিচারন্তিপি.

পন্নরস ধাতুযো অৰিতক্কঅৰিচারা. মনোধাতু সৰিতক্কসৰিচারা. মনোৰিঞ্ঞাণধাতু সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা. ধম্মধাতু সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা, সিযা ন ৰত্তব্বা সৰিতক্কসৰিচারাতিপি, অৰিতক্কৰিচারমত্তাতিপি, অৰিতক্কঅৰিচারাতিপি.

সমুদযসচ্চং সৰিতক্কসৰিচারং. নিরোধসচ্চং অৰিতক্কঅৰিচারং. মগ্গসচ্চং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং. দুক্খসচ্চং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং, সিযা ন ৰত্তব্বং সৰিতক্কসৰিচারন্তিপি, অৰিতক্কৰিচারমত্তন্তিপি, অৰিতক্কঅৰিচারন্তিপি.

নৰিন্দ্রিযা অৰিতক্কঅৰিচারা. দোমনস্সিন্দ্রিযং সৰিতক্কসৰিচারং. উপেক্খিন্দ্রিযং সিযা সৰিতক্কসৰিচারং, সিযা অৰিতক্কঅৰিচারং. একাদসিন্দ্রিযা সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা.

তযো অকুসলহেতূ সৰিতক্কসৰিচারা. ছ হেতূ সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা. কবল়ীকারো আহারো অৰিতক্কঅৰিচারো. তযো আহারা সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা. পঞ্চ ফস্সা অৰিতক্কঅৰিচারা. মনোধাতুসম্ফস্সো সৰিতক্কসৰিচারো. মনোৰিঞ্ঞাণধাতুসম্ফস্সো সিযা সৰিতক্কসৰিচারো, সিযা অৰিতক্কৰিচারমত্তো, সিযা অৰিতক্কঅৰিচারো. পঞ্চ ৰেদনা… পঞ্চ সঞ্ঞা… পঞ্চ চেতনা… পঞ্চ চিত্তা অৰিতক্কঅৰিচারা মনোধাতু সৰিতক্কসৰিচারা, মনোৰিঞ্ঞাণধাতু সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা.

(১) রূপদুকং

১০৪৩. পঞ্চন্নং খন্ধানং কতি রূপা, কতি অরূপা…পে… সত্তন্নং চিত্তানং কতি রূপা, কতি অরূপা?

রূপক্খন্ধো রূপং. চত্তারো খন্ধা অরূপা. দসাযতনা রূপা. মনাযতনং অরূপং. ধম্মাযতনং সিযা রূপং, সিযা অরূপং. দস ধাতুযো রূপা. সত্ত ধাতুযো অরূপা. ধম্মধাতু সিযা রূপা, সিযা অরূপা. তীণি সচ্চানি অরূপা. দুক্খসচ্চং সিযা রূপং, সিযা অরূপং. সত্তিন্দ্রিযা রূপা. চুদ্দসিন্দ্রিযা অরূপা. জীৰিতিন্দ্রিযং সিযা রূপং, সিযা অরূপং. নৰ হেতূ অরূপা. কবল়ীকারো আহারো রূপং. তযো আহারা অরূপা. সত্ত ফস্সা অরূপা. সত্ত ৰেদনা… সত্ত সঞ্ঞা… সত্ত চেতনা সত্ত চিত্তা অরূপা.

(২) লোকিযদুকং

১০৪৪. পঞ্চন্নং খন্ধানং কতি লোকিযা, কতি লোকুত্তরা? দ্ৰাদসন্নং আযতনানং কতি লোকিযা, কতি লোকুত্তরা? অট্ঠারসন্নং ধাতূনং কতি লোকিযা, কতি লোকুত্তরা? চতুন্নং সচ্চানং কতি লোকিযা, কতি লোকুত্তরা…পে… সত্তন্নং চিত্তানং কতি লোকিযা, কতি লোকুত্তরা?

রূপক্খন্ধো লোকিযো. চত্তারো খন্ধা সিযা লোকিযা, সিযা লোকুত্তরা. দসাযতনা লোকিযা. দ্ৰে আযতনা সিযা লোকিযা, সিযা লোকুত্তরা. সোল়স ধাতুযো লোকিযা. দ্ৰে ধাতুযো সিযা লোকিযা, সিযা লোকুত্তরা. দ্ৰে সচ্চা লোকিযা. দ্ৰে সচ্চা লোকুত্তরা.

দসিন্দ্রিযা লোকিযা. তীণিন্দ্রিযা লোকুত্তরা. নৰিন্দ্রিযা সিযা লোকিযা, সিযা লোকুত্তরা. তযো অকুসলহেতূ লোকিযা. ছ হেতূ সিযা লোকিযা, সিযা লোকুত্তরা. কবল়ীকারো আহারো লোকিযো. তযো আহারা সিযা লোকিযা, সিযা লোকুত্তরা. ছ ফস্সা লোকিযা. মনোৰিঞ্ঞাণধাতুসম্ফস্সো সিযা লোকিযো, সিযা লোকুত্তরো. ছ ৰেদনা লোকিযা. মনোৰিঞ্ঞাণধাতুসম্ফস্সজা ৰেদনা সিযা লোকিযা, সিযা লোকুত্তরা. ছ সঞ্ঞা লোকিযা. মনোৰিঞ্ঞাণধাতুসম্ফস্সজা সঞ্ঞা সিযা লোকিযা, সিযা লোকুত্তরা. ছ চেতনা লোকিযা. মনোৰিঞ্ঞাণধাতুসম্ফস্সজা চেতনা সিযা লোকিযা, সিযা লোকুত্তরা. ছ চিত্তা লোকিযা. মনোৰিঞ্ঞাণধাতু সিযা লোকিযা, সিযা লোকুত্তরাতি.

অভিঞ্ঞা দ্ৰে সারম্মণা, দিট্ঠা কুসলৰেদনা;

ৰিপাকা চ উপাদিন্না, ৰিতক্কং রূপলোকিযাতি.

ধম্মহদযৰিভঙ্গো নিট্ঠিতো.

ৰিভঙ্গপকরণং নিট্ঠিতং.