৮. সারম্মণানারম্মণৰারো

১০৩২. পঞ্চন্নং খন্ধানং কতি সারম্মণা, কতি অনারম্মণা…পে… সত্তন্নং চিত্তানং কতি সারম্মণা, কতি অনারম্মণা?

১০৩৩. রূপক্খন্ধো অনারম্মণো. চত্তারো খন্ধা সারম্মণা.

দসাযতনা অনারম্মণা. মনাযতনং সারম্মণং. ধম্মাযতনং সিযা সারম্মণং, সিযা অনারম্মণং.

দস ধাতুযো অনারম্মণা. সত্ত ধাতুযো সারম্মণা. ধম্মধাতু সিযা সারম্মণা, সিযা অনারম্মণা.

দ্ৰে সচ্চা সারম্মণা. নিরোধসচ্চং অনারম্মণং. দুক্খসচ্চং সিযা সারম্মণং, সিযা অনারম্মণং.

সত্তিন্দ্রিযা অনারম্মণা. চুদ্দসিন্দ্রিযা সারম্মণা. জীৰিতিন্দ্রিযং সিযা সারম্মণং, সিযা অনারম্মণং. নৰ হেতূ সারম্মণা. কবল়ীকারো আহারো অনারম্মণো. তযো আহারা সারম্মণা. সত্ত ফস্সা… সত্ত ৰেদনা… সত্ত সঞ্ঞা… সত্ত চেতনা… সত্ত চিত্তা সারম্মণা.

১০৩৪. পঞ্চন্নং খন্ধানং কতি সারম্মণারম্মণা, কতি অনারম্মণারম্মণা…পে… সত্তন্নং চিত্তানং কতি সারম্মণারম্মণা, কতি অনারম্মণারম্মণা?

১০৩৫. রূপক্খন্ধো অনারম্মণো. চত্তারো খন্ধা সিযা সারম্মণারম্মণা, সিযা অনারম্মণারম্মণা.

দসাযতনা অনারম্মণা. মনাযতনং সিযা সারম্মণারম্মণং, সিযা অনারম্মণারম্মণং. ধম্মাযতনং সিযা সারম্মণারম্মণং, সিযা অনারম্মণারম্মণং, সিযা অনারম্মণং.

দস ধাতুযো অনারম্মণা. ছ ধাতুযো অনারম্মণারম্মণা. মনোৰিঞ্ঞাণধাতু সিযা সারম্মণারম্মণা, সিযা অনারম্মণারম্মণা. ধম্মধাতু সিযা সারম্মণারম্মণা, সিযা অনারম্মণারম্মণা, সিযা অনারম্মণা.

নিরোধসচ্চং অনারম্মণং. মগ্গসচ্চং অনারম্মণারম্মণং. সমুদযসচ্চং সিযা সারম্মণারম্মণং, সিযা অনারম্মণারম্মণং. দুক্খসচ্চং সিযা সারম্মণারম্মণং, সিযা অনারম্মণারম্মণং, সিযা অনারম্মণং.

সত্তিন্দ্রিযা অনারম্মণা. পঞ্চিন্দ্রিযা অনারম্মণারম্মণা. নৰিন্দ্রিযা সিযা সারম্মণারম্মণা, সিযা অনারম্মণারম্মণা. জীৰিতিন্দ্রিযং সিযা সারম্মণারম্মণং, সিযা অনারম্মণারম্মণং, সিযা অনারম্মণং.

নৰ হেতূ সিযা সারম্মণারম্মণা, সিযা অনারম্মণারম্মণা. কবল়ীকারো আহারো অনারম্মণো. তযো আহারা সিযা সারম্মণারম্মণা, সিযা অনারম্মণারম্মণা. ছ ফস্সা অনারম্মণারম্মণা. মনোৰিঞ্ঞাণধাতুসম্ফস্সো সিযা সারম্মণারম্মণো সিযা অনারম্মণারম্মণো. ছ ৰেদনা… ছ সঞ্ঞা… ছ চেতনা… ছ চিত্তা অনারম্মণারম্মণা. মনোৰিঞ্ঞাণধাতু সিযা সারম্মণারম্মণা, সিযা অনারম্মণারম্মণা.