৭. অভিঞ্ঞেয্যাদিৰারো

১০৩০. পঞ্চন্নং খন্ধানং কতি অভিঞ্ঞেয্যা, কতি পরিঞ্ঞেয্যা, কতি পহাতব্বা, কতি ভাৰেতব্বা, কতি সচ্ছিকাতব্বা, কতি ন পহাতব্বা, ন ভাৰেতব্বা, ন সচ্ছিকাতব্বা…পে… সত্তন্নং চিত্তানং কতি অভিঞ্ঞেয্যা, কতি পরিঞ্ঞেয্যা, কতি পহাতব্বা, কতি ভাৰেতব্বা, কতি সচ্ছিকাতব্বা, কতি ন পহাতব্বা ন ভাৰেতব্বা ন সচ্ছিকাতব্বা?

১০৩১. রূপক্খন্ধো অভিঞ্ঞেয্যো পরিঞ্ঞেয্যো ন পহাতব্বো ন ভাৰেতব্বো ন সচ্ছিকাতব্বো. চত্তারো খন্ধা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা.

দসাযতনা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা. দ্ৰে আযতনা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা.

সোল়স ধাতুযো অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা. দ্ৰে ধাতুযো অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা.

সমুদযসচ্চং অভিঞ্ঞেয্যং পরিঞ্ঞেয্যং পহাতব্বং ন ভাৰেতব্বং ন সচ্ছিকাতব্বং. মগ্গসচ্চং অভিঞ্ঞেয্যং পরিঞ্ঞেয্যং ন পহাতব্বং ভাৰেতব্বং ন সচ্ছিকাতব্বং. নিরোধসচ্চং অভিঞ্ঞেয্যং পরিঞ্ঞেয্যং ন পহাতব্বং ন ভাৰেতব্বং সচ্ছিকাতব্বং. দুক্খসচ্চং অভিঞ্ঞেয্যং পরিঞ্ঞেয্যং, সিযা পহাতব্বং, ন ভাৰেতব্বং, ন সচ্ছিকাতব্বং, সিযা ন পহাতব্বং.

নৰিন্দ্রিযা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা. দোমনস্সিন্দ্রিযং অভিঞ্ঞেয্যং পরিঞ্ঞেয্যং পহাতব্বং ন ভাৰেতব্বং ন সচ্ছিকাতব্বং. অনঞ্ঞাতঞ্ঞস্সামীতিন্দ্রিযং অভিঞ্ঞেয্যং পরিঞ্ঞেয্যং ন পহাতব্বং ভাৰেতব্বং ন সচ্ছিকাতব্বং. অঞ্ঞিন্দ্রিযং অভিঞ্ঞেয্যং পরিঞ্ঞেয্যং ন পহাতব্বং, সিযা ভাৰেতব্বং, সিযা সচ্ছিকাতব্বং. অঞ্ঞাতাৰিন্দ্রিযং অভিঞ্ঞেয্যং পরিঞ্ঞেয্যং ন পহাতব্বং ন ভাৰেতব্বং সচ্ছিকাতব্বং. তীণিন্দ্রিযা অভিঞ্ঞেয্যা পরিঞ্ঞেয্যা ন পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন ভাৰেতব্বা, সচ্ছিকাতব্বা. ছ ইন্দ্রিযা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা.

তযো অকুসলহেতূ অভিঞ্ঞেয্যা পরিঞ্ঞেয্যা পহাতব্বা ন ভাৰেতব্বা ন সচ্ছিকাতব্বা. তযো কুসলহেতূ অভিঞ্ঞেয্যা পরিঞ্ঞেয্যা ন পহাতব্বা, সিযা ভাৰেতব্বা, ন সচ্ছিকাতব্বা, সিযা ন ভাৰেতব্বা. তযো অব্যাকতহেতূ অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা, সিযা সচ্ছিকাতব্বা, সিযা ন সচ্ছিকাতব্বা.

কবল়ীকারো আহারো অভিঞ্ঞেয্যো পরিঞ্ঞেয্যো ন পহাতব্বো ন ভাৰেতব্বো ন সচ্ছিকাতব্বো. তযো আহারা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা.

ছ ফস্সা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা. মনোৰিঞ্ঞাণধাতুসম্ফস্সো অভিঞ্ঞেয্যো পরিঞ্ঞেয্যো, সিযা পহাতব্বো, সিযা ভাৰেতব্বো, সিযা সচ্ছিকাতব্বো, সিযা ন পহাতব্বো ন ভাৰেতব্বো ন সচ্ছিকাতব্বো.

ছ ৰেদনা…পে… ছ সঞ্ঞা… ছ চেতনা… ছ চিত্তা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা. মনোৰিঞ্ঞাণধাতু অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা.