১. উপ্পাদককম্মং

১০২১. দেৰাতি. তযো দেৰা – সম্মুতিদেৰা [সম্মতিদেৰা (স্যা.)], উপপত্তিদেৰা, ৰিসুদ্ধিদেৰা.

সম্মুতিদেৰা নাম – রাজানো, দেৰিযো, কুমারা.

উপপত্তিদেৰা নাম – চাতুমহারাজিকে [চাতুম্মহারাজিকে (সী. স্যা.)] দেৰে উপাদায তদুপরি দেৰা.

ৰিসুদ্ধিদেৰা নাম – অরহন্তো ৰুচ্চন্তি.

দানং দত্ৰা, সীলং সমাদিযিত্ৰা, উপোসথকম্মং কত্ৰা কত্থ উপপজ্জন্তি? দানং দত্ৰা, সীলং সমাদিযিত্ৰা, উপোসথকম্মং কত্ৰা অপ্পেকচ্চে খত্তিযমহাসালানং সহব্যতং উপপজ্জন্তি, অপ্পেকচ্চে ব্রাহ্মণমহাসালানং সহব্যতং উপপজ্জন্তি, অপ্পেকচ্চে গহপতিমহাসালানং সহব্যতং উপপজ্জন্তি, অপ্পেকচ্চে চাতুমহারাজিকানং দেৰানং সহব্যতং উপপজ্জন্তি, অপ্পেকচ্চে তাৰতিংসানং দেৰানং সহব্যতং উপপজ্জন্তি, অপ্পেকচ্চে যামানং দেৰানং সহব্যতং উপপজ্জন্তি, অপ্পেকচ্চে তুসিতানং দেৰানং সহব্যতং উপপজ্জন্তি, অপ্পেকচ্চে নিম্মানরতীনং দেৰানং সহব্যতং উপপজ্জন্তি, অপ্পেকচ্চে পরনিম্মিতৰসৰত্তীনং দেৰানং সহব্যতং উপপজ্জন্তি.