৬. উপ্পাদককম্মআযুপ্পমাণৰারো

১. উপ্পাদককম্মং

১০২১. দেৰাতি. তযো দেৰা – সম্মুতিদেৰা [সম্মতিদেৰা (স্যা.)], উপপত্তিদেৰা, ৰিসুদ্ধিদেৰা.

সম্মুতিদেৰা নাম – রাজানো, দেৰিযো, কুমারা.

উপপত্তিদেৰা নাম – চাতুমহারাজিকে [চাতুম্মহারাজিকে (সী. স্যা.)] দেৰে উপাদায তদুপরি দেৰা.

ৰিসুদ্ধিদেৰা নাম – অরহন্তো ৰুচ্চন্তি.

দানং দত্ৰা, সীলং সমাদিযিত্ৰা, উপোসথকম্মং কত্ৰা কত্থ উপপজ্জন্তি? দানং দত্ৰা, সীলং সমাদিযিত্ৰা, উপোসথকম্মং কত্ৰা অপ্পেকচ্চে খত্তিযমহাসালানং সহব্যতং উপপজ্জন্তি, অপ্পেকচ্চে ব্রাহ্মণমহাসালানং সহব্যতং উপপজ্জন্তি, অপ্পেকচ্চে গহপতিমহাসালানং সহব্যতং উপপজ্জন্তি, অপ্পেকচ্চে চাতুমহারাজিকানং দেৰানং সহব্যতং উপপজ্জন্তি, অপ্পেকচ্চে তাৰতিংসানং দেৰানং সহব্যতং উপপজ্জন্তি, অপ্পেকচ্চে যামানং দেৰানং সহব্যতং উপপজ্জন্তি, অপ্পেকচ্চে তুসিতানং দেৰানং সহব্যতং উপপজ্জন্তি, অপ্পেকচ্চে নিম্মানরতীনং দেৰানং সহব্যতং উপপজ্জন্তি, অপ্পেকচ্চে পরনিম্মিতৰসৰত্তীনং দেৰানং সহব্যতং উপপজ্জন্তি.

২. আযুপ্পমাণং

১০২২. মনুস্সানং কিত্তকং আযুপ্পমাণং? ৰস্সসতং, অপ্পং ৰা ভিয্যো [অপ্পং ৰা ভিয্যো ৰা (স্যা. ক.) দী. নি. ২.৭].

১০২৩. চাতুমহারাজিকানং দেৰানং কিত্তকং আযুপ্পমাণং? যানি মানুসকানি পঞ্ঞাস ৰস্সানি, চাতুম্মহারাজিকানং দেৰানং এসো একো রত্তিন্দিৰো [রত্তিদিৰো (ক.) অ. নি. ৩.৭১]. তায রত্তিযা তিংস রত্তিযো মাসো. তেন মাসেন দ্ৰাদসমাসিযো সংৰচ্ছরো. তেন সংৰচ্ছরেন দিব্বানি পঞ্চ ৰস্সসতানি চাতুম্মহারাজিকানং দেৰানং আযুপ্পমাণং. মনুস্সানং গণনায কিত্তকং হোতি? নৰুতি ৰস্সসতসহস্সানি.

তাৰতিংসানং দেৰানং কিত্তকং আযুপ্পমাণং? যং মানুসকং ৰস্সসতং, তাৰতিংসানং দেৰানং এসো একো রত্তিন্দিৰো. তায রত্তিযা তিংস রত্তিযো মাসো. তেন মাসেন দ্ৰাদসমাসিযো সংৰচ্ছরো. তেন সংৰচ্ছরেন দিব্বং ৰস্সসহস্সং তাৰতিংসানং দেৰানং আযুপ্পমাণং. মনুস্সানং গণনায কিত্তকং হোতি? তিস্সো চ ৰস্সকোটিযো সট্ঠি চ ৰস্সসতসহস্সানি.

যামানং দেৰানং কিত্তকং আযুপ্পমাণং? যানি মানুসকানি দ্ৰে ৰস্সসতানি, যামানং দেৰানং এসো একো রত্তিন্দিৰো. তায রত্তিযা তিংসরত্তিযো মাসো. তেন মাসেন দ্ৰাদসমাসিযো সংৰচ্ছরো. তেন সংৰচ্ছরেন দিব্বানি দ্ৰে ৰস্সসহস্সানি যামানং দেৰানং আযুপ্পমাণং. মনুস্সানং গণনায কিত্তকং হোতি? চুদ্দসঞ্চ ৰস্সকোটিযো চত্তারীসঞ্চ ৰস্সসতসহস্সানি.

তুসিতানং দেৰানং কিত্তকং আযুপ্পমাণং? যানি মানুসকানি চত্তারি ৰস্সসতানি, তুসিতানং দেৰানং এসো একো রত্তিন্দিৰো. তায রত্তিযা তিংসরত্তিযো মাসো. তেন মাসেন দ্ৰাদসমাসিযো সংৰচ্ছরো. তেন সংৰচ্ছরেন দিব্বানি চত্তারি ৰস্সসহস্সানি তুসিতানং দেৰানং আযুপ্পমাণং. মনুস্সানং গণনায কিত্তকং হোতি? সত্তপঞ্ঞাস ৰস্সকোটিযো সট্ঠি চ ৰস্সসতসহস্সানি.

নিম্মানরতীনং দেৰানং কিত্তকং আযুপ্পমাণং? যানি মানুসকানি অট্ঠ ৰস্সসতানি, নিম্মানরতীনং দেৰানং এসো একো রত্তিন্দিৰো. তায রত্তিযা তিংসরত্তিযো মাসো. তেন মাসেন দ্ৰাদসমাসিযো সংৰচ্ছরো. তেন সংৰচ্ছরেন দিব্বানি অট্ঠ ৰস্সসহস্সানি নিম্মানরতীনং দেৰানং আযুপ্পমাণং. মনুস্সানং গণনায কিত্তকং হোতি? দ্ৰে ৰস্সকোটিসতানি তিংসঞ্চ ৰস্সকোটিযো চত্তারীসঞ্চ ৰস্সসতসহস্সানি.

পরনিম্মিতৰসৰত্তীনং দেৰানং কিত্তকং আযুপ্পমাণং? যানি মানুসকানি সোল়স ৰস্সসতানি, পরনিম্মিতৰসৰত্তীনং দেৰানং এসো একো রত্তিন্দিৰো. তায রত্তিযা তিংসরত্তিযো মাসো. তেন মাসেন দ্ৰাদসমাসিযো সংৰচ্ছরো. তেন সংৰচ্ছরেন দিব্বানি সোল়স ৰস্সসহস্সানি পরনিম্মিতৰসৰত্তীনং দেৰানং আযুপ্পমাণং. মনুস্সানং গণনায কিত্তকং হোতি? নৰ চ ৰস্সকোটিসতানি একৰীসঞ্চ ৰস্সকোটিযো সট্ঠি চ ৰস্সসতসহস্সানীতি.

ছ এতে [ছপি তে (স্যা.)] কামাৰচরা, সব্বকামসমিদ্ধিনো;

সব্বেসং একসঙ্খাতো, আযু ভৰতি কিত্তকো.

দ্ৰাদস কোটিসতং তেসং, অট্ঠৰীসঞ্চ কোটিযো;

পঞ্ঞাস সতসহস্সানি, ৰস্সগ্গেন পকাসিতাতি.

১০২৪. পঠমং ঝানং পরিত্তং ভাৰেত্ৰা কত্থ উপপজ্জন্তি? পঠমং ঝানং পরিত্তং ভাৰেত্ৰা ব্রহ্মপারিসজ্জানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? কপ্পস্স ততিযো ভাগো.

পঠমং ঝানং মজ্ঝিমং ভাৰেত্ৰা কত্থ উপপজ্জন্তি? পঠমং ঝানং মজ্ঝিমং ভাৰেত্ৰা ব্রহ্মপুরোহিতানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? উপড্ঢকপ্পো.

পঠমং ঝানং পণীতং ভাৰেত্ৰা কত্থ উপপজ্জন্তি? পঠমং ঝানং পণীতং ভাৰেত্ৰা মহাব্রহ্মানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? কপ্পো [একো কপ্পো (স্যা.)].

১০২৫. দুতিযং ঝানং পরিত্তং ভাৰেত্ৰা কত্থ উপপজ্জন্তি? দুতিযং ঝানং পরিত্তং ভাৰেত্ৰা পরিত্তাভানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? দ্ৰে কপ্পা.

দুতিযং ঝানং মজ্ঝিমং ভাৰেত্ৰা কত্থ উপপজ্জন্তি? দুতিযং ঝানং মজ্ঝিমং ভাৰেত্ৰা অপ্পমাণাভানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? চত্তারো কপ্পা.

দুতিযং ঝানং পণীতং ভাৰেত্ৰা কত্থ উপপজ্জন্তি? দুতিযং ঝানং পণীতং ভাৰেত্ৰা আভস্সরানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? অট্ঠ কপ্পা.

১০২৬. ততিযং ঝানং পরিত্তং ভাৰেত্ৰা কত্থ উপপজ্জন্তি? ততিযং ঝানং পরিত্তং ভাৰেত্ৰা পরিত্তসুভানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? সোল়স কপ্পা.

ততিযং ঝানং মজ্ঝিমং ভাৰেত্ৰা কত্থ উপপজ্জন্তি? ততিযং ঝানং মজ্ঝিমং ভাৰেত্ৰা অপ্পমাণসুভানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? বাত্তিংস কপ্পা.

ততিযং ঝানং পণীতং ভাৰেত্ৰা কত্থ উপপজ্জন্তি? ততিযং ঝানং পণীতং ভাৰেত্ৰা সুভকিণ্হানং দেৰানং সহব্যতং উপপজ্জন্তি. তেসং কিত্তকং আযুপ্পমাণং? চতুসট্ঠি কপ্পা.

১০২৭. চতুত্থং ঝানং ভাৰেত্ৰা আরম্মণনানত্ততা মনসিকারনানত্ততা ছন্দনানত্ততা পণিধিনানত্ততা অধিমোক্খনানত্ততা অভিনীহারনানত্ততা পঞ্ঞানানত্ততা অপ্পেকচ্চে অসঞ্ঞসত্তানং দেৰানং সহব্যতং উপপজ্জন্তি, অপ্পেকচ্চে ৰেহপ্ফলানং দেৰানং সহব্যতং উপপজ্জন্তি, অপ্পেকচ্চে অৰিহানং দেৰানং সহব্যতং উপপজ্জন্তি, অপ্পেকচ্চে অতপ্পানং দেৰানং সহব্যতং উপপজ্জন্তি, অপ্পেকচ্চে সুদস্সানং দেৰানং সহব্যতং উপপজ্জন্তি, অপ্পেকচ্চে সুদস্সীনং দেৰানং সহব্যতং উপপজ্জন্তি, অপ্পেকচ্চে অকনিট্ঠানং দেৰানং সহব্যতং উপপজ্জন্তি, অপ্পেকচ্চে আকাসানঞ্চাযতনূপগানং দেৰানং সহব্যতং উপপজ্জন্তি, অপ্পেকচ্চে ৰিঞ্ঞাণঞ্চাযতনূপগানং দেৰানং সহব্যতং উপপজ্জন্তি, অপ্পেকচ্চে আকিঞ্চঞ্ঞাযতনূপগানং দেৰানং সহব্যতং উপপজ্জন্তি, অপ্পেকচ্চে নেৰসঞ্ঞানাসঞ্ঞাযতনূপগানং দেৰানং সহব্যতং উপপজ্জন্তি.

অসঞ্ঞসত্তানঞ্চ ৰেহপ্ফলানঞ্চ দেৰানং কিত্তকং আযুপ্পমাণং? পঞ্চকপ্পসতানি.

অৰিহানং দেৰানং কিত্তকং আযুপ্পমাণং? কপ্পসহস্সং.

অতপ্পানং দেৰানং কিত্তকং আযুপ্পমাণং? দ্ৰে কপ্পসহস্সানি.

সুদস্সানং দেৰানং কিত্তকং আযুপ্পমাণং? চত্তারি কপ্পসহস্সানি.

সুদস্সীনং দেৰানং কিত্তকং আযুপ্পমাণং? অট্ঠ কপ্পসহস্সানি.

অকনিট্ঠানং দেৰানং কিত্তকং আযুপ্পমাণং? সোল়স কপ্পসহস্সানি.

১০২৮. আকাসানঞ্চাযতনূপগানং দেৰানং কিত্তকং আযুপ্পমাণং? ৰীসতি কপ্পসহস্সানি.

ৰিঞ্ঞাণঞ্চাযতনূপগানং দেৰানং কিত্তকং আযুপ্পমাণং? চত্তারীস কপ্পসহস্সানি.

আকিঞ্চঞ্ঞাযতনূপগানং দেৰানং কিত্তকং আযুপ্পমাণং? সট্ঠি কপ্পসহস্সানি.

নেৰসঞ্ঞানাসঞ্ঞাযতনূপগানং দেৰানং কিত্তকং আযুপ্পমাণং? চতুরাসীতি কপ্পসহস্সানীতি.

১০২৯. উক্খিত্তা পুঞ্ঞতেজেন, কামরূপগতিং গতা.

ভৰগ্গতম্পি [ভৰগ্গং ৰাপি (স্যা.)] সম্পত্তা, পুনাগচ্ছন্তি [পুন গচ্ছন্তি (স্যা.)] দুগ্গতিং.

তাৰ দীঘাযুকা সত্তা, চৰন্তি আযুসঙ্খযা;

নত্থি কোচি ভৰো নিচ্চো, ইতি ৰুত্তং মহেসিনা.

তস্মা হি ধীরা নিপকা, নিপুণা অত্থচিন্তকা;

জরামরণমোক্খায, ভাৰেন্তি মগ্গমুত্তমং.

ভাৰযিত্ৰা সুচিং মগ্গং, নিব্বানোগধগামিনং;

সব্বাসৰে পরিঞ্ঞায, পরিনিব্বন্তি অনাসৰাতি.