১. এককনিদ্দেসো

৭৬১. পঞ্চ ৰিঞ্ঞাণা ন হেতুমেৰ, অহেতুকমেৰ, হেতুৰিপ্পযুত্তমেৰ, সপ্পচ্চযমেৰ, সঙ্খতমেৰ, অরূপমেৰ, লোকিযমেৰ, সাসৰমেৰ, সংযোজনিযমেৰ, গন্থনিযমেৰ, ওঘনিযমেৰ, যোগনিযমেৰ, নীৰরণিযমেৰ, পরামট্ঠমেৰ, উপাদানিযমেৰ, সংকিলেসিকমেৰ, অব্যাকতমেৰ, সারম্মণমেৰ, অচেতসিকমেৰ, ৰিপাকমেৰ, উপাদিন্নুপাদানিযমেৰ, অসংকিলিট্ঠসংকিলেসিকমেৰ, ন সৰিতক্কসৰিচারমেৰ, ন অৰিতক্কৰিচারমত্তমেৰ, অৰিতক্কঅৰিচারমেৰ, ন পীতিসহগতমেৰ, নেৰ দস্সনেন ন ভাৰনায পহাতব্বমেৰ, নেৰ দস্সনেন ন ভাৰনায পহাতব্বহেতুকমেৰ, নেৰাচযগামিনাপচযগামিমেৰ, নেৰসেক্খনাসেক্খমেৰ, পরিত্তমেৰ, কামাৰচরমেৰ, ন রূপাৰচরমেৰ, ন অরূপাৰচরমেৰ, পরিযাপন্নমেৰ, নো অপরিযাপন্নমেৰ, অনিযতমেৰ, অনিয্যানিকমেৰ, উপ্পন্নং মনোৰিঞ্ঞাণৰিঞ্ঞেয্যমেৰ, অনিচ্চমেৰ, জরাভিভূতমেৰ.

৭৬২. পঞ্চ ৰিঞ্ঞাণা উপ্পন্নৰত্থুকা, উপ্পন্নারম্মণাতি উপ্পন্নস্মিং ৰত্থুস্মিং উপ্পন্নে আরম্মণে উপ্পজ্জন্তি.

পুরেজাতৰত্থুকা, পুরেজাতারম্মণাতি পুরেজাতস্মিং ৰত্থুস্মিং পুরেজাতে আরম্মণে উপ্পজ্জন্তি.

অজ্ঝত্তিকৰত্থুকা, বাহিরারম্মণাতি পঞ্চন্নং ৰিঞ্ঞাণানং ৰত্থু অজ্ঝত্তিকা আরম্মণা বাহিরা.

অসম্ভিন্নৰত্থুকা, অসম্ভিন্নারম্মণাতি অসম্ভিন্নস্মিং ৰত্থুস্মিং অসম্ভিন্নে আরম্মণে উপ্পজ্জন্তি.

নানাৰত্থুকা, নানারম্মণাতি অঞ্ঞং চক্খুৰিঞ্ঞাণস্স ৰত্থু চ আরম্মণঞ্চ, অঞ্ঞং সোতৰিঞ্ঞাণস্স ৰত্থু চ আরম্মণঞ্চ, অঞ্ঞং ঘানৰিঞ্ঞাণস্স ৰত্থু চ আরম্মণঞ্চ, অঞ্ঞং জিৰ্হাৰিঞ্ঞাণস্স ৰত্থু চ আরম্মণঞ্চ, অঞ্ঞং কাযৰিঞ্ঞাণস্স ৰত্থু চ আরম্মণঞ্চ.

৭৬৩. ন অঞ্ঞমঞ্ঞস্স গোচরৰিসযং পচ্চনুভোন্তীতি চক্খুৰিঞ্ঞাণস্স গোচরৰিসযং সোতৰিঞ্ঞাণং ন পচ্চনুভোতি, সোতৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. চক্খুৰিঞ্ঞাণস্স গোচরৰিসযং ঘানৰিঞ্ঞাণং ন পচ্চনুভোতি, ঘানৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. চক্খুৰিঞ্ঞাণস্স গোচরৰিসযং জিৰ্হাৰিঞ্ঞাণং ন পচ্চনুভোতি, জিৰ্হাৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. চক্খুৰিঞ্ঞাণস্স গোচরৰিসযং কাযৰিঞ্ঞাণং ন পচ্চনুভোতি, কাযৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. সোতৰিঞ্ঞাণস্স…পে… ঘানৰিঞ্ঞাণস্স…পে… জিৰ্হাৰিঞ্ঞাণস্স…পে… কাযৰিঞ্ঞাণস্স গোচরৰিসযং চক্খুৰিঞ্ঞাণং ন পচ্চনুভোতি, চক্খুৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি. কাযৰিঞ্ঞাণস্স গোচরৰিসযং সোতৰিঞ্ঞাণং ন পচ্চনুভোতি, সোতৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি. কাযৰিঞ্ঞাণস্স গোচরৰিসযং ঘানৰিঞ্ঞাণং ন পচ্চনুভোতি, ঘানৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি. কাযৰিঞ্ঞাণস্স গোচরৰিসযং জিৰ্হাৰিঞ্ঞাণং ন পচ্চনুভোতি, জিৰ্হাৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি.

৭৬৪. ন অসমন্নাহারা উপ্পজ্জন্তীতি সমন্নাহরন্তস্স উপ্পজ্জন্তি.

ন অমনসিকারা উপ্পজ্জন্তীতি মনসিকরোন্তস্স উপ্পজ্জন্তি.

ন অব্বোকিণ্ণা উপ্পজ্জন্তীতি ন পটিপাটিযা উপ্পজ্জন্তি.

ন অপুব্বং অচরিমং উপ্পজ্জন্তীতি ন একক্খণে উপ্পজ্জন্তি.

৭৬৫. ন অঞ্ঞমঞ্ঞস্স সমনন্তরা উপ্পজ্জন্তীতি চক্খুৰিঞ্ঞাণস্স উপ্পন্নসমনন্তরা সোতৰিঞ্ঞাণং ন উপ্পজ্জতি, সোতৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. চক্খুৰিঞ্ঞাণস্স উপ্পন্নসমনন্তরা ঘানৰিঞ্ঞাণং ন উপ্পজ্জতি, ঘানৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. চক্খুৰিঞ্ঞাণস্স উপ্পন্নসমনন্তরা জিৰ্হাৰিঞ্ঞাণং ন উপ্পজ্জতি, জিৰ্হাৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. চক্খুৰিঞ্ঞাণস্স উপ্পন্নসমনন্তরা কাযৰিঞ্ঞাণং ন উপ্পজ্জতি, কাযৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. সোতৰিঞ্ঞাণস্স…পে… ঘানৰিঞ্ঞাণস্স…পে… জিৰ্হাৰিঞ্ঞাণস্স…পে… কাযৰিঞ্ঞাণস্স উপ্পন্নসমনন্তরা চক্খুৰিঞ্ঞাণং ন উপ্পজ্জতি, চক্খুৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি. কাযৰিঞ্ঞাণস্স উপ্পন্নসমনন্তরা সোতৰিঞ্ঞাণং ন উপ্পজ্জতি, সোতৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি. কাযৰিঞ্ঞাণস্স উপ্পন্নসমনন্তরা ঘানৰিঞ্ঞাণং ন উপ্পজ্জতি, ঘানৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি. কাযৰিঞ্ঞাণস্স উপ্পন্নসমনন্তরা জিৰ্হাৰিঞ্ঞাণং ন উপ্পজ্জতি, জিৰ্হাৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি.

৭৬৬. পঞ্চ ৰিঞ্ঞাণা অনাভোগাতি পঞ্চন্নং ৰিঞ্ঞাণানং নত্থি আৰট্টনা ৰা আভোগো ৰা সমন্নাহারো ৰা মনসিকারো ৰা.

পঞ্চহি ৰিঞ্ঞাণেহি ন কঞ্চি ধম্মং পটিৰিজানাতীতি পঞ্চহি ৰিঞ্ঞাণেহি ন কঞ্চি ধম্মং পটিৰিজানাতি.

অঞ্ঞত্র অভিনিপাতমত্তাতি অঞ্ঞত্র আপাতমত্তা.

পঞ্চন্নং ৰিঞ্ঞাণানং সমনন্তরাপি ন কঞ্চি ধম্মং পটিৰিজানাতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কঞ্চি ধম্মং পটিৰিজানাতি.

পঞ্চহি ৰিঞ্ঞাণেহি ন কঞ্চি ইরিযাপথং কপ্পেতীতি পঞ্চহি ৰিঞ্ঞাণেহি ন কঞ্চি ইরিযাপথং কপ্পেতি – গমনং ৰা ঠানং ৰা নিসজ্জং ৰা সেয্যং ৰা.

পঞ্চন্নং ৰিঞ্ঞাণানং সমনন্তরাপি ন কঞ্চি ইরিযাপথং কপ্পেতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কঞ্চি ইরিযাপথং কপ্পেতি – গমনং ৰা ঠানং ৰা নিসজ্জং ৰা সেয্যং ৰা.

পঞ্চহি ৰিঞ্ঞাণেহি ন কাযকম্মং ন ৰচীকম্মং পট্ঠপেতীতি পঞ্চহি ৰিঞ্ঞাণেহি ন কাযকম্মং ন ৰচীকম্মং পট্ঠপেতি.

পঞ্চন্নং ৰিঞ্ঞাণানং সমনন্তরাপি ন কাযকম্মং ন ৰচীকম্মং পট্ঠপেতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কাযকম্মং ন ৰচীকম্মং পট্ঠপেতি.

পঞ্চহি ৰিঞ্ঞাণেহি ন কুসলাকুসলং ধম্মং সমাদিযতীতি পঞ্চহি ৰিঞ্ঞাণেহি ন কুসলাকুসলং ধম্মং সমাদিযতি.

পঞ্চন্নং ৰিঞ্ঞাণানং সমনন্তরাপি ন কুসলাকুসলং ধম্মং সমাদিযতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কুসলাকুসলং ধম্মং সমাদিযতি.

পঞ্চহি ৰিঞ্ঞাণেহি ন সমাপজ্জতি ন ৰুট্ঠাতীতি পঞ্চহি ৰিঞ্ঞাণেহি ন সমাপজ্জতি ন ৰুট্ঠাতি.

পঞ্চন্নং ৰিঞ্ঞাণানং সমনন্তরাপি ন সমাপজ্জতি ন ৰুট্ঠাতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন সমাপজ্জতি ন ৰুট্ঠাতি.

পঞ্চহি ৰিঞ্ঞাণেহি ন চৰতি ন উপ্পজ্জতীতি পঞ্চহি ৰিঞ্ঞাণেহি ন চৰতি ন উপ্পজ্জতি.

পঞ্চন্নং ৰিঞ্ঞাণানং সমনন্তরাপি ন চৰতি ন উপ্পজ্জতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন চৰতি ন উপ্পজ্জতি.

পঞ্চহি ৰিঞ্ঞাণেহি ন সুপতি ন পটিবুজ্ঝতি ন সুপিনং পস্সতীতি পঞ্চহি ৰিঞ্ঞাণেহি ন সুপতি ন পটিবুজ্ঝতি ন সুপিনং পস্সতি.

পঞ্চন্নং ৰিঞ্ঞাণানং সমনন্তরাপি ন সুপতি ন পটিবুজ্ঝতি ন সুপিনং পস্সতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন সুপতি ন পটিবুজ্ঝতি ন সুপিনং পস্সতি. এৰং যাথাৰকৰত্থুৰিভাৰনা পঞ্ঞা.

এৰং একৰিধেন ঞাণৰত্থু.

এককং.