মাতিকা

১. এককনিদ্দেসো

৭৬১. পঞ্চ ৰিঞ্ঞাণা ন হেতুমেৰ, অহেতুকমেৰ, হেতুৰিপ্পযুত্তমেৰ, সপ্পচ্চযমেৰ, সঙ্খতমেৰ, অরূপমেৰ, লোকিযমেৰ, সাসৰমেৰ, সংযোজনিযমেৰ, গন্থনিযমেৰ, ওঘনিযমেৰ, যোগনিযমেৰ, নীৰরণিযমেৰ, পরামট্ঠমেৰ, উপাদানিযমেৰ, সংকিলেসিকমেৰ, অব্যাকতমেৰ, সারম্মণমেৰ, অচেতসিকমেৰ, ৰিপাকমেৰ, উপাদিন্নুপাদানিযমেৰ, অসংকিলিট্ঠসংকিলেসিকমেৰ, ন সৰিতক্কসৰিচারমেৰ, ন অৰিতক্কৰিচারমত্তমেৰ, অৰিতক্কঅৰিচারমেৰ, ন পীতিসহগতমেৰ, নেৰ দস্সনেন ন ভাৰনায পহাতব্বমেৰ, নেৰ দস্সনেন ন ভাৰনায পহাতব্বহেতুকমেৰ, নেৰাচযগামিনাপচযগামিমেৰ, নেৰসেক্খনাসেক্খমেৰ, পরিত্তমেৰ, কামাৰচরমেৰ, ন রূপাৰচরমেৰ, ন অরূপাৰচরমেৰ, পরিযাপন্নমেৰ, নো অপরিযাপন্নমেৰ, অনিযতমেৰ, অনিয্যানিকমেৰ, উপ্পন্নং মনোৰিঞ্ঞাণৰিঞ্ঞেয্যমেৰ, অনিচ্চমেৰ, জরাভিভূতমেৰ.

৭৬২. পঞ্চ ৰিঞ্ঞাণা উপ্পন্নৰত্থুকা, উপ্পন্নারম্মণাতি উপ্পন্নস্মিং ৰত্থুস্মিং উপ্পন্নে আরম্মণে উপ্পজ্জন্তি.

পুরেজাতৰত্থুকা, পুরেজাতারম্মণাতি পুরেজাতস্মিং ৰত্থুস্মিং পুরেজাতে আরম্মণে উপ্পজ্জন্তি.

অজ্ঝত্তিকৰত্থুকা, বাহিরারম্মণাতি পঞ্চন্নং ৰিঞ্ঞাণানং ৰত্থু অজ্ঝত্তিকা আরম্মণা বাহিরা.

অসম্ভিন্নৰত্থুকা, অসম্ভিন্নারম্মণাতি অসম্ভিন্নস্মিং ৰত্থুস্মিং অসম্ভিন্নে আরম্মণে উপ্পজ্জন্তি.

নানাৰত্থুকা, নানারম্মণাতি অঞ্ঞং চক্খুৰিঞ্ঞাণস্স ৰত্থু চ আরম্মণঞ্চ, অঞ্ঞং সোতৰিঞ্ঞাণস্স ৰত্থু চ আরম্মণঞ্চ, অঞ্ঞং ঘানৰিঞ্ঞাণস্স ৰত্থু চ আরম্মণঞ্চ, অঞ্ঞং জিৰ্হাৰিঞ্ঞাণস্স ৰত্থু চ আরম্মণঞ্চ, অঞ্ঞং কাযৰিঞ্ঞাণস্স ৰত্থু চ আরম্মণঞ্চ.

৭৬৩. ন অঞ্ঞমঞ্ঞস্স গোচরৰিসযং পচ্চনুভোন্তীতি চক্খুৰিঞ্ঞাণস্স গোচরৰিসযং সোতৰিঞ্ঞাণং ন পচ্চনুভোতি, সোতৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. চক্খুৰিঞ্ঞাণস্স গোচরৰিসযং ঘানৰিঞ্ঞাণং ন পচ্চনুভোতি, ঘানৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. চক্খুৰিঞ্ঞাণস্স গোচরৰিসযং জিৰ্হাৰিঞ্ঞাণং ন পচ্চনুভোতি, জিৰ্হাৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. চক্খুৰিঞ্ঞাণস্স গোচরৰিসযং কাযৰিঞ্ঞাণং ন পচ্চনুভোতি, কাযৰিঞ্ঞাণস্স গোচরৰিসযম্পি চক্খুৰিঞ্ঞাণং ন পচ্চনুভোতি. সোতৰিঞ্ঞাণস্স…পে… ঘানৰিঞ্ঞাণস্স…পে… জিৰ্হাৰিঞ্ঞাণস্স…পে… কাযৰিঞ্ঞাণস্স গোচরৰিসযং চক্খুৰিঞ্ঞাণং ন পচ্চনুভোতি, চক্খুৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি. কাযৰিঞ্ঞাণস্স গোচরৰিসযং সোতৰিঞ্ঞাণং ন পচ্চনুভোতি, সোতৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি. কাযৰিঞ্ঞাণস্স গোচরৰিসযং ঘানৰিঞ্ঞাণং ন পচ্চনুভোতি, ঘানৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি. কাযৰিঞ্ঞাণস্স গোচরৰিসযং জিৰ্হাৰিঞ্ঞাণং ন পচ্চনুভোতি, জিৰ্হাৰিঞ্ঞাণস্স গোচরৰিসযম্পি কাযৰিঞ্ঞাণং ন পচ্চনুভোতি.

৭৬৪. ন অসমন্নাহারা উপ্পজ্জন্তীতি সমন্নাহরন্তস্স উপ্পজ্জন্তি.

ন অমনসিকারা উপ্পজ্জন্তীতি মনসিকরোন্তস্স উপ্পজ্জন্তি.

ন অব্বোকিণ্ণা উপ্পজ্জন্তীতি ন পটিপাটিযা উপ্পজ্জন্তি.

ন অপুব্বং অচরিমং উপ্পজ্জন্তীতি ন একক্খণে উপ্পজ্জন্তি.

৭৬৫. ন অঞ্ঞমঞ্ঞস্স সমনন্তরা উপ্পজ্জন্তীতি চক্খুৰিঞ্ঞাণস্স উপ্পন্নসমনন্তরা সোতৰিঞ্ঞাণং ন উপ্পজ্জতি, সোতৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. চক্খুৰিঞ্ঞাণস্স উপ্পন্নসমনন্তরা ঘানৰিঞ্ঞাণং ন উপ্পজ্জতি, ঘানৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. চক্খুৰিঞ্ঞাণস্স উপ্পন্নসমনন্তরা জিৰ্হাৰিঞ্ঞাণং ন উপ্পজ্জতি, জিৰ্হাৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. চক্খুৰিঞ্ঞাণস্স উপ্পন্নসমনন্তরা কাযৰিঞ্ঞাণং ন উপ্পজ্জতি, কাযৰিঞ্ঞাণস্স উপ্পন্নসমনন্তরাপি চক্খুৰিঞ্ঞাণং ন উপ্পজ্জতি. সোতৰিঞ্ঞাণস্স…পে… ঘানৰিঞ্ঞাণস্স…পে… জিৰ্হাৰিঞ্ঞাণস্স…পে… কাযৰিঞ্ঞাণস্স উপ্পন্নসমনন্তরা চক্খুৰিঞ্ঞাণং ন উপ্পজ্জতি, চক্খুৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি. কাযৰিঞ্ঞাণস্স উপ্পন্নসমনন্তরা সোতৰিঞ্ঞাণং ন উপ্পজ্জতি, সোতৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি. কাযৰিঞ্ঞাণস্স উপ্পন্নসমনন্তরা ঘানৰিঞ্ঞাণং ন উপ্পজ্জতি, ঘানৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি. কাযৰিঞ্ঞাণস্স উপ্পন্নসমনন্তরা জিৰ্হাৰিঞ্ঞাণং ন উপ্পজ্জতি, জিৰ্হাৰিঞ্ঞাণস্স উপ্পন্নসমনন্তরাপি কাযৰিঞ্ঞাণং ন উপ্পজ্জতি.

৭৬৬. পঞ্চ ৰিঞ্ঞাণা অনাভোগাতি পঞ্চন্নং ৰিঞ্ঞাণানং নত্থি আৰট্টনা ৰা আভোগো ৰা সমন্নাহারো ৰা মনসিকারো ৰা.

পঞ্চহি ৰিঞ্ঞাণেহি ন কঞ্চি ধম্মং পটিৰিজানাতীতি পঞ্চহি ৰিঞ্ঞাণেহি ন কঞ্চি ধম্মং পটিৰিজানাতি.

অঞ্ঞত্র অভিনিপাতমত্তাতি অঞ্ঞত্র আপাতমত্তা.

পঞ্চন্নং ৰিঞ্ঞাণানং সমনন্তরাপি ন কঞ্চি ধম্মং পটিৰিজানাতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কঞ্চি ধম্মং পটিৰিজানাতি.

পঞ্চহি ৰিঞ্ঞাণেহি ন কঞ্চি ইরিযাপথং কপ্পেতীতি পঞ্চহি ৰিঞ্ঞাণেহি ন কঞ্চি ইরিযাপথং কপ্পেতি – গমনং ৰা ঠানং ৰা নিসজ্জং ৰা সেয্যং ৰা.

পঞ্চন্নং ৰিঞ্ঞাণানং সমনন্তরাপি ন কঞ্চি ইরিযাপথং কপ্পেতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কঞ্চি ইরিযাপথং কপ্পেতি – গমনং ৰা ঠানং ৰা নিসজ্জং ৰা সেয্যং ৰা.

পঞ্চহি ৰিঞ্ঞাণেহি ন কাযকম্মং ন ৰচীকম্মং পট্ঠপেতীতি পঞ্চহি ৰিঞ্ঞাণেহি ন কাযকম্মং ন ৰচীকম্মং পট্ঠপেতি.

পঞ্চন্নং ৰিঞ্ঞাণানং সমনন্তরাপি ন কাযকম্মং ন ৰচীকম্মং পট্ঠপেতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কাযকম্মং ন ৰচীকম্মং পট্ঠপেতি.

পঞ্চহি ৰিঞ্ঞাণেহি ন কুসলাকুসলং ধম্মং সমাদিযতীতি পঞ্চহি ৰিঞ্ঞাণেহি ন কুসলাকুসলং ধম্মং সমাদিযতি.

পঞ্চন্নং ৰিঞ্ঞাণানং সমনন্তরাপি ন কুসলাকুসলং ধম্মং সমাদিযতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন কুসলাকুসলং ধম্মং সমাদিযতি.

পঞ্চহি ৰিঞ্ঞাণেহি ন সমাপজ্জতি ন ৰুট্ঠাতীতি পঞ্চহি ৰিঞ্ঞাণেহি ন সমাপজ্জতি ন ৰুট্ঠাতি.

পঞ্চন্নং ৰিঞ্ঞাণানং সমনন্তরাপি ন সমাপজ্জতি ন ৰুট্ঠাতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন সমাপজ্জতি ন ৰুট্ঠাতি.

পঞ্চহি ৰিঞ্ঞাণেহি ন চৰতি ন উপ্পজ্জতীতি পঞ্চহি ৰিঞ্ঞাণেহি ন চৰতি ন উপ্পজ্জতি.

পঞ্চন্নং ৰিঞ্ঞাণানং সমনন্তরাপি ন চৰতি ন উপ্পজ্জতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন চৰতি ন উপ্পজ্জতি.

পঞ্চহি ৰিঞ্ঞাণেহি ন সুপতি ন পটিবুজ্ঝতি ন সুপিনং পস্সতীতি পঞ্চহি ৰিঞ্ঞাণেহি ন সুপতি ন পটিবুজ্ঝতি ন সুপিনং পস্সতি.

পঞ্চন্নং ৰিঞ্ঞাণানং সমনন্তরাপি ন সুপতি ন পটিবুজ্ঝতি ন সুপিনং পস্সতীতি পঞ্চন্নং ৰিঞ্ঞাণানং সমনন্তরা মনোধাতুযাপি ন সুপতি ন পটিবুজ্ঝতি ন সুপিনং পস্সতি. এৰং যাথাৰকৰত্থুৰিভাৰনা পঞ্ঞা.

এৰং একৰিধেন ঞাণৰত্থু.

এককং.

২. দুকনিদ্দেসো

৭৬৭. (১) তীসু ভূমীসু কুসলাব্যাকতে পঞ্ঞা লোকিযা পঞ্ঞা, চতূসু মগ্গেসু চতূসু ফলেসু পঞ্ঞা লোকুত্তরা পঞ্ঞা.

(২) সব্বাৰ পঞ্ঞা কেনচি ৰিঞ্ঞেয্যা, কেনচি ন ৰিঞ্ঞেয্যা.

(৩) তীসু ভূমীসু কুসলাব্যাকতে পঞ্ঞা সাসৰা পঞ্ঞা, চতূসু মগ্গেসু চতূসু ফলেসু পঞ্ঞা অনাসৰা পঞ্ঞা.

(৪) তীসু ভূমীসু কুসলাব্যাকতে পঞ্ঞা আসৰৰিপ্পযুত্তা সাসৰা পঞ্ঞা, চতূসু মগ্গেসু চতূসু ফলেসু পঞ্ঞা আসৰৰিপ্পযুত্তা অনাসৰা পঞ্ঞা.

(৫) তীসু ভূমীসু কুসলাব্যাকতে পঞ্ঞা সংযোজনিযা পঞ্ঞা, চতূসু মগ্গেসু চতূসু ফলেসু পঞ্ঞা অসংযোজনিযা পঞ্ঞা.

(৬) তীসু ভূমীসু কুসলাব্যাকতে পঞ্ঞা সংযোজনৰিপ্পযুত্তা সংযোজনিযা পঞ্ঞা, চতূসু মগ্গেসু চতূসু ফলেসু পঞ্ঞা সংযোজনৰিপ্পযুত্তা অসংযোজনিযা পঞ্ঞা.

(৭) তীসু ভূমীসু কুসলাব্যাকতে পঞ্ঞা গন্থনিযা পঞ্ঞা, চতূসু মগ্গেসু চতূসু ফলেসু পঞ্ঞা অগন্থনিযা পঞ্ঞা.

(৮) তীসু ভূমীসু কুসলাব্যাকতে পঞ্ঞা গন্থৰিপ্পযুত্তা গন্থনিযা পঞ্ঞা, চতূসু মগ্গেসু চতূসু ফলেসু পঞ্ঞা গন্থৰিপ্পযুত্তা অগন্থনিযা পঞ্ঞা.

(৯) তীসু ভূমীসু কুসলাব্যাকতে পঞ্ঞা ওঘনিযা পঞ্ঞা, চতূসু মগ্গেসু চতূসু ফলেসু পঞ্ঞা অনোঘনিযা পঞ্ঞা.

(১০) তীসু ভূমীসু কুসলাব্যাকতে পঞ্ঞা ওঘৰিপ্পযুত্তা ওঘনিযা পঞ্ঞা, চতূসু মগ্গেসু চতূসু ফলেসু পঞ্ঞা ওঘৰিপ্পযুত্তা অনোঘনিযা পঞ্ঞা.

(১১) তীসু ভূমীসু কুসলাব্যাকতে পঞ্ঞা যোগনিযা পঞ্ঞা, চতূসু মগ্গেসু চতূসু ফলেসু পঞ্ঞা অযোগনিযা পঞ্ঞা.

(১২) তীসু ভূমীসু কুসলাব্যাকতে পঞ্ঞা যোগৰিপ্পযুত্তা যোগনিযা পঞ্ঞা, চতূসু মগ্গেসু চতূসু ফলেসু পঞ্ঞা যোগৰিপ্পযুত্তা অযোগনিযা পঞ্ঞা.

(১৩) তীসু ভূমীসু কুসলাব্যাকতে পঞ্ঞা নীৰরণিযা পঞ্ঞা, চতূসু মগ্গেসু চতূসু ফলেসু পঞ্ঞা অনীৰরণিযা পঞ্ঞা.

(১৪) তীসু ভূমীসু কুসলাব্যাকতে পঞ্ঞা নীৰরণৰিপ্পযুত্তা নীৰরণিযা পঞ্ঞা, চতূসু মগ্গেসু চতূসু ফলেসু পঞ্ঞা নীৰরণৰিপ্পযুত্তা অনীৰরণিযা পঞ্ঞা.

(১৫) তীসু ভূমীসু কুসলাব্যাকতে পঞ্ঞা পরামট্ঠা পঞ্ঞা, চতূসু মগ্গেসু চতূসু ফলেসু পঞ্ঞা অপরামট্ঠা পঞ্ঞা.

(১৬) তীসু ভূমীসু কুসলাব্যাকতে পঞ্ঞা পরামাসৰিপ্পযুত্তা পরামট্ঠা পঞ্ঞা, চতূসু মগ্গেসু চতূসু ফলেসু পঞ্ঞা পরামাসৰিপ্পযুত্তা অপরামট্ঠা পঞ্ঞা.

(১৭) তীসু ভূমীসু ৰিপাকে পঞ্ঞা উপাদিন্না পঞ্ঞা, তীসু ভূমীসু কুসলে তীসু ভূমীসু কিরিযাব্যাকতে চতূসু মগ্গেসু চতূসু ফলেসু পঞ্ঞা অনুপাদিন্না পঞ্ঞা.

(১৮) তীসু ভূমীসু কুসলাব্যাকতে পঞ্ঞা উপাদানিযা পঞ্ঞা, চতূসু মগ্গেসু চতূসু ফলেসু পঞ্ঞা অনুপাদানিযা পঞ্ঞা.

(১৯) তীসু ভূমীসু কুসলাব্যাকতে পঞ্ঞা উপাদানৰিপ্পযুত্তা উপাদানিযা পঞ্ঞা, চতূসু মগ্গেসু চতূসু ফলেসু পঞ্ঞা উপাদানৰিপ্পযুত্তা অনুপাদানিযা পঞ্ঞা.

(২০) তীসু ভূমীসু কুসলাব্যাকতে পঞ্ঞা সংকিলেসিকা পঞ্ঞা, চতূসু মগ্গেসু চতূসু ফলেসু পঞ্ঞা অসংকিলেসিকা পঞ্ঞা.

(২১) তীসু ভূমীসু কুসলাব্যাকতে পঞ্ঞা কিলেসৰিপ্পযুত্তা সংকিলেসিকা পঞ্ঞা, চতূসু মগ্গেসু চতূসু ফলেসু পঞ্ঞা কিলেসৰিপ্পযুত্তা অসংকিলেসিকা পঞ্ঞা.

(২২) ৰিতক্কসম্পযুত্তা পঞ্ঞা সৰিতক্কা পঞ্ঞা, ৰিতক্কৰিপ্পযুত্তা পঞ্ঞা অৰিতক্কা পঞ্ঞা.

(২৩) ৰিচারসম্পযুত্তা পঞ্ঞা সৰিচারা পঞ্ঞা, ৰিচারৰিপ্পযুত্তা পঞ্ঞা অৰিচারা পঞ্ঞা.

(২৪) পীতিসম্পযুত্তা পঞ্ঞা সপ্পীতিকা পঞ্ঞা, পীতিৰিপ্পযুত্তা পঞ্ঞা অপ্পীতিকা পঞ্ঞা.

(২৫) পীতিসম্পযুত্তা পঞ্ঞা পীতিসহগতা পঞ্ঞা, পীতিৰিপ্পযুত্তা পঞ্ঞা ন পীতিসহগতা পঞ্ঞা.

(২৬) সুখসম্পযুত্তা পঞ্ঞা সুখসহগতা পঞ্ঞা, সুখৰিপ্পযুত্তা পঞ্ঞা ন সুখসহগতা পঞ্ঞা.

(২৭) উপেক্খাসম্পযুত্তা পঞ্ঞা উপেক্খাসহগতা পঞ্ঞা, উপেক্খাৰিপ্পযুত্তা পঞ্ঞা ন উপেক্খাসহগতা পঞ্ঞা.

(২৮) কামাৰচরকুসলাব্যাকতে পঞ্ঞা কামাৰচরা পঞ্ঞা, রূপাৰচরা পঞ্ঞা অরূপাৰচরা পঞ্ঞা, অপরিযাপন্না পঞ্ঞা ন কামাৰচরা পঞ্ঞা.

(২৯) রূপাৰচরকুসলাব্যাকতে পঞ্ঞা রূপাৰচরা পঞ্ঞা, কামাৰচরা পঞ্ঞা অরূপাৰচরা পঞ্ঞা অপরিযাপন্না পঞ্ঞা ন রূপাৰচরা পঞ্ঞা.

(৩০) অরূপাৰচরকুসলাব্যাকতে পঞ্ঞা অরূপাৰচরা পঞ্ঞা, কামাৰচরা পঞ্ঞা রূপাৰচরা পঞ্ঞা অপরিযাপন্না পঞ্ঞা ন অরূপাৰচরা পঞ্ঞা.

(৩১) তীসু ভূমীসু কুসলাব্যাকতে পঞ্ঞা পরিযাপন্না পঞ্ঞা, চতূসু মগ্গেসু চতূসু ফলেসু পঞ্ঞা অপরিযাপন্না পঞ্ঞা.

(৩২) চতূসু মগ্গেসু পঞ্ঞা নিয্যানিকা পঞ্ঞা, তীসু ভূমীসু কুসলে চতূসু ভূমীসু ৰিপাকে তীসু ভূমীসু কিরিযাব্যাকতে পঞ্ঞা অনিয্যানিকা পঞ্ঞা.

(৩৩) চতূসু মগ্গেসু পঞ্ঞা নিযতা পঞ্ঞা, তীসু ভূমীসু কুসলে চতূসু ভূমীসু ৰিপাকে তীসু ভূমীসু কিরিযাব্যাকতে পঞ্ঞা অনিযতা পঞ্ঞা.

(৩৪) তীসু ভূমীসু কুসলাব্যাকতে পঞ্ঞা সউত্তরা পঞ্ঞা, চতূসু মগ্গেসু চতূসু ফলেসু পঞ্ঞা অনুত্তরা পঞ্ঞা.

(৩৫) তত্থ কতমা অত্থজাপিকা পঞ্ঞা?

চতূসু ভূমীসু কুসলে অরহতো অভিঞ্ঞং উপ্পাদেন্তস্স সমাপত্তিং উপ্পাদেন্তস্স কিরিযাব্যাকতে পঞ্ঞা অত্থজাপিকা পঞ্ঞা, চতূসু ভূমীসু ৰিপাকে অরহতো উপ্পন্নায অভিঞ্ঞায উপ্পন্নায সমাপত্তিযা কিরিযাব্যাকতে পঞ্ঞা জাপিতত্থা পঞ্ঞা.

এৰং দুৰিধেন ঞাণৰত্থু.

দুকং.

৩. তিকনিদ্দেসো

৭৬৮. (১. ক) তত্থ কতমা চিন্তামযা পঞ্ঞা?

যোগৰিহিতেসু ৰা কম্মাযতনেসু যোগৰিহিতেসু ৰা সিপ্পাযতনেসু যোগৰিহিতেসু ৰা ৰিজ্জাট্ঠানেসু কম্মস্সকতং ৰা সচ্চানুলোমিকং ৰা রূপং অনিচ্চন্তি ৰা ৰেদনা…পে… সঞ্ঞা… সঙ্খারা… ৰিঞ্ঞাণং অনিচ্চন্তি ৰা, যং এৰরূপিং অনুলোমিকং খন্তিং দিট্ঠিং রুচিং মুদিং পেক্খং ধম্মনিজ্ঝানক্খন্তিং পরতো অস্সুত্ৰা পটিলভতি – অযং ৰুচ্চতি ‘‘চিন্তামযা পঞ্ঞা’’.

(খ) তত্থ কতমা সুতমযা পঞ্ঞা? যোগৰিহিতেসু ৰা কম্মাযতনেসু যোগৰিহিতেসু ৰা সিপ্পাযতনেসু যোগৰিহিতেসু ৰা ৰিজ্জাট্ঠানেসু কম্মস্সকতং ৰা সচ্চানুলোমিকং ৰা রূপং অনিচ্চন্তি ৰা ৰেদনা…পে… সঞ্ঞা… সঙ্খারা… ৰিঞ্ঞাণং অনিচ্চন্তি ৰা, যং এৰরূপিং অনুলোমিকং খন্তিং দিট্ঠিং রুচিং মুদিং পেক্খং ধম্মনিজ্ঝানক্খন্তিং পরতো সুত্ৰা পটিলভতি – অযং ৰুচ্চতি ‘‘সুতমযা পঞ্ঞা’’.

(গ) সব্বাপি সমাপন্নস্স পঞ্ঞা ভাৰনামযা পঞ্ঞা.

৭৬৯. (২. ক) তত্থ কতমা দানমযা পঞ্ঞা? দানং আরব্ভ দানাধিগচ্ছ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘দানমযা পঞ্ঞা’’.

(খ) তত্থ কতমা সীলমযা পঞ্ঞা? সীলং আরব্ভ সীলাধিগচ্ছ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘সীলমযা পঞ্ঞা’’.

(গ) সব্বাপি সমাপন্নস্স পঞ্ঞা ভাৰনামযা পঞ্ঞা.

৭৭০. (৩. ক) তত্থ কতমা অধিসীলে পঞ্ঞা? পাতিমোক্খসংৰরং সংৰরন্তস্স যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অধিসীলে পঞ্ঞা’’.

(খ) তত্থ কতমা অধিচিত্তে পঞ্ঞা? রূপাৰচরারূপাৰচরসমাপত্তিং সমাপজ্জন্তস্স যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অধিচিত্তে পঞ্ঞা’’.

(গ) তত্থ কতমা অধিপঞ্ঞায পঞ্ঞা? চতূসু মগ্গেসু চতূসু ফলেসু পঞ্ঞা – অযং ৰুচ্চতি ‘‘অধিপঞ্ঞায পঞ্ঞা’’.

৭৭১. (৪. ক) তত্থ কতমং আযকোসল্লং? ‘‘ইমে ধম্মে মনসিকরোতো অনুপ্পন্না চেৰ অকুসলা ধম্মা ন উপ্পজ্জন্তি, উপ্পন্না চ অকুসলা ধম্মা পহীযন্তি. ইমে ৰা পনিমে ধম্মে মনসিকরোতো অনুপ্পন্না চেৰ কুসলা ধম্মা উপ্পজ্জন্তি, উপ্পন্না চ কুসলা ধম্মা ভিয্যোভাৰায ৰেপুল্লায ভাৰনায পারিপূরিযা সংৰত্তন্তী’’তি – যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘আযকোসল্লং’’.

(খ) তত্থ কতমং অপাযকোসল্লং? ‘‘ইমে ধম্মে মনসিকরোতো অনুপ্পন্না চেৰ কুসলা ধম্মা ন উপ্পজ্জন্তি, উপ্পন্না চ কুসলা ধম্মা নিরুজ্ঝন্তি. ইমে ৰা পনিমে ধম্মে মনসিকরোতো অনুপ্পন্না চেৰ অকুসলা ধম্মা উপ্পজ্জন্তি, উপ্পন্না চ অকুসলা ধম্মা ভিয্যোভাৰায ৰেপুল্লায সংৰত্তন্তী’’তি – যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘অপাযকোসল্লং’’.

(গ) সব্বাপি তত্রুপাযা পঞ্ঞা উপাযকোসল্লং.

৭৭২. (৫. ক) চতূসু ভূমীসু ৰিপাকে পঞ্ঞা ৰিপাকা পঞ্ঞা.

(খ) চতূসু ভূমীসু কুসলে পঞ্ঞা ৰিপাকধম্মধম্মা পঞ্ঞা.

(গ) তীসু ভূমীসু কিরিযাব্যাকতে পঞ্ঞা নেৰৰিপাকনৰিপাকধম্মধম্মা পঞ্ঞা.

৭৭৩. (৬. ক) তীসু ভূমীসু ৰিপাকে পঞ্ঞা উপাদিন্নুপাদানিযা পঞ্ঞা.

(খ) তীসু ভূমীসু কুসলে তীসু ভূমীসু কিরিযাব্যাকতে পঞ্ঞা অনুপাদিন্নুপাদানিযা পঞ্ঞা.

(গ) চতূসু মগ্গেসু চতূসু ফলেসু পঞ্ঞা অনুপাদিন্নঅনুপাদানিযা পঞ্ঞা.

৭৭৪. (৭. ক) ৰিতক্কৰিচারসম্পযুত্তা পঞ্ঞা সৰিতক্কসৰিচারা পঞ্ঞা.

(খ) ৰিতক্কৰিপ্পযুত্তা ৰিচারসম্পযুত্তা পঞ্ঞা অৰিতক্কৰিচারমত্তা পঞ্ঞা.

(গ) ৰিতক্কৰিচারৰিপ্পযুত্তা পঞ্ঞা অৰিতক্কঅৰিচারা পঞ্ঞা.

৭৭৫. (৮. ক) পীতিসম্পযুত্তা পঞ্ঞা পীতিসহগতা পঞ্ঞা.

(খ) সুখসম্পযুত্তা পঞ্ঞা সুখসহগতা পঞ্ঞা.

(গ) উপেক্খাসম্পযুত্তা পঞ্ঞা উপেক্খাসহগতা পঞ্ঞা.

৭৭৬. (৯. ক) তীসু ভূমীসু কুসলে পঞ্ঞা আচযগামিনী পঞ্ঞা.

(খ) চতূসু মগ্গেসু পঞ্ঞা অপচযগামিনী পঞ্ঞা.

(গ) চতূসু ভূমীসু ৰিপাকে তীসু ভূমীসু কিরিযাব্যাকতে পঞ্ঞা নেৰাচযগামিনাপচযগামিনী পঞ্ঞা.

৭৭৭. (১০. ক) চতূসু মগ্গেসু তীসু ফলেসু পঞ্ঞা সেক্খা পঞ্ঞা.

(খ) উপরিট্ঠিমা [উপরিট্ঠিমে (স্যা.), উপরিট্ঠিমং (ক.)] অরহত্তফলে পঞ্ঞা অসেক্খা পঞ্ঞা.

(গ) তীসু ভূমীসু কুসলে তীসু ভূমীসু ৰিপাকে তীসু ভূমীসু কিরিযাব্যাকতে পঞ্ঞা নেৰসেক্খনাসেক্খা পঞ্ঞা.

৭৭৮. (১১. ক) কামাৰচরকুসলাব্যাকতে পঞ্ঞা পরিত্তা পঞ্ঞা.

(খ) রূপাৰচরারূপাৰচরকুসলাব্যাকতে পঞ্ঞা মহগ্গতা পঞ্ঞা.

(গ) চতূসু মগ্গেসু চতূসু ফলেসু পঞ্ঞা অপ্পমাণা পঞ্ঞা.

৭৭৯. (১২. ক) তত্থ কতমা পরিত্তারম্মণা পঞ্ঞা? পরিত্তে ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘পরিত্তারম্মণা পঞ্ঞা’’.

৭৮০. (খ) তত্থ কতমা মহগ্গতারম্মণা পঞ্ঞা? মহগ্গতে ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘মহগ্গতারম্মণা পঞ্ঞা’’.

৭৮১. (গ) তত্থ কতমা অপ্পমাণারম্মণা পঞ্ঞা? অপ্পমাণে ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অপ্পমাণারম্মণা পঞ্ঞা’’.

৭৮২. (১৩. ক) তত্থ কতমা মগ্গারম্মণা পঞ্ঞা? অরিযমগ্গং আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘মগ্গারম্মণা পঞ্ঞা’’.

(খ) চতূসু মগ্গেসু পঞ্ঞা মগ্গহেতুকা পঞ্ঞা.

৭৮৩. (গ) তত্থ কতমা মগ্গাধিপতিনী পঞ্ঞা? অরিযমগ্গং অধিপতিং করিত্ৰা যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘মগ্গাধিপতিনী পঞ্ঞা’’.

৭৮৪. (১৪) চতূসু ভূমীসু ৰিপাকে পঞ্ঞা সিযা উপ্পন্না, সিযা উপ্পাদিনী, ন ৰত্তব্বা অনুপ্পন্নাতি. চতূসু ভূমীসু কুসলে তীসু ভূমীসু কিরিযাব্যাকতে পঞ্ঞা সিযা উপ্পন্না, সিযা অনুপ্পন্না, ন ৰত্তব্বা উপ্পাদিনীতি.

৭৮৫. (১৫) সব্বাৰ পঞ্ঞা সিযা অতীতা, সিযা অনাগতা, সিযা পচ্চুপ্পন্না.

৭৮৬. (১৬. ক) তত্থ কতমা অতীতারম্মণা পঞ্ঞা? অতীতে ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অতীতারম্মণা পঞ্ঞা’’.

৭৮৭. (খ) তত্থ কতমা অনাগতারম্মণা পঞ্ঞা? অনাগতে ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অনাগতারম্মণা পঞ্ঞা’’.

৭৮৮. (গ) তত্থ কতমা পচ্চুপ্পন্নারম্মণা পঞ্ঞা? পচ্চুপ্পন্নে ধম্মে আরব্ভ যা উপ্পজ্জতি পঞ্ঞা পজাননা …পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘পচ্চুপ্পন্নারম্মণা পঞ্ঞা’’.

৭৮৯. (১৭) সব্বাৰ পঞ্ঞা সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা.

৭৯০. (১৮. ক) তত্থ কতমা অজ্ঝত্তারম্মণা পঞ্ঞা? অজ্ঝত্তে ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অজ্ঝত্তারম্মণা পঞ্ঞা’’.

৭৯১. (খ) তত্থ কতমা বহিদ্ধারম্মণা পঞ্ঞা? বহিদ্ধাধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘বহিদ্ধারম্মণা পঞ্ঞা’’.

৭৯২. (গ) তত্থ কতমা অজ্ঝত্তবহিদ্ধারম্মণা পঞ্ঞা? অজ্ঝত্তবহিদ্ধা ধম্মে আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ‘‘অজ্ঝত্তবহিদ্ধারম্মণা পঞ্ঞা’’.

এৰং তিৰিধেন ঞাণৰত্থু.

তিকং.

৪. চতুক্কনিদ্দেসো

৭৯৩. (১. ক) তত্থ কতমং কম্মস্সকতঞাণং? ‘‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’’তি – যা এৰরূপা পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘কম্মস্সকতঞাণং’’. ঠপেত্ৰা সচ্চানুলোমিকং ঞাণং, সব্বাপি সাসৰা কুসলা পঞ্ঞা কম্মস্সকতঞাণং.

(খ) তত্থ কতমং সচ্চানুলোমিকং ঞাণং? ‘‘রূপং অনিচ্চ’’ন্তি ৰা ৰেদনা…পে… সঞ্ঞা… সঙ্খারা… ‘‘ৰিঞ্ঞাণং অনিচ্চ’’ন্তি ৰা যা এৰরূপী অনুলোমিকা খন্তি দিট্ঠি রুচি মুদি পেক্খা ধম্মনিজ্ঝানক্খন্তি – ইদং ৰুচ্চতি ‘‘সচ্চানুলোমিকং ঞাণং’’.

(গ) চতূসু মগ্গেসু পঞ্ঞা মগ্গসমঙ্গিস্স ঞাণং.

(ঘ) চতূসু ফলেসু পঞ্ঞা ফলসমঙ্গিস্স ঞাণং.

৭৯৪. (২) মগ্গসমঙ্গিস্স ঞাণং দুক্খেপেতং ঞাণং, দুক্খসমুদযেপেতং ঞাণং, দুক্খনিরোধেপেতং ঞাণং, দুক্খনিরোধগামিনিযা পটিপদাযপেতং ঞাণং.

(ক) তত্থ কতমং দুক্খে ঞাণং? দুক্খং আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘দুক্খে ঞাণং’’.

(খ-ঘ) দুক্খসমুদযং আরব্ভ…পে… দুক্খনিরোধং আরব্ভ…পে… দুক্খনিরোধগামিনিং পটিপদং আরব্ভ যা উপ্পজ্জতি পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘দুক্খনিরোধগামিনিযা পটিপদায ঞাণং’’.

৭৯৫. (৩) কামাৰচরকুসলাব্যাকতে পঞ্ঞা কামাৰচরা পঞ্ঞা, রূপাৰচরকুসলাব্যাকতে পঞ্ঞা রূপাৰচরা পঞ্ঞা, অরূপাৰচরকুসলাব্যাকতে পঞ্ঞা অরূপাৰচরা পঞ্ঞা, চতূসু মগ্গেসু চতূসু ফলেসু পঞ্ঞা অপরিযাপন্না পঞ্ঞা.

৭৯৬. (৪. ক) তত্থ কতমং ধম্মে ঞাণং? চতূসু মগ্গেসু চতূসু ফলেসু পঞ্ঞা ধম্মে ঞাণং.

(খ) সো ইমিনা ধম্মেন ঞাতেন দিট্ঠেন পত্তেন ৰিদিতেন পরিযোগাল়্হেন অতীতানাগতেন নযং নেতি. ‘‘যে হি কেচি অতীতমদ্ধানং সমণা ৰা ব্রাহ্মণা ৰা দুক্খং অব্ভঞ্ঞংসু [অব্ভঞ্ঞিংসু (স্যা.) এৰমুপরিপি], দুক্খসমুদযং অব্ভঞ্ঞংসু, দুক্খনিরোধং অব্ভঞ্ঞংসু, দুক্খনিরোধগামিনিং পটিপদং অব্ভঞ্ঞংসু, ইমঞ্ঞেৰ তে দুক্খং অব্ভঞ্ঞংসু, ইমঞ্ঞেৰ তে দুক্খসমুদযং অব্ভঞ্ঞংসু, ইমঞ্ঞেৰ তে দুক্খনিরোধং অব্ভঞ্ঞংসু, ইমঞ্ঞেৰ তে দুক্খনিরোধগামিনিং পটিপদং অব্ভঞ্ঞংসু. যে হি কেচি অনাগতমদ্ধানং সমণা ৰা ব্রাহ্মণা ৰা দুক্খং অভিজানিস্সন্তি, দুক্খসমুদযং অভিজানিস্সন্তি, দুক্খনিরোধং অভিজানিস্সন্তি, দুক্খনিরোধগামিনিং পটিপদং অভিজানিস্সন্তি, ইমঞ্ঞেৰ তে দুক্খং অভিজানিস্সন্তি, ইমঞ্ঞেৰ তে দুক্খসমুদযং অভিজানিস্সন্তি, ইমঞ্ঞেৰ তে দুক্খনিরোধং অভিজানিস্সন্তি, ইমঞ্ঞেৰ তে দুক্খনিরোধগামিনিং পটিপদং অভিজানিস্সন্তী’’তি – যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘অন্ৰযে ঞাণং’’.

(গ) তত্থ কতমং পরিযে ঞাণং? ইধ ভিক্খু পরসত্তানং পরপুগ্গলানং চেতসা চেতো পরিচ্চ পজানাতি. সরাগং ৰা চিত্তং ‘‘সরাগং চিত্ত’’ন্তি পজানাতি, ৰীতরাগং ৰা চিত্তং ‘‘ৰীতরাগং চিত্ত’’ন্তি পজানাতি, সদোসং ৰা চিত্তং ‘‘সদোসং চিত্ত’’ন্তি পজানাতি, ৰীতদোসং ৰা চিত্তং ‘‘ৰীতদোসং চিত্ত’’ন্তি পজানাতি, সমোহং ৰা চিত্তং ‘‘সমোহং চিত্ত’’ন্তি পজানাতি, ৰীতমোহং ৰা চিত্তং ‘‘ৰীতমোহং চিত্ত’’ন্তি পজানাতি, সংখিত্তং ৰা চিত্তং ‘‘সংখিত্তং চিত্ত’’ন্তি পজানাতি, ৰিক্খিত্তং ৰা চিত্তং ‘‘ৰিক্খিত্তং চিত্ত’’ন্তি পজানাতি, মহগ্গতং ৰা চিত্তং ‘‘মহগ্গতং চিত্ত’’ন্তি পজানাতি, অমহগ্গতং ৰা চিত্তং ‘‘অমহগ্গতং চিত্ত’’ন্তি পজানাতি, সউত্তরং ৰা চিত্তং ‘‘সউত্তরং চিত্ত’’ন্তি পজানাতি, অনুত্তরং ৰা চিত্তং ‘‘অনুত্তরং চিত্ত’’ন্তি পজানাতি, সমাহিতং ৰা চিত্তং ‘‘সমাহিতং চিত্ত’’ন্তি পজানাতি, অসমাহিতং ৰা চিত্তং ‘‘অসমাহিতং চিত্ত’’ন্তি পজানাতি, ৰিমুত্তং ৰা চিত্তং ‘‘ৰিমুত্তং চিত্ত’’ন্তি পজানাতি, অৰিমুত্তং ৰা চিত্তং ‘‘অৰিমুত্তং চিত্ত’’ন্তি পজানাতীতি – যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি ‘‘পরিযে ঞাণং’’.

(ঘ) ঠপেত্ৰা ধম্মে ঞাণং অন্ৰযে ঞাণং পরিযে ঞাণং, অৰসেসা পঞ্ঞা সম্মুতিঞাণং.

৭৯৭. (৫. ক) তত্থ কতমা পঞ্ঞা আচযায নো অপচযায? কামাৰচরকুসলে পঞ্ঞা আচযায নো অপচযায.

(খ) চতূসু মগ্গেসু পঞ্ঞা অপচযায নো আচযায.

(গ) রূপাৰচরারূপাৰচরকুসলে পঞ্ঞা আচযায চেৰ অপচযায চ.

(ঘ) অৰসেসা পঞ্ঞা নেৰ আচযায নো অপচযায.

৭৯৮. (৬. ক) তত্থ কতমা পঞ্ঞা নিব্বিদায নো পটিৰেধায? যায পঞ্ঞায কামেসু ৰীতরাগো হোতি, ন চ অভিঞ্ঞাযো পটিৰিজ্ঝতি ন চ সচ্চানি – অযং ৰুচ্চতি ‘‘পঞ্ঞা নিব্বিদায নো পটিৰেধায’’.

(খ) স্ৰেৰ পঞ্ঞায কামেসু ৰীতরাগো সমানো অভিঞ্ঞাযো পটিৰিজ্ঝতি ন চ সচ্চানি – অযং ৰুচ্চতি ‘‘পঞ্ঞা পটিৰেধায নো নিব্বিদায’’.

(গ) চতূসু মগ্গেসু পঞ্ঞা নিব্বিদায চেৰ পটিৰেধায চ.

(ঘ) অৰসেসা পঞ্ঞা নেৰ নিব্বিদায নো পটিৰেধায.

৭৯৯. (৭. ক) তত্থ কতমা হানভাগিনী পঞ্ঞা? পঠমস্স ঝানস্স লাভিং কামসহগতা সঞ্ঞামনসিকারা সমুদাচরন্তি হানভাগিনী পঞ্ঞা.

(খ) তদনুধম্মতা সতি সন্তিট্ঠতি ঠিতিভাগিনী পঞ্ঞা.

(গ) অৰিতক্কসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা.

(ঘ) নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা. দুতিযস্স ঝানস্স লাভিং ৰিতক্কসহগতা সঞ্ঞামনসিকারা সমুদাচরন্তি হানভাগিনী পঞ্ঞা. তদনুধম্মতা সতি সন্তিট্ঠতি ঠিতিভাগিনী পঞ্ঞা. উপেক্খাসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা. নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা. ততিযস্স ঝানস্স লাভিং পীতিসুখসহগতা সঞ্ঞামনসিকারা সমুদাচরন্তি হানভাগিনী পঞ্ঞা. তদনুধম্মতা সতি সন্তিট্ঠতি ঠিতিভাগিনী পঞ্ঞা. অদুক্খমসুখসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা. নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা. চতুত্থস্স ঝানস্স লাভিং উপেক্খাসহগতা সঞ্ঞামনসিকারা সমুদাচরন্তি হানভাগিনী পঞ্ঞা. তদনুধম্মতা সতি সন্তিট্ঠতি ঠিতিভাগিনী পঞ্ঞা. আকাসানঞ্চাযতনসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা. নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা. আকাসানঞ্চাযতনস্স লাভিং রূপসহগতা সঞ্ঞামনসিকারা সমুদাচরন্তি হানভাগিনী পঞ্ঞা. তদনুধম্মতা সতি সন্তিট্ঠতি ঠিতিভাগিনী পঞ্ঞা. ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা. নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা. ৰিঞ্ঞাণঞ্চাযতনস্স লাভিং আকাসানঞ্চাযতনসহগতা সঞ্ঞামনসিকারা সমুদাচরন্তি হানভাগিনী পঞ্ঞা. তদনুধম্মতা সতি সন্তিট্ঠতি ঠিতিভাগিনী পঞ্ঞা. আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা. নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা. আকিঞ্চঞ্ঞাযতনস্স লাভিং ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি হানভাগিনী পঞ্ঞা. তদনুধম্মতা সতি সন্তিট্ঠতি ঠিতিভাগিনী পঞ্ঞা. নেৰসঞ্ঞানাসঞ্ঞাযতনসহগতা সঞ্ঞামনসিকারা সমুদাচরন্তি ৰিসেসভাগিনী পঞ্ঞা. নিব্বিদাসহগতা সঞ্ঞামনসিকারা সমুদাচরন্তি ৰিরাগূপসঞ্হিতা নিব্বেধভাগিনী পঞ্ঞা.

৮০০. (৮) তত্থ কতমা চতস্সো পটিসম্ভিদা? অত্থপটিসম্ভিদা, ধম্মপটিসম্ভিদা, নিরুত্তিপটিসম্ভিদা, পটিভানপটিসম্ভিদা. অত্থে ঞাণং অত্থপটিসম্ভিদা, ধম্মে ঞাণং ধম্মপটিসম্ভিদা, তত্র ধম্মনিরুত্তাভিলাপে ঞাণং নিরুত্তিপটিসম্ভিদা, ঞাণেসু ঞাণং পটিভানপটিসম্ভিদা. ইমা চতস্সো পটিসম্ভিদা.

৮০১. (৯) তত্থ কতমা চতস্সো পটিপদা? দুক্খপটিপদা দন্ধাভিঞ্ঞা পঞ্ঞা, দুক্খপটিপদা খিপ্পাভিঞ্ঞা পঞ্ঞা, সুখপটিপদা দন্ধাভিঞ্ঞা পঞ্ঞা, সুখপটিপদা খিপ্পাভিঞ্ঞা পঞ্ঞা.