৪. চতুক্কপুগ্গলপঞ্ঞত্তি

১৩২. কতমো চ পুগ্গলো অসপ্পুরিসো? ইধেকচ্চো পুগ্গলো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, সুরামেরযমজ্জপমাদট্ঠাযী হোতি – অযং ৰুচ্চতি পুগ্গলো ‘‘অসপ্পুরিসো’’.

১৩৩. কতমো চ পুগ্গলো অসপ্পুরিসেন অসপ্পুরিসতরো? ইধেকচ্চো পুগ্গলো অত্তনা চ পাণাতিপাতী হোতি পরঞ্চ পাণাতিপাতে সমাদপেতি, অত্তনা চ অদিন্নাদাযী হোতি পরঞ্চ অদিন্নাদানে সমাদপেতি, অত্তনা চ কামেসুমিচ্ছাচারী হোতি পরঞ্চ কামেসুমিচ্ছাচারে সমাদপেতি, অত্তনা চ মুসাৰাদী হোতি পরঞ্চ মুসাৰাদে সমাদপেতি, অত্তনা চ সুরামেরযমজ্জপমাদট্ঠাযী হোতি পরঞ্চ সুরামেরযমজ্জপমাদট্ঠানে সমাদপেতি – অযং ৰুচ্চতি পুগ্গলো ‘‘অসপ্পুরিসেন অসপ্পুরিসতরো’’.

১৩৪. কতমো চ পুগ্গলো সপ্পুরিসো? ইধেকচ্চো পুগ্গলো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, সুরামেরযমজ্জপমাদট্ঠানা পটিৰিরতো হোতি – অযং ৰুচ্চতি পুগ্গলো ‘‘সপ্পুরিসো’’.

১৩৫. কতমো চ পুগ্গলো সপ্পুরিসেন সপ্পুরিসতরো? ইধেকচ্চো পুগ্গলো অত্তনা চ পাণাতিপাতা পটিৰিরতো হোতি পরঞ্চ পাণাতিপাতা ৰেরমণিযা সমাদপেতি, অত্তনা চ অদিন্নাদানা পটিৰিরতো হোতি পরঞ্চ অদিন্নাদানা ৰেরমণিযা সমাদপেতি, অত্তনা চ কামেসুমিচ্ছাচারা পটিৰিরতো হোতি পরঞ্চ কামেসুমিচ্ছাচারা ৰেরমণিযা সমাদপেতি, অত্তনা চ মুসাৰাদা পটিৰিরতো হোতি পরঞ্চ মুসাৰাদা ৰেরমণিযা সমাদপেতি, অত্তনা চ সুরামেরযমজ্জপমাদট্ঠানা পটিৰিরতো হোতি পরঞ্চ সুরামেরযমজ্জপমাদট্ঠানা ৰেরমণিযা সমাদপেতি – অযং ৰুচ্চতি পুগ্গলো ‘‘সপ্পুরিসেন সপ্পুরিসতরো’’.

১৩৬. কতমো চ পুগ্গলো পাপো? ইধেকচ্চো পুগ্গলো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণৰাচো [পিসুণাৰাচো] হোতি, ফরুসৰাচো [ফরুসাৰাচো (সী.) দী. নি. ৩.১১৫] হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠি [মিচ্ছাদিট্ঠী (ক.)] হোতি – অযং ৰুচ্চতি পুগ্গলো ‘‘পাপো’’.

১৩৭. কতমো চ পুগ্গলো পাপেন পাপতরো? ইধেকচ্চো পুগ্গলো অত্তনা চ পাণাতিপাতী হোতি পরঞ্চ পাণাতিপাতে সমাদপেতি, অত্তনা চ অদিন্নাদাযী হোতি পরঞ্চ অদিন্নাদানে সমাদপেতি, অত্তনা চ কামেসুমিচ্ছাচারী হোতি পরঞ্চ কামেসুমিচ্ছাচারে সমাদপেতি, অত্তনা চ মুসাৰাদী হোতি পরঞ্চ মুসাৰাদে সমাদপেতি, অত্তনা চ পিসুণৰাচো হোতি পরঞ্চ পিসুণায ৰাচায সমাদপেতি, অত্তনা চ ফরুসৰাচো হোতি পরঞ্চ ফরুসায ৰাচায সমাদপেতি, অত্তনা চ সম্ফপ্পলাপী হোতি পরঞ্চ সম্ফপ্পলাপে সমাদপেতি, অত্তনা চ অভিজ্ঝালু হোতি পরঞ্চ অভিজ্ঝায সমাদপেতি, অত্তনা চ ব্যাপন্নচিত্তো হোতি পরঞ্চ ব্যাপাদে সমাদপেতি, অত্তনা চ মিচ্ছাদিট্ঠি হোতি পরঞ্চ মিচ্ছাদিট্ঠিযা সমাদপেতি – অযং ৰুচ্চতি পুগ্গলো ‘‘পাপেন পাপতরো’’.

১৩৮. কতমো চ পুগ্গলো কল্যাণো? ইধেকচ্চো পুগ্গলো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি [সম্মাদিট্ঠী (ক.)] হোতি – অযং ৰুচ্চতি পুগ্গলো ‘‘কল্যাণো’’.

১৩৯. কতমো চ পুগ্গলো কল্যাণেন কল্যাণতরো? ইধেকচ্চো পুগ্গলো অত্তনা চ পাণাতিপাতা পটিৰিরতো হোতি পরঞ্চ পাণাতিপাতা ৰেরমণিযা সমাদপেতি, অত্তনা চ অদিন্নাদানা পটিৰিরতো হোতি পরঞ্চ অদিন্নাদানা ৰেরমণিযা সমাদপেতি, অত্তনা চ কামেসুমিচ্ছাচারা পটিৰিরতো হোতি পরঞ্চ কামেসুমিচ্ছাচারা ৰেরমণিযা সমাদপেতি, অত্তনা চ মুসাৰাদা পটিৰিরতো হোতি পরঞ্চ মুসাৰাদা ৰেরমণিযা সমাদপেতি, অত্তনা চ পিসুণায ৰাচায পটিৰিরতো হোতি পরঞ্চ পিসুণায ৰাচায ৰেরমণিযা সমাদপেতি, অত্তনা চ ফরুসায ৰাচায পটিৰিরতো হোতি পরঞ্চ ফরুসায ৰাচায ৰেরমণিযা সমাদপেতি, অত্তনা চ সম্ফপ্পলাপা পটিৰিরতো হোতি পরঞ্চ সম্ফপ্পলাপা ৰেরমণিযা সমাদপেতি, অত্তনা চ অনভিজ্ঝালু হোতি পরঞ্চ অনভিজ্ঝায সমাদপেতি, অত্তনা চ অব্যাপন্নচিত্তো হোতি পরঞ্চ অব্যাপাদে সমাদপেতি, অত্তনা চ সম্মাদিট্ঠি হোতি পরঞ্চ সম্মাদিট্ঠিযা সমাদপেতি – অযং ৰুচ্চতি পুগ্গলো ‘‘কল্যাণেন কল্যাণতরো’’.

১৪০. কতমো চ পুগ্গলো পাপধম্মো? ইধেকচ্চো পুগ্গলো পাণাতিপাতী হোতি, অদিন্নাদাযী হোতি…পে… মিচ্ছাদিট্ঠি হোতি – অযং ৰুচ্চতি পুগ্গলো ‘‘পাপধম্মো’’.

১৪১. কতমো চ পুগ্গলো পাপধম্মেন পাপধম্মতরো? ইধেকচ্চো পুগ্গলো অত্তনা চ পাণাতিপাতী হোতি পরঞ্চ পাণাতিপাতে সমাদপেতি, অত্তনা চ অদিন্নাদাযী হোতি পরঞ্চ অদিন্নাদানে সমাদপেতি…পে… অত্তনা চ মিচ্ছাদিট্ঠি হোতি পরঞ্চ মিচ্ছাদিট্ঠিযা সমাদপেতি – অযং ৰুচ্চতি পুগ্গলো ‘‘পাপধম্মেন পাপধম্মতরো’’.

১৪২. কতমো চ পুগ্গলো কল্যাণধম্মো? ইধেকচ্চো পুগ্গলো পাণাতিপাতা পটিৰিরতো হোতি, অদিন্নাদানা পটিৰিরতো হোতি…পে… সমাদিট্ঠি হোতি – অযং ৰুচ্চতি পুগ্গলো ‘‘কল্যাণধম্মো’’.

১৪৩. কতমো চ পুগ্গলো কল্যাণধম্মেন কল্যাণধম্মতরো? ইধেকচ্চো পুগ্গলো অত্তনা চ পাণাতিপাতা পটিৰিরতো হোতি পরঞ্চ পাণাতিপাতা ৰেরমণিযা সমাদপেতি…পে… অত্তনা চ সম্মাদিট্ঠি হোতি পরঞ্চ সম্মাদিট্ঠিযা সমাদপেতি – অযং ৰুচ্চতি পুগ্গলো ‘‘কল্যাণধম্মেন কল্যাণধম্মতরো’’.

১৪৪. কতমো চ পুগ্গলো সাৰজ্জো? ইধেকচ্চো পুগ্গলো সাৰজ্জেন কাযকম্মেন সমন্নাগতো হোতি, সাৰজ্জেন ৰচীকম্মেন সমন্নাগতো হোতি, সাৰজ্জেন মনোকম্মেন সমন্নাগতো হোতি – অযং ৰুচ্চতি পুগ্গলো ‘‘সাৰজ্জো’’.

১৪৫. কতমো চ পুগ্গলো ৰজ্জবহুলো? ইধেকচ্চো পুগ্গলো সাৰজ্জেন বহুলং কাযকম্মেন সমন্নাগতো হোতি অপ্পং অনৰজ্জেন, সাৰজ্জেন বহুলং ৰচীকম্মেন সমন্নাগতো হোতি অপ্পং অনৰজ্জেন, সাৰজ্জেন বহুলং মনোকম্মেন সমন্নাগতো হোতি অপ্পং অনৰজ্জেন – অযং ৰুচ্চতি পুগ্গলো ‘‘ৰজ্জবহুলো’’.

১৪৬. কতমো চ পুগ্গলো অপ্পৰজ্জো? ইধেকচ্চো পুগ্গলো অনৰজ্জেন বহুলং কাযকম্মেন সমন্নাগতো হোতি অপ্পং সাৰজ্জেন, অনৰজ্জেন বহুলং ৰচীকম্মেন সমন্নাগতো হোতি অপ্পং সাৰজ্জেন, অনৰজ্জেন বহুলং মনোকম্মেন সমন্নাগতো হোতি অপ্পং সাৰজ্জেন – অযং ৰুচ্চতি পুগ্গলো ‘‘অপ্পৰজ্জো’’.

১৪৭. কতমো চ পুগ্গলো অনৰজ্জো? ইধেকচ্চো পুগ্গলো অনৰজ্জেন কাযকম্মেন সমন্নাগতো হোতি, অনৰজ্জেন ৰচীকম্মেন সমন্নাগতো হোতি, অনৰজ্জেন মনোকম্মেন সমন্নাগতো হোতি – অযং ৰুচ্চতি পুগ্গলো ‘‘অনৰজ্জো’’.

১৪৮. কতমো চ পুগ্গলো উগ্ঘটিতঞ্ঞূ? যস্স পুগ্গলস্স সহ উদাহটৰেলায ধম্মাভিসমযো হোতি – অযং ৰুচ্চতি পুগ্গলো ‘‘উগ্ঘটিতঞ্ঞূ’’.

১৪৯. কতমো চ পুগ্গলো ৰিপঞ্চিতঞ্ঞূ? যস্স পুগ্গলস্স সংখিত্তেন ভাসিতস্স ৰিত্থারেন অত্থে ৰিভজিযমানে ধম্মাভিসমযো হোতি – অযং ৰুচ্চতি পুগ্গলো ‘‘ৰিপঞ্চিতঞ্ঞূ’’.

১৫০. কতমো চ পুগ্গলো নেয্যো? যস্স পুগ্গলস্স উদ্দেসতো পরিপুচ্ছতো যোনিসো মনসিকরোতো কল্যাণমিত্তে সেৰতো ভজতো পযিরুপাসতো এৰং অনুপুব্বেন ধম্মাভিসমযো হোতি – অযং ৰুচ্চতি পুগ্গলো ‘‘নেয্যো’’.

১৫১. কতমো চ পুগ্গলো পদপরমো? যস্স পুগ্গলস্স বহুম্পি সুণতো বহুম্পি ভণতো বহুম্পি ধারযতো বহুম্পি ৰাচযতো ন তায জাতিযা ধম্মাভিসমযো হোতি – অযং ৰুচ্চতি পুগ্গলো ‘‘পদপরমো’’.

১৫২. কতমো চ পুগ্গলো যুত্তপ্পটিভানো [যুত্তপটিভাণো (স্যা.) অ. নি. ৪.১৩২] নো মুত্তপ্পটিভানো? ইধেকচ্চো পুগ্গলো পঞ্হং পুট্ঠো সমানো যুত্তং ৰদতি নো সীঘং – অযং ৰুচ্চতি পুগ্গলো ‘‘যুত্তপ্পটিভানো নো মুত্তপ্পটিভানো’’.

১৫৩. কতমো চ পুগ্গলো মুত্তপ্পটিভানো নো যুত্তপ্পটিভানো? ইধেকচ্চো পুগ্গলো পঞ্হং পুট্ঠো সমানো সীঘং ৰদতি নো যুত্তং – অযং ৰুচ্চতি পুগ্গলো ‘‘মুত্তপ্পটিভানো নো যুত্তপ্পটিভানো’’.

১৫৪. কতমো চ পুগ্গলো যুত্তপ্পটিভানো চ মুত্তপ্পটিভানো চ? ইধেকচ্চো পুগ্গলো পঞ্হং পুট্ঠো সমানো যুত্তঞ্চ ৰদতি সীঘঞ্চ – অযং ৰুচ্চতি পুগ্গলো ‘‘যুত্তপ্পটিভানো চ মুত্তপ্পটিভানো চ’’.

১৫৫. কতমো চ পুগ্গলো নেৰ যুত্তপ্পটিভানো নো মুত্তপ্পটিভানো? ইধেকচ্চো পুগ্গলো পঞ্হং পুট্ঠো সমানো নেৰ যুত্তং ৰদতি নো সীঘং – অযং ৰুচ্চতি, পুগ্গলো ‘‘নেৰ যুত্তপ্পটিভানো নো মুত্তপ্পটিভানো’’.

১৫৬. তত্থ কতমে চত্তারো ধম্মকথিকা পুগ্গলা? ইধেকচ্চো ধম্মকথিকো অপ্পঞ্চ ভাসতি অসহিতঞ্চ, পরিসা চস্স ন কুসলা হোতি সহিতাসহিতস্স. এৰরূপো ধম্মকথিকো এৰরূপায পরিসায ধম্মকথিকোত্ৰেৰ সঙ্খং গচ্ছতি.

ইধ পনেকচ্চো ধম্মকথিকো অপ্পঞ্চ ভাসতি সহিতঞ্চ, পরিসা চস্স কুসলা হোতি সহিতাসহিতস্স. এৰরূপো ধম্মকথিকো এৰরূপায পরিসায ধম্মকথিকোত্ৰেৰ সঙ্খং গচ্ছতি.

ইধ পনেকচ্চো ধম্মকথিকো বহুঞ্চ ভাসতি অসহিতঞ্চ, পরিসা চস্স ন কুসলা হোতি সহিতাসহিতস্স. এৰরূপো ধম্মকথিকো এৰরূপায পরিসায ধম্মকথিকোত্ৰেৰ সঙ্খং গচ্ছতি.

ইধ পনেকচ্চো ধম্মকথিকো বহুঞ্চ ভাসতি সহিতঞ্চ, পরিসা চস্স কুসলা হোতি সহিতাসহিতস্স. এৰরূপো ধম্মকথিকো এৰরূপায পরিসায ধম্মকথিকোত্ৰেৰ সঙ্খং গচ্ছতি. ইমে চত্তারো ‘‘ধম্মকথিকা পুগ্গলা’’.

১৫৭. তত্থ কতমে চত্তারো ৰলাহকূপমা পুগ্গলা? চত্তারো ৰলাহকা – গজ্জিতা নো ৰস্সিতা, ৰস্সিতা নো গজ্জিতা, গজ্জিতা চ ৰস্সিতা চ, নেৰ গজ্জিতা নো ৰস্সিতা. এৰমেৰং চত্তারোমে ৰলাহকূপমা পুগ্গলা সন্তো সংৰিজ্জমানা লোকস্মিং. কতমে চত্তারো? গজ্জিতা নো ৰস্সিতা, ৰস্সিতা নো গজ্জিতা, গজ্জিতা চ ৰস্সিতা চ, নেৰ গজ্জিতা নো ৰস্সিতা.

কথঞ্চ পুগ্গলো গজ্জিতা হোতি নো ৰস্সিতা? ইধেকচ্চো পুগ্গলো ভাসিতা হোতি, নো কত্তা. এৰং পুগ্গলো গজ্জিতা হোতি, নো ৰস্সিতা. সেয্যথাপি সো ৰলাহকো গজ্জিতা নো ৰস্সিতা, তথূপমো অযং পুগ্গলো.

কথঞ্চ পুগ্গলো ৰস্সিতা হোতি নো গজ্জিতা? ইধেকচ্চো পুগ্গলো কত্তা হোতি, নো ভাসিতা. এৰং পুগ্গলো ৰস্সিতা হোতি নো গজ্জিতা. সেয্যথাপি সো ৰলাহকো ৰস্সিতা নো গজ্জিতা, তথূপমো অযং পুগ্গলো.

কথঞ্চ পুগ্গলো গজ্জিতা চ হোতি ৰস্সিতা চ? ইধেকচ্চো পুগ্গলো ভাসিতা চ হোতি, কত্তা চ. এৰং পুগ্গলো গজ্জিতা চ হোতি ৰস্সিতা চ. সেয্যথাপি সো ৰলাহকো গজ্জিতা চ ৰস্সিতা চ, তথূপমো অযং পুগ্গলো.

কথঞ্চ পুগ্গলো নেৰ গজ্জিতা হোতি নো ৰস্সিতা? ইধেকচ্চো পুগ্গলো নেৰ ভাসিতা হোতি নো কত্তা. এৰং পুগ্গলো নেৰ গজ্জিতা হোতি নো ৰস্সিতা. সেয্যথাপি সো ৰলাহকো নেৰ গজ্জিতা নো ৰস্সিতা, তথূপমো অযং পুগ্গলো.

ইমে চত্তারো ৰলাহকূপমা পুগ্গলা সন্তো সংৰিজ্জমানা লোকস্মিং.

১৫৮. তত্থ কতমে চত্তারো মূসিকূপমা পুগ্গলা? চতস্সো মূসিকা – গাধং কত্তা নো ৰসিতা, ৰসিতা নো গাধং কত্তা, গাধং কত্তা চ ৰসিতা চ, নেৰ গাধং কত্তা নো ৰসিতা. এৰমেৰং চত্তারোমে মূসিকূপমা পুগ্গলা সন্তো সংৰিজ্জমানা লোকস্মিং. কতমে চত্তারো? গাধং কত্তা নো ৰসিতা, ৰসিতা নো গাধং কত্তা, গাধং কত্তা চ ৰসিতা চ, নেৰ গাধং কত্তা নো ৰসিতা.

কথঞ্চ পুগ্গলো গাধং কত্তা হোতি নো ৰসিতা? ইধেকচ্চো পুগ্গলো ধম্মং পরিযাপুণাতি – সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো ‘‘ইদং দুক্খ’’ন্তি যথাভূতং নপ্পজানাতি, ‘‘অযং দুক্খসমুদযো’’তি যথাভূতং নপ্পজানাতি, ‘‘অযং দুক্খনিরোধো’’তি যথাভূতং নপ্পজানাতি, ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো গাধং কত্তা হোতি নো ৰসিতা. সেয্যথাপি সা মূসিকা গাধং কত্তা নো ৰসিতা, তথূপমো অযং পুগ্গলো.

কথঞ্চ পুগ্গলো ৰসিতা হোতি নো গাধং কত্তা? ইধেকচ্চো পুগ্গলো ধম্মং ন পরিযাপুণাতি – সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো ৰসিতা হোতি নো গাধং কত্তা. সেয্যথাপি সা মূসিকা ৰসিতা নো গাধং কত্তা, তথূপমো অযং পুগ্গলো.

কথঞ্চ পুগ্গলো গাধং কত্তা চ হোতি ৰসিতা চ? ইধেকচ্চো পুগ্গলো ধম্মং পরিযাপুণাতি – সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো গাধং কত্তা চ হোতি ৰসিতা চ. সেয্যথাপি সা মূসিকা গাধং কত্তা চ ৰসিতা চ, তথূপমো অযং পুগ্গলো.

কথঞ্চ পুগ্গলো নেৰ গাধং কত্তা হোতি নো ৰসিতা? ইধেকচ্চো পুগ্গলো ধম্মং ন পরিযাপুণাতি – সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো ‘‘ইদং দুক্খ’’ন্তি যথাভূতং নপ্পজানাতি, ‘‘অযং দুক্খসমুদযো’’তি যথাভূতং নপ্পজানাতি, ‘‘অযং দুক্খনিরোধো’’তি যথাভূতং নপ্পজানাতি, ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো নেৰ গাধং কত্তা হোতি নো ৰসিতা. সেয্যথাপি সা মূসিকা নেৰ গাধং কত্তা নো ৰসিতা, তথূপমো অযং পুগ্গলো.

ইমে চত্তারো মূসিকূপমা পুগ্গলা সন্তো সংৰিজ্জমানা লোকস্মিং.

১৫৯. তত্থ কতমে চত্তারো অম্বূপমা পুগ্গলা? চত্তারি অম্বানি – আমং পক্কৰণ্ণি [পক্কৰণ্ণী], পক্কং আমৰণ্ণি [আমৰণ্ণী (স্যা. ক.) অ. নি. ৪.১০৫], আমং আমৰণ্ণি, পক্কং পক্কৰণ্ণি. এৰমেৰং চত্তারোমে অম্বূপমা পুগ্গলা সন্তো সংৰিজ্জমানা লোকস্মিং. কতমে চত্তারো? আমো পক্কৰণ্ণী, পক্কো আমৰণ্ণী, আমো আমৰণ্ণী, পক্কো পক্কৰণ্ণী.

কথঞ্চ পুগ্গলো আমো হোতি পক্কৰণ্ণী? ইধেকচ্চস্স পুগ্গলস্স পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং [সম্মিঞ্জিতং (সী. স্যা.)] পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং নপ্পজানাতি, ‘‘অযং দুক্খসমুদযো’’তি যথাভূতং নপ্পজানাতি, ‘‘অযং দুক্খনিরোধো’’তি যথাভূতং নপ্পজানাতি, ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো আমো হোতি পক্কৰণ্ণী. সেয্যথাপি তং অম্বং আমং পক্কৰণ্ণি, তথূপমো অযং পুগ্গলো.

কথঞ্চ পুগ্গলো পক্কো হোতি আমৰণ্ণী? ইধেকচ্চস্স পুগ্গলস্স ন পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো পক্কো হোতি আমৰণ্ণী. সেয্যথাপি তং অম্বং পক্কং আমৰণ্ণি, তথূপমো অযং পুগ্গলো.

কথঞ্চ পুগ্গলো আমো হোতি আমৰণ্ণী? ইধেকচ্চস্স পুগ্গলস্স ন পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং নপ্পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো আমো হোতি আমৰণ্ণী. সেয্যথাপি তং অম্বং আমং আমৰণ্ণি, তথূপমো অযং পুগ্গলো.

কথঞ্চ পুগ্গলো পক্কো হোতি পক্কৰণ্ণী? ইধেকচ্চস্স পুগ্গলস্স পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং পজানাতি …পে… ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো পক্কো হোতি পক্কৰণ্ণী. সেয্যথাপি তং অম্বং পক্কং পক্কৰণ্ণি, তথূপমো অযং পুগ্গলো.

ইমে চত্তারো অম্বূপমা পুগ্গলা সন্তো সংৰিজ্জমানা লোকস্মিং.

১৬০. তত্থ কতমে চত্তারো কুম্ভূপমা পুগ্গলা? চত্তারো কুম্ভা – তুচ্ছো পিহিতো, পূরো ৰিৰটো, তুচ্ছো ৰিৰটো, পূরো পিহিতো. এৰমেৰং চত্তারোমে কুম্ভূপমা পুগ্গলা সন্তো সংৰিজ্জমানা লোকস্মিং. কতমে চত্তারো? তুচ্ছো পিহিতো, পূরো ৰিৰটো, তুচ্ছো ৰিৰটো, পূরো পিহিতো.

কথঞ্চ পুগ্গলো তুচ্ছো হোতি পিহিতো? ইধেকচ্চস্স পুগ্গলস্স পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং নপ্পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো তুচ্ছো হোতি পিহিতো. সেয্যথাপি সো কুম্ভো তুচ্ছো পিহিতো, তথূপমো অযং পুগ্গলো.

কথঞ্চ পুগ্গলো পূরো হোতি ৰিৰটো? ইধেকচ্চস্স পুগ্গলস্স ন পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো পূরো হোতি ৰিৰটো. সেয্যথাপি সো কুম্ভো পূরো ৰিৰটো, তথূপমো অযং পুগ্গলো.

কথঞ্চ পুগ্গলো তুচ্ছো হোতি ৰিৰটো? ইধেকচ্চস্স পুগ্গলস্স ন পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং নপ্পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো তুচ্ছো হোতি ৰিৰটো. সেয্যথাপি সো কুম্ভো তুচ্ছো ৰিৰটো, তথূপমো অযং পুগ্গলো.

কথঞ্চ পুগ্গলো পূরো হোতি পিহিতো? ইধেকচ্চস্স পুগ্গলস্স পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো পূরো হোতি পিহিতো. সেয্যথাপি সো কুম্ভো পূরো পিহিতো, তথূপমো অযং পুগ্গলো. ইমে চত্তারো কুম্ভূপমা পুগ্গলা সন্তো সংৰিজ্জমানা লোকস্মিং.

১৬১. তত্থ কতমে চত্তারো উদকরহদূপমা পুগ্গলা? চত্তারো উদকরহদা – উত্তানো গম্ভীরোভাসো, গম্ভীরো উত্তানোভাসো, উত্তানো উত্তানোভাসো, গম্ভীরো গম্ভীরোভাসো. এৰমেৰং চত্তারোমে উদকরহদূপমা পুগ্গলা সন্তো সংৰিজ্জমানা লোকস্মিং. কতমে চত্তারো? উত্তানো গম্ভীরোভাসো, গম্ভীরো উত্তানোভাসো, উত্তানো উত্তানোভাসো, গম্ভীরো গম্ভীরোভাসো.

কথঞ্চ পুগ্গলো উত্তানো হোতি গম্ভীরোভাসো? ইধেকচ্চস্স পুগ্গলস্স পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং নপ্পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো উত্তানো হোতি গম্ভীরোভাসো. সেয্যথাপি সো উদকরহদো উত্তানো গম্ভীরোভাসো, তথূপমো অযং পুগ্গলো.

কথঞ্চ পুগ্গলো গম্ভীরো হোতি উত্তানোভাসো? ইধেকচ্চস্স পুগ্গলস্স ন পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো গম্ভীরো হোতি উত্তানোভাসো. সেয্যথাপি সো উদকরহদো গম্ভীরো উত্তানোভাসো, তথূপমো অযং পুগ্গলো.

কথঞ্চ পুগ্গলো উত্তানো হোতি উত্তানোভাসো? ইধেকচ্চস্স পুগ্গলস্স ন পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং নপ্পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং নপ্পজানাতি. এৰং পুগ্গলো উত্তানো হোতি উত্তানোভাসো. সেয্যথাপি সো উদকরহদো উত্তানো উত্তানোভাসো, তথূপমো অযং পুগ্গলো.

কথঞ্চ পুগ্গলো গম্ভীরো হোতি গম্ভীরোভাসো? ইধেকচ্চস্স পুগ্গলস্স পাসাদিকং হোতি অভিক্কন্তং পটিক্কন্তং আলোকিতং ৰিলোকিতং সমিঞ্জিতং পসারিতং সঙ্ঘাটিপত্তচীৰরধারণং. সো ‘‘ইদং দুক্খ’’ন্তি যথাভূতং পজানাতি…পে… ‘‘অযং দুক্খনিরোধগামিনী পটিপদা’’তি যথাভূতং পজানাতি. এৰং পুগ্গলো গম্ভীরো হোতি গম্ভীরোভাসো. সেয্যথাপি সো উদকরহদো গম্ভীরো গম্ভীরোভাসো, তথূপমো অযং পুগ্গলো. ইমে চত্তারো উদকরহদূপমা পুগ্গলা সন্তো সংৰিজ্জমানা লোকস্মিং.

১৬২. তত্থ কতমে চত্তারো বলীবদ্দূপমা পুগ্গলা? চত্তারো বলীবদ্দা [বলিবদ্ধা (স্যা.)] – সকগৰচণ্ডো [সগৰচণ্ডো (ক. সী.) অ. নি. ৪.১০৮] নো পরগৰচণ্ডো, পরগৰচণ্ডো নো সকগৰচণ্ডো, সকগৰচণ্ডো চ পরগৰচণ্ডো চ, নেৰ সকগৰচণ্ডো নো পরগৰচণ্ডো. এৰমেৰং চত্তারোমে বলীবদ্দূপমা পুগ্গলা সন্তো সংৰিজ্জমানা লোকস্মিং. কতমে চত্তারো? সকগৰচণ্ডো নো পরগৰচণ্ডো, পরগৰচণ্ডো নো সকগৰচণ্ডো, সকগৰচণ্ডো চ পরগৰচণ্ডো চ, নেৰ সকগৰচণ্ডো নো পরগৰচণ্ডো.

কথঞ্চ পুগ্গলো সকগৰচণ্ডো হোতি নো পরগৰচণ্ডো? ইধেকচ্চো পুগ্গলো সকপরিসং উব্বেজিতা হোতি, নো পরপরিসং. এৰং পুগ্গলো সকগৰচণ্ডো হোতি নো পরগৰচণ্ডো. সেয্যথাপি সো বলীবদ্দো সকগৰচণ্ডো নো পরগৰচণ্ডো, তথূপমো অযং পুগ্গলো.

কথঞ্চ পুগ্গলো পরগৰচণ্ডো হোতি নো সকগৰচণ্ডো? ইধেকচ্চো পুগ্গলো পরপরিসং উব্বেজিতা হোতি, নো সকপরিসং. এৰং পুগ্গলো পরগৰচণ্ডো হোতি নো সকগৰচণ্ডো. সেয্যথাপি সো বলীবদ্দো পরগৰচণ্ডো নো সকগৰচণ্ডো, তথূপমো অযং পুগ্গলো.

কথঞ্চ পুগ্গলো সকগৰচণ্ডো চ হোতি পরগৰচণ্ডো চ? ইধেকচ্চো পুগ্গলো সকপরিসঞ্চ উব্বেজিতা হোতি, পরপরিসঞ্চ. এৰং পুগ্গলো সকগৰচণ্ডো চ হোতি পরগৰচণ্ডো চ. সেয্যথাপি সো বলীবদ্দো সকগৰচণ্ডো চ পরগৰচণ্ডো চ, তথূপমো অযং পুগ্গলো.

কথঞ্চ পুগ্গলো নেৰ সকগৰচণ্ডো হোতি নো পরগৰচণ্ডো? ইধেকচ্চো পুগ্গলো নেৰ সকপরিসং উব্বেজিতা হোতি নো পরপরিসং. এৰং পুগ্গলো নেৰ সকগৰচণ্ডো হোতি নো পরগৰচণ্ডো. সেয্যথাপি সো বলীবদ্দো নেৰ সকগৰচণ্ডো নো পরগৰচণ্ডো, তথূপমো অযং পুগ্গলো. ইমে চত্তারো বলীবদ্দূপমা পুগ্গলা সন্তো সংৰিজ্জমানা লোকস্মিং.

১৬৩. তত্থ কতমে চত্তারো আসীৰিসূপমা পুগ্গলা? চত্তারো আসীৰিসা [আসিৰিসা (স্যা.)] – আগতৰিসো নো ঘোরৰিসো, ঘোরৰিসো নো আগতৰিসো, আগতৰিসো চ ঘোরৰিসো চ, নেৰ আগতৰিসো নো ঘোরৰিসো. এৰমেৰং চত্তারোমে আসীৰিসূপমা পুগ্গলা সন্তো সংৰিজ্জমানা লোকস্মিং. কতমে চত্তারো? আগতৰিসো নো ঘোরৰিসো, ঘোরৰিসো নো আগতৰিসো, আগতৰিসো চ ঘোরৰিসো চ, নেৰ আগতৰিসো নো ঘোরৰিসো.

কথঞ্চ পুগ্গলো আগতৰিসো হোতি নো ঘোরৰিসো? ইধেকচ্চো পুগ্গলো অভিণ্হং কুজ্ঝতি. সো চ খ্ৰস্স কোধো ন চিরং দীঘরত্তং অনুসেতি. এৰং পুগ্গলো আগতৰিসো হোতি, নো ঘোরৰিসো. সেয্যথাপি সো আসীৰিসো আগতৰিসো নো ঘোরৰিসো, তথূপমো অযং পুগ্গলো.

কথঞ্চ পুগ্গলো ঘোরৰিসো হোতি নো আগতৰিসো? ইধেকচ্চো পুগ্গলো নহেৰ খো [নেৰ খো (সী.) অ. নি. ৪.১১০] অভিণ্হং কুজ্ঝতি. সো চ খ্ৰস্স কোধো চিরং দীঘরত্তং অনুসেতি. এৰং পুগ্গলো ঘোরৰিসো হোতি, নো আগতৰিসো. সেয্যথাপি সো আসীৰিসো ঘোরৰিসো নো আগতৰিসো, তথূপমো অযং পুগ্গলো.

কথঞ্চ পুগ্গলো আগতৰিসো চ হোতি ঘোরৰিসো চ? ইধেকচ্চো পুগ্গলো অভিণ্হং কুজ্ঝতি. সো চ খ্ৰস্স কোধো চিরং দীঘরত্তং অনুসেতি. এৰং পুগ্গলো আগতৰিসো চ হোতি ঘোরৰিসো চ. সেয্যথাপি সো আসীৰিসো আগতৰিসো চ ঘোরৰিসো চ, তথূপমো অযং পুগ্গলো.

কথঞ্চ পুগ্গলো নেৰ আগতৰিসো হোতি নো ঘোরৰিসো? ইধেকচ্চো পুগ্গলো নহেৰ খো অভিণ্হং কুজ্ঝতি. সো চ খ্ৰস্স কোধো ন চিরং দীঘরত্তং অনুসেতি. এৰং পুগ্গলো নেৰ আগতৰিসো হোতি নো ঘোরৰিসো. সেয্যথাপি সো আসীৰিসো নেৰ আগতৰিসো নো ঘোরৰিসো, তথূপমো অযং পুগ্গলো. ইমে চত্তারো আসীৰিসূপমা পুগ্গলা সন্তো সংৰিজ্জমানা লোকস্মিং.

১৬৪. কথঞ্চ পুগ্গলো অননুৰিচ্চ অপরিযোগাহেত্ৰা অৰণ্ণারহস্স ৰণ্ণং ভাসিতা হোতি? ইধেকচ্চো পুগ্গলো দুপ্পটিপন্নানং মিচ্ছাপটিপন্নানং তিত্থিযানং তিত্থিযসাৰকানং ৰণ্ণং ভাসতি – ‘‘সুপ্পটিপন্না’’ ইতিপি, ‘‘সম্মাপটিপন্না’’ ইতিপীতি. এৰং পুগ্গলো অননুৰিচ্চ অপরিযোগাহেত্ৰা অৰণ্ণারহস্স ৰণ্ণং ভাসিতা হোতি.

কথঞ্চ পুগ্গলো অননুৰিচ্চ অপরিযোগাহেত্ৰা ৰণ্ণারহস্স অৰণ্ণং ভাসিতা হোতি? ইধেকচ্চো পুগ্গলো সুপ্পটিপন্নানং সম্মাপটিপন্নানং বুদ্ধানং বুদ্ধসাৰকানং অৰণ্ণং ভাসতি – ‘‘দুপ্পটিপন্না’’ ইতিপি, ‘‘মিচ্ছাপটিপন্না’’ ইতিপীতি. এৰং পুগ্গলো অননুৰিচ্চ অপরিযোগাহেত্ৰা ৰণ্ণারহস্স অৰণ্ণং ভাসিতা হোতি.

কথঞ্চ পুগ্গলো অননুৰিচ্চ অপরিযোগাহেত্ৰা অপ্পসাদনীযে ঠানে পসাদং উপদংসিতা হোতি? ইধেকচ্চো পুগ্গলো দুপ্পটিপদায মিচ্ছাপটিপদায পসাদং জনেতি – ‘‘সুপ্পটিপদা’’ ইতিপি, ‘‘সম্মাপটিপদা’’ ইতিপীতি. এৰং পুগ্গলো অননুৰিচ্চ অপরিযোগাহেত্ৰা অপ্পসাদনীযে ঠানে পসাদং উপদংসিতা হোতি.

কথঞ্চ পুগ্গলো অননুৰিচ্চ অপরিযোগাহেত্ৰা পসাদনীযে ঠানে অপ্পসাদং উপদংসিতা হোতি? ইধেকচ্চো পুগ্গলো সুপ্পটিপদায সম্মাপটিপদায অপ্পসাদং জনেতি – ‘‘দুপ্পটিপদা’’ ইতিপি, ‘‘মিচ্ছাপটিপদা’’ ইতিপীতি. এৰং পুগ্গলো অননুৰিচ্চ অপরিযোগাহেত্ৰা পসাদনীযে ঠানে অপ্পসাদং উপদংসিতা হোতি.

১৬৫. কথঞ্চ পুগ্গলো অনুৰিচ্চ পরিযোগাহেত্ৰা অৰণ্ণারহস্স অৰণ্ণং ভাসিতা হোতি? ইধেকচ্চো পুগ্গলো দুপ্পটিপন্নানং মিচ্ছাপটিপন্নানং তিত্থিযানং তিত্থিযসাৰকানং অৰণ্ণং ভাসতি – ‘‘দুপ্পটিপন্না’’ ইতিপি, ‘‘মিচ্ছাপটিপন্না’’ ইতিপীতি. এৰং পুগ্গলো অনুৰিচ্চ পরিযোগাহেত্ৰা অৰণ্ণারহস্স অৰণ্ণং ভাসিতা হোতি.

কথঞ্চ পুগ্গলো অনুৰিচ্চ পরিযোগাহেত্ৰা ৰণ্ণারহস্স ৰণ্ণং ভাসিতা হোতি? ইধেকচ্চো পুগ্গলো সুপ্পটিপন্নানং সম্মাপটিপন্নানং বুদ্ধানং বুদ্ধসাৰকানং ৰণ্ণং ভাসতি – ‘‘সুপ্পটিপন্না’’ ইতিপি, ‘‘সম্মাপটিপন্না’’ ইতিপীতি. এৰং পুগ্গলো অনুৰিচ্চ পরিযোগাহেত্ৰা ৰণ্ণারহস্স ৰণ্ণং ভাসিতা হোতি.

কথঞ্চ পুগ্গলো অনুৰিচ্চ পরিযোগাহেত্ৰা অপ্পসাদনীযে ঠানে অপ্পসাদং উপদংসিতা হোতি? ইধেকচ্চো পুগ্গলো দুপ্পটিপদায মিচ্ছাপটিপদায অপ্পসাদং জনেতি – ‘‘দুপ্পটিপদা’’ ইতিপি, ‘‘মিচ্ছাপটিপদা’’ ইতিপীতি. এৰং পুগ্গলো অনুৰিচ্চ পরিযোগাহেত্ৰা অপ্পসাদনীযে ঠানে অপ্পসাদং উপদংসিতা হোতি.

কথঞ্চ পুগ্গলো অনুৰিচ্চ পরিযোগাহেত্ৰা পসাদনীযে ঠানে পসাদং উপদংসিতা হোতি? ইধেকচ্চো পুগ্গলো সুপ্পটিপদায সম্মাপটিপদায পসাদং জনেতি – ‘‘সুপ্পটিপদা’’ ইতিপি, ‘‘সম্মাপটিপদা’’ ইতিপীতি. এৰং পুগ্গলো অনুৰিচ্চ পরিযোগাহেত্ৰা পসাদনীযে ঠানে পসাদং উপদংসিতা হোতি.

১৬৬. কথঞ্চ পুগ্গলো অৰণ্ণারহস্স অৰণ্ণং ভাসিতা হোতি ভূতং তচ্ছং কালেন, নো চ খো ৰণ্ণারহস্স ৰণ্ণং ভাসিতা হোতি ভূতং তচ্ছং কালেন? ইধেকচ্চো পুগ্গলো ৰণ্ণোপি সংৰিজ্জতি অৰণ্ণোপি সংৰিজ্জতি. যো তত্থ অৰণ্ণো তং ভণতি ভূতং তচ্ছং কালেন, যো তত্থ ৰণ্ণো তং ন ভণতি ভূতং তচ্ছং কালেন. এৰং পুগ্গলো অৰণ্ণারহস্স অৰণ্ণং ভাসিতা হোতি ভূতং তচ্ছং কালেন, নো চ খো ৰণ্ণারহস্স ৰণ্ণং ভাসিতা হোতি ভূতং তচ্ছং কালেন.

কথঞ্চ পুগ্গলো ৰণ্ণারহস্স ৰণ্ণং ভাসিতা হোতি ভূতং তচ্ছং কালেন, নো চ খো অৰণ্ণারহস্স অৰণ্ণং ভাসিতা হোতি ভূতং তচ্ছং কালেন? ইধেকচ্চো পুগ্গলো ৰণ্ণোপি সংৰিজ্জতি অৰণ্ণোপি সংৰিজ্জতি. যো তত্থ ৰণ্ণো তং ভণতি ভূতং তচ্ছং কালেন, যো তত্থ অৰণ্ণো তং ন ভণতি ভূতং তচ্ছং কালেন. এৰং পুগ্গলো ৰণ্ণারহস্স ৰণ্ণং ভাসিতা হোতি ভূতং তচ্ছং কালেন, নো চ খো অৰণ্ণারহস্স অৰণ্ণং ভাসিতা হোতি ভূতং তচ্ছং কালেন.

কথঞ্চ পুগ্গলো অৰণ্ণারহস্স চ অৰণ্ণং ভাসিতা হোতি ভূতং তচ্ছং কালেন, ৰণ্ণারহস্স চ ৰণ্ণং ভাসিতা হোতি ভূতং তচ্ছং কালেন? ইধেকচ্চো পুগ্গলো ৰণ্ণোপি সংৰিজ্জতি অৰণ্ণোপি সংৰিজ্জতি. যো তত্থ অৰণ্ণো তং ভণতি ভূতং তচ্ছং কালেন, যোপি তত্থ ৰণ্ণো তম্পি ভণতি ভূতং তচ্ছং কালেন. তত্র কালঞ্ঞূ হোতি তস্স পঞ্হস্স ৰেয্যাকরণায. এৰং পুগ্গলো অৰণ্ণারহস্স চ অৰণ্ণং ভাসিতা হোতি ভূতং তচ্ছং কালেন, ৰণ্ণারহস্স চ ৰণ্ণং ভাসিতা হোতি ভূতং তচ্ছং কালেন.

কথঞ্চ পুগ্গলো নেৰ অৰণ্ণারহস্স অৰণ্ণং ভাসিতা হোতি ভূতং তচ্ছং কালেন, নোপি ৰণ্ণারহস্স ৰণ্ণং ভাসিতা হোতি ভূতং তচ্ছং কালেন? ইধেকচ্চো পুগ্গলো ৰণ্ণোপি সংৰিজ্জতি অৰণ্ণোপি সংৰিজ্জতি. যো তত্থ অৰণ্ণো তং ন ভণতি ভূতং তচ্ছং কালেন, যোপি তত্থ ৰণ্ণো তম্পি ন ভণতি ভূতং তচ্ছং কালেন. উপেক্খকো ৰিহরতি সতো সম্পজানো. এৰং পুগ্গলো নেৰ অৰণ্ণারহস্স অৰণ্ণং ভাসিতা হোতি ভূতং তচ্ছং কালেন, নোপি ৰণ্ণারহস্স ৰণ্ণং ভাসিতা হোতি ভূতং তচ্ছং কালেন.

১৬৭. কতমো চ পুগ্গলো উট্ঠানফলূপজীৰী নো পুঞ্ঞফলূপজীৰী? যস্স পুগ্গলস্স উট্ঠহতো ঘটতো ৰাযমতো আজীৰো অভিনিব্বত্ততি, নো পুঞ্ঞতো – অযং ৰুচ্চতি পুগ্গলো ‘‘উট্ঠানফলূপজীৰী, নো পুঞ্ঞফলূপজীৰী’’.

কতমো চ পুগ্গলো পুঞ্ঞফলূপজীৰী নো উট্ঠানফলূপজীৰী? পরনিম্মিতৰসৰত্তী দেৰে [পরনিম্মিতৰসৰত্তিদেৰে (সী. স্যা.)] উপাদায ততূপরি দেৰা পুঞ্ঞফলূপজীৰিনো ন উট্ঠানফলূপজীৰিনো.

কতমো চ পুগ্গলো উট্ঠানফলূপজীৰী চ পুঞ্ঞফলূপজীৰী চ? যস্স পুগ্গলস্স উট্ঠহতো ঘটতো ৰাযমতো আজীৰো অভিনিব্বত্ততি পুঞ্ঞতো চ – অযং ৰুচ্চতি পুগ্গলো ‘‘উট্ঠানফলূপজীৰী চ পুঞ্ঞফলূপজীৰী চ’’.

কতমো চ পুগ্গলো নেৰ উট্ঠানফলূপজীৰী নো পুঞ্ঞফলূপজীৰী? নেরযিকা নেৰ উট্ঠানফলূপজীৰিনো নো পুঞ্ঞফলূপজীৰিনো.

১৬৮. কথঞ্চ পুগ্গলো তমো হোতি তমপরাযনো? ইধেকচ্চো পুগ্গলো নীচে কুলে পচ্চাজাতো হোতি – চণ্ডালকুলে ৰা নেসাদকুলে ৰা ৰেনকুলে [ৰেণকুলে (সী. স্যা.)] ৰা রথকারকুলে ৰা পুক্কুসকুলে ৰা দলিদ্দে [দল়িদ্দে (সী.) পস্স অঙ্গুত্তরনিকাযে] অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ হোতি দুব্বণ্ণো দুদ্দসিকো ওকোটিমকো বহ্ৰাবাধো কাণো ৰা কুণী ৰা খঞ্জো ৰা পক্খহতো ৰা, ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. এৰং পুগ্গলো তমো হোতি তমপরাযনো.

কথঞ্চ পুগ্গলো তমো হোতি জোতিপরাযনো? ইধেকচ্চো পুগ্গলো নীচে কুলে পচ্চাজাতো হোতি – চণ্ডালকুলে ৰা নেসাদকুলে ৰা ৰেনকুলে ৰা রথকারকুলে ৰা পুক্কুসকুলে ৰা দলিদ্দে অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ হোতি দুব্বণ্ণো দুদ্দসিকো ওকোটিমকো বহ্ৰাবাধো কাণো ৰা কুণী ৰা খঞ্জো ৰা পক্খহতো ৰা, ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা ৰাচায সুচরিতং চরিত্ৰা মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি. এৰং পুগ্গলো তমো হোতি জোতিপরাযনো.

কথঞ্চ পুগ্গলো জোতি হোতি তমপরাযনো? ইধেকচ্চো পুগ্গলো উচ্চে কুলে পচ্চাজাতো হোতি – খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. এৰং পুগ্গলো জোতি হোতি তমপরাযনো.

কথঞ্চ পুগ্গলো জোতি হোতি জোতিপরাযনো? ইধেকচ্চো পুগ্গলো উচ্চে কুলে পচ্চাজাতো হোতি – খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা ৰাচায সুচরিতং চরিত্ৰা মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি. এৰং পুগ্গলো জোতি হোতি জোতিপরাযনো.

১৬৯. কথঞ্চ পুগ্গলো ওণতোণতো হোতি…পে… এৰং পুগ্গলো ওণতোণতো হোতি.

কথঞ্চ পুগ্গলো ওণতুণ্ণতো হোতি…পে… এৰং পুগ্গলো ওণতুণ্ণতো হোতি.

কথঞ্চ পুগ্গলো উণ্ণতোণতো হোতি…পে… এৰং পুগ্গলো উণ্ণতোণতো হোতি.

কথঞ্চ পুগ্গলো উণ্ণতুণ্ণতো হোতি…পে… এৰং পুগ্গলো উণ্ণতুণ্ণতো হোতি.

১৭০. তত্থ কতমে চত্তারো রুক্খূপমা পুগ্গলা? চত্তারো রুক্খা – ফেগ্গু সারপরিৰারো, সারো ফেগ্গুপরিৰারো, ফেগ্গু ফেগ্গুপরিৰারো, সারো সারপরিৰারো. এৰমেৰং চত্তারোমে রুক্খূপমা পুগ্গলা সন্তো সংৰিজ্জমানা লোকস্মিং. কতমে চত্তারো? ফেগ্গু সারপরিৰারো, সারো ফেগ্গুপরিৰারো, ফেগ্গু ফেগ্গুপরিৰারো, সারো সারপরিৰারো.

কথঞ্চ পুগ্গলো ফেগ্গু হোতি সারপরিৰারো? ইধেকচ্চো পুগ্গলো দুস্সীলো হোতি পাপধম্মো, পরিসা চ খ্ৰস্স হোতি সীলৰতী কল্যাণধম্মা. এৰং পুগ্গলো ফেগ্গু হোতি সারপরিৰারো. সেয্যথাপি সো রুক্খো ফেগ্গু সারপরিৰারো, তথূপমো অযং পুগ্গলো.

কথঞ্চ পুগ্গলো সারো হোতি ফেগ্গুপরিৰারো? ইধেকচ্চো পুগ্গলো সীলৰা হোতি কল্যাণধম্মো, পরিসা চ খ্ৰস্স হোতি দুস্সীলা পাপধম্মা. এৰং পুগ্গলো সারো হোতি ফেগ্গুপরিৰারো. সেয্যথাপি সো রুক্খো সারো ফেগ্গুপরিৰারো, তথূপমো অযং পুগ্গলো.

কথঞ্চ পুগ্গলো ফেগ্গু হোতি ফেগ্গুপরিৰারো? ইধেকচ্চো পুগ্গলো দুস্সীলো হোতি পাপধম্মো, পরিসাপিস্স হোতি দুস্সীলা পাপধম্মা. এৰং পুগ্গলো ফেগ্গু হোতি ফেগ্গুপরিৰারো. সেয্যথাপি সো রুক্খো ফেগ্গু ফেগ্গুপরিৰারো, তথূপমো অযং পুগ্গলো.

কথঞ্চ পুগ্গলো সারো হোতি সারপরিৰারো? ইধেকচ্চো পুগ্গলো সীলৰা হোতি কল্যাণধম্মো, পরিসাপিস্স হোতি সীলৰতী কল্যাণধম্মা. এৰং পুগ্গলো সারো হোতি সারপরিৰারো. সেয্যথাপি সো রুক্খো সারো সারপরিৰারো, তথূপমো অযং পুগ্গলো. ইমে চত্তারো রুক্খূপমা পুগ্গলা সন্তো সংৰিজ্জমানা লোকস্মিং.

১৭১. কতমো চ পুগ্গলো রূপপ্পমাণো রূপপ্পসন্নো? ইধেকচ্চো পুগ্গলো আরোহং ৰা পস্সিত্ৰা পরিণাহং ৰা পস্সিত্ৰা সণ্ঠানং ৰা পস্সিত্ৰা পারিপূরিং ৰা পস্সিত্ৰা তত্থ পমাণং গহেত্ৰা পসাদং জনেতি. অযং ৰুচ্চতি পুগ্গলো রূপপ্পমাণো রূপপ্পসন্নো.

কতমো চ পুগ্গলো ঘোসপ্পমাণো ঘোসপ্পসন্নো? ইধেকচ্চো পুগ্গলো পরৰণ্ণনায পরথোমনায পরপসংসনায পরৰণ্ণহারিকায [পরৰণ্ণহারিযা (সী.)] তত্থ পমাণং গহেত্ৰা পসাদং জনেতি. অযং ৰুচ্চতি পুগ্গলো ঘোসপ্পমাণো ঘোসপ্পসন্নো.

১৭২. কতমো চ পুগ্গলো লূখপ্পমাণো লূখপ্পসন্নো? ইধেকচ্চো পুগ্গলো চীৰরলূখং ৰা পস্সিত্ৰা পত্তলূখং ৰা পস্সিত্ৰা সেনাসনলূখং ৰা পস্সিত্ৰা ৰিৰিধং ৰা দুক্করকারিকং পস্সিত্ৰা তত্থ পমাণং গহেত্ৰা পসাদং জনেতি. অযং ৰুচ্চতি পুগ্গলো লূখপ্পমাণো লূখপ্পসন্নো.

কতমো চ পুগ্গলো ধম্মপ্পমাণো ধম্মপ্পসন্নো? ইধেকচ্চো পুগ্গলো সীলং ৰা পস্সিত্ৰা সমাধিং ৰা পস্সিত্ৰা পঞ্ঞং ৰা পস্সিত্ৰা তত্থ পমাণং গহেত্ৰা পসাদং জনেতি. অযং ৰুচ্চতি পুগ্গলো ধম্মপ্পমাণো ধম্মপ্পসন্নো.

১৭৩. কথঞ্চ পুগ্গলো অত্তহিতায পটিপন্নো হোতি নো পরহিতায? ইধেকচ্চো পুগ্গলো অত্তনা সীলসম্পন্নো হোতি, নো পরং সীলসম্পদায সমাদপেতি; অত্তনা সমাধিসম্পন্নো হোতি, নো পরং সমাধিসম্পদায সমাদপেতি; অত্তনা পঞ্ঞাসম্পন্নো হোতি, নো পরং পঞ্ঞাসম্পদায সমাদপেতি; অত্তনা ৰিমুত্তিসম্পন্নো হোতি, নো পরং ৰিমুত্তিসম্পদায সমাদপেতি; অত্তনা ৰিমুত্তিঞাণদস্সনসম্পন্নো হোতি, নো পরং ৰিমুত্তিঞাণদস্সনসম্পদায সমাদপেতি. এৰং পুগ্গলো অত্তহিতায পটিপন্নো হোতি নো পরহিতায.

কথঞ্চ পুগ্গলো পরহিতায পটিপন্নো হোতি নো অত্তহিতায? ইধেকচ্চো পুগ্গলো অত্তনা ন সীলসম্পন্নো হোতি, পরং সীলসম্পদায সমাদপেতি; অত্তনা ন সমাধিসম্পন্নো হোতি, পরং সমাধিসম্পদায সমাদপেতি; অত্তনা ন পঞ্ঞাসম্পন্নো হোতি, পরং পঞ্ঞাসম্পদায সমাদপেতি; অত্তনা ন ৰিমুত্তিসম্পন্নো হোতি, পরং ৰিমুত্তিসম্পদায সমাদপেতি; অত্তনা ন ৰিমুত্তিঞাণদস্সনসম্পন্নো হোতি, পরং ৰিমুত্তিঞাণদস্সনসম্পদায সমাদপেতি. এৰং পুগ্গলো পরহিতায পটিপন্নো হোতি নো অত্তহিতায.

কথঞ্চ পুগ্গলো অত্তহিতায চেৰ পটিপন্নো হোতি পরহিতায চ? ইধেকচ্চো পুগ্গলো অত্তনা চ সীলসম্পন্নো হোতি, পরঞ্চ সীলসম্পদায সমাদপেতি; অত্তনা চ সমাধিসম্পন্নো হোতি, পরঞ্চ সমাধিসম্পদায সমাদপেতি; অত্তনা চ পঞ্ঞাসম্পন্নো হোতি, পরঞ্চ পঞ্ঞাসম্পদায সমাদপেতি; অত্তনা চ ৰিমুত্তিসম্পন্নো হোতি, পরঞ্চ ৰিমুত্তিসম্পদায সমাদপেতি; অত্তনা চ ৰিমুত্তিঞাণদস্সনসম্পন্নো হোতি, পরঞ্চ ৰিমুত্তিঞাণদস্সনসম্পদায সমাদপেতি. এৰং পুগ্গলো অত্তহিতায চেৰ পটিপন্নো হোতি পরহিতায চ.

কথঞ্চ পুগ্গলো নেৰ অত্তহিতায পটিপন্নো হোতি নো পরহিতায? ইধেকচ্চো পুগ্গলো অত্তনা ন সীলসম্পন্নো হোতি, নো পরং সীলসম্পদায সমাদপেতি; অত্তনা ন সমাধিসম্পন্নো হোতি, নো পরং সমাধিসম্পদায সমাদপেতি; অত্তনা ন পঞ্ঞাসম্পন্নো হোতি, নো পরং পঞ্ঞাসম্পদায সমাদপেতি; অত্তনা ন ৰিমুত্তিসম্পন্নো হোতি, নো পরং ৰিমুত্তিসম্পদায সমাদপেতি; অত্তনা ন ৰিমুত্তিঞাণদস্সনসম্পন্নো হোতি, নো পরং ৰিমুত্তিঞাণদস্সনসম্পদায সমাদপেতি. এৰং পুগ্গলো নেৰ অত্তহিতায পটিপন্নো হোতি নো পরহিতায.

১৭৪. কথঞ্চ পুগ্গলো অত্তন্তপো হোতি অত্তপরিতাপনানুযোগমনুযুত্তো? ইধেকচ্চো পুগ্গলো অচেলকো হোতি মুত্তাচারো হত্থাপলেখনো [হত্থাৰলেখনো (স্যা.)], নএহিভদ্দন্তিকো নতিট্ঠভদ্দন্তিকো নাভিহটং ন উদ্দিস্সকতং ন নিমন্তনং সাদিযতি, সো ন কুম্ভিমুখা পটিগ্গণ্হাতি ন কল়োপিমুখা [কলোপিমুখা (সী. স্যা.) ম. নি. ২.৭] পটিগ্গণ্হাতি, ন এল়কমন্তরং ন দণ্ডমন্তরং ন মুসলমন্তরং ন দ্ৰিন্নং ভুঞ্জমানানং ন গব্ভিনিযা ন পাযমানায ন পুরিসন্তরগতায, ন সঙ্কিত্তীসু ন যত্থ সা উপট্ঠিতো হোতি ন যত্থ মক্খিকা সণ্ডসণ্ডচারিনী, ন মচ্ছং ন মংসং ন সুরং ন মেরযং ন থুসোদকং পিৰতি. সো একাগারিকো ৰা হোতি একালোপিকো, দ্ৰাগারিকো ৰা হোতি দ্ৰালোপিকো…পে… সত্তাগারিকো ৰা হোতি সত্তালোপিকো; একিস্সাপি দত্তিযা যাপেতি, দ্ৰীহিপি দত্তীহি যাপেতি…পে… সত্তহিপি দত্তীহি যাপেতি; একাহিকম্পি আহারং আহারেতি, দ্ৰীহিকম্পি [দ্ৰাহিকম্পি (সী.)] আহারং আহারেতি…পে… সত্তাহিকম্পি আহারং আহারেতি. ইতি এৰরূপং অড্ঢমাসিকম্পি পরিযাযভত্তভোজনানুযোগমনুযুত্তো ৰিহরতি. সো সাকভক্খো ৰা হোতি সামাকভক্খো ৰা হোতি নীৰারভক্খো ৰা হোতি দদ্দুলভক্খো ৰা হোতি হটভক্খো ৰা হোতি কণভক্খো ৰা হোতি আচামভক্খো ৰা হোতি পিঞ্ঞাকভক্খো ৰা হোতি তিণভক্খো ৰা হোতি গোমযভক্খো ৰা হোতি, ৰনমূলফলাহারো যাপেতি পৰত্তফলভোজী. সো সাণানিপি ধারেতি মসাণানিপি ধারেতি ছৰদুস্সানিপি ধারেতি পংসুকূলানিপি ধারেতি তিরীটানিপি ধারেতি অজিনম্পি ধারেতি অজিনক্খিপম্পি ধারেতি কুসচীরম্পি ধারেতি ৰাকচীরম্পি ধারেতি ফলকচীরম্পি ধারেতি কেসকম্বলম্পি ধারেতি ৰাল়কম্বলম্পি ধারেতি উলূকপক্খম্পি [উলুকপক্খম্পি (সী. স্যা.)] ধারেতি, কেসমস্সুলোচকোপি হোতি কেসমস্সুলোচনানুযোগমনুযুত্তো, উব্ভট্ঠকোপি হোতি আসনপটিক্খিত্তো, উক্কুটিকোপি হোতি উক্কুটিকপ্পধানমনুযুত্তো, কণ্টকাপস্সযিকোপি হোতি কণ্টকাপস্সযে সেয্যং কপ্পেতি, সাযততিযকম্পি [সাযংততিযকম্পি (স্যা. ক.) ম. নি. ২.৭] উদকোরোহনানুযোগমনুযুত্তো ৰিহরতি. ইতি এৰরূপং অনেকৰিহিতং কাযস্স আতাপনপরিতাপনানুযোগমনুযুত্তো ৰিহরতি. এৰং পুগ্গলো অত্তন্তপো হোতি অত্তপরিতাপনানুযোগমনুযুত্তো.

১৭৫. কথঞ্চ পুগ্গলো পরন্তপো হোতি পরপরিতাপনানুযোগমনুযুত্তো? ইধেকচ্চো পুগ্গলো ওরব্ভিকো হোতি সূকরিকো সাকুণিকো মাগৰিকো লুদ্দো মচ্ছঘাতকো চোরো চোরঘাতকো গোঘাতকো বন্ধনাগারিকো, যে ৰা পনঞ্ঞেপি কেচি কুরূরকম্মন্তা. এৰং পুগ্গলো পরন্তপো হোতি পরপরিতাপনানুযোগমনুযুত্তো.

১৭৬. কথঞ্চ পুগ্গলো অত্তন্তপো চ হোতি অত্তপরিতাপনানুযোগমনুযুত্তো, পরন্তপো চ পরপরিতাপনানুযোগমনুযুত্তো? ইধেকচ্চো পুগ্গলো রাজা ৰা হোতি খত্তিযো মুদ্ধাৰসিত্তো [মুদ্ধাভিসিত্তো (স্যা. ক.)] ব্রাহ্মণো ৰা মহাসালো. সো পুরত্থিমেন নরস্স নৰং সন্ধাগারং [সন্তাগারং (স্যা.), যঞ্ঞাগারং (সী.)] কারাপেত্ৰা কেসমস্সুং ওহারেত্ৰা খরাজিনং [খুরাজিনং (স্যা. ক.)] নিৰাসেত্ৰা সপ্পিতেলেন কাযং অব্ভঞ্জিত্ৰা মিগৰিসাণেন পিট্ঠিং কণ্ডুৰমানো [কণ্ডূযমানো (সী.)] সন্ধাগারং পৰিসতি সদ্ধিং মহেসিযা ব্রাহ্মণেন চ পুরোহিতেন. সো তত্থ অনন্তরহিতায ভূমিযা হরিতুপলিত্তায সেয্যং কপ্পেতি. একিস্সা গাৰিযা সরূপৰচ্ছায যং একস্মিং থনে খীরং হোতি তেন রাজা যাপেতি, যং দুতিযস্মিং থনে খীরং হোতি তেন মহেসী যাপেতি, যং ততিযস্মিং থনে খীরং হোতি তেন ব্রাহ্মণো পুরোহিতো যাপেতি, যং চতুত্থস্মিং থনে খীরং হোতি তেন অগ্গিং জুহতি, অৰসেসেন ৰচ্ছকো যাপেতি. সো এৰমাহ – ‘‘এত্তকা উসভা হঞ্ঞন্তু যঞ্ঞত্থায, এত্তকা ৰচ্ছতরা হঞ্ঞন্তু যঞ্ঞত্থায, এত্তকা ৰচ্ছতরিযো হঞ্ঞন্তু যঞ্ঞত্থায, এত্তকা অজা হঞ্ঞন্তু যঞ্ঞত্থায, এত্তকা উরব্ভা হঞ্ঞন্তু যঞ্ঞত্থায, (এত্তকা অস্সা হঞ্ঞন্তু যঞ্ঞত্থায) [( ) নত্থি সীহল়পোত্থকে. মজ্ঝিমনিকাযে কন্দরকসুত্তেপি এৰমেৰ] এত্তকা রুক্খা ছিজ্জন্তু যূপত্থায, এত্তকা দব্ভা লূযন্তু বরিহিসত্থাযা’’তি [পরিহিংসত্থাযাতি (সী. স্যা. ক.) ম. নি. ২.৯]. যেপিস্স তে হোন্তি দাসাতি ৰা পেস্সাতি ৰা কম্মকরাতি ৰা, তেপি দণ্ডতজ্জিতা ভযতজ্জিতা অস্সুমুখা রুদমানা পরিকম্মানি করোন্তি. এৰং পুগ্গলো অত্তন্তপো চ হোতি অত্তপরিতাপনানুযোগমনুযুত্তো, পরন্তপো চ পরপরিতাপনানুযোগমনুযুত্তো.

১৭৭. কথঞ্চ পুগ্গলো নেৰ অত্তন্তপো চ হোতি ন অত্তপরিতাপনানুযোগমনুযুত্তো, ন পরন্তপো ন পরপরিতাপনানুযোগমনুযুত্তো? সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি.

ইধ তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা. সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি. সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. তং ধম্মং সুণাতি গহপতি ৰা গহপতিপুত্তো ৰা অঞ্ঞতরস্মিং ৰা কুলে পচ্চাজাতো. সো তং ধম্মং সুত্ৰা তথাগতে সদ্ধং পটিলভতি. সো তেন সদ্ধাপটিলাভেন সমন্নাগতো ইতি পটিসঞ্চিক্খতি – ‘‘সম্বাধো ঘরাৰাসো রজাপথো, অব্ভোকাসো পব্বজ্জা. নযিদং সুকরং অগারং অজ্ঝাৰসতা একন্তপরিপুণ্ণং একন্তপরিসুদ্ধং সঙ্খলিখিতং ব্রহ্মচরিযং চরিতুং. যংনূনাহং কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজেয্য’’ন্তি! সো অপরেন সমযেন অপ্পং ৰা ভোগক্খন্ধং পহায মহন্তং ৰা ভোগক্খন্ধং পহায অপ্পং ৰা ঞাতিপরিৰট্টং পহায মহন্তং ৰা ঞাতিপরিৰট্টং পহায কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি.

১৭৮. সো এৰং পব্বজিতো সমানো ভিক্খূনং সিক্খাসাজীৰসমাপন্নো পাণাতিপাতং পহায পাণাতিপাতা পটিৰিরতো হোতি নিহিতদণ্ডো নিহিতসত্থো লজ্জী দযাপন্নো সব্বপাণভূতহিতানুকম্পী ৰিহরতি.

অদিন্নাদানং পহায অদিন্নাদানা পটিৰিরতো হোতি দিন্নাদাযী দিন্নপাটিকঙ্খী, অথেনেন সুচিভূতেন অত্তনা ৰিহরতি.

অব্রহ্মচরিযং পহায ব্রহ্মচারী হোতি আরাচারী [অনাচারী (ক.)] পটিৰিরতো মেথুনা গামধম্মা.

মুসাৰাদং পহায মুসাৰাদা পটিৰিরতো হোতি সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্স.

পিসুণং ৰাচং পহায পিসুণায ৰাচায পটিৰিরতো হোতি, ইতো সুত্ৰা ন অমুত্র অক্খাতা ইমেসং ভেদায, অমুত্র ৰা সুত্ৰা ন ইমেসং অক্খাতা অমূসং ভেদায. ইতি ভিন্নানং ৰা সন্ধাতা সহিতানং ৰা অনুপ্পদাতা সমগ্গারামো সমগ্গরতো সমগ্গনন্দী সমগ্গকরণিং ৰাচং ভাসিতা হোতি.

ফরুসং ৰাচং পহায ফরুসায ৰাচায পটিৰিরতো হোতি. যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপিং ৰাচং ভাসিতা হোতি.

সম্ফপ্পলাপং পহায সম্ফপ্পলাপা পটিৰিরতো হোতি, কালৰাদী ভূতৰাদী অত্থৰাদী ধম্মৰাদী ৰিনযৰাদী নিধানৰতিং ৰাচং ভাসিতা কালেন সাপদেসং পরিযন্তৰতিং অত্থসংহিতং.

১৭৯. সো বীজগামভূতগামসমারম্ভা পটিৰিরতো হোতি, একভত্তিকো হোতি রত্তূপরতো ৰিরতো ৰিকালভোজনা, নচ্চগীতৰাদিতৰিসূকদস্সনা পটিৰিরতো হোতি, মালাগন্ধৰিলেপনধারণমণ্ডনৰিভূসনট্ঠানা পটিৰিরতো হোতি, উচ্চাসযনমহাসযনা পটিৰিরতো হোতি, জাতরূপরজতপটিগ্গহণা পটিৰিরতো হোতি.

আমকধঞ্ঞপটিগ্গহণা পটিৰিরতো হোতি, আমকমংসপটিগ্গহণা পটিৰিরতো হোতি, ইত্থিকুমারিকাপটিগ্গহণা পটিৰিরতো হোতি, দাসিদাসপটিগ্গহণা পটিৰিরতো হোতি, অজেল়কপটিগ্গহণা পটিৰিরতো হোতি, কুক্কুটসূকরপটিগ্গহণা পটিৰিরতো হোতি, হত্থিগৰাস্সৰল়ৰপটিগ্গহণা পটিৰিরতো হোতি, খেত্তৰত্থুপটিগ্গহণা পটিৰিরতো হোতি, দূতেয্যপহিণগমনানুযোগা পটিৰিরতো হোতি, কযৰিক্কযা পটিৰিরতো হোতি, তুলাকূটকংসকূটমানকূটা পটিৰিরতো হোতি, উক্কোটনৰঞ্চননিকতিসাচিযোগা [… সাৰিযোগা (স্যা. ক.)] পটিৰিরতো হোতি, ছেদনৰধবন্ধনৰিপরামোসআলোপসহসাকারা পটিৰিরতো হোতি.

১৮০. সো সন্তুট্ঠো হোতি কাযপরিহারিকেন চীৰরেন কুচ্ছিপরিহারিকেন পিণ্ডপাতেন. সো যেন যেনেৰ পক্কমতি সমাদাযেৰ পক্কমতি, সেয্যথাপি নাম পক্খী সকুণো যেন যেনেৰ ডেতি সপত্তভারোৰ ডেতি. এৰমেৰং ভিক্খু সন্তুট্ঠো হোতি কাযপরিহারিকেন চীৰরেন কুচ্ছিপরিহারিকেন পিণ্ডপাতেন. সো যেন যেনেৰ পক্কমতি সমাদাযেৰ পক্কমতি. সো ইমিনা অরিযেন সীলক্খন্ধেন সমন্নাগতো অজ্ঝত্তং অনৰজ্জসুখং পটিসংৰেদেতি.

১৮১. সো চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি; সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি. সো ইমিনা অরিযেন ইন্দ্রিযসংৰরেন সমন্নাগতো অজ্ঝত্তং অব্যাসেকসুখং পটিসংৰেদেতি.

১৮২. সো অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতি.

সো ইমিনা চ অরিযেন সীলক্খন্ধেন সমন্নাগতো ইমিনা চ অরিযেন ইন্দ্রিযসংৰরেন সমন্নাগতো ইমিনা চ অরিযেন সতিসম্পজঞ্ঞেন সমন্নাগতো ইমায চ অরিযায সন্তুট্ঠিযা সমন্নাগতো [পস্স ম. নি. ২ কন্দরকসুত্তে; অ. নি. ১ অত্তন্তপসুত্তে চ] ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. সো পচ্ছাভত্তং পিণ্ডপাতপটিক্কন্তো নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো অভিজ্ঝং লোকে পহায ৰিগতাভিজ্ঝেন চেতসা ৰিহরতি, অভিজ্ঝায চিত্তং পরিসোধেতি; ব্যাপাদপদোসং পহায অব্যাপন্নচিত্তো ৰিহরতি সব্বপাণভূতহিতানুকম্পী, ব্যাপাদপদোসা চিত্তং পরিসোধেতি; থিনমিদ্ধং [থীনমিদ্ধং (সী. স্যা.)] পহায ৰিগতথিনমিদ্ধো ৰিহরতি আলোকসঞ্ঞী সতো সম্পজানো, থিনমিদ্ধা চিত্তং পরিসোধেতি; উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো, উদ্ধচ্চকুক্কুচ্চা চিত্তং পরিসোধেতি; ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি.

১৮৩. সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি; ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি; পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘‘উপেক্খকো সতিমা সুখৰিহারী’’তি ততিযং ঝানং উপসম্পজ্জ ৰিহরতি; সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি.

সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি. সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপটিসংৰেদী এৰমাযুপরিযন্তো, সো ততো চুতো ইধূপপন্নো’’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি.

১৮৪. সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি. সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাতি – ‘‘ইমে ৰত ভোন্তো সত্তা কাযদুচ্চরিতেন সমন্নাগতা, ৰচীদুচ্চরিতেন সমন্নাগতা, মনোদুচ্চরিতেন সমন্নাগতা, অরিযানং উপৰাদকা, মিচ্ছাদিট্ঠিকা মিচ্ছাদিট্ঠিকম্মসমাদানা. তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না. ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা. তে কাযস্স ভেদা পরং মরণা সুগতিং সগ্গং লোকং উপপন্না’’তি. সো ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাতি.

১৮৫. সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি, ‘‘ইমে আসৰা’’তি যথাভূতং পজানাতি, ‘‘অযং আসৰসমুদযো’’তি যথাভূতং পজানাতি, ‘‘অযং আসৰনিরোধো’’তি যথাভূতং পজানাতি, ‘‘অযং আসৰনিরোধগামিনী পটিপদা’’তি যথাভূতং পজানাতি. তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি. ৰিমুত্তস্মিং ৰিমুত্তমিতি ঞাণং হোতি. ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি পজানাতি. এৰং পুগ্গলো নেৰ অত্তন্তপো চ হোতি ন অত্তপরিতাপনানুযোগমনুযুত্তো, ন পরন্তপো ন পরপরিতাপনানুযোগমনুযুত্তো. সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি.

১৮৬. কতমো চ পুগ্গলো সরাগো? যস্স পুগ্গলস্স রাগো অপ্পহীনো, অযং ৰুচ্চতি পুগ্গলো ‘‘সরাগো’’.

কতমো চ পুগ্গলো সদোসো? যস্স পুগ্গলস্স দোসো অপ্পহীনো, অযং ৰুচ্চতি পুগ্গলো ‘‘সদোসো’’.

কতমো চ পুগ্গলো সমোহো? যস্স পুগ্গলস্স মোহো অপ্পহীনো, অযং ৰুচ্চতি পুগ্গলো ‘‘সমোহো’’.

কতমো চ পুগ্গলো সমানো? যস্স পুগ্গলস্স মানো অপ্পহীনো, অযং ৰুচ্চতি পুগ্গলো ‘‘সমানো’’.

১৮৭. কথঞ্চ পুগ্গলো লাভী হোতি অজ্ঝত্তং চেতোসমথস্স, ন লাভী অধিপঞ্ঞাধম্মৰিপস্সনায? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং, ন লাভী লোকুত্তরমগ্গস্স ৰা ফলস্স ৰা. এৰং পুগ্গলো লাভী হোতি অজ্ঝত্তং চেতোসমথস্স, ন লাভী অধিপঞ্ঞাধম্মৰিপস্সনায.

কথঞ্চ পুগ্গলো লাভী হোতি অধিপঞ্ঞাধম্মৰিপস্সনায, ন লাভী অজ্ঝত্তং চেতোসমথস্স? ইধেকচ্চো পুগ্গলো লাভী হোতি লোকুত্তরমগ্গস্স ৰা ফলস্স ৰা, ন লাভী রূপসহগতানং ৰা অরূপসহগতানং ৰা সমাপত্তীনং. এৰং পুগ্গলো লাভী হোতি অধিপঞ্ঞাধম্মৰিপস্সনায, ন লাভী অজ্ঝত্তং চেতোসমথস্স.

কথঞ্চ পুগ্গলো লাভী চেৰ হোতি অজ্ঝত্তং চেতোসমথস্স, লাভী চ অধিপঞ্ঞাধম্মৰিপস্সনায? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং, লাভী লোকুত্তরমগ্গস্স ৰা ফলস্স ৰা. এৰং পুগ্গলো লাভী চেৰ হোতি অজ্ঝত্তং চেতোসমথস্স, লাভী চ অধিপঞ্ঞাধম্মৰিপস্সনায.

কথঞ্চ পুগ্গলো নেৰ লাভী হোতি অজ্ঝত্তং চেতোসমথস্স, ন লাভী অধিপঞ্ঞাধম্মৰিপস্সনায? ইধেকচ্চো পুগ্গলো নেৰ লাভী হোতি রূপসহগতানং ৰা অরূপসহগতানং ৰা সমাপত্তীনং, ন লাভী লোকুত্তরমগ্গস্স ৰা ফলস্স ৰা. এৰং পুগ্গলো নেৰ লাভী হোতি অজ্ঝত্তং চেতোসমথস্স, ন লাভী অধিপঞ্ঞাধম্মৰিপস্সনায.

১৮৮. কতমো চ পুগ্গলো অনুসোতগামী? ইধেকচ্চো পুগ্গলো কামে চ পটিসেৰতি পাপঞ্চ কম্মং করোতি. অযং ৰুচ্চতি পুগ্গলো ‘‘অনুসোতগামী’’.

কতমো চ পুগ্গলো পটিসোতগামী? ইধেকচ্চো পুগ্গলো কামে চ ন পটিসেৰতি পাপঞ্চ কম্মং ন করোতি. সো সহাপি দুক্খেন সহাপি দোমনস্সেন অস্সুমুখেনপি রুদমানো পরিপুণ্ণং পরিসুদ্ধং ব্রহ্মচরিযং চরতি. অযং ৰুচ্চতি পুগ্গলো ‘‘পটিসোতগামী’’.

কতমো চ পুগ্গলো ঠিতত্তো? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা. অযং ৰুচ্চতি পুগ্গলো ‘‘ঠিতত্তো’’.

কতমো চ পুগ্গলো তিণ্ণো পারঙ্গতো থলে তিট্ঠতি ব্রাহ্মণো? ইধেকচ্চো পুগ্গলো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. অযং ৰুচ্চতি পুগ্গলো তিণ্ণো পারঙ্গতো থলে তিট্ঠতি ব্রাহ্মণো.

১৮৯. কথঞ্চ পুগ্গলো অপ্পস্সুতো হোতি সুতেন অনুপপন্নো? ইধেকচ্চস্স পুগ্গলস্স অপ্পকং সুতং হোতি সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো তস্স অপ্পকস্স সুতস্স ন অত্থমঞ্ঞায ধম্মমঞ্ঞায ধম্মানুধম্মপ্পটিপন্নো [ন ধম্মমঞ্ঞায ন ধম্মানুধম্মপটিপন্নো (স্যা.), ন ধম্মমঞ্ঞায ধম্মানুধম্মপ্পটিপন্নো (ক.)] হোতি. এৰং পুগ্গলো অপ্পস্সুতো হোতি সুতেন অনুপপন্নো.

কথঞ্চ পুগ্গলো অপ্পস্সুতো হোতি সুতেন উপপন্নো? ইধেকচ্চস্স পুগ্গলস্স অপ্পকং সুতং হোতি সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো তস্স অপ্পকস্স সুতস্স অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি. এৰং পুগ্গলো অপ্পস্সুতো হোতি সুতেন উপপন্নো.

কথঞ্চ পুগ্গলো বহুস্সুতো হোতি সুতেন অনুপপন্নো? ইধেকচ্চস্স পুগ্গলস্স বহুকং সুতং হোতি সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো তস্স বহুকস্স সুতস্স ন অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি. এৰং পুগ্গলো বহুস্সুতো হোতি সুতেন অনুপপন্নো.

কথঞ্চ পুগ্গলো বহুস্সুতো হোতি সুতেন উপপন্নো? ইধেকচ্চস্স পুগ্গলস্স বহুকং সুতং হোতি সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং. সো তস্স বহুকস্স সুতস্স অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি. এৰং পুগ্গলো বহুস্সুতো হোতি সুতেন উপপন্নো.

১৯০. কতমো চ পুগ্গলো সমণমচলো? ইধেকচ্চো পুগ্গলো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযনো. অযং ৰুচ্চতি পুগ্গলো ‘‘সমণমচলো’’.

কতমো চ পুগ্গলো সমণপদুমো? ইধেকচ্চো পুগ্গলো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি, সকিদেৰ ইমং লোকং আগন্ত্ৰা দুক্খস্সন্তং করোতি. অযং ৰুচ্চতি পুগ্গলো ‘‘সমণপদুমো’’.

কতমো চ পুগ্গলো সমণপুণ্ডরীকো? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা. অযং ৰুচ্চতি পুগ্গলো ‘‘সমণপুণ্ডরীকো’’.

কতমো চ পুগ্গলো সমণেসু সমণসুখুমালো? ইধেকচ্চো পুগ্গলো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. অযং ৰুচ্চতি পুগ্গলো ‘‘সমণেসু সমণসুখুমালো’’তি.

চতুক্কনিদ্দেসো.