নিদ্দেসো

১. এককপুগ্গলপঞ্ঞত্তি

১. কতমো চ পুগ্গলো সমযৰিমুত্তো? ইধেকচ্চো পুগ্গলো কালেন কালং সমযেন সমযং অট্ঠ ৰিমোক্খে কাযেন ফুসিত্ৰা [ফস্সিত্ৰা (সী. পী.)] ৰিহরতি, পঞ্ঞায চস্স দিস্ৰা একচ্চে আসৰা পরিক্খীণা হোন্তি – অযং ৰুচ্চতি পুগ্গলো ‘‘সমযৰিমুত্তো’’.

২. কতমো চ পুগ্গলো অসমযৰিমুত্তো? ইধেকচ্চো পুগ্গলো ন হেৰ খো কালেন কালং সমযেন সমযং অট্ঠ ৰিমোক্খে কাযেন ফুসিত্ৰা ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি – অযং ৰুচ্চতি পুগ্গলো ‘‘অসমযৰিমুত্তো’’. সব্বেপি অরিযপুগ্গলা অরিযে ৰিমোক্খে অসমযৰিমুত্তা.

৩. কতমো চ পুগ্গলো কুপ্পধম্মো? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং. সো চ খো ন নিকামলাভী হোতি ন অকিচ্ছলাভী ন অকসিরলাভী; ন যত্থিচ্ছকং যদিচ্ছকং যাৰতিচ্ছকং সমাপজ্জতিপি ৰুট্ঠাতিপি. ঠানং খো পনেতং ৰিজ্জতি, যং তস্স পুগ্গলস্স পমাদমাগম্ম তা সমাপত্তিযো কুপ্পেয্যুং – অযং ৰুচ্চতি পুগ্গলো ‘‘কুপ্পধম্মো’’.

৪. কতমো চ পুগ্গলো অকুপ্পধম্মো? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং. সো চ খো নিকামলাভী হোতি অকিচ্ছলাভী অকসিরলাভী; যত্থিচ্ছকং যদিচ্ছকং যাৰতিচ্ছকং সমাপজ্জতিপি ৰুট্ঠাতিপি. অট্ঠানমেতং অনৰকাসো যং তস্স পুগ্গলস্স পমাদমাগম্ম তা সমাপত্তিযো কুপ্পেয্যুং – অযং ৰুচ্চতি পুগ্গলো ‘‘অকুপ্পধম্মো’’. সব্বেপি অরিযপুগ্গলা অরিযে ৰিমোক্খে অকুপ্পধম্মা.

৫. কতমো চ পুগ্গলো পরিহানধম্মো? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং. সো চ খো ন নিকামলাভী হোতি ন অকিচ্ছলাভী ন অকসিরলাভী; ন যত্থিচ্ছকং যদিচ্ছকং যাৰতিচ্ছকং সমাপজ্জতিপি ৰুট্ঠাতিপি. ঠানং খো পনেতং ৰিজ্জতি, যং সো পুগ্গলো পমাদমাগম্ম তাহি সমাপত্তীহি পরিহাযেয্য – অযং ৰুচ্চতি পুগ্গলো ‘‘পরিহানধম্মো’’.

৬. কতমো চ পুগ্গলো অপরিহানধম্মো? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং. সো চ খো নিকামলাভী হোতি অকিচ্ছলাভী অকসিরলাভী; যত্থিচ্ছকং যদিচ্ছকং যাৰতিচ্ছকং সমাপজ্জতিপি ৰুট্ঠাতিপি. অট্ঠানমেতং অনৰকাসো যং সো পুগ্গলো পমাদমাগম্ম তাহি সমাপত্তীহি পরিহাযেয্য – অযং ৰুচ্চতি পুগ্গলো ‘‘অপরিহানধম্মো’’. সব্বেপি অরিযপুগ্গলা অরিযে ৰিমোক্খে অপরিহানধম্মা.

৭. কতমো চ পুগ্গলো চেতনাভব্বো? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং. সো চ খো ন নিকামলাভী হোতি ন অকিচ্ছলাভী ন অকসিরলাভী; ন যত্থিচ্ছকং যদিচ্ছকং যাৰতিচ্ছকং সমাপজ্জতিপি ৰুট্ঠাতিপি. সচে অনুসঞ্চেতেতি, ন পরিহাযতি তাহি সমাপত্তীহি. সচে ন অনুসঞ্চেতেতি, পরিহাযতি তাহি সমাপত্তীহি – অযং ৰুচ্চতি পুগ্গলো ‘‘চেতনাভব্বো’’.

৮. কতমো চ পুগ্গলো অনুরক্খণাভব্বো? ইধেকচ্চো পুগ্গলো লাভী হোতি রূপসহগতানং ৰা অরূপসহগতানং ৰা সমাপত্তীনং. সো চ খো ন নিকামলাভী হোতি ন অকিচ্ছলাভী ন অকসিরলাভী; ন যত্থিচ্ছকং যদিচ্ছকং যাৰতিচ্ছকং সমাপজ্জতিপি ৰুট্ঠাতিপি. সচে অনুরক্খতি, ন পরিহাযতি তাহি সমাপত্তীহি. সচে ন অনুরক্খতি, পরিহাযতি তাহি সমাপত্তীহি – অযং ৰুচ্চতি পুগ্গলো ‘‘অনুরক্খণাভব্বো’’.

৯. কতমো চ পুগ্গলো পুথুজ্জনো? যস্স পুগ্গলস্স তীণি সংযোজনানি অপ্পহীনানি; ন চ তেসং ধম্মানং পহানায পটিপন্নো – অযং ৰুচ্চতি পুগ্গলো ‘‘পুথুজ্জনো’’.

১০. কতমো চ পুগ্গলো গোত্রভূ? যেসং ধম্মানং সমনন্তরা অরিযধম্মস্স অৰক্কন্তি হোতি তেহি ধম্মেহি সমন্নাগতো – অযং ৰুচ্চতি পুগ্গলো ‘‘গোত্রভূ’’.

১১. কতমো চ পুগ্গলো ভযূপরতো? সত্ত সেক্খা ভযূপরতা, যে চ পুথুজ্জনা সীলৰন্তো. অরহা অভযূপরতো.

১২. কতমো চ পুগ্গলো অভব্বাগমনো? যে তে পুগ্গলা কম্মাৰরণেন সমন্নাগতা, কিলেসাৰরণেন সমন্নাগতা, ৰিপাকাৰরণেন সমন্নাগতা, অস্সদ্ধা অচ্ছন্দিকা দুপ্পঞ্ঞা এল়া, অভব্বা নিযামং ওক্কমিতুং কুসলেসু ধম্মেসু সম্মত্তং – ইমে ৰুচ্চন্তি পুগ্গলা ‘‘অভব্বাগমনা’’.

১৩. কতমো চ পুগ্গলো ভব্বাগমনো? যে তে পুগ্গলা ন কম্মাৰরণেন সমন্নাগতা, ন কিলেসাৰরণেন সমন্নাগতা, ন ৰিপাকাৰরণেন সমন্নাগতা, সদ্ধা ছন্দিকা পঞ্ঞৰন্তো [পঞ্ঞৰন্তা (সী.)] অনেল়া, ভব্বা নিযামং ওক্কমিতুং কুসলেসু ধম্মেসু সম্মত্তং – ইমে ৰুচ্চন্তি পুগ্গলা ‘‘ভব্বাগমনা’’.

১৪. কতমো চ পুগ্গলো নিযতো? পঞ্চ পুগ্গলা আনন্তরিকা, যে চ মিচ্ছাদিট্ঠিকা নিযতা, অট্ঠ চ অরিযপুগ্গলা নিযতা. অৰসেসা পুগ্গলা অনিযতা.

১৫. কতমো চ পুগ্গলো পটিপন্নকো? চত্তারো মগ্গসমঙ্গিনো পুগ্গলা পটিপন্নকা, চত্তারো ফলসমঙ্গিনো পুগ্গলা ফলে ঠিতা.

১৬. কতমো চ পুগ্গলো সমসীসী? যস্স পুগ্গলস্স অপুব্বং অচরিমং আসৰপরিযাদানঞ্চ হোতি জীৰিতপরিযাদানঞ্চ – অযং ৰুচ্চতি পুগ্গলো ‘‘সমসীসী’’.

১৭. কতমো চ পুগ্গলো ঠিতকপ্পী? অযঞ্চ পুগ্গলো সোতাপত্তিফলসচ্ছিকিরিযায পটিপন্নো অস্স, কপ্পস্স চ উড্ডয্হনৰেলা অস্স, নেৰ তাৰ কপ্পো উড্ডয্হেয্য যাৰাযং পুগ্গলো ন সোতাপত্তিফলং সচ্ছিকরোতি. অযং ৰুচ্চতি পুগ্গলো ‘‘ঠিতকপ্পী’’. সব্বেপি মগ্গসমঙ্গিনো পুগ্গলা ঠিতকপ্পিনো.

১৮. কতমো চ পুগ্গলো অরিযো? অট্ঠ অরিযপুগ্গলা অরিযা. অৰসেসা পুগ্গলা অনরিযা.

১৯. কতমো চ পুগ্গলো সেক্খো? চত্তারো মগ্গসমঙ্গিনো তযো ফলসমঙ্গিনো পুগ্গলা ‘‘সেক্খা’’. অরহা অসেক্খো. অৰসেসা পুগ্গলা নেৰসেক্খনাসেক্খা.

২০. কতমো চ পুগ্গলো তেৰিজ্জো? তীহি ৰিজ্জাহি সমন্নাগতো পুগ্গলো ‘‘তেৰিজ্জো’’.

২১. কতমো চ পুগ্গলো ছল়ভিঞ্ঞো? ছহি অভিঞ্ঞাহি সমন্নাগতো পুগ্গলো ‘‘ছল়ভিঞ্ঞো’’.

২২. কতমো চ পুগ্গলো সম্মাসম্বুদ্ধো? ইধেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝতি; তত্থ চ সব্বঞ্ঞুতং পাপুণাতি, বলেসু চ ৰসীভাৰং – অযং ৰুচ্চতি পুগ্গলো ‘‘সম্মাসম্বুদ্ধো’’.

২৩. কতমো চ পুগ্গলো পচ্চেকসম্বুদ্ধো? ইধেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝতি; ন চ তত্থ সব্বঞ্ঞুতং পাপুণাতি, ন চ বলেসু ৰসীভাৰং – অযং ৰুচ্চতি পুগ্গলো ‘‘পচ্চেকসম্বুদ্ধো’’.

২৪. কতমো চ পুগ্গলো উভতোভাগৰিমুত্তো? ইধেকচ্চো পুগ্গলো অট্ঠ ৰিমোক্খে কাযেন ফুসিত্ৰা ৰিহরতি; পঞ্ঞায চস্স দিস্ৰা আসৰা পরিক্খীণা হোন্তি – অযং ৰুচ্চতি পুগ্গলো ‘‘উভতোভাগৰিমুত্তো’’.

২৫. কতমো চ পুগ্গলো পঞ্ঞাৰিমুত্তো? ইধেকচ্চো পুগ্গলো ন হেৰ খো অট্ঠ ৰিমোক্খে কাযেন ফুসিত্ৰা ৰিহরতি; পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি পুগ্গলো ‘‘পঞ্ঞাৰিমুত্তো’’.

২৬. কতমো চ পুগ্গলো কাযসক্খী? ইধেকচ্চো পুগ্গলো অট্ঠ ৰিমোক্খে কাযেন ফুসিত্ৰা ৰিহরতি; পঞ্ঞায চস্স দিস্ৰা একচ্চে আসৰা পরিক্খীণা হোন্তি. অযং ৰুচ্চতি পুগ্গলো ‘‘কাযসক্খী’’.

২৭. কতমো চ পুগ্গলো দিট্ঠিপ্পত্তো? ইধেকচ্চো পুগ্গলো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি. তথাগতপ্পৰেদিতা চস্স ধম্মা পঞ্ঞায ৰোদিট্ঠা হোন্তি ৰোচরিতা. পঞ্ঞায চস্স দিস্ৰা একচ্চে আসৰা পরিক্খীণা হোন্তি – অযং ৰুচ্চতি পুগ্গলো ‘‘দিট্ঠিপ্পত্তো’’.

২৮. কতমো চ পুগ্গলো সদ্ধাৰিমুত্তো? ইধেকচ্চো পুগ্গলো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি. তথাগতপ্পৰেদিতা চস্স ধম্মা পঞ্ঞায ৰোদিট্ঠা হোন্তি ৰোচরিতা. পঞ্ঞায চস্স দিস্ৰা একচ্চে আসৰা পরিক্খীণা হোন্তি, নো চ খো যথা দিট্ঠিপ্পত্তস্স – অযং ৰুচ্চতি পুগ্গলো ‘‘সদ্ধাৰিমুত্তো’’.

২৯. কতমো চ পুগ্গলো ধম্মানুসারী? যস্স পুগ্গলস্স সোতাপত্তিফলসচ্ছিকিরিযায পটিপন্নস্স পঞ্ঞিন্দ্রিযং অধিমত্তং হোতি, পঞ্ঞাৰাহিং পঞ্ঞাপুব্বঙ্গমং অরিযমগ্গং ভাৰেতি – অযং ৰুচ্চতি পুগ্গলো ‘‘ধম্মানুসারী’’. সোতাপত্তিফলসচ্ছিকিরিযায পটিপন্নো পুগ্গলো ধম্মানুসারী ফলে ঠিতো দিট্ঠিপ্পত্তো.

৩০. কতমো চ পুগ্গলো সদ্ধানুসারী? যস্স পুগ্গলস্স সোতাপত্তিফলসচ্ছিকিরিযায পটিপন্নস্স সদ্ধিন্দ্রিযং অধিমত্তং হোতি, সদ্ধাৰাহিং সদ্ধাপুব্বঙ্গমং অরিযমগ্গং ভাৰেতি – অযং ৰুচ্চতি পুগ্গলো ‘‘সদ্ধানুসারী’’. সোতাপত্তিফলসচ্ছিকিরিযায পটিপন্নো পুগ্গলো সদ্ধানুসারী ফলে ঠিতো সদ্ধাৰিমুত্তো.

৩১. কতমো চ পুগ্গলো সত্তক্খত্তুপরমো? ইধেকচ্চো পুগ্গলো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযনো [সম্বোধিপরাযণো (সী. ক.)]. সো সত্তক্খত্তুং দেৰে চ মানুসে চ সন্ধাৰিত্ৰা সংসরিত্ৰা দুক্খস্সন্তং করোতি – অযং ৰুচ্চতি পুগ্গলো ‘‘সত্তক্খত্তুপরমো’’.

৩২. কতমো চ পুগ্গলো কোলঙ্কোলো? ইধেকচ্চো পুগ্গলো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযনো. সো দ্ৰে ৰা তীণি ৰা কুলানি সন্ধাৰিত্ৰা সংসরিত্ৰা দুক্খস্সন্তং করোতি – অযং ৰুচ্চতি পুগ্গলো ‘‘কোলঙ্কোলো’’.

৩৩. কতমো চ পুগ্গলো একবীজী? ইধেকচ্চো পুগ্গলো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযনো. সো একংযেৰ মানুসকং ভৰং নিব্বত্তেত্ৰা দুক্খস্সন্তং করোতি – অযং ৰুচ্চতি পুগ্গলো ‘‘একবীজী’’.

৩৪. কতমো চ পুগ্গলো সকদাগামী? ইধেকচ্চো পুগ্গলো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি, সকিদেৰ ইমং লোকং আগন্ত্ৰা দুক্খস্সন্তং করোতি – অযং ৰুচ্চতি পুগ্গলো ‘‘সকদাগামী’’.

৩৫. কতমো চ পুগ্গলো অনাগামী? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা – অযং ৰুচ্চতি পুগ্গলো ‘‘অনাগামী’’.

৩৬. কতমো চ পুগ্গলো অন্তরাপরিনিব্বাযী? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা. সো উপপন্নং ৰা সমনন্তরা অপ্পত্তং ৰা ৰেমজ্ঝং আযুপ্পমাণং অরিযমগ্গং সঞ্জনেতি উপরিট্ঠিমানং সংযোজনানং পহানায – অযং ৰুচ্চতি পুগ্গলো ‘‘অন্তরাপরিনিব্বাযী’’.

৩৭. কতমো চ পুগ্গলো উপহচ্চপরিনিব্বাযী? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা. সো অতিক্কমিত্ৰা ৰেমজ্ঝং আযুপ্পমাণং উপহচ্চ ৰা কালকিরিযং [কালং কিরিযং (ক.)] অরিযমগ্গং সঞ্জনেতি উপরিট্ঠিমানং সংযোজনানং পহানায – অযং ৰুচ্চতি পুগ্গলো ‘‘উপহচ্চপরিনিব্বাযী’’.

৩৮. কতমো চ পুগ্গলো অসঙ্খারপরিনিব্বাযী? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা. সো অসঙ্খারেন অরিযমগ্গং সঞ্জনেতি উপরিট্ঠিমানং সংযোজনানং পহানায – অযং ৰুচ্চতি পুগ্গলো ‘‘অসঙ্খারপরিনিব্বাযী’’.

৩৯. কতমো চ পুগ্গলো সসঙ্খারপরিনিব্বাযী? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা. সো সসঙ্খারেন অরিযমগ্গং সঞ্জনেতি উপরিট্ঠিমানং সংযোজনানং পহানায – অযং ৰুচ্চতি পুগ্গলো ‘‘সসঙ্খারপরিনিব্বাযী’’.

৪০. কতমো চ পুগ্গলো উদ্ধংসোতো অকনিট্ঠগামী? ইধেকচ্চো পুগ্গলো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা. সো অৰিহা চুতো অতপ্পং গচ্ছতি, অতপ্পা চুতো সুদস্সং গচ্ছতি, সুদস্সা চুতো সুদস্সিং গচ্ছতি, সুদস্সিযা চুতো অকনিট্ঠং গচ্ছতি; অকনিট্ঠে অরিযমগ্গং সঞ্জনেতি উপরিট্ঠিমানং সংযোজনানং পহানায – অযং ৰুচ্চতি পুগ্গলো ‘‘উদ্ধংসোতো অকনিট্ঠগামী’’.

৪১. কতমো চ পুগ্গলো সোতাপন্নো সোতাপত্তিফলসচ্ছিকিরিযায পটিপন্নো? তিণ্ণং সংযোজনানং পহানায পটিপন্নো পুগ্গলো সোতাপত্তিফলসচ্ছিকিরিযায পটিপন্নো. যস্স পুগ্গলস্স তীণি সংযোজনানি পহীনানি – অযং ৰুচ্চতি পুগ্গলো ‘‘সোতাপন্নো’’.

৪২. কামরাগব্যাপাদানং তনুভাৰায পটিপন্নো পুগ্গলো সকদাগামিফলসচ্ছিকিরিযায পটিপন্নো. যস্স পুগ্গলস্স কামরাগব্যাপাদা তনুভূতা – অযং ৰুচ্চতি পুগ্গলো ‘‘সকদাগামী’’.

৪৩. কামরাগব্যাপাদানং অনৰসেসপ্পহানায পটিপন্নো পুগ্গলো অনাগামিফলসচ্ছিকিরিযায পটিপন্নো. যস্স পুগ্গলস্স কামরাগব্যাপাদা অনৰসেসা পহীনা – অযং ৰুচ্চতি পুগ্গলো ‘‘অনাগামী’’.

৪৪. রূপরাগঅরূপরাগমানউদ্ধচ্চঅৰিজ্জায অনৰসেসপ্পহানায পটিপন্নো পুগ্গলো অরহত্তফলসচ্ছিকিরিযায পটিপন্নো. যস্স পুগ্গলস্স রূপরাগো অরূপরাগো মানো উদ্ধচ্চং অৰিজ্জা অনৰসেসা পহীনা – অযং ৰুচ্চতি পুগ্গলো ‘‘অরহা’’.

এককনিদ্দেসো.

২. দুকপুগ্গলপঞ্ঞত্তি

৪৫. কতমো চ পুগ্গলো কোধনো? তত্থ কতমো কোধো? যো কোধো কুজ্ঝনা কুজ্ঝিতত্তং দোসো দুস্সনা দুস্সিতত্তং [দূসনা দূসিতত্তং (স্যা.)] ব্যাপত্তি ব্যাপজ্জনা ব্যাপজ্জিতত্তং ৰিরোধো পটিৰিরোধো চণ্ডিক্কং অসুরোপো অনত্তমনতা চিত্তস্স – অযং ৰুচ্চতি কোধো. যস্স পুগ্গলস্স অযং কোধো অপ্পহীনো – অযং ৰুচ্চতি পুগ্গলো ‘‘কোধনো’’.

৪৬. কতমো চ পুগ্গলো উপনাহী? তত্থ কতমো উপনাহো? পুব্বকালং কোধো অপরকালং উপনাহো. যো এৰরূপো উপনাহো উপনয্হনা উপনয্হিতত্তং অট্ঠপনা [আঠপনা (ক.) ৰিভ. ৮৯১] ঠপনা সণ্ঠপনা অনুসংসন্দনা অনুপ্পবন্ধনা দল়্হীকম্মং কোধস্স – অযং ৰুচ্চতি উপনাহো. যস্স পুগ্গলস্স অযং উপনাহো অপ্পহীনো – অযং ৰুচ্চতি পুগ্গলো ‘‘উপনাহী’’.

৪৭. কতমো চ পুগ্গলো মক্খী? তত্থ কতমো মক্খো? যো মক্খো মক্খাযনা মক্খাযিতত্তং [মক্খীযনা মক্খীযিতত্তং (সী.), মক্খিযনা মক্খিযিতত্তং (ক.)] নিট্ঠুরিযং নিট্ঠুরিযকম্মং – অযং ৰুচ্চতি মক্খো. যস্স পুগ্গলস্স অযং মক্খো অপ্পহীনো – অযং ৰুচ্চতি পুগ্গলো ‘‘মক্খী’’.

৪৮. কতমো চ পুগ্গলো পল়াসী? তত্থ কতমো পল়াসো? যো পল়াসো পল়াসাযনা পল়াসাযিতত্তং পল়াসাহারো ৰিৰাদট্ঠানং যুগগ্গাহো অপ্পটিনিস্সগ্গো – অযং ৰুচ্চতি পল়াসো. যস্স পুগ্গলস্স অযং পল়াসো অপ্পহীনো – অযং ৰুচ্চতি পুগ্গলো ‘‘পল়াসী’’.

৪৯. কতমো চ পুগ্গলো ইস্সুকী? তত্থ কতমা ইস্সা? যা পরলাভসক্কারগরুকারমাননৰন্দনপূজনাসু ইস্সা ইস্সাযনা ইস্সাযিতত্তং উসূযা উসূযনা [উস্সুযা উস্সুযনা (ক.) ৰিভ. ৮৯৩] উসূযিতত্তং – অযং ৰুচ্চতি ইস্সা. যস্স পুগ্গলস্স অযং ইস্সা অপ্পহীনা – অযং ৰুচ্চতি পুগ্গলো ‘‘ইস্সুকী’’.

৫০. কতমো চ পুগ্গলো মচ্ছরী? তত্থ কতমং মচ্ছরিযং? পঞ্চ মচ্ছরিযানি – আৰাসমচ্ছরিযং, কুলমচ্ছরিযং, লাভমচ্ছরিযং, ৰণ্ণমচ্ছরিযং, ধম্মমচ্ছরিযং. যং এৰরূপং মচ্ছেরং মচ্ছরাযনা মচ্ছরাযিতত্তং ৰেৰিচ্ছং কদরিযং কটুকঞ্চুকতা অগ্গহিতত্তং চিত্তস্স – ইদং ৰুচ্চতি মচ্ছরিযং. যস্স পুগ্গলস্স ইদং মচ্ছরিযং অপ্পহীনং – অযং ৰুচ্চতি পুগ্গলো ‘‘মচ্ছরী’’.

৫১. কতমো চ পুগ্গলো সঠো? তত্থ কতমং সাঠেয্যং? ইধেকচ্চো সঠো হোতি পরিসঠো. যং তত্থ সঠং সঠতা সাঠেয্যং কক্করতা কক্করিযং [কক্খল়তা কক্খল়িযং (স্যা.) এৰং খুদ্দকৰিভঙ্গদুকনিদ্দেসেপি] পরিক্খত্তত্তা পারিক্খত্তিযং – ইদং ৰুচ্চতি সাঠেয্যং. যস্স পুগ্গলস্স ইদং সাঠেয্যং অপ্পহীনং – অযং ৰুচ্চতি পুগ্গলো ‘‘সঠো’’.

৫২. কতমো চ পুগ্গলো মাযাৰী? তত্থ কতমা মাযা? ইধেকচ্চো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা তস্স পটিচ্ছাদনহেতু পাপিকং ইচ্ছং পণিদহতি – ‘‘মা মং জঞ্ঞা’’তি ইচ্ছতি, ‘‘মা মং জঞ্ঞা’’তি সঙ্কপ্পতি ‘‘মা মং জঞ্ঞা’’তি ৰাচং ভাসতি, ‘‘মা মং জঞ্ঞা’’তি কাযেন পরক্কমতি. যা এৰরূপা মাযা মাযাৰিতা অচ্চাসরা ৰঞ্চনা নিকতি ৰিকিরণা পরিহরণা গূহনা পরিগূহনা ছাদনা পটিচ্ছাদনা অনুত্তানীকম্মং অনাৰিকম্মং ৰোচ্ছাদনা পাপকিরিযা – অযং ৰুচ্চতি মাযা. যস্স পুগ্গলস্স অযং মাযা অপ্পহীনা – অযং ৰুচ্চতি পুগ্গলো ‘‘মাযাৰী’’.

৫৩. কতমো চ পুগ্গলো অহিরিকো? তত্থ কতমং অহিরিকং? যং ন হিরীযতি হিরিযিতব্বেন ন হিরীযতি পাপকানং অকুসলানং ধম্মানং সমাপত্তিযা – ইদং ৰুচ্চতি অহিরিকং. ইমিনা অহিরিকেন সমন্নাগতো পুগ্গলো ‘‘অহিরিকো’’.

৫৪. কতমো চ পুগ্গলো অনোত্তপ্পী? তত্থ কতমং অনোত্তপ্পং? যং ন ওত্তপ্পতি ওত্তপ্পিতব্বেন ন ওত্তপ্পতি পাপকানং অকুসলানং ধম্মানং সমাপত্তিযা – ইদং ৰুচ্চতি অনোত্তপ্পং. ইমিনা অনোত্তপ্পেন সমন্নাগতো পুগ্গলো ‘‘অনোত্তপ্পী’’.

৫৫. কতমো চ পুগ্গলো দুব্বচো? তত্থ কতমো দোৰচস্সতা? সহধম্মিকে ৰুচ্চমানে দোৰচস্সাযং দোৰচস্সিযং দোৰচস্সতা ৰিপ্পটিকুলগ্গাহিতা ৰিপচ্চনীকসাততা অনাদরিযং অনাদরিযতা অগারৰতা অপ্পতিস্সৰতা – অযং ৰুচ্চতি দোৰচস্সতা. ইমায দোৰচস্সতায সমন্নাগতো পুগ্গলো ‘‘দুব্বচো’’.

৫৬. কতমো চ পুগ্গলো পাপমিত্তো? তত্থ কতমা পাপমিত্ততা? যে তে পুগ্গলা অস্সদ্ধা দুস্সীলা অপ্পস্সুতা মচ্ছরিনো দুপ্পঞ্ঞা, যা তেসং সেৰনা নিসেৰনা সংসেৰনা ভজনা সম্ভজনা ভত্তি সম্ভত্তি সম্পৰঙ্কতা – অযং ৰুচ্চতি পাপমিত্ততা. ইমায পাপমিত্ততায সমন্নাগতো পুগ্গলো ‘‘পাপমিত্তো’’.

৫৭. কতমো চ পুগ্গলো ইন্দ্রিযেসু অগুত্তদ্ৰারো? তত্থ কতমা ইন্দ্রিযেসু অগুত্তদ্ৰারতা? ইধেকচ্চো পুগ্গলো চক্খুনা রূপং দিস্ৰা নিমিত্তগ্গাহী হোতি অনুব্যঞ্জনগ্গাহী; যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায ন পটিপজ্জতি, ন রক্খতি চক্খুন্দ্রিযং, চক্খুন্দ্রিযে ন সংৰরং আপজ্জতি. সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায নিমিত্তগ্গাহী হোতি অনুব্যঞ্জনগ্গাহী; যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায ন পটিপজ্জতি, ন রক্খতি মনিন্দ্রিযং, মনিন্দ্রিযে ন সংৰরং আপজ্জতি. যা ইমেসং ছন্নং ইন্দ্রিযানং অগুত্তি অগোপনা অনারক্খো অসংৰরো – অযং ৰুচ্চতি ইন্দ্রিযেসু অগুত্তদ্ৰারতা. ইমায ইন্দ্রিযেসু অগুত্তদ্ৰারতায সমন্নাগতো পুগ্গলো ‘‘ইন্দ্রিযেসু অগুত্তদ্ৰারো’’.

৫৮. কতমো চ পুগ্গলো ভোজনে অমত্তঞ্ঞূ? তত্থ কতমা ভোজনে অমত্তঞ্ঞুতা? ইধেকচ্চো পুগ্গলো অপ্পটিসঙ্খা অযোনিসো আহারং আহারেতি দৰায মদায মণ্ডনায ৰিভূসনায, যা তত্থ অসন্তুট্ঠিতা অমত্তঞ্ঞুতা অপ্পটিসঙ্খা ভোজনে – অযং ৰুচ্চতি ভোজনে অমত্তঞ্ঞুতা. ইমায ভোজনে অমত্তঞ্ঞুতায সমন্নাগতো পুগ্গলো ‘‘ভোজনে অমত্তঞ্ঞূ’’.

৫৯. কতমো চ পুগ্গলো মুট্ঠস্সতি? তত্থ কতমং মুট্ঠস্সচ্চং? যা অস্সতি অননুস্সতি অপ্পটিস্সতি অস্সতি অস্সরণতা অধারণতা পিলাপনতা সম্মুসনতা – ইদং ৰুচ্চতি মুট্ঠস্সচ্চং. ইমিনা মুট্ঠস্সচ্চেন সমন্নাগতো পুগ্গলো ‘‘মুট্ঠস্সতি’’.

৬০. কতমো চ পুগ্গলো অসম্পজানো? তত্থ কতমং অসম্পজঞ্ঞং? যং অঞ্ঞাণং অদস্সনং অনভিসমযো অননুবোধো অসম্বোধো অপ্পটিৰেধো অসঙ্গাহণা অপরিযোগাহণা [অসংগাহনা অপরিযোগাহনা (সী. স্যা. ক.)] অসমপেক্খণা অপচ্চৰেক্খণা অপচ্চক্খকম্মং দুম্মেজ্ঝং বাল্যং অসম্পজঞ্ঞং মোহো পমোহো সম্মোহো অৰিজ্জা অৰিজ্জোঘো অৰিজ্জাযোগো অৰিজ্জানুসযো অৰিজ্জাপরিযুট্ঠানং অৰিজ্জালঙ্গী মোহো অকুসলমূলং – ইদং ৰুচ্চতি অসম্পজঞ্ঞং. ইমিনা অসম্পজঞ্ঞেন সমন্নাগতো পুগ্গলো ‘‘অসম্পজানো’’.

৬১. কতমো চ পুগ্গলো সীলৰিপন্নো? তত্থ কতমা সীলৰিপত্তি? কাযিকো ৰীতিক্কমো ৰাচসিকো ৰীতিক্কমো কাযিকৰাচসিকো ৰীতিক্কমো – অযং ৰুচ্চতি সীলৰিপত্তি. সব্বম্পি দুস্সিল্যং সীলৰিপত্তি. ইমায সীলৰিপত্তিযা সমন্নাগতো পুগ্গলো ‘‘সীলৰিপন্নো’’.

৬২. কতমো চ পুগ্গলো দিট্ঠিৰিপন্নো? তত্থ কতমা দিট্ঠিৰিপত্তি? ‘‘নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং [সুকটদুক্কটানং (সী.)] কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা [সমগ্গতা (ক.)] সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’’তি. যা এৰরূপা দিট্ঠি দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকাযিকং দিট্ঠিৰিপ্ফন্দিতং দিট্ঠিসংযোজনং গাহো পটিগ্গাহো অভিনিৰেসো পরামাসো কুম্মগ্গো মিচ্ছাপথো মিচ্ছত্তং তিত্থাযতনং ৰিপরিযাসগ্গাহো [ৰিপরিযেসগ্গাহো (সব্বত্থ) পদসিদ্ধি চিন্তেতব্বা], অযং ৰুচ্চতি দিট্ঠিৰিপত্তি. সব্বাপি মিচ্ছাদিট্ঠি দিট্ঠিৰিপত্তি. ইমায দিট্ঠিৰিপত্তিযা সমন্নাগতো পুগ্গলো ‘‘দিট্ঠিৰিপন্নো’’.

৬৩. কতমো চ পুগ্গলো অজ্ঝত্তসংযোজনো? যস্স পুগ্গলস্স পঞ্চোরম্ভাগিযানি সংযোজনানি অপ্পহীনানি – অযং ৰুচ্চতি পুগ্গলো ‘‘অজ্ঝত্তসংযোজনো’’.

৬৪. কতমো চ পুগ্গলো বহিদ্ধাসংযোজনো? যস্স পুগ্গলস্স পঞ্চুদ্ধম্ভাগিযানি সংযোজনানি অপ্পহীনানি – অযং ৰুচ্চতি পুগ্গলো ‘‘বহিদ্ধাসংযোজনো’’.

৬৫. কতমো চ পুগ্গলো অক্কোধনো? তত্থ কতমো কোধো? যো কোধো কুজ্ঝনা কুজ্ঝিতত্তং দোসো দুস্সনা দুস্সিতত্তং ব্যাপত্তি ব্যাপজ্জনা ব্যাপজ্জিতত্তং ৰিরোধো পটিৰিরোধো চণ্ডিক্কং অসুরোপো অনত্তমনতা চিত্তস্স – অযং ৰুচ্চতি কোধো. যস্স পুগ্গলস্স অযং কোধো পহীনো – অযং ৰুচ্চতি পুগ্গলো ‘‘অক্কোধনো’’.

৬৬. কতমো চ পুগ্গলো অনুপনাহী? তত্থ কতমো উপনাহো? পুব্বকালং কোধো অপরকালং উপনাহো যো এৰরূপো উপনাহো উপনয্হনা উপনয্হিতত্তং অট্ঠপনা ঠপনা সণ্ঠপনা অনুসংসন্দনা অনুপ্পবন্ধনা দল়্হীকম্মং কোধস্স – অযং ৰুচ্চতি উপনাহো. যস্স পুগ্গলস্স অযং উপনাহো পহীনো – অযং ৰুচ্চতি পুগ্গলো ‘‘অনুপনাহী’’.

৬৭. কতমো চ পুগ্গলো অমক্খী? তত্থ কতমো মক্খো? যো মক্খো মক্খাযনা মক্খাযিতত্তং নিট্ঠুরিযং নিট্ঠুরিযকম্মং – অযং ৰুচ্চতি মক্খো. যস্স পুগ্গলস্স অযং মক্খো পহীনো – অযং ৰুচ্চতি পুগ্গলো ‘‘অমক্খী’’.

৬৮. কতমো চ পুগ্গলো অপল়াসী? তত্থ কতমো পল়াসো? যো পল়াসো পল়াসাযনা পল়াসাযিতত্তং পল়াসাহারো ৰিৰাদট্ঠানং যুগগ্গাহো অপ্পটিনিস্সগ্গো – অযং ৰুচ্চতি পল়াসো. যস্স পুগ্গলস্স অযং পল়াসো পহীনো – অযং ৰুচ্চতি পুগ্গলো ‘‘অপল়াসী’’.

৬৯. কতমো চ পুগ্গলো অনিস্সুকী? তত্থ কতমা ইস্সা? যা পরলাভসক্কারগরুকারমাননৰন্দনপূজনাসু ইস্সা ইস্সাযনা ইস্সাযিতত্তং উসূযা উসূযনা উসূযিতত্তং – অযং ৰুচ্চতি ইস্সা. যস্স পুগ্গলস্স অযং ইস্সা পহীনা – অযং ৰুচ্চতি পুগ্গলো ‘‘অনিস্সুকী’’.

৭০. কতমো চ পুগলো অমচ্ছরী? তত্থ কতমং মচ্ছরিযং? পঞ্চ মচ্ছরিযানি – আৰাসমচ্ছরিযং, কুলমচ্ছরিযং, লাভমচ্ছরিযং, ৰণ্ণমচ্ছরিযং, ধম্মমচ্ছরিযং. যং এৰরূপং মচ্ছেরং মচ্ছরাযনা মচ্ছরাযিতত্তং ৰেৰিচ্ছং কদরিযং কটুকঞ্চুকতা অগ্গহিতত্তং চিত্তস্স – ইদং ৰুচ্চতি মচ্ছরিযং. যস্স পুগ্গলস্স ইদং মচ্ছরিযং পহীনং – অযং ৰুচ্চতি পুগ্গলো ‘‘অমচ্ছরী’’.

৭১. কতমো চ পুগ্গলো অসঠো? তত্থ কতমং সাঠেয্যং? ইধেকচ্চো সঠো হোতি পরিসঠো. যং তত্থ সঠং সঠতা সাঠেয্যং কক্করতা কক্করিযং পরিক্খত্ততা পারিক্খত্তিযং – ইদং ৰুচ্চতি সাঠেয্যং. যস্স পুগ্গলস্স ইদং সাঠেয্যং পহীনং – অযং ৰুচ্চতি পুগ্গলো ‘‘অসঠো’’.

৭২. কতমো চ পুগ্গলো অমাযাৰী? তত্থ কতমা মাযা? ইধেকচ্চো পুগ্গলো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা তস্স পটিচ্ছাদনহেতু পাপিকং ইচ্ছং পণিদহতি – ‘‘মা মং জঞ্ঞা’’তি ইচ্ছতি, ‘‘মা মং জঞ্ঞা’’তি সঙ্কপ্পতি, ‘‘মা মং জঞ্ঞা’’তি ৰাচং ভাসতি, ‘‘মা মং জঞ্ঞা’’তি কাযেন পরক্কমতি. যা এৰরূপা মাযা মাযাৰিতা অচ্চাসরা ৰঞ্চনা নিকতি ৰিকিরণা পরিহরণা গূহনা পরিগূহনা ছাদনা পটিচ্ছাদনা অনুত্তানীকম্মং অনাৰিকম্মং ৰোচ্ছাদনা পাপকিরিযা – অযং ৰুচ্চতি মাযা. যস্স পুগ্গলস্স অযং মাযা পহীনা – অযং ৰুচ্চতি পুগ্গলো ‘‘অমাযাৰী’’.

৭৩. কতমো চ পুগ্গলো হিরিমা? তত্থ কতমা হিরী? যং হিরীযতি হিরিযিতব্বেন হিরীযতি পাপকানং অকুসলানং ধম্মানং সমাপত্তিযা – অযং ৰুচ্চতি হিরী. ইমায হিরিযা সমন্নাগতো পুগ্গলো ‘‘হিরিমা’’.

৭৪. কতমো চ পুগ্গলো ওত্তপ্পী? তত্থ কতমং ওত্তপ্পং? যং ওত্তপ্পতি ওত্তপ্পিতব্বেন ওত্তপ্পতি পাপকানং অকুসলানং ধম্মানং সমাপত্তিযা – ইদং ৰুচ্চতি ওত্তপ্পং. ইমিনা ওত্তপ্পেন সমন্নাগতো পুগ্গলো ‘‘ওত্তপ্পী’’.

৭৫. কতমো চ পুগ্গলো সুৰচো? তত্থ কতমা সোৰচস্সতা? সহধম্মিকে ৰুচ্চমানে সোৰচস্সাযং সোৰচস্সিযং সোৰচস্সতা অৰিপ্পটিকুলগ্গাহিতা অৰিপচ্চনীকসাততা সাদরিযং সাদরিযতা সগারৰতা সপ্পতিস্সৰতা – অযং ৰুচ্চতি সোৰচস্সতা. ইমায সোৰচস্সতায সমন্নাগতো পুগ্গলো ‘‘সুৰচো’’.

৭৬. কতমো চ পুগ্গলো কল্যাণমিত্তো? তত্থ কতমা কল্যাণমিত্ততা? যে তে পুগ্গলা সদ্ধা সীলৰন্তো বহুস্সুতা চাগৰন্তো পঞ্ঞৰন্তো, যা তেসং সেৰনা নিসেৰনা সংসেৰনা ভজনা সম্ভজনা ভত্তি সম্ভত্তি সম্পৰঙ্কতা – অযং ৰুচ্চতি কল্যাণমিত্ততা. ইমায কল্যাণমিত্ততায সমন্নাগতো পুগ্গলো ‘‘কল্যাণমিত্তো’’.

৭৭. কতমো চ পুগ্গলো ইন্দ্রিযেসু গুত্তদ্ৰারো? তত্থ কতমা ইন্দ্রিযেসু গুত্তদ্ৰারতা? ইধেকচ্চো পুগ্গলো চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী; যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি চক্খুন্দ্রিযং চক্খুন্দ্রিযে সংৰরং আপজ্জতি. সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী; যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি. যা ইমেসং ছন্নং ইন্দ্রিযানং গুত্তি গোপনা আরক্খো সংৰরো – অযং ৰুচ্চতি ইন্দ্রিযেসু গুত্তদ্ৰারতা. ইমায ইন্দ্রিযেসু গুত্তদ্ৰারতায সমন্নাগতো পুগ্গলো ‘‘ইন্দ্রিযেসু গুত্তদ্ৰারো’’.

৭৮. কতমো চ পুগ্গলো ভোজনে মত্তঞ্ঞূ? তত্থ কতমা ভোজনে মত্তঞ্ঞুতা? ইধেকচ্চো পুগ্গলো পটিসঙ্খা যোনিসো আহারং আহারেতি – ‘‘নেৰ দৰায, ন মদায, ন মণ্ডনায, ন ৰিভূসনায; যাৰদেৰ ইমস্স কাযস্স ঠিতিযা যাপনায ৰিহিংসূপরতিযা ব্রহ্মচরিযানুগ্গহায. ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি অনৰজ্জতা চ ফাসুৰিহারো চা’’তি. যা তত্থ সন্তুট্ঠিতা মত্তঞ্ঞুতা পটিসঙ্খা ভোজনে – অযং ৰুচ্চতি ভোজনে মত্তঞ্ঞুতা. ইমায ভোজনে মত্তঞ্ঞুতায সমন্নাগতো পুগ্গলো ‘‘ভোজনে মত্তঞ্ঞূ’’.

৭৯. কতমো চ পুগ্গলো উপট্ঠিতস্সতি? তত্থ কতমা সতি? যা সতি অনুস্সতি পটিস্সতি সতি সরণতা ধারণতা অপিলাপনতা অসম্মুসনতা সতি সতিন্দ্রিযং সতিবলং সম্মাসতি – অযং ৰুচ্চতি সতি. ইমায সতিযা সমন্নাগতো পুগ্গলো ‘‘উপট্ঠিতস্সতি’’.

৮০. কতমো চ পুগ্গলো সম্পজানো? তত্থ কতমং সম্পজঞ্ঞং? যা পঞ্ঞা পজাননা ৰিচযো পৰিচযো ধম্মৰিচযো সল্লক্খণা উপলক্খণা পচ্চুপলক্খণা পণ্ডিচ্চং কোসল্লং নেপুঞ্ঞং ৰেভব্যা চিন্তা উপপরিক্খা ভূরী মেধা পরিণাযিকা ৰিপস্সনা সম্পজঞ্ঞং পতোদো পঞ্ঞা পঞ্ঞিন্দ্রিযং পঞ্ঞাবলং পঞ্ঞাসত্থং পঞ্ঞাপাসাদো পঞ্ঞাআলোকো পঞ্ঞাওভাসো পঞ্ঞাপজ্জোতো পঞ্ঞারতনং অমোহো ধম্মৰিচযো সম্মাদিট্ঠি – ইদং ৰুচ্চতি সম্পজঞ্ঞং. ইমিনা সম্পজঞ্ঞেন সমন্নাগতো পুগ্গলো ‘‘সম্পজানো’’.

৮১. কতমো চ পুগ্গলো সীলসম্পন্নো? তত্থ কতমা সীলসম্পদা? কাযিকো অৰীতিক্কমো ৰাচসিকো অৰীতিক্কমো কাযিকৰাচসিকো অৰীতিক্কমো – অযং ৰুচ্চতি সীলসম্পদা. সব্বোপি সীলসংৰরো সীলসম্পদা. ইমায সীলসম্পদায সমন্নাগতো পুগ্গলো ‘‘সীলসম্পন্নো’’.

৮২. কতমো চ পুগ্গলো দিট্ঠিসম্পন্নো? তত্থ কতমা দিট্ঠিসম্পদা? ‘‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’’তি. যা এৰরূপা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি দিট্ঠিসম্পদা. সব্বাপি সম্মাদিট্ঠি দিট্ঠিসম্পদা. ইমায দিট্ঠিসম্পদায সমন্নাগতো পুগ্গলো ‘‘দিট্ঠিসম্পন্নো’’.

৮৩. কতমে দ্ৰে পুগ্গলা দুল্লভা লোকস্মিং? যো চ পুব্বকারী, যো চ কতঞ্ঞূ কতৰেদী – ইমে দ্ৰে পুগ্গলা দুল্লভা লোকস্মিং.

৮৪. কতমে দ্ৰে পুগ্গলা দুত্তপ্পযা? যো চ লদ্ধং লদ্ধং নিক্খিপতি, যো চ লদ্ধং লদ্ধং ৰিস্সজ্জেতি – ইমে দ্ৰে পুগ্গলা ‘‘দুত্তপ্পযা’’.

৮৫. কতমে দ্ৰে পুগ্গলা সুতপ্পযা? যো চ লদ্ধং লদ্ধং ন নিক্খিপতি, যো চ লদ্ধং লদ্ধং ন ৰিস্সজ্জেতি – ইমে দ্ৰে পুগ্গলা ‘‘সুতপ্পযা’’.

৮৬. কতমেসং দ্ৰিন্নং পুগ্গলানং আসৰা ৰড্ঢন্তি? যো চ ন কুক্কুচ্চাযিতব্বং কুক্কুচ্চাযতি, যো চ কুক্কুচ্চাযিতব্বং ন কুক্কুচ্চাযতি – ইমেসং দ্ৰিন্নং পুগ্গলানং আসৰা ৰড্ঢন্তি.

৮৭. কতমেসং দ্ৰিন্নং পুগ্গলানং আসৰা ন ৰড্ঢন্তি? যো চ ন কুক্কুচ্চাযিতব্বং ন কুক্কুচ্চাযতি, যো চ কুক্কুচ্চাযিতব্বং কুক্কুচ্চাযতি – ইমেসং দ্ৰিন্নং পুগ্গলানং আসৰা ন ৰড্ঢন্তি.

৮৮. কতমো চ পুগ্গলো হীনাধিমুত্তো? ইধেকচ্চো পুগ্গলো দুস্সীলো হোতি পাপধম্মো, সো অঞ্ঞং দুস্সীলং পাপধম্মং সেৰতি ভজতি পযিরুপাসতি – অযং ৰুচ্চতি পুগ্গলো ‘‘হীনাধিমুত্তো’’.

৮৯. কতমো চ পুগ্গলো পণীতাধিমুত্তো? ইধেকচ্চো পুগ্গলো সীলৰা হোতি কল্যাণধম্মো, সো অঞ্ঞং সীলৰন্তং কল্যাণধম্মং সেৰতি ভজতি পযিরুপাসতি – অযং ৰুচ্চতি পুগ্গলো ‘‘পণীতাধিমুত্তো’’.

৯০. কতমো চ পুগ্গলো তিত্তো? পচ্চেকসম্বুদ্ধা [পচ্চেকবুদ্ধো (সী.)] যে চ তথাগতস্স সাৰকা অরহন্তো তিত্তা. সম্মাসম্বুদ্ধো তিত্তো চ তপ্পেতা চ [তপ্পেতা চ, অযং ৰুচ্চতি পুগ্গলো তিত্তো (সী.)].

দুকনিদ্দেসো.

৩. তিকপুগ্গলপঞ্ঞত্তি

৯১. কতমো চ পুগ্গলো নিরাসো? ইধেকচ্চো পুগ্গলো দুস্সীলো হোতি পাপধম্মো অসুচি সঙ্কস্সরসমাচারো পটিচ্ছন্নকম্মন্তো অস্সমণো সমণপটিঞ্ঞো অব্রহ্মচারী ব্রহ্মচারিপটিঞ্ঞো অন্তোপূতি অৰস্সুতো কসম্বুজাতো. সো সুণাতি – ‘‘ইত্থন্নামো কির ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি. তস্স ন এৰং হোতি – ‘‘কুদাস্সু নামাহম্পি আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সামী’’তি. অযং ৰুচ্চতি পুগ্গলো ‘‘নিরাসো’’.

৯২. কতমো চ পুগ্গলো আসংসো? ইধেকচ্চো পুগ্গলো সীলৰা হোতি কল্যাণধম্মো. সো সুণাতি – ‘‘ইত্থন্নামো কির ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি. তস্স এৰং হোতি – ‘‘কুদাস্সু নামাহম্পি আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সামী’’তি. অযং ৰুচ্চতি পুগ্গলো ‘‘আসংসো’’.

৯৩. কতমো চ পুগ্গলো ৰিগতাসো? ইধেকচ্চো পুগ্গলো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. সো সুণাতি – ‘‘ইত্থন্নামো কির ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি. তস্স ন এৰং হোতি – ‘‘কুদাস্সু নামাহম্পি আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সামী’’তি. তং কিস্স হেতু? যা হিস্স পুব্বে অৰিমুত্তস্স ৰিমুত্তাসা, সা পটিপ্পস্সদ্ধা. অযং ৰুচ্চতি পুগ্গলো ‘‘ৰিগতাসো’’.

৯৪. তত্থ কতমে তযো গিলানূপমা পুগ্গলা? তযো গিলানা – ইধেকচ্চো গিলানো লভন্তো ৰা সপ্পাযানি ভোজনানি অলভন্তো ৰা সপ্পাযানি ভোজনানি, লভন্তো ৰা সপ্পাযানি ভেসজ্জানি অলভন্তো ৰা সপ্পাযানি ভেসজ্জানি, লভন্তো ৰা পতিরূপং উপট্ঠাকং অলভন্তো ৰা পতিরূপং উপট্ঠাকং, নেৰ ৰুট্ঠাতি তম্হা আবাধা. (১)

ইধ পনেকচ্চো গিলানো লভন্তো ৰা সপ্পাযানি ভোজনানি অলভন্তো ৰা সপ্পাযানি ভোজনানি, লভন্তো ৰা সপ্পাযানি ভেসজ্জানি অলভন্তো ৰা সপ্পাযানি ভেসজ্জানি, লভন্তো ৰা পতিরূপং উপট্ঠাকং অলভন্তো ৰা পতিরূপং উপট্ঠাকং, ৰুট্ঠাতি তম্হা আবাধা. (২)

ইধ পনেকচ্চো গিলানো লভন্তো সপ্পাযানি ভোজনানি নো অলভন্তো, লভন্তো সপ্পাযানি ভেসজ্জানি নো অলভন্তো, লভন্তো পতিরূপং উপট্ঠাকং নো অলভন্তো, ৰুট্ঠাতি তম্হা আবাধা. (৩)

তত্র য্ৰাযং গিলানো লভন্তো সপ্পাযানি ভোজনানি নো অলভন্তো, লভন্তো সপ্পাযানি ভেসজ্জানি নো অলভন্তো, লভন্তো পতিরূপং উপট্ঠাকং নো অলভন্তো, ৰুট্ঠাতি তম্হা আবাধা, ইমং গিলানং পটিচ্চ ভগৰতা গিলানভত্তং অনুঞ্ঞাতং গিলানভেসজ্জং অনুঞ্ঞাতং গিলানুপট্ঠাকো অনুঞ্ঞাতো. ইমঞ্চ পন গিলানং পটিচ্চ অঞ্ঞেপি গিলানা উপট্ঠাতব্বা.

এৰমেৰং [এৰমেৰ (সী.)] তযো গিলানূপমা পুগ্গলা সন্তো সংৰিজ্জমানা লোকস্মিং. কতমে তযো? ইধেকচ্চো পুগ্গলো লভন্তো ৰা তথাগতং দস্সনায অলভন্তো ৰা তথাগতং দস্সনায, লভন্তো ৰা তথাগতপ্পৰেদিতং ধম্মৰিনযং সৰণায অলভন্তো ৰা তথাগতপ্পৰেদিতং ধম্মৰিনযং সৰণায, নেৰ ওক্কমতি নিযামং কুসলেসু ধম্মেসু সম্মত্তং. (১)

ইধ পনেকচ্চো পুগ্গলো লভন্তো ৰা তথাগতং দস্সনায অলভন্তো ৰা তথাগতং দস্সনায, লভন্তো ৰা তথাগতপ্পৰেদিতং ধম্মৰিনযং সৰণায অলভন্তো ৰা তথাগতপ্পৰেদিতং ধম্মৰিনযং সৰণায, ওক্কমতি নিযামং কুসলেসু ধম্মেসু সম্মত্তং. (২)

ইধ পনেকচ্চো পুগ্গলো লভন্তো তথাগতং দস্সনায নো অলভন্তো, লভন্তো তথাগতপ্পৰেদিতং ধম্মৰিনযং সৰণায নো অলভন্তো, ওক্কমতি নিযামং কুসলেসু ধম্মেসু সম্মত্তং. (৩)

তত্র য্ৰাযং পুগ্গলো লভন্তো তথাগতং দস্সনায নো অলভন্তো, লভন্তো তথাগতপ্পৰেদিতং ধম্মৰিনযং সৰণায নো অলভন্তো, ওক্কমতি নিযামং কুসলেসু ধম্মেসু সম্মত্তং, ইমং পুগ্গলং পটিচ্চ ভগৰতা ধম্মদেসনা অনুঞ্ঞাতা, ইমঞ্চ পুগ্গলং পটিচ্চ অঞ্ঞেসম্পি ধম্মো দেসেতব্বো. ইমে তযো গিলানূপমা পুগ্গলা সন্তো সংৰিজ্জমানা লোকস্মিং.

৯৫. কতমো চ পুগ্গলো কাযসক্খী? ইধেকচ্চো পুগ্গলো অট্ঠ ৰিমোক্খে কাযেন ফুসিত্ৰা ৰিহরতি, পঞ্ঞায চস্স দিস্ৰা একচ্চে আসৰা পরিক্খীণা হোন্তি – অযং ৰুচ্চতি পুগ্গলো ‘‘কাযসক্খী’’.

৯৬. কতমো চ পুগ্গলো দিট্ঠিপ্পত্তো? ইধেকচ্চো পুগ্গলো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি, তথাগতপ্পৰেদিতা চস্স ধম্মা পঞ্ঞায ৰোদিট্ঠা হোন্তি ৰোচরিতা, পঞ্ঞায চস্স দিস্ৰা একচ্চে আসৰা পরিক্খীণা হোন্তি – অযং ৰুচ্চতি পুগ্গলো ‘‘দিট্ঠিপ্পত্তো’’.

৯৭. কতমো চ পুগ্গলো সদ্ধাৰিমুত্তো? ইধেকচ্চো পুগ্গলো ‘‘ইদং দুক্খ’’ন্তি যথাভূতং পজানাতি…পে… তথাগতপ্পৰেদিতা চস্স ধম্মা পঞ্ঞায ৰোদিট্ঠা হোন্তি ৰোচরিতা, পঞ্ঞায চস্স দিস্ৰা একচ্চে আসৰা পরিক্খীণা হোন্তি, নো চ খো যথাদিট্ঠিপ্পত্তস্স – অযং ৰুচ্চতি পুগ্গলো ‘‘সদ্ধাৰিমুত্তো’’.

৯৮. কতমো চ পুগ্গলো গূথভাণী? ইধেকচ্চো পুগ্গলো মুসাৰাদী হোতি সভগ্গতো ৰা পরিসগ্গতো ৰা ঞাতিমজ্ঝগতো ৰা পূগমজ্ঝগতো ৰা রাজকুলমজ্ঝগতো ৰা অভিনীতো সক্খিপুট্ঠো – ‘‘এহম্ভো [এহি ভো (স্যা. ক.) ম. নি. ১.৪৪০; অ. নি. ৩.২৮], পুরিস, যং জানাসি তং ৰদেহী’’তি, সো অজানং ৰা আহ – ‘‘জানামী’’তি, জানং ৰা আহ – ‘‘ন জানামী’’তি, অপস্সং ৰা আহ – ‘‘পস্সামী’’তি, পস্সং ৰা আহ – ‘‘ন পস্সামী’’তি. ইতি অত্তহেতু ৰা পরহেতু ৰা আমিসকিঞ্চিক্খহেতু ৰা সম্পজানমুসা ভাসিতা হোতি – অযং ৰুচ্চতি পুগ্গলো ‘‘গূথভাণী’’.

৯৯. কতমো চ পুগ্গলো পুপ্ফভাণী? ইধেকচ্চো পুগ্গলো মুসাৰাদং পহায মুসাৰাদা পটিৰিরতো হোতি সভগ্গতো ৰা পরিসগ্গতো ৰা ঞাতিমজ্ঝগতো ৰা পূগমজ্ঝগতো ৰা রাজকুলমজ্ঝগতো ৰা অভিনীতো সক্খিপুট্ঠো – ‘‘এহম্ভো, পুরিস, যং জানাসি তং ৰদেহী’’তি, সো অজানং ৰা আহ – ‘‘ন জানামী’’তি, জানং ৰা আহ – ‘‘জানামী’’তি, অপস্সং ৰা আহ – ‘‘ন পস্সামী’’তি, পস্সং ৰা আহ – ‘‘পস্সামী’’তি. ইতি অত্তহেতু ৰা পরহেতু ৰা আমিসকিঞ্চিক্খহেতু ৰা ন সম্পজানমুসা ভাসিতা হোতি – অযং ৰুচ্চতি পুগ্গলো ‘‘পুপ্ফভাণী’’.

১০০. কতমো চ পুগ্গলো মধুভাণী? ইধেকচ্চো পুগ্গলো যা সা ৰাচা নেলা কণ্ণসুখা পেমনিযা হদযঙ্গমা পোরী বহুজনকন্তা বহুজনমনাপা, তথারূপিং ৰাচং ভাসিতা হোতি – অযং ৰুচ্চতি পুগ্গলো ‘‘মধুভাণী’’.

১০১. কতমো চ পুগ্গলো অরুকূপমচিত্তো? ইধেকচ্চো পুগ্গলো কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতি [পতিট্ঠীযতি (স্যা. ক.) অ. নি. ৩.২৫], কোপঞ্চ দোসঞ্চ অপ্পচ্চযঞ্চ পাতুকরোতি. সেয্যথাপি নাম দুট্ঠারুকো কট্ঠেন ৰা কঠলায [কথলায (ক.), কথলেন (অট্ঠকথা) অ. নি. ৩.২৫] ৰা ঘট্টিতো ভিয্যোসো মত্তায আসৰং দেতি [অস্সৰনোতি (সী.)], এৰমেৰং ইধেকচ্চো পুগ্গলো কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি – অযং ৰুচ্চতি পুগ্গলো ‘‘অরুকূপমচিত্তো’’.

১০২. কতমো চ পুগ্গলো ৰিজ্জূপমচিত্তো? ইধেকচ্চো পুগ্গলো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি. সেয্যথাপি নাম চক্খুমা পুরিসো রত্তন্ধকারতিমিসায ৰিজ্জন্তরিকায রূপানি পস্সেয্য, এৰমেৰং ইধেকচ্চো পুগ্গলো ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি – অযং ৰুচ্চতি পুগ্গলো ‘‘ৰিজ্জূপমচিত্তো’’.

১০৩. কতমো চ পুগ্গলো ৰজিরূপমচিত্তো? ইধেকচ্চো পুগ্গলো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. সেয্যথাপি নাম ৰজিরস্স নত্থি কিঞ্চি অভেজ্জং মণি ৰা পাসাণো ৰা, এৰমেৰং ইধেকচ্চো পুগ্গলো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি – অযং ৰুচ্চতি পুগ্গলো ‘‘ৰজিরূপমচিত্তো’’.

১০৪. কতমো চ পুগ্গলো অন্ধো? ইধেকচ্চস্স পুগ্গলস্স তথারূপং চক্খু ন হোতি যথারূপেন চক্খুনা অনধিগতং ৰা ভোগং অধিগচ্ছেয্য, অধিগতং ৰা ভোগং ফাতিং করেয্য; তথারূপম্পিস্স চক্খু ন হোতি যথারূপেন চক্খুনা কুসলাকুসলে ধম্মে জানেয্য, সাৰজ্জানৰজ্জে ধম্মে জানেয্য, হীনপ্পণীতে ধম্মে জানেয্য, কণ্হসুক্কসপ্পটিভাগে ধম্মে জানেয্য – অযং ৰুচ্চতি পুগ্গলো ‘‘অন্ধো’’.

১০৫. কতমো চ পুগ্গলো একচক্খু? ইধেকচ্চস্স পুগ্গলস্স তথারূপং চক্খু হোতি, যথারূপেন চক্খুনা অনধিগতং ৰা ভোগং অধিগচ্ছেয্য, অধিগতং ৰা ভোগং ফাতিং করেয্য; তথারূপম্পিস্স চক্খু ন হোতি যথারূপেন চক্খুনা কুসলাকুসলে ধম্মে জানেয্য, সাৰজ্জানৰজ্জে ধম্মে জানেয্য, হীনপ্পণীতে ধম্মে জানেয্য, কণ্হসুক্কসপ্পটিভাগে ধম্মে জানেয্য – অযং ৰুচ্চতি পুগ্গলো ‘‘একচক্খু’’.

১০৬. কতমো চ পুগ্গলো দ্ৰিচক্খু? ইধেকচ্চস্স পুগ্গলস্স তথারূপং চক্খু হোতি যথারূপেন চক্খুনা অনধিগতং ৰা ভোগং অধিগচ্ছেয্য, অধিগতং ৰা ভোগং ফাতিং করেয্য; তথারূপম্পিস্স চক্খু হোতি যথারূপেন চক্খুনা কুসলাকুসলে ধম্মে জানেয্য, সাৰজ্জানৰজ্জে ধম্মে জানেয্য, হীনপ্পণীতে ধম্মে জানেয্য, কণ্হসুক্কসপ্পটিভাগে ধম্মে জানেয্য – অযং ৰুচ্চতি পুগ্গলো ‘‘দ্ৰিচক্খু’’.

১০৭. কতমো চ পুগ্গলো অৰকুজ্জপঞ্ঞো? ইধেকচ্চো পুগ্গলো আরামং গন্তা [গতো (সী.), গন্ত্ৰা (স্যা.)] হোতি অভিক্খণং ভিক্খূনং সন্তিকে ধম্মস্সৰণায [ধম্মস্সৰনায (স্যা.)]. তস্স ভিক্খূ ধম্মং দেসেন্তি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেন্তি. সো তস্মিং আসনে নিসিন্নো তস্সা কথায নেৰ আদিং মনসি করোতি, ন মজ্ঝং মনসি করোতি, ন পরিযোসানং মনসি করোতি. ৰুট্ঠিতোপি তম্হা আসনা তস্সা কথায নেৰ আদিং মনসি করোতি, ন মজ্ঝং মনসি করোতি, ন পরিযোসানং মনসি করোতি. সেয্যথাপি নাম কুম্ভো নিক্কুজ্জো [নিকুজ্জো (স্যা.) অ. নি. ৩.৩০] তত্র উদকং আসিত্তং ৰিৰট্টতি, নো সণ্ঠাতি; এৰমেৰং ইধেকচ্চো পুগ্গলো আরামং গন্তা হোতি অভিক্খণং ভিক্খূনং সন্তিকে ধম্মস্সৰণায. তস্স ভিক্খূ ধম্মং দেসেন্তি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেন্তি. সো তস্মিং আসনে নিসিন্নো তস্সা কথায নেৰ আদিং মনসি করোতি, ন মজ্ঝং মনসি করোতি, ন পরিযোসানং মনসি করোতি. ৰুট্ঠিতোপি তম্হা আসনা তস্সা কথায নেৰ আদিং মনসি করোতি, ন মজ্ঝং মনসি করোতি, ন পরিযোসানং মনসি করোতি – অযং ৰুচ্চতি পুগ্গলো ‘‘অৰকুজ্জপঞ্ঞো’’.

১০৮. কতমো চ পুগ্গলো উচ্ছঙ্গপঞ্ঞো? ইধেকচ্চো পুগ্গলো আরামং গন্তা হোতি অভিক্খণং ভিক্খূনং সন্তিকে ধম্মস্সৰণায. তস্স ভিক্খূ ধম্মং দেসেন্তি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেন্তি. সো তস্মিং আসনে নিসিন্নো তস্সা কথায আদিম্পি মনসি করোতি, মজ্ঝম্পি মনসি করোতি, পরিযোসানম্পি মনসি করোতি. ৰুট্ঠিতো চ খো তম্হা আসনা তস্সা কথায নেৰ আদিং মনসি করোতি, ন মজ্ঝং মনসি করোতি, ন পরিযোসানং মনসি করোতি. সেয্যথাপি নাম পুরিসস্স উচ্ছঙ্গে নানাখজ্জকানি আকিণ্ণানি – তিলা তণ্ডুলা [তিলতণ্ডুলা (ক.) অ. নি. ৩.৩০] মোদকা বদরা. সো তম্হা আসনা ৰুট্ঠহন্তো সতিসম্মোসা পকিরেয্য. এৰমেৰং ইধেকচ্চো পুগ্গলো আরামং গন্তা হোতি অভিক্খণং ভিক্খূনং সন্তিকে ধম্মস্সৰণায. তস্স ভিক্খূ ধম্মং দেসেন্তি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেন্তি. সো তস্মিং আসনে নিসিন্নো তস্সা কথায আদিম্পি মনসি করোতি, মজ্ঝম্পি মনসি করোতি, পরিযোসানম্পি মনসি করোতি. ৰুট্ঠিতো চ খো তম্হা আসনা তস্সা কথায নেৰ আদিম্পি মনসি করোতি, ন মজ্ঝম্পি মনসি করোতি, ন পরিযোসানম্পি মনসি করোতি – অযং ৰুচ্চতি পুগ্গলো ‘‘উচ্ছঙ্গপঞ্ঞো’’.

১০৯. কতমো চ পুগ্গলো পুথুপঞ্ঞো? ইধেকচ্চো পুগ্গলো আরামং গন্তা হোতি অভিক্খণং ভিক্খূনং সন্তিকে ধম্মস্সৰণায. তস্স ভিক্খূ ধম্মং দেসেন্তি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেন্তি. সো তস্মিং আসনে নিসিন্নো তস্সা কথায আদিম্পি মনসি করোতি, মজ্ঝম্পি মনসি করোতি, পরিযোসানম্পি মনসি করোতি. ৰুট্ঠিতোপি তম্হা আসনা তস্সা কথায আদিম্পি মনসি করোতি, মজ্ঝম্পি মনসি করোতি, পরিযোসানম্পি মনসি করোতি. সেয্যথাপি নাম কুম্ভো উক্কুজ্জো তত্র উদকং আসিত্তং সণ্ঠাতি, নো ৰিৰট্টতি; এৰমেৰং ইধেকচ্চো পুগ্গলো আরামং গন্তা হোন্তি অভিক্খণং ভিক্খূনং সন্তিকে ধম্মস্সৰণায. তস্স ভিক্খূ ধম্মং দেসেন্তি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেন্তি. সো তস্মিং আসনে নিসিন্নো তস্সা কথায আদিম্পি মনসি করোতি, মজ্ঝম্পি মনসি করোতি, পরিযোসানম্পি মনসি করোতি. ৰুট্ঠিতোপি তম্হা আসনা তস্সা কথায আদিম্পি মনসি করোতি, মজ্ঝম্পি মনসি করোতি, পরিযোসানম্পি মনসি করোতি – অযং ৰুচ্চতি পুগ্গলো ‘‘পুথুপঞ্ঞো’’.

১১০. কতমো চ পুগ্গলো কামেসু চ ভৰেসু চ অৰীতরাগো? সোতাপন্নসকদাগামিনো – ইমে ৰুচ্চন্তি পুগ্গলা ‘‘কামেসু চ ভৰেসু চ অৰীতরাগা’’.

১১১. কতমো চ পুগ্গলো কামেসু ৰীতরাগো, ভৰেসু অৰীতরাগো? অনাগামী – অযং ৰুচ্চতি পুগ্গলো ‘‘কামেসু ৰীতরাগো, ভৰেসু অৰীতরাগো’’.

১১২. কতমো চ পুগ্গলো কামেসু চ ভৰেসু চ ৰীতরাগো? অরহা – অযং ৰুচ্চতি পুগ্গলো ‘‘কামেসু চ ভৰেসু চ ৰীতরাগো’’.

১১৩. কতমো চ পুগ্গলো পাসাণলেখূপমো? ইধেকচ্চো পুগ্গলো অভিণ্হং কুজ্ঝতি. সো চ খ্ৰস্স কোধো চিরং দীঘরত্তং অনুসেতি. সেয্যথাপি নাম পাসাণে লেখা ন খিপ্পং লুজ্জতি ৰাতেন ৰা উদকেন ৰা, চিরট্ঠিতিকা হোতি; এৰমেৰং ইধেকচ্চো পুগ্গলো অভিণ্হং কুজ্ঝতি. সো চ খ্ৰস্স কোধো চিরং দীঘরত্তং অনুসেতি – অযং ৰুচ্চতি পুগ্গলো ‘‘পাসাণলেখূপমো’’.

১১৪. কতমো চ পুগ্গলো পথৰিলেখূপমো? ইধেকচ্চো পুগ্গলো অভিণ্হং কুজ্ঝতি. সো চ খ্ৰস্স কোধো ন চিরং দীঘরত্তং অনুসেতি. সেয্যথাপি নাম পথৰিযা [পঠৰিযা (সী. স্যা.)] লেখা খিপ্পং লুজ্জতি ৰাতেন ৰা উদকেন ৰা, ন চিরট্ঠিতিকা হোতি; এৰমেৰং ইধেকচ্চো পুগ্গলো অভিণ্হং কুজ্ঝতি. সো চ খ্ৰস্স কোধো ন চিরং দীঘরত্তং অনুসেতি – অযং ৰুচ্চতি পুগ্গলো ‘‘পথৰিলেখূপমো’’.

১১৫. কতমো চ পুগ্গলো উদকলেখূপমো? ইধেকচ্চো পুগ্গলো আগাল়্হেনপি ৰুচ্চমানো ফরুসেনপি ৰুচ্চমানো অমনাপেনপি ৰুচ্চমানো সংসন্দতিমেৰ [… চেৰ (স্যা.) অ. নি. ৩.১৩৩] সন্ধিযতিমেৰ [… চেৰ (স্যা.) অ. নি. ৩.১৩৩] সম্মোদতিমেৰ [… চেৰ (স্যা.) অ. নি. ৩.১৩৩]. সেয্যথাপি নাম উদকে লেখা খিপ্পং লুজ্জতি, ন চিরট্ঠিতিকা হোতি; এৰমেৰং ইধেকচ্চো পুগ্গলো আগাল়্হেনপি ৰুচ্চমানো ফরুসেনপি ৰুচ্চমানো অমনাপেনপি ৰুচ্চমানো সংসন্দতিমেৰ সন্ধিযতিমেৰ সম্মোদতিমেৰ – অযং ৰুচ্চতি পুগ্গলো ‘‘উদকলেখূপমো’’.

১১৬. তত্থ কতমে তযো পোত্থকূপমা পুগ্গলা? তযো পোত্থকা – নৰোপি পোত্থকো দুব্বণ্ণো চেৰ হোতি দুক্খসম্ফস্সো চ অপ্পগ্ঘো চ, মজ্ঝিমোপি পোত্থকো দুব্বণ্ণো চেৰ হোতি দুক্খসম্ফস্সো চ অপ্পগ্ঘো চ, জিণ্ণোপি পোত্থকো দুব্বণ্ণো চেৰ হোতি দুক্খসম্ফস্সো চ অপ্পগ্ঘো চ. জিণ্ণম্পি পোত্থকং উক্খলিপরিমজ্জনং ৰা করোন্তি সঙ্কারকূটে ৰা নং ছড্ডেন্তি. এৰমেৰং তযোমে পোত্থকূপমা পুগ্গলা সন্তো সংৰিজ্জমানা ভিক্খূসু. কতমে তযো? নৰো চেপি ভিক্খু হোতি দুস্সীলো পাপধম্মো, ইদমস্স দুব্বণ্ণতায. সেয্যথাপি সো পোত্থকো দুব্বণ্ণো, তথূপমো অযং পুগ্গলো. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং অহিতায দুক্খায. ইদমস্স দুক্খসম্ফস্সতায. সেয্যথাপি সো পোত্থকো দুক্খসম্ফস্সো, তথূপমো অযং পুগ্গলো. যেসং খো পন সো পটিগ্গণ্হাতি চীৰরপিণ্ডপাতসেনাসনগিলানপচ্চযভেসজ্জপরিক্খারং, তেসং তং ন মহপ্ফলং হোতি ন মহানিসংসং. ইদমস্স অপ্পগ্ঘতায. সেয্যথাপি সো পোত্থকো অপ্পগ্ঘো, তথূপমো অযং পুগ্গলো.

মজ্ঝিমো চেপি ভিক্খু হোতি…পে… থেরো চেপি ভিক্খু হোতি দুস্সীলো পাপধম্মো, ইদমস্স দুব্বণ্ণতায. সেয্যথাপি সো পোত্থকো দুব্বণ্ণো, তথূপমো অযং পুগ্গলো. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং অহিতায দুক্খায. ইদমস্স দুক্খসম্ফস্সতায. সেয্যথাপি সো পোত্থকো দুক্খসম্ফস্সো, তথূপমো অযং পুগ্গলো. যেসং খো পন সো পটিগ্গণ্হাতি চীৰরপিণ্ডপাতসেনাসনগিলানপচ্চযভেসজ্জপরিক্খারং, তেসং তং ন মহপ্ফলং হোতি ন মহানিসংসং. ইদমস্স অপ্পগ্ঘতায. সেয্যথাপি সো পোত্থকো অপ্পগ্ঘো, তথূপমো অযং পুগ্গলো.

এৰরূপো চে থেরো ভিক্খু সঙ্ঘমজ্ঝে ভণতি. তমেনং ভিক্খূ এৰমাহংসু – ‘‘কিং নু খো তুয্হং বালস্স অব্যত্তস্স ভণিতেন, ত্ৰম্পি নাম ভণিতব্বং মঞ্ঞসী’’তি! সো কুপিতো অনত্তমনো তথারূপিং ৰাচং নিচ্ছারেতি যথারূপায ৰাচায সঙ্ঘো তং উক্খিপতি, সঙ্কারকূটেৰ নং পোত্থকং. ইমে তযো পোত্থকূপমা পুগ্গলা সন্তো সংৰিজ্জমানা ভিক্খূসু.

১১৭. তত্থ কতমে তযো কাসিকৰত্থূপমা পুগ্গলা? তীণি কাসিকৰত্থানি – নৰম্পি কাসিকৰত্থং ৰণ্ণৰন্তঞ্চেৰ হোতি সুখসম্ফস্সঞ্চ মহগ্ঘঞ্চ, মজ্ঝিমম্পি কাসিকৰত্থং ৰণ্ণৰন্তঞ্চেৰ হোতি সুখসম্ফস্সঞ্চ মহগ্ঘঞ্চ, জিণ্ণম্পি কাসিকৰত্থং ৰণ্ণৰন্তঞ্চেৰ হোতি সুখসম্ফস্সঞ্চ মহগ্ঘঞ্চ. জিণ্ণম্পি কাসিকৰত্থং রতনপলিৰেঠনং ৰা করোন্তি গন্ধকরণ্ডকে ৰা নং নিক্খিপন্তি.

এৰমেৰং তযোমে কাসিকৰত্থূপমা পুগ্গলা সন্তো সংৰিজ্জমানা ভিক্খূসু. কতমে তযো? নৰো চেপি ভিক্খু হোতি সীলৰা কল্যাণধম্মো, ইদমস্স সুৰণ্ণতায. সেয্যথাপি তং কাসিকৰত্থং ৰণ্ণৰন্তং, তথূপমো অযং পুগ্গলো. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং হিতায সুখায. ইদমস্স সুখসম্ফস্সতায. সেয্যথাপি তং কাসিকৰত্থং সুখসম্ফস্সং, তথূপমো অযং পুগ্গলো. যেসং খো পন সো [যেসং খো পন (সব্বত্থ) অ. নি. ৩.১০০] পটিগ্গণ্হাতি [পতিগণ্হাতি (সী.) রূপসিদ্ধিটীকায পন সমেতি] চীৰরপিণ্ডপাতসেনাসনগিলানপচ্চযভেসজ্জপরিক্খারং, তেসং তং মহপ্ফলং হোতি মহানিসংসং. ইদমস্স মহগ্ঘতায. সেয্যথাপি তং কাসিকৰত্থং মহগ্ঘং, তথূপমো অযং পুগ্গলো.

মজ্ঝিমো চেপি ভিক্খু…পে… থেরো চেপি ভিক্খু হোতি সীলৰা কল্যাণধম্মো, ইদমস্স সুৰণ্ণতায. সেয্যথাপি তং কাসিকৰত্থং ৰণ্ণৰন্তং, তথূপমো অযং পুগ্গলো. যে খো পনস্স সেৰন্তি ভজন্তি পযিরুপাসন্তি দিট্ঠানুগতিং আপজ্জন্তি, তেসং তং হোতি দীঘরত্তং হিতায সুখায. ইদমস্স সুখসম্ফস্সতায. সেয্যথাপি তং কাসিকৰত্থং সুখসম্ফস্সং, তথূপমো অযং পুগ্গলো. যেসং খো পন সো পটিগ্গণ্হাতি চীৰরপিণ্ডপাতসেনাসনগিলানপচ্চযভেসজ্জপরিক্খারং, তেসং তং মহপ্ফলং হোতি মহানিসংসং. ইদমস্স মহগ্ঘতায. সেয্যথাপি তং কাসিকৰত্থং মহগ্ঘং, তথূপমো অযং পুগ্গলো.

এৰরূপো চে থেরো ভিক্খু সঙ্ঘমজ্ঝে ভণতি, তমেনং ভিক্খূ এৰমাহংসু – ‘‘অপ্পসদ্দা আযস্মন্তো হোথ, থেরো ভিক্খু ধম্মঞ্চ ৰিনযঞ্চ ভণতী’’তি. তস্স তং ৰচনং আধেয্যং গচ্ছতি, গন্ধকরণ্ডকেৰ নং কাসিকৰত্থং. ইমে তযো কাসিকৰত্থূপমা পুগ্গলা সন্তো সংৰিজ্জমানা ভিক্খূসু.

১১৮. কতমো চ পুগ্গলো সুপ্পমেয্যো? ইধেকচ্চো পুগ্গলো উদ্ধতো হোতি উন্নল়ো চপলো মুখরো ৰিকিণ্ণৰাচো মুট্ঠস্সতি অসম্পজানো অসমাহিতো ৰিব্ভন্তচিত্তো পাকটিন্দ্রিযো – অযং ৰুচ্চতি পুগ্গলো ‘‘সুপ্পমেয্যো’’.

১১৯. কতমো চ পুগ্গলো দুপ্পমেয্যো? ইধেকচ্চো পুগ্গলো অনুদ্ধতো হোতি অনুন্নল়ো অচপলো অমুখরো অৰিকিণ্ণৰাচো উপট্ঠিতস্সতি সম্পজানো সমাহিতো একগ্গচিত্তো সংৰুতিন্দ্রিযো – অযং ৰুচ্চতি পুগ্গলো ‘‘দুপ্পমেয্যো’’.

১২০. কতমো চ পুগ্গলো অপ্পমেয্যো? ইধেকচ্চো পুগ্গলো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি – অযং ৰুচ্চতি পুগ্গলো ‘‘অপ্পমেয্যো’’.

১২১. কতমো চ পুগ্গলো ন সেৰিতব্বো ন ভজিতব্বো ন পযিরুপাসিতব্বো? ইধেকচ্চো পুগ্গলো হীনো হোতি সীলেন সমাধিনা পঞ্ঞায. এৰরূপো পুগ্গলো ন সেৰিতব্বো ন ভজিতব্বো ন পযিরুপাসিতব্বো, অঞ্ঞত্র অনুদ্দযা অঞ্ঞত্র অনুকম্পা.

১২২. কতমো চ পুগ্গলো সেৰিতব্বো ভজিতব্বো পযিরুপাসিতব্বো? ইধেকচ্চো পুগ্গলো সদিসো হোতি সীলেন সমাধিনা পঞ্ঞায. এৰরূপো পুগ্গলো সেৰিতব্বো ভজিতব্বো পযিরুপাসিতব্বো. তং কিস্স হেতু? ‘‘সীলসামঞ্ঞগতানং সতং সীলকথা চ নো ভৰিস্সতি, সা চ নো ফাসু ভৰিস্সতি, সা চ নো পৰত্তিনী ভৰিস্সতি; সমাধিসামঞ্ঞগতানং সতং সমাধিকথা চ নো ভৰিস্সতি, সা চ নো ফাসু ভৰিস্সতি, সা চ নো পৰত্তিনী [পৰত্তনী (সী.) অ. নি. ৩.২৬] ভৰিস্সতি; পঞ্ঞাসামঞ্ঞগতানং সতং পঞ্ঞাকথা চ নো ভৰিস্সতি, সা চ নো ফাসু ভৰিস্সতি, সা চ নো পৰত্তিনী ভৰিস্সতী’’তি. তস্মা এৰরূপো পুগ্গলো সেৰিতব্বো ভজিতব্বো পযিরুপাসিতব্বো.

১২৩. কতমো চ পুগ্গলো সক্কত্ৰা গরুং কত্ৰা সেৰিতব্বো ভজিতব্বো পযিরুপাসিতব্বো? ইধেকচ্চো পুগ্গলো অধিকো হোতি সীলেন সমাধিনা পঞ্ঞায. এৰরূপো পুগ্গলো সক্কত্ৰা গরুং কত্ৰা সেৰিতব্বো ভজিতব্বো পযিরুপাসিতব্বো. তং কিস্স হেতু? ‘‘অপরিপূরং ৰা সীলক্খন্ধং পরিপূরেস্সামি, পরিপূরং ৰা সীলক্খন্ধং তত্থ তত্থ পঞ্ঞায অনুগ্গহেস্সামি; অপরিপূরং ৰা সমাধিক্খন্ধং পরিপূরেস্সামি, পরিপূরং ৰা সমাধিক্খন্ধং তত্থ তত্থ পঞ্ঞায অনুগ্গহেস্সামি; অপরিপূরং ৰা পঞ্ঞাক্খন্ধং পরিপূরেস্সামি, পরিপূরং ৰা পঞ্ঞাক্খন্ধং তত্থ তত্থ পঞ্ঞায অনুগ্গহেস্সামী’’তি. তস্মা এৰরূপো পুগ্গলো সক্কত্ৰা গরুং কত্ৰা সেৰিতব্বো ভজিতব্বো পযিরুপাসিতব্বো.

১২৪. কতমো চ পুগ্গলো জিগুচ্ছিতব্বো ন সেৰিতব্বো ন ভজিতব্বো ন পযিরুপাসিতব্বো? ইধেকচ্চো পুগ্গলো দুস্সীলো হোতি পাপধম্মো অসুচি সঙ্কস্সরসমাচারো পটিচ্ছন্নকম্মন্তো অস্সমণো সমণপটিঞ্ঞো অব্রহ্মচারী ব্রহ্মচারিপটিঞ্ঞো অন্তোপূতি অৰস্সুতো কসম্বুজাতো. এৰরূপো পুগ্গলো জিগুচ্ছিতব্বো ন সেৰিতব্বো ন ভজিতব্বো ন পযিরুপাসিতব্বো. তং কিস্স হেতু? কিঞ্চাপি এৰরূপস্স পুগ্গলস্স ন দিট্ঠানুগতিং আপজ্জতি, অথ খো নং পাপকো কিত্তিসদ্দো অব্ভুগ্গচ্ছতি – ‘‘পাপমিত্তো পুরিসপুগ্গলো পাপসহাযো পাপসম্পৰঙ্কো’’তি. সেয্যথাপি নাম অহি গূথগতো কিঞ্চাপি ন ডংসতি, অথ খো নং মক্খেতি; এৰমেৰং কিঞ্চাপি এৰরূপস্স পুগ্গলস্স ন দিট্ঠানুগতিং আপজ্জতি, অথ খো নং পাপকো কিত্তিসদ্দো অব্ভুগ্গচ্ছতি – ‘‘পাপমিত্তো পুরিসপুগ্গলো পাপসহাযো পাপসম্পৰঙ্কো’’তি! তস্মা এৰরূপো পুগ্গলো জিগুচ্ছিতব্বো ন সেৰিতব্বো ন ভজিতব্বো ন পযিরুপাসিতব্বো.

১২৫. কতমো চ পুগ্গলো অজ্ঝুপেক্খিতব্বো ন সেৰিতব্বো ন ভজিতব্বো ন পযিরুপাসিতব্বো? ইধেকচ্চো পুগ্গলো কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি. সেয্যথাপি নাম দুট্ঠারুকো কট্ঠেন ৰা কঠলায ৰা ঘট্টিতো ভিয্যোসো মত্তায আসৰং দেতি, এৰমেৰং ইধেকচ্চো পুগ্গলো কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি. সেয্যথাপি নাম তিন্দুকালাতং কট্ঠেন ৰা কঠলায ৰা ঘট্টিতং ভিয্যোসো মত্তায চিচ্চিটাযতি চিটিচিটাযতি, এৰমেৰং ইধেকচ্চো পুগ্গলো কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি. সেয্যথাপি নাম গূথকূপো কট্ঠেন ৰা কঠলায ৰা ঘট্টিতো ভিয্যোসো মত্তায দুগ্গন্ধো হোতি, এৰমেৰং ইধেকচ্চো পুগ্গলো কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি; এৰরূপো পুগ্গলো অজ্ঝুপেক্খিতব্বো ন সেৰিতব্বো ন ভজিতব্বো ন পযিরুপাসিতব্বো. তং কিস্স হেতু? ‘‘অক্কোসেয্যপি মং পরিভাসেয্যপি মং অনত্থম্পি মে করেয্যা’’তি! তস্মা এৰরূপো পুগ্গলো অজ্ঝুপেক্খিতব্বো ন সেৰিতব্বো ন ভজিতব্বো ন পযিরুপাসিতব্বো.

১২৬. কতমো চ পুগ্গলো সেৰিতব্বো ভজিতব্বো পযিরুপাসিতব্বো? ইধেকচ্চো পুগ্গলো সীলৰা হোতি কল্যাণধম্মো – এৰরূপো পুগ্গলো সেৰিতব্বো ভজিতব্বো পযিরুপাসিতব্বো. তং কিস্স হেতু? কিঞ্চাপি এৰরূপস্স পুগ্গলস্স ন দিট্ঠানুগতিং আপজ্জতি, অথ খো নং কল্যাণো কিত্তিসদ্দো অব্ভুগ্গচ্ছতি – ‘‘কল্যাণমিত্তো পুরিসপুগ্গলো কল্যাণসহাযো কল্যাণসম্পৰঙ্কো’’তি! তস্মা এৰরূপো পুগ্গলো সেৰিতব্বো ভজিতব্বো পযিরুপাসিতব্বো.

১২৭. কতমো চ পুগ্গলো সীলেসু পরিপূরকারী, সমাধিস্মিং মত্তসো কারী, পঞ্ঞায মত্তসো কারী? সোতাপন্নসকদাগামিনো – ইমে ৰুচ্চন্তি পুগ্গলা সীলেসু পরিপূরকারিনো, সমাধিস্মিং মত্তসো কারিনো, পঞ্ঞায মত্তসো কারিনো.

১২৮. কতমো চ পুগ্গলো সীলেসু চ পরিপূরকারী, সমাধিস্মিঞ্চ পরিপূরকারী, পঞ্ঞায মত্তসো কারী? অনাগামী – অযং ৰুচ্চতি পুগ্গলো সীলেসু চ পরিপূরকারী, সমাধিস্মিঞ্চ পরিপূরকারী, পঞ্ঞায মত্তসো কারী.

১২৯. কতমো চ পুগ্গলো সীলেসু চ পরিপূরকারী, সমাধিস্মিঞ্চ পরিপূরকারী, পঞ্ঞায চ পরিপূরকারী? অরহা – অযং ৰুচ্চতি পুগ্গলো সীলেসু চ পরিপূরকারী, সমাধিস্মিঞ্চ পরিপূরকারী, পঞ্ঞায চ পরিপূরকারী.

১৩০. তত্থ কতমে তযো সত্থারো? ইধেকচ্চো সত্থা কামানং পরিঞ্ঞং পঞ্ঞপেতি [পঞ্ঞাপেতি (সী. স্যা.)], ন রূপানং পরিঞ্ঞং পঞ্ঞপেতি, ন ৰেদনানং পরিঞ্ঞং পঞ্ঞপেতি. ইধ পনেকচ্চো সত্থা কামানঞ্চ পরিঞ্ঞং পঞ্ঞপেতি, রূপানঞ্চ পরিঞ্ঞং পঞ্ঞপেতি, ন ৰেদনানং পরিঞ্ঞং পঞ্ঞপেতি. ইধ পনেকচ্চো সত্থা কামানঞ্চ পরিঞ্ঞং পঞ্ঞপেতি, রূপানঞ্চ পরিঞ্ঞং পঞ্ঞপেতি, ৰেদনানঞ্চ পরিঞ্ঞং পঞ্ঞপেতি.

তত্র য্ৰাযং সত্থা কামানং পরিঞ্ঞং পঞ্ঞপেতি, ন রূপানং পরিঞ্ঞং পঞ্ঞপেতি, ন ৰেদনানং পরিঞ্ঞং পঞ্ঞপেতি, রূপাৰচরসমাপত্তিযা লাভী সত্থা তেন দট্ঠব্বো. তত্র য্ৰাযং সত্থা কামানঞ্চ পরিঞ্ঞং পঞ্ঞপেতি, রূপানঞ্চ পরিঞ্ঞং পঞ্ঞপেতি, ন ৰেদনানং পরিঞ্ঞং পঞ্ঞপেতি, অরূপাৰচরসমাপত্তিযা লাভী সত্থা তেন দট্ঠব্বো. তত্র য্ৰাযং সত্থা কামানঞ্চ পরিঞ্ঞং পঞ্ঞপেতি, রূপানঞ্চ পরিঞ্ঞং পঞ্ঞপেতি, ৰেদনানঞ্চ পরিঞ্ঞং পঞ্ঞপেতি, সম্মাসম্বুদ্ধো সত্থা তেন দট্ঠব্বো. ইমে তযো সত্থারো.

১৩১. তত্থ কতমে অপরেপি তযো সত্থারো? ইধেকচ্চো সত্থা দিট্ঠে চেৰ ধম্মে অত্তানং সচ্চতো থেততো পঞ্ঞপেতি, অভিসম্পরাযঞ্চ অত্তানং সচ্চতো থেততো পঞ্ঞপেতি. ইধ পনেকচ্চো সত্থা দিট্ঠে চেৰ ধম্মে অত্তানং সচ্চতো থেততো পঞ্ঞপেতি, নো চ খো অভিসম্পরাযং অত্তানং সচ্চতো থেততো পঞ্ঞপেতি. ইধ পনেকচ্চো সত্থা দিট্ঠে চেৰ ধম্মে অত্তানং সচ্চতো থেততো ন পঞ্ঞপেতি, অভিসম্পরাযঞ্চ অত্তানং সচ্চতো থেততো ন পঞ্ঞপেতি.