নমো তস্স ভগৰতো অরহতো সম্মাসম্বুদ্ধস্স
অভিধম্মপিটকে
পুগ্গলপঞ্ঞত্তিপাল়ি
মাতিকা
১. এককউদ্দেসো
১. ছ পঞ্ঞত্তিযো – খন্ধপঞ্ঞত্তি, আযতনপঞ্ঞত্তি, ধাতুপঞ্ঞত্তি, সচ্চপঞ্ঞত্তি, ইন্দ্রিযপঞ্ঞত্তি, পুগ্গলপঞ্ঞত্তীতি.
২. কিত্তাৰতা খন্ধানং খন্ধপঞ্ঞত্তি? যাৰতা পঞ্চক্খন্ধা – রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো; এত্তাৰতা খন্ধানং খন্ধপঞ্ঞত্তি.
৩. কিত্তাৰতা আযতনানং আযতনপঞ্ঞত্তি? যাৰতা দ্ৰাদসাযতনানি – চক্খাযতনং, রূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং; এত্তাৰতা আযতনানং আযতনপঞ্ঞত্তি.
৪. কিত্তাৰতা ধাতূনং ধাতুপঞ্ঞত্তি? যাৰতা অট্ঠারস ধাতুযো – চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, ঘানধাতু, গন্ধধাতু, ঘানৰিঞ্ঞাণধাতু, জিৰ্হাধাতু, রসধাতু, জিৰ্হাৰিঞ্ঞাণধাতু, কাযধাতু, ফোট্ঠব্বধাতু, কাযৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতু; এত্তাৰতা ধাতূনং ধাতুপঞ্ঞত্তি.
৫. কিত্তাৰতা সচ্চানং সচ্চপঞ্ঞত্তি? যাৰতা চত্তারি সচ্চানি – দুক্খসচ্চং, সমুদযসচ্চং, নিরোধসচ্চং, মগ্গসচ্চং; এত্তাৰতা সচ্চানং সচ্চপঞ্ঞত্তি.
৬. কিত্তাৰতা ইন্দ্রিযানং ইন্দ্রিযপঞ্ঞত্তি? যাৰতা বাৰীসতিন্দ্রিযানি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং, পুরিসিন্দ্রিযং, জীৰিতিন্দ্রিযং, সুখিন্দ্রিযং, দুক্খিন্দ্রিযং, সোমনস্সিন্দ্রিযং, দোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং; এত্তাৰতা ইন্দ্রিযানং ইন্দ্রিযপঞ্ঞত্তি.
৭. কিত্তাৰতা পুগ্গলানং পুগ্গলপঞ্ঞত্তি?
(১) সমযৰিমুত্তো
(২) অসমযৰিমুত্তো
(৩) কুপ্পধম্মো
(৪) অকুপ্পধম্মো
(৫) পরিহানধম্মো
(৬) অপরিহানধম্মো
(৭) চেতনাভব্বো
(৮) অনুরক্খণাভব্বো
(৯) পুথুজ্জনো
(১০) গোত্রভূ
(১১) ভযূপরতো
(১২) অভযূপরতো
(১৩) ভব্বাগমনো
(১৪) অভব্বাগমনো
(১৫) নিযতো
(১৬) অনিযতো
(১৭) পটিপন্নকো
(১৮) ফলেঠিতো
(১৯) সমসীসী
(২০) ঠিতকপ্পী
(২১) অরিযো
(২২) অনরিযো
(২৩) সেক্খো
(২৪) অসেক্খো
(২৫) নেৰসেক্খনাসেক্খো
(২৬) তেৰিজ্জো
(২৭) ছল়ভিঞ্ঞো
(২৮) সম্মাসম্বুদ্ধো
(২৯) পচ্চেকসম্বুদ্ধো [পচ্চেকবুদ্ধো (সী.)]
(৩০) উভতোভাগৰিমুত্তো
(৩১) পঞ্ঞাৰিমুত্তো
(৩২) কাযসক্খী
(৩৩) দিট্ঠিপ্পত্তো
(৩৪) সদ্ধাৰিমুত্তো
(৩৫) ধম্মানুসারী
(৩৬) সদ্ধানুসারী
(৩৭) সত্তক্খত্তুপরমো
(৩৮) কোলঙ্কোলো
(৩৯) একবীজী
(৪০) সকদাগামী
(৪১) অনাগামী
(৪২) অন্তরাপরিনিব্বাযী
(৪৩) উপহচ্চপরিনিব্বাযী
(৪৪) অসঙ্খারপরিনিব্বাযী
(৪৫) সসঙ্খারপরিনিব্বাযী
(৪৬) উদ্ধংসোতোঅকনিট্ঠগামী
(৪৭) সোতাপন্নো
(৪৮) সোতাপত্তিফলসচ্ছিকিরিযায পটিপন্নো
(৪৯) সকদাগামী
(৫০) সকদাগামিফলসচ্ছিকিরিযায পটিপন্নো
(৫১) অনাগামী
(৫২) অনাগামিফলসচ্ছিকিরিযায পটিপন্নো
(৫৩) অরহা
(৫৪) অরহত্তফলসচ্ছিকিরিযায [অরহত্তায (সী.)] পটিপন্নো
এককং.
২. দুকউদ্দেসো
৮. দ্ৰে পুগ্গলা –
(১) কোধনো চ, উপনাহী চ.
(২) মক্খী চ, পল়াসী [পলাসী (স্যা. ক.)] চ.
(৩) ইস্সুকী চ, মচ্ছরী চ.
(৪) সঠো চ, মাযাৰী চ.
(৫) অহিরিকো চ, অনোত্তপ্পী চ.
(৬) দুব্বচো চ, পাপমিত্তো চ.
(৭) ইন্দ্রিযেসু অগুত্তদ্ৰারো চ, ভোজনে অমত্তঞ্ঞূ চ.
(৮) মুট্ঠস্সতি চ, অসম্পজানো চ.
(৯) সীলৰিপন্নো চ, দিট্ঠিৰিপন্নো চ.
(১০) অজ্ঝত্তসংযোজনো চ, বহিদ্ধাসংযোজনো চ.
(১১) অক্কোধনো চ, অনুপনাহী চ.
(১২) অমক্খী চ, অপল়াসী চ.
(১৩) অনিস্সুকী চ, অমচ্ছরী চ.
(১৪) অসঠো চ, অমাযাৰী চ.
(১৫) হিরিমা চ, ওত্তপ্পী চ.
(১৬) সুৰচো চ, কল্যাণমিত্তো চ.
(১৭) ইন্দ্রিযেসু গুত্তদ্ৰারো চ, ভোজনে মত্তঞ্ঞূ চ.
(১৮) উপট্ঠিতস্সতি চ, সম্পজানো চ.
(১৯) সীলসম্পন্নো চ, দিট্ঠিসম্পন্নো চ.
(২০) দ্ৰে পুগ্গলা দুল্লভা লোকস্মিং.
(২১) দ্ৰে পুগ্গলা দুত্তপ্পযা.
(২২) দ্ৰে পুগ্গলা সুতপ্পযা.
(২৩) দ্ৰিন্নং পুগ্গলানং আসৰা ৰড্ঢন্তি.
(২৪) দ্ৰিন্নং পুগ্গলানং আসৰা ন ৰড্ঢন্তি.
(২৫) হীনাধিমুত্তো চ, পণীতাধিমুত্তো চ.
(২৬) তিত্তো চ, তপ্পেতা চ.
দুকং.
৩. তিকউদ্দেসো
৯. তযো পুগ্গলা –
(১) নিরাসো, আসংসো, ৰিগতাসো.
(২) তযো গিলানূপমা পুগ্গলা.
(৩) কাযসক্খী, দিট্ঠিপ্পত্তো, সদ্ধাৰিমুত্তো.
(৪) গূথভাণী, পুপ্ফভাণী, মধুভাণী.
(৫) অরুকূপমচিত্তো পুগ্গলো, ৰিজ্জূপমচিত্তো পুগ্গলো, ৰজিরূপমচিত্তো পুগ্গলো.
(৬) অন্ধো, একচক্খু, দ্ৰিচক্খু.
(৭) অৰকুজ্জপঞ্ঞো পুগ্গলো, উচ্ছঙ্গপঞ্ঞো [উচ্চঙ্গুপঞ্ঞো (স্যা.)] পুগ্গলো, পুথুপঞ্ঞো পুগ্গলো.
(৮) অত্থেকচ্চো পুগ্গলো কামেসু চ ভৰেসু চ অৰীতরাগো, অত্থেকচ্চো পুগ্গলো কামেসু ৰীতরাগো ভৰেসু অৰীতরাগো, অত্থেকচ্চো পুগ্গলো কামেসু চ ভৰেসু চ ৰীতরাগো.
(৯) পাসাণলেখূপমো পুগ্গলো, পথৰিলেখূপমো পুগ্গলো, উদকলেখূপমো পুগ্গলো.
(১০) তযো পোত্থকূপমা পুগ্গলা.
(১১) তযো কাসিকৰত্থূপমা পুগ্গলা.
(১২) সুপ্পমেয্যো, দুপ্পমেয্যো, অপ্পমেয্যো.
(১৩) অত্থেকচ্চো পুগ্গলো ন সেৰিতব্বো ন ভজিতব্বো ন পযিরুপাসিতব্বো, অত্থেকচ্চো পুগ্গলো সেৰিতব্বো ভজিতব্বো পযিরুপাসিতব্বো, অত্থেকচ্চো পুগ্গলো সক্কত্ৰা গরুং কত্ৰা [গরুকত্ৰা (সী.)] সেৰিতব্বো ভজিতব্বো পযিরুপাসিতব্বো.
(১৪) অত্থেকচ্চো পুগ্গলো জিগুচ্ছিতব্বো ন সেৰিতব্বো ন ভজিতব্বো ন পযিরুপাসিতব্বো, অত্থেকচ্চো পুগ্গলো অজ্ঝুপেক্খিতব্বো ন সেৰিতব্বো ন ভজিতব্বো ন পযিরুপাসিতব্বো; অত্থেকচ্চো পুগ্গলো সেৰিতব্বো ভজিতব্বো পযিরুপাসিতব্বো.
(১৫) অত্থেকচ্চো পুগ্গলো সীলেসু পরিপূরকারী [পরিপূরীকারী (স্যা.)], সমাধিস্মিং মত্তসো কারী, পঞ্ঞায মত্তসো কারী; অত্থেকচ্চো পুগ্গলো সীলেসু চ পরিপূরকারী, সমাধিস্মিঞ্চ পরিপূরকারী, পঞ্ঞায মত্তসো কারী; অত্থেকচ্চো পুগ্গলো সীলেসু চ পরিপূরকারী, সমাধিস্মিঞ্চ পরিপূরকারী, পঞ্ঞায চ পরিপূরকারী.
(১৬) তযো সত্থারো.
(১৭) অপরেপি তযো সত্থারো.
তিকং.
৪. চতুক্কউদ্দেসো
১০. চত্তারো পুগ্গলা –
(১) অসপ্পুরিসো, অসপ্পুরিসেন অসপ্পুরিসতরো, সপ্পুরিসো, সপ্পুরিসেন সপ্পুরিসতরো.
(২) পাপো, পাপেন পাপতরো, কল্যাণো, কল্যাণেন কল্যাণতরো.
(৩) পাপধম্মো, পাপধম্মেন পাপধম্মতরো, কল্যাণধম্মো, কল্যাণধম্মেন কল্যাণধম্মতরো.
(৪) সাৰজ্জো, ৰজ্জবহুলো, অপ্পৰজ্জো [অপ্পসাৰজ্জো (স্যা. ক.) অ. নি. ৪.১৩৫], অনৰজ্জো.
(৫) উগ্ঘটিতঞ্ঞূ, ৰিপঞ্চিতঞ্ঞূ [ৰিপচিতঞ্ঞূ (সী.) অ. নি. ৪.১৩৩], নেয্যো, পদপরমো.
(৬) যুত্তপ্পটিভানো, নো মুত্তপ্পটিভানো, মুত্তপ্পটিভানো, নো যুত্তপ্পটিভানো, যুত্তপ্পটিভানো চ মুত্তপ্পটিভানো চ, নেৰ যুত্তপ্পটিভানো নো মুত্তপ্পটিভানো.
(৭) চত্তারো ধম্মকথিকা পুগ্গলা.
(৮) চত্তারো ৰলাহকূপমা পুগ্গলা.
(৯) চত্তারো মূসিকূপমা পুগ্গলা.
(১০) চত্তারো অম্বূপমা পুগ্গলা.
(১১) চত্তারো কুম্ভূপমা পুগ্গলা.
(১২) চত্তারো উদকরহদূপমা পুগ্গলা.
(১৩) চত্তারো বলীবদ্দূপমা [বলিবদ্দূপমা (সী.)] পুগ্গলা.
(১৪) চত্তারো আসীৰিসূপমা পুগ্গলা.
(১৫) অত্থেকচ্চো পুগ্গলো অননুৰিচ্চ অপরিযোগাহেত্ৰা অৰণ্ণারহস্স ৰণ্ণং ভাসিতা হোতি, অত্থেকচ্চো পুগ্গলো অননুৰিচ্চ অপরিযোগাহেত্ৰা ৰণ্ণারহস্স অৰণ্ণং ভাসিতা হোতি, অত্থেকচ্চো পুগ্গলো অননুৰিচ্চ অপরিযোগাহেত্ৰা অপ্পসাদনীযে ঠানে পসাদং উপদংসিতা হোতি, অত্থেকচ্চো পুগ্গলো অননুৰিচ্চ অপরিযোগাহেত্ৰা পসাদনীযে ঠানে অপ্পসাদং উপদংসিতা হোতি.
(১৬) অত্থেকচ্চো পুগ্গলো অনুৰিচ্চ পরিযোগাহেত্ৰা অৰণ্ণারহস্স অৰণ্ণং ভাসিতা হোতি, অত্থেকচ্চো পুগ্গলো অনুৰিচ্চ পরিযোগাহেত্ৰা ৰণ্ণারহস্স ৰণ্ণং ভাসিতা হোতি, অত্থেকচ্চো পুগ্গলো অনুৰিচ্চ পরিযোগাহেত্ৰা অপ্পসাদনীযে ঠানে অপ্পসাদং উপদংসিতা হোতি, অত্থেকচ্চো পুগ্গলো অনুৰিচ্চ পরিযোগাহেত্ৰা পসাদনীযে ঠানে পসাদং উপদংসিতা হোতি.
(১৭) অত্থেকচ্চো পুগ্গলো অৰণ্ণারহস্স অৰণ্ণং ভাসিতা হোতি ভূতং তচ্ছং কালেন, নো চ খো ৰণ্ণারহস্স ৰণ্ণং ভাসিতা হোতি ভূতং তচ্ছং কালেন; অত্থেকচ্চো পুগ্গলো ৰণ্ণারহস্স ৰণ্ণং ভাসিতা হোতি ভূতং তচ্ছং কালেন, নো চ খো অৰণ্ণারহস্স অৰণ্ণং ভাসিতা হোতি ভূতং তচ্ছং কালেন; অত্থেকচ্চো পুগ্গলো অৰণ্ণারহস্স চ অৰণ্ণং ভাসিতা হোতি ভূতং তচ্ছং কালেন; ৰণ্ণারহস্স চ ৰণ্ণং ভাসিতা হোতি ভূতং তচ্ছং কালেন, অত্থেকচ্চো পুগ্গলো নেৰ অৰণ্ণারহস্স অৰণ্ণং ভাসিতা হোতি ভূতং তচ্ছং কালেন, নো চ ৰণ্ণারহস্স ৰণ্ণং ভাসিতা হোতি ভূতং তচ্ছং কালেন.
(১৮) উট্ঠানফলূপজীৰী নো পুঞ্ঞফলূপজীৰী, পুঞ্ঞফলূপজীৰী নো উট্ঠানফলূপজীৰী, উট্ঠানফলূপজীৰী চ পুঞ্ঞফলূপজীৰী চ, নেৰ উট্ঠানফলূপজীৰী নো পুঞ্ঞফলূপজীৰী.
(১৯) তমো তমপরাযনো, তমো জোতিপরাযনো, জোতি তমপরাযনো, জোতি জোতিপরাযনো.
(২০) ওণতোণতো, ওণতুণ্ণতো, উণ্ণতোণতো, উণ্ণতুণ্ণতো.
(২১) চত্তারো রুক্খূপমা পুগ্গলা.
(২২) রূপপ্পমাণো, রূপপ্পসন্নো, ঘোসপ্পমাণো, ঘোসপ্পসন্নো.
(২৩) লূখপ্পমাণো, লূখপ্পসন্নো, ধম্মপ্পমাণো, ধম্মপ্পসন্নো.
(২৪) অত্থেকচ্চো পুগ্গলো অত্তহিতায পটিপন্নো হোতি, নো পরহিতায; অত্থেকচ্চো পুগ্গলো পরহিতায পটিপন্নো হোতি, নো অত্তহিতায; অত্থেকচ্চো পুগ্গলো অত্তহিতায চেৰ পটিপন্নো হোতি পরহিতায চ; অত্থেকচ্চো পুগ্গলো নেৰ অত্তহিতায পটিপন্নো হোতি নো পরহিতায.
(২৫) অত্থেকচ্চো পুগ্গলো অত্তন্তপো হোতি অত্তপরিতাপনানুযোগমনুযুত্তো; অত্থেকচ্চো পুগ্গলো পরন্তপো হোতি পরপরিতাপনানুযোগমনুযুত্তো; অত্থেকচ্চো পুগ্গলো অত্তন্তপো চ হোতি অত্তপরিতাপনানুযোগমনুযুত্তো, পরন্তপো চ পরপরিতাপনানুযোগমনুযুত্তো; অত্থেকচ্চো পুগ্গলো নেৰ অত্তন্তপো হোতি ন অত্তপরিতাপনানুযোগমনুযুত্তো, ন পরন্তপো ন পরপরিতাপনানুযোগমনুযুত্তো. সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো [সীতিভূতো (সী. ক.)] সুখপ্পটিসংৰেদী ব্রহ্মভূতেন অত্তনা ৰিহরতি.
(২৬) সরাগো, সদোসো, সমোহো, সমানো.
(২৭) অত্থেকচ্চো পুগ্গলো লাভী হোতি অজ্ঝত্তং চেতোসমথস্স, ন লাভী অধিপঞ্ঞাধম্মৰিপস্সনায; অত্থেকচ্চো পুগ্গলো লাভী হোতি অধিপঞ্ঞাধম্মৰিপস্সনায, ন লাভী অজ্ঝত্তং চেতোসমথস্স; অত্থেকচ্চো পুগ্গলো লাভী চেৰ হোতি অজ্ঝত্তং চেতোসমথস্স, লাভী চ অধিপঞ্ঞাধম্মৰিপস্সনায; অত্থেকচ্চো পুগ্গলো নেৰ লাভী হোতি অজ্ঝত্তং চেতোসমথস্স, ন লাভী অধিপঞ্ঞাধম্মৰিপস্সনায.
(২৮) অনুসোতগামী পুগ্গলো, পটিসোতগামী পুগ্গলো, ঠিতত্তো পুগ্গলো, তিণ্ণো পারঙ্গতো [পারগতো (সী. স্যা.)] থলে তিট্ঠতি ব্রাহ্মণো.
(২৯) অপ্পস্সুতো সুতেন অনুপপন্নো, অপ্পস্সুতো সুতেন উপপন্নো, বহুস্সুতো সুতেন অনুপপন্নো, বহুস্সুতো সুতেন উপপন্নো.
(৩০) সমণমচলো, সমণপদুমো, সমণপুণ্ডরীকো, সমণেসু সমণসুখুমালো.
চতুক্কং.