৪. সীলানুস্সতিকথা

১৫৮. সীলানুস্সতিং ভাৰেতুকামেন পন রহোগতেন পটিসল্লীনেন ‘‘অহো ৰত মে সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপ্পসত্থানি অপরামট্ঠানি সমাধিসংৰত্তনিকানী’’তি (অ. নি. ৬.১০) এৰং অখণ্ডতাদিগুণৰসেন অত্তনো সীলানি অনুস্সরিতব্বানি. তানি চ গহট্ঠেন গহট্ঠসীলানি, পব্বজিতেন পব্বজিতসীলানি.

গহট্ঠসীলানি ৰা হোন্তু পব্বজিতসীলানি ৰা, যেসং আদিম্হি ৰা অন্তে ৰা একম্পি ন ভিন্নং, তানি পরিযন্তে ছিন্নসাটকো ৰিয ন খণ্ডানীতি অখণ্ডানি. যেসং ৰেমজ্ঝে একম্পি ন ভিন্নং, তানি মজ্ঝে ৰিনিৰিদ্ধসাটকো ৰিয ন ছিদ্দানীতি অচ্ছিদ্দানি. যেসং পটিপাটিযা দ্ৰে ৰা তীণি ৰা ন ভিন্নানি, তানি পিট্ঠিযা ৰা কুচ্ছিযা ৰা উট্ঠিতেন দীঘৰট্টাদিসণ্ঠানেন ৰিসভাগৰণ্ণেন কাল়রত্তাদীনং অঞ্ঞতরসরীরৰণ্ণা গাৰী ৰিয ন সবলানীতি অসবলানি. যানি অন্তরন্তরা ন ভিন্নানি, তানি ৰিসভাগবিন্দুৰিচিত্রা গাৰী ৰিয ন কম্মাসানীতি অকম্মাসানি. অৰিসেসেন ৰা সব্বানিপি সত্তৰিধেন মেথুনসংযোগেন কোধুপনাহাদীহি চ পাপধম্মেহি অনুপহতত্তা অখণ্ডানি অচ্ছিদ্দানি অসবলানি অকম্মাসানি. তানিযেৰ তণ্হাদাসব্যতো মোচেত্ৰা ভুজিস্সভাৰকরণেন ভুজিস্সানি. বুদ্ধাদীহি ৰিঞ্ঞূহি পসত্থত্তা ৰিঞ্ঞুপ্পসত্থানি. তণ্হাদিট্ঠীহি অপরামট্ঠতায কেনচি ৰা অযং তে সীলেসু দোসোতি এৰং পরামট্ঠুং অসক্কুণেয্যতায অপরামট্ঠানি. উপচারসমাধিং অপ্পনাসমাধিং ৰা, অথ ৰা পন মগ্গসমাধিং ফলসমাধিঞ্চাপি সংৰত্তেন্তীতি সমাধিসংৰত্তনিকানি.

১৫৯. এৰং অখণ্ডতাদিগুণৰসেন অত্তনো সীলানি অনুস্সরতো নেৰস্স তস্মিং সমযে রাগপরিযুট্ঠিতং চিত্তং হোতি. ন দোস…পে… ন মোহপরিযুট্ঠিতং চিত্তং হোতি. উজুগতমেৰস্স তস্মিং সমযে চিত্তং হোতি, সীলং আরব্ভাতি পুরিমনযেনেৰ ৰিক্খম্ভিতনীৰরণস্স একক্খণে ঝানঙ্গানি উপ্পজ্জন্তি. সীলগুণানং পন গম্ভীরতায নানপ্পকারগুণানুস্সরণাধিমুত্ততায ৰা অপ্পনং অপ্পত্ৰা উপচারপ্পত্তমেৰ ঝানং হোতি. তদেতং সীলগুণানুস্সরণৰসেন উপ্পন্নত্তা সীলানুস্সতিচ্চেৰ সঙ্খং গচ্ছতি.

ইমঞ্চ পন সীলানুস্সতিং অনুযুত্তো ভিক্খু সিক্খায সগারৰো হোতি সভাগৰুত্তি, পটিসন্থারে অপ্পমত্তো, অত্তানুৰাদাদিভযৰিরহিতো, অণুমত্তেসু ৰজ্জেসু ভযদস্সাৰী, সদ্ধাদিৰেপুল্লং অধিগচ্ছতি, পীতিপামোজ্জবহুলো হোতি. উত্তরি অপ্পটিৰিজ্ঝন্তো পন সুগতিপরাযনো হোতি.

তস্মা হৰে অপ্পমাদং, কযিরাথ সুমেধসো;

এৰং মহানুভাৰায, সীলানুস্সতিযা সদাতি.

ইদং সীলানুস্সতিযং ৰিত্থারকথামুখং.