সকারন্তধাতু

পুস পোসনে. পোসেতি, পোসযতি. ইমানি রূপানি কিঞ্চাপি ভূৰাদিগণিকং ‘‘পোসেতী’’তি রূপং পটিচ্চ হেতুকত্তুরূপানি ৰিয দিস্সন্তি, তথাপি ‘‘অঞ্ঞেপি দেৰো পোসেতী’’তিআদিকস্স চুরাদিগণিকরূপস্স দস্সনতো সুদ্ধকত্তুৰসেন ৰুত্তানীতি দট্ঠব্বং. উভিন্নং পন কারিতট্ঠানে ‘‘পোসাপেতি, পোসাপযতী’’তি হেতুকত্তুরূপানি ইচ্ছিতব্বানি.

পেস পটিহরণে. পেসেতি, পেসযতি.

পিস বলপাণনেসু. পিসেতি, পিসযতি.

পসি নাসনে. পংসেতি, পংসযতি.

জসি রক্খণে. জংসেতি, জংসযতি.

সিলেস সিলেসনে. সিলেসেতি, সিলেসযতি. সিলেসো.

লূস হিংসাযং. লূসেতি, লূসযতি.

পুন্স অভিমদ্দনে. নকারো নিগ্গহীতত্থং. পুংসেতি, পুংসযতি. নপুংসকো. ধাতুনকারস্স লোপে ‘‘পোসো’’ ইচ্চপি রূপং.

তত্থ ন পুংসকোতি ইত্থিভাৰপুম্ভাৰরহিতো পুগ্গলো. সো হি পুরিসো ৰিয সাতিসযং পচ্চামিত্তে ন পুংসেতি অভিমদ্দনং কাতুং ন সক্কোতীতি নপুংসকোতি ৰুচ্চতি. কেচি পন ‘‘ন পুমা, ন ইত্থী’’তি নপুংসকোতি ৰচনত্থং ৰদন্তি. তথা হি সদ্দসত্থৰিদূ তং পুগ্গলং নপুংসকলিঙ্গৰসেন নপুংসকন্তি ৰদন্তি.

ধূস কন্তিকরণে. ধূসেতি, ধূসযতি.

রুস রোসনে. রোসনং কোপকরণং. রোসেতি, রোসযতি. রোসো. রোসোতি কোধো.

ব্যুস উস্সগ্গে. ব্যোসেতি, ব্যোসযতি.

জস হিংসাযং. জাসেতি, জাসযতি.

দংস দংসনে. দংসেতি, দংসযতি. দংসনো. দংসনোতি দন্তো. দংসন্তি খাদনীযং ৰা ভোজনীযং ৰা এতেনাতি দংসনো.

দসি দস্সনে চ. চকারো দংসনং অপেক্খতি. দংসেতি, দংসযতি. ৰিদংসেতি, ৰিদংসযতি সূরিযো আলোকং.

তস্স সন্তজ্জনে. তস্সেতি, তস্সযতি পুরিসো চোরে.

ৰস্সু সত্তিবন্ধনে. সত্তিবন্ধনং সমত্থতাকরণং. ৰস্সেতি, ৰস্সযতি.

জস তাল়নে. তাল়নং পহরণং. জাসেতি, জাসযতি.

পস বন্ধনে. পাসেতি, পাসযতি. পাসো. পাসন্তি বন্ধন্তি সত্তে এতেনাতি পাসো, সকুণপাসাদি.

ঘুসি ৰিসদ্দনে. ৰিসদ্দনং উগ্ঘোসনং. ঘোসেতি, ঘোসযতি. ঘোসো.

লস সিল্যযোগে. সিল্যযোগো লাসিযং নাটকনাটনং রেচকদানং. লাসেতি, লাসযতি. লাসেন্তো, লাসেন্তী. অত্রাযং পাল়ি ‘‘ৰাদেন্তিযাপি লাসেন্তি, নচ্চন্তিযাপি লাসেন্তি, লাসেন্তিযাপি নচ্চন্তী’’তি. তত্থ লাসেন্তীতি যা উপ্লৰমানা ৰিয উট্ঠহিত্ৰা লাসিযনাটকং নাটেন্তি, রেচকং দেন্তি.

ভূস অলঙ্কারে. ভূসেতি, ভূসযতি. ৰিভূসেতি, ৰিভূসযতি. ভূসনং, ৰিভূসনং.

ৰস সিনেহনছেদাৰহরণেসু. অৰহরণং চোরিকায গহণং. ৰাসেতি, ৰাসযতি. ৰসা.

তাস ৰারণে. ৰারণং নিৰারণং. তাসেতি, তাসযতি.

ধস উঞ্ছে. ধাসেতি, ধাসযতি.

ভস গহণে. ভাসেতি, ভাসযতি.

পুস ধারণে. পোসেতি, পোসযতি, আভরণং ধারেতীতি অত্থো.

তুসি পিসি কুসি দসি ভাসাযং. তুংসেতি, তুংসযতি. পিংসেতি, পিংসযতি. কুংসেতি, কুংসযতি. দংসেতি, দংসযতি.

খুসি অক্কোসনে. খুংসেতি, খুংসযতি. খুংসনা.

গৰেস মগ্গনে. গৰেসেতি, গৰেসযতি. গৰেসকো, গৰেসিতো, গৰেসনা, গৰেট্ঠি.

ৰাস উপসেৰাযং. ৰাসেতি, ৰাসযতি. ৰাসো, আৰাসো.

হিসি হিংসাযং. হিংসেতি, হিংসযতি.

নিৰাস অচ্ছাদনে. ৰত্থং নিৰাসেতি, নিৰাসযতি. পুব্বণ্হসমযং নিৰাসেত্ৰা.

অংস সঙ্ঘাতে. অংসেতি, অংসযতি. অংসো, অংসা.

এত্থ চ অংসোতি কোট্ঠাসোপি খন্ধোপি ৰুচ্চতি. অংসাতি অরিসরোগো.

মিস সজ্জনে. মেসেতি, মেসযতি.

রস অস্সাদনে. রসেতি, রসযতি. রসো. রসিযতে অস্সাদিযতে জনেহীতি রসো.

রস সিনেহনে. রসেতি, রসযতি. রসো.

তত্থ রসেতীতি সিনেহতি. রসোতি সিনেহো, সিনেহসম্বন্ধো সামগ্গিরসোতি ৰুচ্চতি, যং সন্ধায ব্রাহ্মণা ভগৰন্তং ‘‘অরসরূপো সমণো গোতমো’’তি অৰোচুং.

সিয অসব্বপ্পযোগে. সেসেতি, সেসযতি. সেসো. ৰিপুব্বো অতিসযে, ৰিপুব্বো অতিসযে, ৰিপুব্বো সিসধাতু অতিসযে ৰত্ততি, ৰিসেসেতি, ৰিসেসযতি. ৰিসেসো, ৰিসিট্ঠো, ৰিসেসনং.

মিস্স সম্মিস্সে. মিস্সেতি, মিস্সযতি. সম্মিস্সেতি, সম্মিস্সযতি. মিস্সো, মিস্সো, মিস্সিতো, সম্মিস্সিতো, সম্মিস্সো ইচ্চাদীনি. অলম্বুসাজাতকে মিস্সাতি ইত্থীনং ৰত্তব্বনামং, পুরিসেহি সদ্ধিং সম্মিস্সনতায.

জুস পরিতক্কনে. জোসেতি, জোসযতি.

মস পহাসনে. মসেতি, মসযতি.

মরিস তিতিক্খাযং. মরিসেতি. মরিসযতি.

পিস পেসনে. পেসেতি, পেসযতি. পেসকো, পেসিতো.

ঘুস সদ্দে. ঘোসেতি, ঘোসযতি. উগ্ঘোসযুং বোধিমণ্ডে পমোদিতা. ঘোসো.

দিসী উচ্চারণে. দেসেতি, দেসযতি. দেসকো, দেসেতা, দেসিতো, দেসনা.

ৰস অচ্ছাদনে. ৰাসেতি, ৰাসযতি. নিৰাসেতি, নিৰাসযতি. ৰত্থং.

সকারন্তধাতুরূপানি.