১৮. চুরাদিগণপরিদীপন

ইতো পরং পৰক্খামি, পচুরত্থহিতক্করং;

চুরাদিকগণনামং, নামতো অট্ঠমং গণং.

চুর থেয্যে. থেননং থেয্যং, চোরিকাতি ৰুত্তং হোতি. তস্মিং থেয্যে চুরধ্তু ৰত্ততি. চোরেতি, চোরযতি, চোরো, চোরী, চোরিকা, চোরেতু, চোরযিতুং, চোরেত্ৰা, চোরযিত্ৰা. কত্তুত্থেসু ণেণযতা চুরাদিগণলক্খণং. কারিতে – চোরাপেতি, চোরাপযতি, চোরাপেতুং, চোরাপযিতুং, চোরাপেত্ৰা, চোরাপযিত্ৰা. কম্মেধনং চোরেহি চোরিযতি, চোরিতং ধনং. এস নযো সব্বত্থ.

ককারন্তধাতু

লোক দস্সনে. লোকেতি, লোকযতি, ওলোকেতি, ওলোকযতি, উল্লোকেতি, উল্লোকযতি, অপলোকেতি, অপলোকযতি, আলোকেতি, আলোকযতি, ৰিলোকেতি, ৰিলোকযতি. লোকো, আলোকো, লোকনং, ওলোকনং, উল্লোকনং, আলোকনং, ৰিলোকনং, অপলোকনং, অৰলোকনং. ওলোকেতুং, ওলোকযিতুং, ওলোকেত্ৰা, ওলোকযিত্ৰা. কারিতে পন ‘‘ওলোকাপেতি, ওলোকাপযতি, ওলোকাপেতুং, ওলোকাপযিতুং, ওলোকাপেত্ৰা, ওলোকাপযিত্ৰা’’ ইচ্চেৰমাদীনি যোজেতব্বানি. এস নযো সব্বত্থাপি.

তত্থ লোকোতি তযো লোকা সঙ্খারলোকো সত্তলোকো ওকাসলোকোতি. তত্থ ‘‘একো লোকো সব্বে সত্তা আহারট্ঠিতিকা’’তি আগতট্ঠানে সঙ্খারলোকো ৰেদিতব্বো. ‘‘সস্সতো লোকো’তি ৰা ‘অসস্সতো লোকো’তি ৰা’’তি আগতট্ঠানে সত্তলোকো.

‘‘যাৰতা চন্দিমসূরিযা পরিহরন্তি,

দিসা ভন্তি ৰিরোচমানা;

তাৰ সহস্সধা লোকো,

এত্থ তে ৰত্ততে ৰসো’’তি

আগতট্ঠানে ওকাসলোকো.

অথ ৰা লোকোতি তিৰিধো লোকো কিলেসলোকো ভৰলোকো ইন্দ্রিযলোকোতি. তত্থ রাগাদিকিলেসবহুলতায কামাৰচরসত্তা কিলেসলোকো. ঝানাভিঞ্ঞাপরিবুদ্ধিযা রূপাৰচরসত্তা ভৰলোকো. আনেঞ্জসমাধিবহুলতায ৰিসদিন্দ্রিযত্তা অরূপাৰচরসত্তা ইন্দ্রিযলোকো. অথ ৰা কিলিস্সনং কিলেসো, ৰিপাকদুক্খন্তি অত্থো. তস্মা দুক্খবহুলতায অপাযেসু সত্তা কিলেসলোকো. তদঞ্ঞে সত্তা সম্পত্তিভৰভাৰতো ভৰলোকো. তত্থ যে ৰিমুত্তিপরিপাচকেহি ইন্দ্রিযেহি সমন্নাগতা সত্তা, সো ইন্দ্রিযলোকোতি ৰেদিতব্বং.

জাতকট্ঠকথাযং পন –

‘‘সঙ্খারলোকো সত্তলোকো ওকাসলোকো খন্ধলোকো আযতনলোকো ধাতুলোকোতি অনেকৰিধো লোকো. এত্থ ‘একো লোকো সব্বে সত্তা আহারট্ঠিতিকা…পে… অট্ঠারস লোকা অট্ঠারস ধাতুযো’তি এত্থ সঙ্খারলোকো ৰুত্তো. খন্ধলোকাদযো তদন্তোগধাযেৰ. ‘অযং লোকো পরো লোকো ব্রহ্মলোকো সদেৰকো’তিআদীসু পন সত্তলোকো ৰুত্তো. ‘যাৰতা চন্দিমসূরিযা পরিহরন্তি, দিসা ভন্তি ৰিরোচমানা. তাৰ সহস্সধা লোকো, এত্থ তেৰত্ততে ৰসো’তি এত্থ ওকাসলোকো ৰুত্তো’’তি ৰুত্তং.

অত্থতো পন ইন্দ্রিযবদ্ধানং খন্ধানং সমূহো সন্তানো চ সত্তলোকো, রূপাদীসু সত্তৰিসত্ততায সত্তো, লোকিযতি এত্থ কুসলাকুসলং তব্বিপাকো চাতি. অনিন্দ্রিযবদ্ধানং রূপানং সমূহো সন্তানো চ ওকাসলোকো, লোকিযন্তি এত্থ তসা থাৰরা চ, তেসঞ্চ ওকাসভূতোতি, তদাধারণতায হেস ‘‘ভাজনলোকো’’তিপি ৰুচ্চতি. দুৰিধোপি চেস রূপাদিধম্মে উপাদায পঞ্ঞত্তত্তা উপাদাপঞ্ঞত্তিভূতো অপরমত্থসভাৰো সপ্পচ্চযে পন রূপারূপধম্মে উপাদায পঞ্ঞত্তত্তা তদুভযস্সাপি উপাদানানং ৰসেন পরিযাযতো পচ্চযাযত্তৰুত্তিতা উপচরিতব্বা, তদুভযে খন্ধা সঙ্খারলোকো, পচ্চযেহি সঙ্খরিযন্তি, লুজ্জন্তি পলুজ্জন্তি চাতি এত্থ পচ্চযাযত্তৰুত্তিতায মগ্গফলধম্মানম্পি সতিপি লুজ্জনপলুজ্জনত্তে তেভূমিকধম্মানংযেৰ ‘‘লোকো’’তি অধিপ্পেতত্তা নত্থি লোকতাপজ্জনং. তথা হি তে ‘‘লোকুত্তরা’’তি ৰুত্তা.

আলোকোতি রস্মি, আলোকেন্তি এতেন ভুসো পস্সন্তি জনা চক্খুৰিঞ্ঞাণং ৰাতি আলোকো. ওলোকনন্তি হেট্ঠা পেক্খনং. ৰিলোকনন্তি উদ্ধং পেক্খনং. আলোকনন্তি পুরতো পেক্খনং. ৰিলোকনন্তি দ্ৰীসু পস্সেসু পেক্খনং, ৰিৰিধা ৰা পেক্খনং. অপলোকনন্তি ‘‘সঙ্ঘং অপলোকেত্ৰা’’তিআদীসু ৰিয জানাপনং. অৰলোকনন্তি ‘‘নাগাৰলোকিতং অৰলোকেত্ৰা’’তিআদীসু ৰিয পুরিমকাযং পরিৰত্তেত্ৰা পেক্খনং. ‘‘আলোকিতে ৰিলোকিতে সম্পজানকারী হোতী’’তি এত্থাপি ভাৰৰসেন আলোকনং আলোকিতং ৰিলোকনং ৰিলোকিতন্তি অত্থো গহেতব্বো.

থক পটিঘাতে. থকেতি, থকযতি দ্ৰারং পুরিসো.

তক্ক ৰিতক্কে. তক্কেতি, ৰিতক্কেতি, ৰিতক্কযতি. তক্কো, ৰিতক্কো, ৰিতক্কিতা.

তত্থ তক্কনং তক্কো, ঊহনন্তি ৰুত্তং হোতি, এৰং ৰিতক্কো. অথ ৰা ৰিতক্কেন্তি এতেন, সযং ৰা ৰিতক্কেতি, ৰিতক্কনমত্তমেৰ ৰা এতন্তি ৰিতক্কো. ‘‘তক্কো, ৰিতক্কো, অপ্পনা, ব্যপ্পনা, চেতসো অভিনিরোপনা’’তি অভিধম্মে পরিযাযসদ্দা ৰুত্তা. ৰিতক্কেতীতি ৰিতক্কিতা, পুগ্গলো. ‘‘অৰিতক্কিতা মচ্চুমুপব্বজন্তী’’তি পাল়ি.

অকি লক্খণে. লক্খণং সঞ্ঞাণং, সঞ্জাননকারণন্তি ৰুত্তং হোতি. অত্রিদং সল্লক্খিতব্বং. যে ইমস্মিং চুরাদিগণে অনেকস্সরা অসংযোগন্তা ইকারানুবন্ধৰসেন নিদ্দিট্ঠা ধাতৰো, তে এৰংৰুত্তেহি ইমেহি তীহি লক্খণেহি সমন্নাগতা আখ্যাতত্তং নামিকত্তঞ্চ পাপুণন্তা একন্ততো নিগ্গহীতাগমেন নিপ্ফন্নরূপাযেৰ ভৰন্তি, ন কত্থচিপি ৰিগতনিগ্গহীতাগমরূপানি ভৰন্তি. অঙ্কেতি, অঙ্কযতি. অঙ্কনং, অঙ্কো. সমাসে পন ‘‘সসঙ্কো, চক্কঙ্কিতচরণো’’তিআদীনি রূপানি ভৰন্তি.

সক্ক ৰক্ক ভাসনে. সক্কেতি, সক্কযতি. ৰক্কেতি, ৰক্কযতি.

নক্ক ৰক্ক নাসনে. নক্কেতি, নক্কযতি. ৰক্কেতি, ৰক্কযতি.

চক্ক চুক্ক ব্যথনে. চক্কেতি, চক্কযতি. চুক্কেতি, চুক্কযতি. চক্কং. চক্কন্তি কেনট্ঠেন চক্কং? চক্কেতি ব্যথতি হিংসতীতি অত্থেন চক্কং. চক্কসদ্দো –

সম্পত্তিযং লক্খণে চ, রথঙ্গে ইরিযাপথে;

দানে রত্নধম্মখুর-চক্কাদীসু পদিস্সতি;

‘‘চত্তারিমানি ভিক্খৰে চক্কানি যেহি সমন্নাগতানং দেৰমনুস্সান’’ন্তিআদীসু হি অযং সম্পত্তিযং দিস্সতি. ‘‘পাদতলেসু চক্কানি জাতানী’’তি এত্থ লক্খণে. ‘‘চক্কংৰ ৰহতো পদ’’ন্তি এত্থ রথঙ্গে. ‘‘চতুচক্কং নৰদ্ৰার’’ন্তি এত্থ ইরিযাপথে. ‘‘দদ ভুঞ্জ চ মা চপ্পমাদো, চক্কং ৰত্তস্সু পাণিন’’ন্তি এত্থ দানে. ‘‘দিব্বং চক্করতনং পাতুরহোসী’’তি এত্থ রতনচক্কে. ‘‘মযা পৰত্তিতং চক্ক’’ন্তি এত্থ ধম্মচক্কে. ‘‘ইচ্ছাহতস্স পোসস্স, চক্কং ভমতি মত্থকে’’তি এত্থ খুরচক্কে. ‘‘খুরপরিযন্তেন চেপি চক্কেনা’’তি এত্থ পহরণচক্কে. ‘‘অসনিৰিচক্ক’’ন্তি এত্থ অসনিমণ্ডলেতি.

তকি বন্ধনে. তঙ্কেতি, তঙ্কযতি.

অক্ক থৰনে. থৰনং থুতি. অক্কেতি, অক্কযতি. অক্কো. অক্কোতি সূরিযো. সো হি মহাজুতিতায অক্কিযতি অভিত্থৰিযতি তপ্পসন্নেহি জনেহীতি অক্কো. তথা হি তস্স ‘‘নত্থি সূরিযসমা আভা. উদেতযং চক্খুমা একরাজা’’তিআদিনা অভিক্খুতি দিস্সতি.

হিক্ক হিংসাযং. হিক্কেতি, হিক্কযতি.

নিক্ক পরিমাণে. নিক্কেতি, নিক্কযতি.

বুক্ক ভস্সনে. এত্থ সুনখভস্সনং ভস্সনন্তি গহেতব্বং, ন ৰাচাসঙ্খাতং ভস্সনং. বুক্কেতি, বুক্কযতি. এত্থ চ ‘‘বুক্কযতি সা চোরে’’ ইতি লোকিযপ্পযোগো ৰেদিতব্বো. ভূৰাদিগণে পন ‘‘বুক্কতি সা’’তি রূপং ভৰতি. অঞ্ঞো তু ‘‘বুক্ক পরিভাসনে’’ ইতি পঠতি, এৰং পঠন্তেপি সুনখভস্সনমেৰাধিপ্পেতং.

দক লক অস্সাদনে. দকেতি, দকযতি. লকেতি, লকযতি.

তক্ক লোক ভাসাযং. তক্কেতি, তক্কযতি. লোকেতি, লোকযতি.

চিক সিক আমসনে. চিকেতি, চিকযতি. সিকেতি, সিকযতি.

ককারন্তধাতুরূপানি.

খকারন্তধাতু

লক্খ দস্সনঙ্কেসু. দস্সনং পস্সনং. অঙ্কো লঞ্জনং. লক্খেতি, লক্খযতি. সল্লক্খেতি, সল্লক্খযতি. লক্খং ৰিজ্ঝতি উসুনা, লক্খং করোতি.

গঙ্গায ৰালুকা খীযে, উদকং খীযে মহণ্ণৰে;

মহিযা মত্তিকা খীযে, লক্খে ন মম বুদ্ধিযা.

কপ্পলক্খণং. গোলক্খণং. ইত্থিলক্খণং. ধম্মানং লক্খণং. সল্লক্খনা. উপলক্খনা. পচ্চুপলক্খনা. লক্খধাতুযা যুপচ্চযন্তায সমাদিপুব্বানং রূপানং নকারো দন্তজো.

ভক্খ অদনে. ভক্খেতি, ভক্খযতি. ভক্খো নো লদ্ধো. ভক্খযন্তি মিগাধমা. ভূৰাদিগণে পন ‘‘ভক্খতী’’তি রূপং.

নক্খ সম্বন্ধে. নক্খেতি, নক্খযতি.

মক্খ মক্খনে. মক্খেতি, মক্খযতি. মক্খো, মক্খী. তত্থ মক্খোতি পরেহি কতগুণং মক্খেতি পিসতীতি মক্খো, গুণধংসনা. ‘‘মক্খং অসহমানো’’তি এত্থ পন অত্তনি পরেহি কতং অৰমঞ্ঞনং মক্খোতি ৰুচ্চতি.

যক্খ পূজাযং. যক্খেতি, যক্খযতি. যক্খো. যক্খোতি মহানুভাৰো সত্তো. তথা হি ‘‘পুচ্ছামি তং মহাযক্খ, সব্বভূতানমিস্সরা’’তি এত্থ সক্কো দেৰরাজা ‘‘যক্খো’’তি ৰুত্তো. অথ ৰা যক্খোতি যক্খযোনিযং নিব্বত্তসত্তো. সব্বেপি ৰা সত্তা ‘‘যক্খা’’তি ৰুচ্চন্তি. ‘‘পরমযক্খৰিসুদ্ধিং পঞ্ঞাপেন্তী’’তি এত্থ হি যক্খসদ্দো সত্তে ৰত্ততি. তথা হি যক্খোপি সত্তোপি দেৰোপি সক্কোপি খীণাসৰোপি যক্খোযেৰ নাম, মহানুভাৰতায যক্খিযতি সরণগতেহি জনেহি নানাপচ্চযেহি নানাবলীহি চ পূজিযতীতি যক্খো.

সত্তে দেৰে চ সক্কে চ, খীণাসৰে চ রক্খসে;

পঞ্চস্ৰেতেসু অত্থেসু, যক্খসদ্দো পৰত্ততি.

লক্খ আলোচনে. লক্খেতি, লক্খযতি. লক্খং ৰিজ্ঝতি উসুনা.

মোক্খ আসনে. মোক্খেতি, মোক্খযতি.

রুক্খ ফারুস্সে. ফারুস্সং ফরুসভাৰো. রুক্খেতি, রুক্খযতি. সমাসে ‘‘রুক্খকেসো, অতিরুক্খৰচনো’’তি রূপানি. এত্থ চ ‘‘সমণো অযং পাপো অতিরুক্খৰাচো’’তি পাল়ি নিদস্সনং. তত্থ অতিরুক্খৰাচোতি অতিফরুসৰচনোতি অত্থো.

খকারন্তধাতুরূপানি.

গকারন্তধাতু

লিঙ্গ চিত্তীকরণে. চিত্তীকরণং ৰিচিত্রভাৰকরণং. লিঙ্গেতি, লিঙ্গযতি, লিঙ্গং. এত্থ লিঙ্গং নাম দীঘরস্সকিসথূলপরিমণ্ডলাদিভেদং সণ্ঠানন্তি গহণে অতীৰ যুজ্জতি. তঞ্হি নানপ্পকারেহি ৰিচিত্রং হোতি, লিঙ্গীযতি ৰিচিত্তং করিযতি অৰিজ্জাতণ্হাকম্মেহি উতুনা ৰা চুণ্ণাদীহি ৰা সরীরমিতি লিঙ্গং, অজ্ঝত্তসন্তানতিণরুক্খাদিকুণ্ডলকরণ্ডকাদীসু পৰত্তসণ্ঠানৰসেনেতং দট্ঠব্বং. লিঙ্গসদ্দো সদ্দে সদ্দপ্পৰত্তিনিমিত্তে ইত্থিব্যঞ্জনে পুরিসব্যঞ্জনে সঞ্ঞাণে আকারে চাতি ইমেসু অত্থেসু দিস্সতি. অযঞ্হি ‘‘রুক্খোতি ৰচনং লিঙ্গ’’ন্তি এত্থ সদ্দে দিস্সতি. ‘‘সতলিঙ্গস্স অত্থস্সা’’তি এত্থ সদ্দপ্পৰত্তিনিমিত্তে. ‘‘তেন খো পন সমযেন অঞ্ঞতরস্স ভিক্খুনো ইত্থিলিঙ্গং পাতুভৰতী’’তি এত্থ ইত্থিব্যঞ্জনে. ‘‘পুরিসলিঙ্গনিমিত্তকুত্তাকপ্পান’’ন্তি এত্থ পুরিসব্যঞ্জনে. ‘‘তেন লিঙ্গেন জানাম, ধুৰং বুদ্ধো ভৰিস্সতী’’তি এত্থ সঞ্ঞাণে. ‘‘তেহি লিঙ্গেহি তেহি নিমিত্তেহি তেহি আকারেহি আগন্তুকভাৰো জানিতব্বো ‘‘আগন্তুকা ইমে’’তি এত্থ আকারে দিস্সতি.

সদ্দে চ তন্নিমিত্তে চ, কাটকোটচিকায চ;

লক্খণে চেৰ আকারে, লিঙ্গসদ্দো পৰত্ততি.

মগ অন্ৰেসনে. মগেতি, মগযতি. মিগো, মগো, মগো, মগযমানো.

এত্থ চ ‘‘যথা বিল়ারো মূসিকং মগযমানো’’তি পাল়ি নিদস্সনং. ‘‘মিগো’’তি চ ‘‘মগো’’তি চ চতুপ্পদো পৰুচ্চতি. এত্থ মিগোতি মগযতি ইতো চিতো গোচরং অন্ৰেসতি পরিযেসতীতি মিগো. এৰং মগো. এত্থ ৰিসেসতো হরিণ মিগো মিগো নাম. সামঞ্ঞতো পন অৰসেসাপি চতুপ্পদা ‘‘মিগো’’ ইচ্চেৰ ৰুচ্চন্তি. তথা হি সুসীমজাতকে ‘‘কাল়া মিগা সেতদন্তা তৰ ইমে, পরোসহস্সং হেমজালাভিসঞ্ছন্না’’তি এতস্মিং পাল়িপ্পদেসে হত্থিনোপি মিগসদ্দেন ৰুত্তা ‘‘কাল়মিগা’’তি. অথ ৰা মগিযতি জীৰিতকপ্পনত্থায মংসাদীহি অত্থিকেহি লুদ্দেহি অন্ৰেসিযতি পরিযেসিযতীতি মিগো, অরঞ্ঞজাতা সসপসদহরিণেণেয্যাদযো চতুপ্পাদা, এৰং মগো. ‘‘অত্থং ন লভতে মগো’’তি এত্থ পন মগো ৰিযাতি মগো, বালোতি অত্থো.

মগ্গ গৰেসনে. মগ্গেতি, মগ্গযতি. মগ্গো, মগ্গনং.

এত্থ চ মগ্গোতি পটিপদায চ পকতিমগ্গস্স চ উপাযস্স চ অধিৰচনং. ‘‘মহাৰিহারৰাসীনং, ৰাচনামগ্গনিস্সিত’’ন্তিআদীসু পন কথাপবন্ধোপি ‘‘মগ্গো’’তি ৰুচ্চতি. তত্র পটিপদা একন্ততো জাতিজরাব্যাধিদুক্খাদীহি পীল়িতেহি সত্তেহি দুক্খক্খযং নিব্বানং পাপুণত্থায মগ্গিতব্বো গৰেসিতব্বোতি মগ্গো. পকতিমগ্গো পন মগ্গমূল়্হেহি মগ্গিতব্বোতি মগ্গো. পকতিমগ্গমূল়্হেহি চ পটিপদাসঙ্খাতারিযমগ্গমূল়্হা এৰ বহৰো সন্তি. পকতিমগ্গো হি কদাচি এৰ অদ্ধিকানং মুয্হতি, ‘‘এস মগ্গো’’তি নাযকা ন দুল্লভা. অরিযমগ্গো পন সব্বদাযেৰ সব্বলোকস্স মুয্হতি, নাযকা পরমদুল্লভা. তস্মা সো এৰ অৰিজ্জাসম্মূল়্হেহি মগ্গিতব্বোতি মগ্গো. অঞ্ঞেসং পন দ্ৰিন্নং ধাতূনং ৰসেনপি অত্থং ৰদন্তি গরূ ‘‘কিলেসে মারেন্তো গচ্ছতীতি মগ্গো’’তি. তং তং কিচ্চং হিতং ৰা নিপ্ফাদেতুকামেহি মগ্গিযতি গৰেসিযতীতি মগ্গো, উপাযো. মগ্গসদ্দো হি ‘‘অভিধম্মকথামগ্গং, দেৰানং সম্পৰত্তযী’’তি এত্থ উপাযেপি ৰত্ততি. তথা হি অভিধম্মটীকাযং ‘‘মগ্গোতি উপাযো, খন্ধাযতনাদীনং কুসলাদীনঞ্চ ধম্মানং অৰবোধস্স সচ্চপ্পটিৰেধস্সেৰ ৰা উপাযভাৰতো অভিধম্মকথামগ্গো’’তি ৰুত্তো, পবন্ধো ৰা ‘‘মগ্গো’’তি ৰুচ্চতি. সো হি দীঘত্তা মগ্গো ৰিযাতি মগ্গো, তস্মা অভিধম্মকথাপবন্ধো অভিধম্মকথামগ্গোতি ৰুত্তো. ইদানি পকতিপটিপদামগ্গানং নামানি কথযাম. তেসু পকতিমগ্গস্স –

‘‘মগ্গো পন্থো পথো পজ্জো, অঞ্ঝসং ৰটুমা’যনং;

অদ্ধান’মদ্ধা পদৰী, ৰত্তনি চেৰ সন্ততী’’তি

ইমানি নামানি. পটিপদামগ্গস্স পন –

‘‘মগ্গো পন্থো পথো পজ্জো, অঞ্জসং ৰটুমা’যনং;

নাৰ উত্তর সেতু চ, কুল্লো চ ভিসি সঙ্কমো’’তি

অনেকানি নামানি. এত্থ পন কেচি ‘‘নাৰাতিআদীনি পকতিমগ্গস্স নামানী’’তি ৰদন্তি, তং ন গহেতব্বং, পকতিমগ্গস্স কিস্মিঞ্চিপি পাল়িপ্পদেসে ‘‘নাৰা’’তিআদীহি পদেহি ৰুত্তট্ঠানাভাৰতো, অভিধানসত্থেসু চ ‘‘নাৰা’’ ইচ্চাদিকানং তদভিধানানং অনাগতত্তা.

অযং পনেত্থ ৰচনত্থো – নাৰাৰিযাতি নাৰা, উত্তরন্তি এতেনাতি উত্তরং, নাৰাযেৰ উত্তরন্তি. অযঞ্হি নাৰাপরিযাযো ‘‘তরং, তরণং, পোতো, প্লৰো’’তি. ইমেপি তংপরিযাযাযেৰ. উত্তরং ৰিযাতি উত্তরং. সেতু ৰিযাতি সেতু. কুল্লো ৰিযাতি কুল্লো. ভিসি ৰিযাতি ভিসি. সঙ্কমো ৰিয, সঙ্কমন্তি ৰা এতেনাতি সঙ্কমো, সব্বমেতং অরিযমগ্গস্সেৰ নামং, ন পকতিমগ্গস্স. তথা হি ‘‘ধম্মনাৰং সমারূয্হ, সন্তারেস্সং সদেৰক’’ন্তি চ, ‘‘ধম্মসেতুং দল়্হং কত্ৰা, নিব্বুতো সো নরাসভো’’তি চ, ‘‘কুল্লো’তি খো ভিক্খৰে অরিযমগ্গস্সেতং অধিৰচন’’ন্তি চ এৰমাদিনা তত্থ তত্থ ভগৰতা অরিযমগ্গো ‘‘নাৰা’’তিআদীহি অনেকেহি নামেহি ৰুত্তো. অট্ঠকথাচরিযেহিপি সুত্তনিপাতট্ঠকথাযং ‘‘বদ্ধা ভিসি সুসঙ্খতা ভগৰা’’তি এতস্মিং পদেসে এৰং অত্থসংৰণ্ণনা কতা ‘‘ভিসীতি পত্থরিত্ৰা পুথুলং কত্ৰা বদ্ধা ‘কুল্লা’তি ৰুচ্চতি লোকে, অরিযস্স ৰিনযে পন অরিযমগ্গো’তি.

‘মগ্গো পজ্জো পথো পন্থো, অঞ্জসং ৰটুমা’যনং;

নাৰা উত্তর সেতু চ, কুল্লো চ ভিসি সঙ্কমো;

অদ্ধানং পভৰো’চ্চেৰ, তত্থ তত্থ পকাসিতো’’তি.

এৰং আচরিযেহি কতায অত্থসংৰণ্ণনায দস্সনতো চ ‘‘নাৰাতিআদীনিপি পকতিমগ্গস্স নামানী’’তি ৰচনং ন গহেতব্বং, যথাৰুত্তমেৰ ৰচনং গহেতব্বং.

কোচি পনেত্থ এৰং ৰদেয্য ‘‘ধম্মসেতুং দল়্হং কত্ৰা’তি এত্থ ‘ধম্মসেতুন্তি মগ্গসেতু’ন্তি ৰচনতো ধম্মসদ্দো মগ্গে ৰত্ততি, ন সেতুসদ্দো’’তি. তন্ন, ধম্মসদ্দো ৰিয সেতুসদ্দোপি মগ্গে ৰত্ততীতি সেতু ৰিযাতি সেতু, ধম্মো এৰ সেতু ধম্মসেতূতি অত্থৰসেন, এস নযো অঞ্ঞত্রাপি. অপরম্পি ৰদেয্য ‘‘ননু ব্রহ্মজালসুত্তন্তট্ঠকথাযং ‘দক্খিণুত্তরেন বোধিমণ্ডং পৰিসিত্ৰা অস্সত্থদুমরাজানং পদক্খিণং কত্ৰা পুব্বুত্তরভাগে ঠিতো’তি ইমস্মিং ঠানে দক্খিণুত্তরসদ্দেন দক্খিণো মগ্গো ৰুত্তো’’তি. ন, অনেকেসু পাল়িপ্পদেসেসু অট্ঠকথাপদেসেসু চ অভিধানসত্থেসু চ মগ্গৰাচকস্স উত্তরসদ্দস্স অনাগতত্তা, তস্মা তত্থ এৰমত্থো দট্ঠব্বো ‘‘দক্খিণদিসতো গন্তব্বো উত্তরদিসাভাগো দক্খিণুত্তরোতি ৰুচ্চতি, এৰংভূতেন দক্খিণুত্তরেন বোধিমণ্ডপৰিসনং সন্ধায দক্খিণুত্তরেন বোধিমণ্ডং পৰিসিত্ৰাতি ৰুত্ত’’ন্তি. অথ ৰা দক্খিণুত্তরেনাতি দক্খিণপচ্ছিমুত্তরেন, এত্থ আদিঅৰসানগ্গহণেন মজ্ঝস্সপি গহণং দট্ঠব্বং. এৰং গহণংযেৰ হি যং জাতকনিদানে ৰুত্তং ‘‘বোধিসত্তো তিণং গহেত্ৰা বোধিমণ্ডং আরূয্হ দক্খিণদিসাভাগে উত্তরাভিমুখো অট্ঠাসি, তস্মিং খণে দক্খিণচক্কৰাল়ং ওসীদিত্ৰা হেট্ঠা অৰীচিসম্পত্তং ৰিয অহোসি, উত্তরচক্কৰাল়ং উল্লঙ্ঘিত্ৰা উপরি ভৰগ্গপ্পত্তং ৰিয অহোসি, বোধিসত্তো ইদং সম্বোধিপাপুণট্ঠানং ন ভৰতি মঞ্ঞেতি পদক্খিণং করোন্তো পচ্ছিমদিসাভাগং গন্ত্ৰা পুরত্থাভিমুখো অট্ঠাসী’’তিআদি, তেন সমেতি. অথাপি ৰদেয্য ‘‘যদি উত্তরসদ্দো দিসাৰাচকো, এৰঞ্চ সতি ‘‘দক্খিণুত্তরেনা’’তি এনযোগং অৰত্ৰা ‘‘দক্খিণুত্তরাযা’’তি আযযোগো ৰত্তব্বো’’তি. তন্ন, দিসাৰাচকস্সপি সদ্দস্স ‘‘উত্তরেন নদী সীতা, গম্ভীরা দুরতিক্কমা’’তি এনযোগৰসেন ৰচনতো. অপিচ দিসাভাগং সন্ধায ‘‘দক্খিণুত্তরেনা’’তি ৰচনং ৰুত্তং. দিসাভাগো হি দিসা এৰাতি নিট্ঠমেত্থাৰগন্তব্বং.

গকারন্তধাতুরূপানি.

ঘকারন্তধাতু

লিঘি ভাসনে. লঙ্ঘেতি, লঙ্ঘযতি. এতানি বুদ্ধৰচনে অপ্পসিদ্ধানিপি লোকিকপ্পযোগদস্সনৰসেন আগতানি. সাসনস্মিঞ্হি ভূৰাদিগণচুরাদিগণপরিযাপন্নস্স গত্যত্থৰাচকউল্লঙ্ঘনত্থপরিদীপকস্স ধাতুস্স রূপং অতীৰ পসিদ্ধং.

লঙ্ঘ লঙ্ঘনে. লঙ্ঘেতি, লঙ্ঘযতি.

‘‘অতিকর’মকরা’চরিয, ময্হম্পেতং ন রুচ্চতি;

চতুত্থে লঙ্ঘযিত্ৰান, পঞ্চমিযম্পি আৰুতো’’তি

ইমস্মিং সত্তিলঙ্ঘনজাতকে চুরাদিগণপরিযাপন্নস্স গত্যত্থৰাচকস্স উল্লঙ্ঘনত্থপরিদীপকস্স লঙ্ঘধাতুস্স ‘‘লঙ্ঘযিত্ৰা, লঙ্ঘযিত্ৰানা’’তি রূপে দিট্ঠেযেৰ ‘‘লঙ্ঘেতি, লঙ্ঘযতী’’তি রূপানি দিট্ঠানি এৰ হোন্তি. ভাসত্থৰাচকস্স পন তথারূপানি রূপানি ন দিট্ঠানি, এৰং সন্তেপি পুব্বাচরিযেহি দীঘদস্সীহি অভিমতত্তা ভাসত্থৰাচিকাপি লঙ্ঘধাতু অত্থীতি গহেতব্বা, এৰং সব্বেসুপি ভূৰাদিগণাদীসু সাসনে অপ্পসিদ্ধানম্পি রূপানং সাসনানুকূলানং গহণং ৰেদিতব্বং, অননুকূলানঞ্চ অপ্পসিদ্ধানং ছড্ডনং.

অঘ পাপকরণে. অঘেতি, অঘযতি. অঘং, অঘো, অনঘো.

তত্থ অঘন্তি দুক্খং. ‘‘অঘন্তং পটিসেৰিস্সং. ৰনে ৰাল়মিগাকিণ্ণে. খগ্গদীপিনিসেৰিতে’’তি ইদং নিদস্সনং. অঘোতি কিলেসো. তেন অঘেন অরহা অনঘো. তত্থ অঘযন্তি পাপং করোন্তি সত্তা এতেনাতি অঘং, কিন্তং? দুক্খং, এৰং অঘো. ননু চ সপ্পুরিসা দুক্খহেতুপি কিলেসহেতুপি চ অত্তনো সুখত্থায পাপং ন করোন্তি. তথা হি –

‘‘ন পণ্ডিতা অত্তসুখস্স হেতু,

পাপানি কম্মানি সমাচরন্তি;

দুক্খেন ফুট্ঠা খলিতাপি সন্তা,

ছন্দা চ দোসা ন জহন্তি ধম্ম’’ন্তি

ৰুত্তং. এৰং সন্তে কস্মা ‘‘অঘ পাপকরণে’’তি ধাতু চ ‘‘অঘযন্তি পাপং করোন্তি সত্তা এতেনাতি অঘ’’ন্তিআদিৰচনঞ্চ ৰুত্তন্তি? সচ্চং, যেভুয্যেন পন সত্তা দুক্খাদিহেতু পাপকম্মং করোন্তি, এতেসু সপ্পুরিসা এৰ ন করোন্তি, ইতরে করোন্তি. এৰং পাপকরণস্স হি দুক্খং কিলেসো চ হেতু. তথা হি –

সুখীপি হেকে ন করোন্তি পাপং,

অৰণ্ণসংসগ্গভযা পুনেকে;

পহূ সমানো ৰিপুলত্থচিন্তী,

কিংকারণা মে ন করোসি দুক্খ’’ন্তি

ৰুত্তং. অযঞ্হি গাথা দুক্খহেতুপি সত্তা পাপং করোন্তীতি এতমত্থং দীপেতি. ‘‘কুদ্ধো হি পিতরং হন্তি, কুদ্ধো হন্তি সমাতর’’ন্তি অযং পন কিলেসহেতুপি পাপং করোন্তীতি এতমত্থং দীপেতি, তস্মা অম্হেহি ‘‘অঘ পাপকরণে’’তিআদিৰচনং ৰুত্তং.

ঘকারন্তধাতুরূপানি.

চকারন্তধাতু

লোচ দস্সনে. লোচেতি, লোচযতি. লোচনং. রূপারম্মণং লোচযতি পস্সতীতি লোচনং, চক্খু.

কিচি মদ্দনে. কিঞ্চেতি, কিঞ্চযতি. কিঞ্চনং, অকিঞ্চনো.

তত্থ কিঞ্চনন্তি পলিবোধো. কিঞ্চেতি সত্তে মদ্দতীতি কিঞ্চনং. কিঞ্চনসদ্দো মদ্দনত্থে ৰত্ততি. মনুস্সা হি ৰীহিং মদ্দন্তা গোণং ‘‘কিঞ্চেহি কাপিল, কিঞ্চেহি কাপিলা’’তি ৰদন্তি.

পচি ৰিত্থারে. পঞ্চেতি, পঞ্চযতি. পপঞ্চেতি, পপঞ্চযতি. পপঞ্চা.

এত্থ পপঞ্চাতি তণ্হামানদিট্ঠিযো. এতা হি অত্তনিস্সিতানং সত্তানং সংসারং পপঞ্চেন্তি ৰিত্থিন্নং করোন্তীতি পপঞ্চাতি ৰুচ্চন্তি. অথ ৰা পপঞ্চেন্তি যত্থ সযং উপ্পন্না তংসন্তানং ৰিত্থারেন্তি চিরং ঠপেন্তীতি পপঞ্চা. লোকিযা পন ‘‘অম্হাকং তুম্হেহি সদ্ধিং কথেন্তানং পপঞ্চো হোতী’’তিআদীনি ৰদন্তা কালস্স চিরভাৰং পপঞ্চোতি ৰদন্তি, সাসনে পন দ্ৰযম্পি লব্ভতি.

সিচ্চ কুড্ডনে. সিচ্চেতি, সিচ্চযতি.

ৰঞ্চু পলম্ভনে. পলম্ভনং উপলাপনং. ৰঞ্চেতি, ৰঞ্চযতি. ৰঞ্চকো, ৰঞ্চনং. ভূৰাদিগণে পন ৰঞ্চধাতু গত্যত্থে ৰত্ততি. ‘‘সন্তি পাদা অৰঞ্চনা’’তি হি পাল়ি

চচ্চ অজ্ঝযনে. চচ্চেতি, চচ্চযতি.

চু চৰনে. চাৰেতি, চাৰযতি. অঞ্ঞো ‘‘চু সহনে’’ ইতি ব্রুতে. চাৰেতি, চাৰযতি, সহতীতি অত্থো.

অঞ্চু ৰিসেসনে. অঞ্চেতি, অঞ্চযতি.

লোচ ভাসাযং. লোচেতি, লোচযতি. লোচনং, লোচযতি সমৰিসমং আচিক্খন্তং ৰিয ভৰতীতি লোচনং, চক্খু.

রচ পতিযতনে. রচেতি, রচযতি. রচনা, ৰিরচিতং, কেসরচনা, গাথারচনা.

সূচ পেসুঞ্ঞে. পিসুণভাৰো পেসুঞ্ঞং. সূচেতি, সূচযতি. সূচকো.

পচ্চ সংযমনে. পচ্চেতি, পচ্চযতি.

রিচ ৰিযোজনসম্পজ্জনেসু. রেচেতি, রেচযতি. সেট্ঠিপুত্তং ৰিরেচেয্য. ৰিরেচেতি, ৰিরেচযতি. ৰিরেচকো, ৰিরেচনং.

ৰচ ভাসনে. ৰচেতি, ৰচযতি. ভূৰাদিগণেপি অযং ৰত্ততি. তদা তস্সা ‘‘ৰত্তি, ৰচতি, অৰোচ, অৰোচু’’ন্তিআদীনি রূপানি ভৰন্তি. কারিতে পন ‘‘অন্তেৰাসিকং ধম্মং ৰাচেতি, ৰাচযতী’’তি রূপানি. ৰত্তুং, ৰত্তৰে, ৰত্ৰা, ৰুত্তং, ৰুচ্চতি.

অচ্চ পূজাযং. অচ্চেতি, অচ্চযতি. ব্রহ্মাসুরসুরচ্চিতো.

সূচ গন্ধনে. সুচেতি, সূচযতি. সূচকো, সুত্তং.

এত্থ চ অত্তত্থপরত্থাদিভেদে অত্থে সূচেতীতি সুত্তং. তেপিটকং বুদ্ধৰচনং.

কচ দিত্তিযং. কচ্চেতি, কচ্চযতি. কচ্চো.

এত্থ কচ্চোতি রূপসম্পত্তিযা কচ্চেতি দিব্বতি ৰিরোচতীতি কচ্চো, এৰংনামকো আদিপুরিসো, তব্বংসে জাতা পুরিসা ‘‘কচ্চানা’’তিপি ‘‘কচ্চাযনা’’তিপি ‘‘কাতিযানা’’তিপি ৰুচ্চন্তি, ইত্থিযো পন ‘‘কচ্চানী’’তিপি ‘‘কচ্চাযনী’’তিপি ‘‘কাতিযানী’’তিপি ৰুচ্চন্তি.

চকারন্তধাতুরূপানি.

ছকারন্তধাতু

মিলেছ অব্যত্তাযং ৰাচাযং. মিলেচ্ছেতি, মিলেচ্ছযতি. মিলক্খু.

এত্থ মিলক্খূতি মিলেচ্ছেতি অব্যত্তৰাচং ভাসতীতি মিলক্খু.

কুচ্ছ অৰক্খেপে. অৰক্খেপো অধোখিপনং. কুচ্ছেতি, কুচ্ছযতি.

ৰিচ্ছ ভাসাযং. ৰিচ্ছেতি, ৰিচ্ছযতি.

ছকারন্তধাতুরূপানি.

জকারন্তধাতু

ৰজ্জ ৰজ্জনে. ৰজ্জেতি, ৰজ্জযতি. পরিৰজ্জনকো. ৰজ্জিতো সীলৰন্তেহি, কথং ভিক্খু করিস্সসীতি.

তুজ্জ বলপালনেসু. তুজ্জেতি, তুজ্জযতি.

তুজি পিজি হিংসাবলদাননিকেতনেসু. নিকেতনং নিৰাসো. তুঞ্জেতি, তুঞ্জযতি. পিঞ্জেতি. পিঞ্জযতি.

খজি কিচ্ছজীৰনে. খঞ্জেতি, খঞ্জযতি. খঞ্জো.

খজি রক্খণে. তাদিসানিযেৰ রূপানি. ভূৰাদিগণে ‘‘খজি গতিৰেকল্লেতি ইমিস্সা ‘‘খঞ্জতী’’তি রূপং.

পূজ পূজাযং. পূজেতি, পূজযতি. পূজা. এসাৰ পূজনা সেয্যো. পূজকো, পূজিতো, পূজনীযো, পূজনেয্যো, পূজেতব্বো, পুজ্জো.

গজ মদ্দনসদ্দেসু. গজেতি, গজযতি. গজো.

তিজ নিসানে. তেজেতি, তেজযতি.

ৰজ মগ্গনসঙ্খারেসু. ৰজেতি, ৰজযতি.

তজ্জ সন্তজ্জনে. তজ্জেতি, তজ্জযতি. সন্তজ্জেতি, সন্তজ্জযতি. সন্তজ্জিতো.

অজ্জ পটিসজ্জনে. অজ্জেতি, অজ্জযতি.

সজ্জ সজ্জনে. সজ্জেতি, সজ্জযতি দানং. গমনসজ্জো হুত্ৰা.

ভজ ৰিস্সাসে. ভজেতি, ভজযতি. ভূৰাদিগণে পন ‘‘ভজতী’’তি রূপং, ভত্তি, সম্ভত্তি.

তুজি পিজি লুজি ভজি ভাসাযং. তুঞ্জেতি, তুঞ্জযতি. পিঞ্জেতি, পিঞ্জযতি. লুঞ্জেতি, লুঞ্জযতি. ভঞ্জেতি, ভঞ্জযতি. কথেতীতি অত্থো.

রুজ হিংসাযং. রোজেতি, রোজযতি. রোগো.

ভাজ পুথকম্মনি. পুথকম্মং পুথক্করণং, ৰিসুং ক্রিযাতি অত্থো. ভাজেতি, ভাজযতি. ৰিভাজেতি, ৰিভাজযতি. ৰিভত্তি.

সভাজ সীতিসেৰনেসু. সভাজেতি, সভাজযতি.

লজ পকাসনে. লজেতি, লজযতি. লাজা.

যুজ সংযমনে. সংপুব্বো বন্ধনে. যোজেতি, যোজযতি. সংযোজেতি, সংযোজযতি. সংযোজনং.

মজ্জ সোচেয্যালঙ্কারেসু. মজ্জেতি, মজ্জযতি. সম্মজ্জেতি, সম্মজ্জযতি. সম্মজ্জা.

ভাজ ভাজনদানেসু. ভাজেতি, ভাজযতি. কথং ৰেস্সন্তরো পুত্তো, গজং ভাজেতি সঞ্চয.

জকারন্তধাতুরূপানি.

ঝঞন্তা অপ্পসিদ্ধা. সদ্দসত্থে পন ‘‘ঞা নিযোজনে’’তি পঠন্তি, রূপং পন বুদ্ধৰচনানুকূলং ন ভৰতি, তস্মা ন দস্সিতং অম্হেহি.

টকারন্তধাতু

ঘট্ট ঘট্টনে. ঘট্টনং ৰাযামকরণং. ঘট্টেতি, ঘট্টযতি. এত্থ তু ‘‘ঘট্টেসি, ঘট্টেসি, কিংকারণা ঘট্টেসি, অহং তং জানামী’’তি নিদস্সনং.

ঘট সঙ্ঘাতে. পুব্বে ৰিয ক্রিযাপদানি, নামিকত্তে ‘‘ঘটো, ঘটা’’তি রূপানি. এত্থ গটোতি পানীযঘটো. ঘটাতি সমূহো ‘‘মচ্ছঘটা’’তিআদীসু ৰিয.

ঘট্ট চলনে. ঘট্টেতি, ঘট্টযতি.

নট অৰসন্দনে. অৰসন্দনং গত্তৰিক্খেপো. নটেতি, নটযতি.

চুট ছুট কুট্ট ছেদনে. চুটেতি, চুটযতি. ছুটেতি, ছুটযতি. কুট্টেতি, কুট্টযতি.