২৯. দেৰপুত্তস্স ৰত্থুম্হি অযমানুপুব্বীকথা

ইতো পুব্বে নারদস্স কির সম্মাসম্বুদ্ধস্স কালে অযং দীপো অঞ্ঞতরেন নামেন পাকটো অহোসি, সো পনেকস্মিং কালে দুব্ভিক্খো অহোসি দুস্সস্সো, মহাছাতকভযং সত্তে পীল়েতি. তস্মিং সমযে নারদস্স ভগৰতো একো সাসনিকো সাৰকো অঞ্ঞতরস্মিং গামে পিণ্ডায চরিত্ৰা যথা ধোতপত্তোৰ নিক্খমি. অথঞ্ঞতরস্মিং গেহে মনুস্সা একং তণ্ডুলনাল়িংপোটলিকায বন্ধিত্ৰা উদকে পক্খিপিত্ৰা পচিত্ৰা উদকং গহেত্ৰা পিৰন্তো জীৰন্তি, তদা থেরং দিস্ৰা ৰন্দিত্ৰা পত্তং গহেত্ৰা তেন তণ্ডুলেন ভত্তং পচিত্ৰা পত্তে পক্খিপিত্ৰা থেরস্স অদংসু. অথ তেসং সদ্ধাবলেন সা উক্খলি ভত্তেন পরিপুণ্ণা অহোসি, তে তং অব্ভুতং দিস্ৰা অয্যস্স দিন্নদানে ৰিপাকো অজ্জেৰ নো দিট্ঠোতি সোমনস্সজাতা মহাজনং সন্নিপাতেত্ৰা তে ভত্তং ভোজেত্ৰা পচ্ছা সযং ভুঞ্জিংসু. ভত্তস্স গহিতগহিতট্ঠানং পূরতেৰ. ততো পট্ঠায তে সম্পত্তমহাজনস্স দানং দদন্তা আযুপরিযোসানে দেৰলোকে নিব্বত্তিংসু, অথ সো থেরো ভত্তং আদায গন্ত্ৰা অঞ্ঞতরস্মিং রুক্খমূলে নিসীদিত্ৰা ভুঞ্জিতুমারতি. তস্মিং কির রুক্খে নিব্বত্তো একো দেৰপুত্তো আহারেন কিলন্তো ভুঞ্জমানং থেরং দিস্ৰা অত্তভাৰং ৰিজহিত্ৰা মহল্লকৰেসেন তস্স সমীপে অট্ঠাসি. থেরো অনাৰজ্জিত্ৰাৰ ভুঞ্জতি. দেৰপুত্তো চরিমালোপং ঠপেত্ৰা ভুত্তকালে উক্কাসিত্ৰা অত্তানং ঠিতভাৰং জানাপেসি. থেরো তং দিস্ৰা ৰিপ্পটিসারি হুত্ৰা চরিমং ভত্থপিণ্ডং তস্স হত্থে ঠপেসি, ততো সো ভত্তপিণ্ডং গহেত্ৰা ঠিতো চিন্তেসি. ইতো কির মযা পুব্বে সমণব্রাহ্মণানং ৰা কপণদ্ধিকানং ৰা অন্তমসো কাকসুনখা দীনম্পি আহারং অদিন্নপুব্বং ভৰিস্সতি, তেনৰাহং দেৰো হুত্ৰাপি ভত্তং ন লভামি. হন্দাহং ইমং ভত্তপিণ্ডং থেরস্সেৰ দস্সামি, তং মে ভৰিস্সতি দীঘরত্তং হিতায সুখায চাতি. এৰঞ্চ পন চিন্তেত্ৰা ভত্তপিণ্ডে আসং পহায থেরং উপসঙ্কম্ম সামি দাসস্স ৰো অলং ইধ লোকেন সঙ্গহং. পরলোকেন মে সঙ্গহং করোথাতি ৰত্ৰা তস্স পত্তে ওকিরি. অথস্স ভত্থপিণ্ডং [ভত্থপিণ্ডং ইতিসব্বত্থ] পত্তে পতিতমত্তেযেৰ তিগাৰুতট্ঠানে দিব্বমযানি ভত্তভাজনানিপঞ্ঞাযিংসু. দেৰপুত্তো থেরং পঞ্চপতিট্ঠিতেন ৰন্দিত্ৰা ততো দিব্বভোজনং গহেত্ৰা পথমং দানং দত্ৰা পচ্ছা সযং ভুঞ্চি. ততো দেপুত্তো দুতিযদিৰসতো পট্ঠায থেরস্স চ সম্পত্তমহাজনস্স চ মহাদানং দেন্তো আযুপরিযোসানে ০ দেৰলোকে নিব্বত্তিত্ৰা ছসু কামসগ্গেসু অপরাপরং দিব্বসম্পত্তি মনুভৰমানো পদুমুত্তরস্স ভগৰতো কালে ততো চুতো বারাণসিযং অনেকৰিভৰস্স মিচ্ছাদিট্ঠিকস্স কুটুম্বিকস্স গেহে নিব্বত্তি. দেৰোতিস্স নামং অকংসু. অপরভাগে ৰিঞ্ঞুতং পত্তস্স তস্স মাতাপিতরো কালমকংসু. সোৰণ্ণমণিমুত্তাদিপূরিতকোট্ঠাগারাদযো ওলোকেত্ৰা মম মাতাপিতরো মিচ্ছাদিট্ঠিকত্তা ইতো দানাদিকিঞ্চিকম্মং অকরিত্ৰা পরলোকং গচ্ছন্তা কাকণিকমত্তম্পি অগহেত্ৰা গতা, অহং পন তং গহেত্ৰাৰ গমিস্সামীতি সন্নিট্ঠানং কত্ৰা ভেরিং চরাপেত্ৰা কপণদ্ধিকৰনিব্বকে সন্নিপাতেত্ৰা সত্তাহব্ভন্তরে সব্বং সাপতেয্যং দানমুখেন দত্ৰা অরঞ্ঞং পৰিসিত্ৰা ইসিপ্পব্বজ্জং পব্বজিত্ৰা কসিণপরিকম্মং কত্ৰা পঞ্চ ভিঞ্ঞা অট্ঠ সমাপত্তিযো নিব্বত্তেত্ৰা আকাসচারী অহোসি. অথ তস্মিংসমযে পদুমুত্তরো নাম ভগৰা হংসৰতীনগরে পটিৰসন্তো দেৰব্রহ্মাদিপরিৰুতো চতুসচ্চপটিসংযুত্তং ধম্মং দেসেন্তো নিসিন্নো হোতি, তদা সো তাপসো আকাসেন গচ্ছন্তো মহাজনসমাগমঞ্চ ভগৰতো সরীরতো নিক্খন্তছব্বণ্ণরংসিযো চ দিস্ৰা কিমেতংতি ৰিম্হিতো আকাসা ওতরিত্ৰা মহতিযা বুদ্ধলীল়ায নিসীদিত্ৰা ধম্মং দেসেন্তং ভগৰন্তং দিস্ৰা পসন্নমানসো পরিসন্তরে নিসিন্নো ধম্মং সুত্ৰা ভগৰন্তং ৰন্দিত্ৰা অত্তনো অস্সমমেৰ অগমাসি. অথ সো তত্থ যাৰতাযুকং ঠত্ৰা আযুপরিযোসানে তাৰতিংসভৰনে নিব্বত্তো তিংসকপ্পে দিব্বসম্পত্তিমনুভৰন্তো ছসু কামসগ্গেসু অপরাপরিযৰসেন সংসরি. একপঞ্ঞাসঅত্তভাৰে সক্কো দেৰরাজা অহোসি, এককৰীসতিঅত্তভাৰে চক্কৰত্তি হুত্ৰা মনুস্সসম্পত্তি মনুভৰিত্ৰা ইমস্মিংবুদ্ধুপ্পাদে ভগৰতি পরিনিব্বুতে সাৰত্থিযং অঞ্ঞতরস্মিং কুলগেহে নিব্বত্তিত্ৰা সত্তৰস্সিকো একং ভিক্খুং ধম্মং দেসেন্তং অদ্দস. দিস্ৰা তং উপসঙ্কমিত্ৰা ধম্মং সুত্ৰা অনিচ্চসঞ্ঞং পটিলভিত্ৰা তত্থ নিসিন্নোৰ অরহত্তং পাপুণি, ততো সো পত্তপটিসম্ভিদো অত্তনা কতপুঞ্ঞকম্মং ওলোকেন্তো তং পুব্বচরিযং ভিক্খূনং মজ্ঝে পকাসেন্তো আহ. তস্মা.

১. নারদো কির সম্বুদ্ধো, পুব্বে আসি নরুত্তমো;

লোকং দুক্খা পমোচেন্তো, দদন্তো অমতং পদং.

২. তস্মিং তু সমযে তস্স, সাৰকো ছিন্নবন্ধনো;

ভিক্খিত্ৰা দীপকে লদ্ধ, মাহারং পরিভুঞ্জিতুং.

৩. রুক্খমূল মুপা গঞ্ছি, তত্থাসিং রুক্খদেৰতা;

বুভুক্খিতা উদিক্খন্তী, অট্ঠাসিং তস্স সন্তিকে.

৪. অদাসি মে ভত্তপিণ্ডং, করুণাপূরিতন্তরো;

গহেত্ৰান ঠিতো পিণ্ডং, সহমানো খুদং তদা.

৫. অদিন্নত্তা মযা পুব্বে, কিঞ্চি দানং সুপেসলে;

জিঘচ্ছাপীল়িতো হোমি, জাতোপি দেৰযোনিযং.

৬. অজ্জ খেত্তং সুলদ্ধংমে, দেয্যধম্মোপি ৰিজ্জতি;

বীজমেত্থ চ রোপেমি, ভৰতো পরিমুত্তিযা.

৭. ইতি চিন্তিয ৰন্দিত্ৰা, দাসস্স সামি ৰো অলং;

সঙ্গহং ইধ লোকস্মিং, করোথ পারলোকিকং.

৮. ইতি ৰত্ৰা অদাসাহং, ভুঞ্চি সোপি দযাপরো;

তেনাহং পুঞ্ঞকম্মেন, সুধন্নমলভিং খণে.

৯. ততো চুতো ছদেৰেসু, ৰিন্দন্তো মহতিংসিরিং;

চিরকালং ৰসিং তত্থ, দেৰিদ্ধীহি সমঙ্গিতা.

১০. সতসহস্সে ইতো কপ্পে, পদুমুত্তরনামকো;

উপ্পজ্জি লোকনাযকো, ধম্মরাজা তথাগতো.

১১. মহিদ্ধিকো তদা আসিং, তাপসো কাননে ৰনে;

সম্পত্তপঞ্চা ভিঞ্ঞাণো, আকাসেন চরামহং.

১২. তদা কাসেন গচ্ছন্তো, রম্মে হংসৰতীপুরে;

বুদ্ধরংসিপরিক্খিত্তং, কেতুমালাৰিলাসিতং.

১৩. দেৰসঙ্ঘপরিব্বূল়্হং, দেসেন্তং অদ্দসং জিনং;

সো তং দিস্ৰান নভসা, ঠিতোহং পরিসন্তরে.

১৪. ধম্মং সুত্ৰা উদগ্গোহং, কালং কত্ৰান সত্থুনো;

ততো চুতো পপন্নোস্মি, তাৰতিংসে মনোরমে.

১৫. তিংসকপ্পসহস্সানি, চরন্তো দেৰমানুসে;

দুগ্গতিং নাভিজানামি, লভামি ৰিপুলং সুখং.

১৬. একপঞ্ঞাসতিক্খত্তুং, দেৰরজ্জমকারযিং;

অথেকৰীসতিক্খত্তুং, চক্কৰত্তী অহোসহং.

১৭. পদেসরজ্জং কাসাহং, বহুক্খত্তুং তহিং তহিং;

ইমস্মিং ভদ্দকে কপ্পে, নিব্বুতেতু [নিব্বুতেসু ইতিসব্বত্থ] তথাগতে.

১৮. চোদিতো পুঞ্ঞকম্মেন, সাৰত্থিপুরমুত্তমে;

উপ্পজ্জিত্ৰা কুলে সেট্ঠে, জাতিযা সত্তৰস্সিকো.

১৯. সুত্ৰা ধম্মং কথেন্তস্স, ভিক্খুস্সঞ্ঞতরস্সহং;

ভৰস্সন্তং করিত্ৰান, অরহত্তমপাপুণিং.

২০. সুদিন্নং মে তদা দানং, সুস্সুতং ধম্মমুত্তমং;

দুক্খস্সন্তং অকাসাহং, তস্স কম্মস্স ৰাহসাতি.

এৰঞ্চ পন ৰত্ৰা বহূ জনে কুসলকম্মে নিযোজেসীতি.

২১. দানেনপেৰং চরিমায পিণ্ডিযা,

সৰণায ধম্মস্স মুহুত্তকেন;

লভন্তি সত্তা তিৰিধম্পি সম্পদং,

ফলং ৰদে কো বহুদাযকস্স ভো.

দেৰপুত্তস্স ৰত্থুং নৰমং.