৩০. সীৰলিত্থেরস্স ৰত্থুম্হি অযমানুপুব্বীকথা

ইতো কির কপ্পসতসহস্সমত্থকে পদুমুত্তরো নাম সত্থা লোকে উদপাদি ধম্মদেসনায সত্তে অমতমহানিব্বাণং পাপেন্তো, তস্মিং সমযে ভগৰা হংসাৰতিযং সরাজিকায পরিসায মজ্ঝে একং ভিক্খুং লাভীনং অগ্গট্ঠানে ঠপেসি. তদা রাজা তং দিস্ৰা তং ঠানং কামযমানো বুদ্ধপমুখস্স সঙ্ঘস্স মহাদানং দত্ৰা ভগৰতো পাদমূলে সিরসা নিপজ্জি, তদাস্স ভগৰা অনাগতে গোতমস্স ভগৰতো সাসনে তং ঠানং লভিস্সসীতি ৰত্ৰা ব্যাকাসি. তং সুত্ৰা মুদিতো রাজা পুঞ্ঞানি কত্ৰা দেৰলোকে নিব্বত্তি. ততো অপরভাগে বারাণসিযং সেট্ঠিপুত্তো হুত্ৰা পচ্চেকবুদ্ধসহস্সং চতুপচ্চযদানেন যাৰজীৰং পটিজগ্গিত্ৰা দেৰলোকে নিব্বত্তো মহন্তং সম্পত্তি মনুভৰিত্ৰা ততো চুতো ৰিপস্সিস্স ভগৰতো কালে বন্ধুমতীনগরে অঞ্ঞতরস্মিং কুলগেহে নিব্বত্তি. সো তস্মিং সমযে সেনগুত্তট্ঠানে ঠত্ৰা রঞ্ঞো কম্মং করোতি, তদা নগরৰাসিনো উপাসকগণা ৰিপস্সীসম্মাসম্বুদ্ধং উপসঙ্কম্ম ৰন্দিত্ৰা ভগৰা ভন্তে সসাৰকো অম্হাকং অনুগ্গহং করোতূতি স্ৰাতনায নিমন্তেত্ৰা মহাদানং দত্ৰা সব্বে একচ্ছন্দা ভগৰন্ত মুদ্দিস্স মহারহং মহাপরিৰেণং কারাপেত্ৰা পরিৰেণমহে মহাদানং দদন্তা দানগ্গে অসুকং নাম নত্থীতি ন ৰত্তব্বন্তি ৰত্ৰা দানং পটিযাদেত্ৰা দানগ্গং ওলোকেন্তা নৰদধিঞ্চ পটলমধুঞ্চ অপস্সন্তা পুরিসে পক্কোসিত্ৰা সহস্সং দত্ৰা দধিমধুং খিপ্পং পরিযেসিত্ৰা আনেথাতি পেসেসুং, তে সহস্সং গহেত্ৰা দধিমধুং উপধারেতুং তত্থ তত্থ ৰিচরন্তা দ্ৰারন্তরে অট্ঠংসু, তদা অযং সেনগুত্তো রঞ্ঞো সভত্তং দধিমধুং আদায গচ্ছন্তো মহাদ্ৰারং সম্পাপুণি, অথ তে দধিমধুং দিস্ৰা ভো কহাপণং গহেত্ৰা ইমং দেহীতি যাচিংসু. তেন [তেনদস্সামি ইতিপিকত্তচি] ন দস্সামীতি ৰুত্তে যাৰসহস্সং ৰড্ঢেত্ৰা যাচিংসু. ততো সেনগুত্তো ইমং অপ্পগ্ঘং সহস্সেন যাচথ, কি মনেন করোথাতি পুচ্ছি, তেহি সম্বুদ্ধত্থাযাতি ৰুত্তে তেনহি অহমেৰ দস্সামীতি জীরমরিচাদীহি সক্খরমধুফাণিতাদযো যোজেত্ৰা দানগ্গং উপনামেসি. তং সত্থু আনুভাৰেন বুদ্ধপমুখস্স অট্ঠসট্ঠিভিক্খুসতসহস্সস্স পহোণকং অহোসি. ততো সো তেন পুঞ্ঞকম্মেন দেৰমনুস্সলোকেসু সম্পত্তি মনুভৰিত্ৰা অপরভাগে অম্হাকং ভগৰতো কালে কোলিযনগরে মহালিলিচ্ছৰিরঞ্ঞো উপনিস্সায সুপ্পিযায নাম অগ্গমহেসিযা কুচ্ছিস্মিং পটিসন্ধিং গণ্হি. সো সত্তমাসসত্তসংৰচ্ছরানি মাতুকুচ্ছিযং ৰসিত্ৰা সত্তদিৰসানি মূল়্হগব্ভো দুক্খমনুভৰি. মাতুকুচ্ছিতো নিক্খমন্তস্স তস্স মাতাপিতরো সীৰলীতি নাম মকংসু. এৰং মহাপুঞ্ঞস্স এত্তকং কালং মাতুকুচ্ছিম্হি দুক্খানুভৰনং অত্তনাৰ কতেন পাপবলেন অহোসি, সো কির অতীতে রাজা হুত্ৰা অত্তনো সপত্তরঞ্ঞা সদ্ধিং সঙ্গামেন্তো মাতরা সদ্ধিং মন্তেসি. সা নগরং রুন্ধিত্ৰা অমিত্তে গণ্হিতুং সক্কাতি উপায মদাসি, সোপি তস্সা ৰচনেন নগরং রুন্ধিত্ৰা সত্তমে দিৰসে অগ্গহেসি, তেন পাপকম্মবলেন মাতাপুত্তানং এৰং মহন্তং দুক্খং অহোসীতি. ততো সা পুত্তং ৰিজাযনকালে সত্তমে দিৰসে ভগৰন্তং অনুস্সরিত্ৰা সুখেন ভারং মুঞ্চি. তুট্ঠা সা সত্তমে দিৰসে বুদ্ধপমুখস্স ভিক্খুসঙ্ঘস্স মহাদানং অদাসি, অথস্সা পুত্তো সত্তৰস্সিককালে গেহা নিক্খম্ম সত্থারং দিস্ৰা পব্বজ্জং যাচি. সত্থা সারিপুত্তত্থেরস্স নিযোজেসি, ততো সারিপুত্তত্থেরেন উপজ্ঝাযেন মোগ্গল্লানমাচরিযং কত্ৰা পব্বজি, অথ সো খুরগ্গেযেৰ অরহত্তং পত্ৰা বুদ্ধসাসনং সোভেসি, সো পুব্বে কতপুঞ্ঞানুভাৰেন মহাপুঞ্ঞো অহোসি লাভীনঞ্চ অগ্গো. অথেকস্মিং সমযে ভগৰা রেৰতত্থেরং দস্সনায খদিরৰনৰিহারং গচ্ছন্তো তিংসভিক্খুসহস্সেহি সদ্ধিং তিংসযোজনিকং ছট্টিতকন্তারং সম্পাপুণি নিরূদকং অপ্পভক্খং. যেভুয্যেন দেৰতা সীৰলিত্থেরে পসন্না. তস্মা ভগৰা সীৰলিত্থেরং পুরতো চারিকং কত্ৰা দেৰতাহি কারাপিতে ৰিহারে ৰসন্তো দেৰতাহি সজ্জিতদানং পরিভুঞ্জন্তো রেৰতত্থেরং সংপাপুণিত্ৰা গতকম্মং নিট্ঠাপেত্ৰা জেতৰনমাগম্ম লাভীনং অগ্গট্ঠানে তং ঠপেসীতি. তেন ৰুত্তং অপদানে.

১. পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

২. সীলং তস্স অসঙ্খ্যেয্যং, সমাধি ৰজিরূপমো [ৰজিরূপমা ইতিকত্থচি];

অসংখিযং ঞাণৰরং, ৰিমুত্তি চ অনোপমা.

৩. মনুজামরনাগানং, ব্রহ্মানঞ্চ সমাগমে;

সমণব্রাহ্মণাকিণ্ণে, ধম্মং দেসেতি নাযকো.

৪. সসাৰকং মহালাভিং, পুঞ্ঞৰন্তং জুতিন্ধরং,

ঠপেসি এতদগ্গম্হি, পরিসাসু ৰিসারদো.

৫. তদাহং খত্তিযো আসিং, পুরে হংসৰতীৰ্হযে [হংসাৰতৰ্হযে ইতিসব্বত্থ];

সুত্ৰা জিনস্স তং ৰাক্যং, সাৰকস্স গুণং বহুং.

৬. নিমন্তযিত্ৰা সত্তাহং, ভোজযিত্ৰা সসাৰকং;

মহাদানং দদিত্ৰান, তং ঠানমভিপত্থযিং.

৭. তদা মং ৰিনতং পাদে, দিস্ৰান পুরিসাসভো;

সো সরেন মহাৰীরো, ইমং ৰচনমব্রৰী.

৮. ততো জিনস্স ৰচনং, সোতুকামা মহাজনা;

দেৰদানৰগন্ধব্বা, ব্রহ্মানোচ মহিদ্ধিকা.

৯. সমণব্রাহ্মণা চাপি, নমস্সিসুং কতঞ্জলী;

নমো তে পুরিসাজঞ্ঞ, নমো তে পুরিসুত্তম.

১০. খত্তিযেন মহাদানং, দিন্নং সত্তাহকম্পি [সত্তাহকংপিতো ইতিপিকত্থচি] নো;

সোতুকামা ফলং তস্স, ব্যাকরোহি মহামুনে.

১১. ততো অৰোচ ভগৰা, সুণোথ মম ভাসিতং;

অপ্পমেয্যম্হি বুদ্ধস্মিং, গুণম্হি সুপ্পতিট্ঠিতা.

১২. দক্খিণা দাযকং পত্ৰা, অপ্পমেয্যফলাৰহা;

অপি চে স মহাভোগো, ঠানং পত্থেতি মুত্তমং.

১৩. লাভী ৰিপুললাভীনং, যথা ভিক্খু সুদস্সনো;

তথাহংপি ভৰেয্যন্তি, লচ্ছতে তং অনাগতে.

১৪. সতসহস্সিতো কপ্পে, ওক্কাককুলসম্ভৰো;

গোতমোনাম নামেন, সত্থা লোকে ভৰিস্সতি.

১৫. তস্স ধম্মেসু দাযাদো, ওরসো ধম্মনিম্মিতো;

সীৰলি নাম নামেন, হেস্সতি সত্থুসাৰকো.

১৬. তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসূপগো অহং.

১৭. ততোপরস্মিংসমযে, বারাণসিপুরুত্তমে;

সেট্ঠিপুত্তো অহং আসিং, অড্ঢপ্পত্তো মহাধনো.

১৮. সহস্সমত্তে পচ্চেক, নাযকে চ নিমন্তিয;

মধুরেনন্নপানেন, সন্তপ্পেসিংতদাদরো.

১৯. ততো চুতো ছকামগ্গে, অনুভোসিংমহাযসং;

দেৰচ্ছরাপরিৰুতো, পাসাদে রতনামযে.

২০. এৰং অচিন্তিযা বুদ্ধা, বুদ্ধধম্মা অচিন্তিযা;

অচিন্তিযে পসন্নানং, ৰিপাকোপি অচিন্তিযো.

২১. একনৰুতিতো কপ্পে, ৰিপস্সীনাম নাযকো;

উপ্পজ্জি চারুনযনো, সব্বধম্মৰিপস্সকো.

২২. তদাহং বন্ধুমতিযা, কুলস্সঞ্ঞতরস্স চ;

দযিতো পত্থিতো পুত্তো, আসিং কম্মন্তব্যাৰটো.

২৩. তদা অঞ্ঞতরো পূগো, ৰিপস্সিস্স মহেসিনো;

পরিৰেণং অকারেসি, মহন্ত মিতি ৰিস্সুতং.

২৪. নিট্ঠিতে চ মহাদানং, দদং খজ্জকসংযুতং;

নৰং দধি মধুঞ্চেৰ, ৰিচিনং ন চ মদ্দস.

২৫. তদাহং তং গহেত্ৰান, নৰং দধি মধুম্পিচ,

কম্মসামিঘরং গচ্ছং, তমেনং [তমেসং ইতিসব্বত্থ] দান মদ্দসং.

২৬. সহস্সম্পি চ দত্ৰান, ন লতিংসু চ তং দ্ৰযং;

ততো এৰং ৰিচিন্তেসিং, নেতং হেস্সতি ওরকং.

২৭. যথা ইমে জনা সব্বে, সক্করোন্তি তথাগতং;

অহম্পি কারং কস্সামি, সসঙ্ঘে লোকনাযকে.

২৮. তদাহমেৰং চিন্তেত্ৰা, দধিংমধুঞ্চ একতো;

যোজেত্ৰা লোকনাথস্স, সসঙ্ঘস্স অদাসহং.

২৯. তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংস মগঞ্ছহং.

৩০. পুনাহং বারাণসিযং, রাজা হুত্ৰা মহাযসো;

সত্তুকস্স তদা রুদ্ধো, দ্ৰাররোধং অকারযিং.

৩১. ততো সপত্তিনো [সম্পত্তিনো; সপত্তানো ইতিচকত্থচি] রুদ্ধা, একাহং রক্খিতা অহুং;

ততো তস্স ৰিপাকেন, পাপুণিং নিরযং ভুসং.

৩২. পচ্ছিমে চ ভৰে দানি, জাতোহং কোলিযে পুরে;

সুপ্পৰাসা চ মে মাতা, মহালি লিচ্ছৰী পিতা.

৩৩. খত্তিযে পুঞ্ঞকম্মেন, দ্ৰাররোধস্স ৰাহসা;

সত্তমাসে সত্তৰস্সে, ৰসিংকুচ্ছিম্হি দুক্খিতো.

৩৪. সত্তাহং দ্ৰারমূল়্হোহং, মহাদুক্খসমপ্পিতো;

মাতা মে ছন্দদানেন, এৰ মাসি সুদুক্খিতা.

৩৫. সুৰত্থিতোহং নিক্খন্তো, বুদ্ধেন অনুকম্পিতো;

নিক্খন্তদিৰসেযেৰ, পব্বজিং অনগারিযং.

৩৬. উপজ্ঝা সারিপুত্তো মে, মোগ্গল্লানো মহিদ্ধিকো;

কেসে ওরোপযন্তো মে, অনুসাসি মহামতি.

৩৭. কেসেসু ছিজ্জমানেসু [ছন্নমনেসু ইতিপিকত্থচি], অরহত্তমপাপুণীং;

দেৰো নাগা মনুস্সা চ, পচ্চযানু পনেন্তি মে.

৩৮. পদুমুত্তরনামঞ্চ, ৰিপস্সিংচ ৰিনাযকং;

সংপূজযিং পমুদিতো, পচ্চযেহি ৰিসেসতো.

৩৯. ততো তেসং ৰিপাকেন, কম্মানং ৰিপুলুত্তমং;

লাভং লভামি সব্বত্থ, ৰনে গামে জলে থলে.

৪০. রেৰতং দস্সনত্থায, যদা যাতি ৰিনাযকো;

তিংসভিক্খুসহস্সেহি, সহ লোকগ্গনাযকো.

৪১. তদা দেৰো পনীতেহি [পণীতেহি ইতিসব্বত্থ], মমত্থায মহামতি;

পচ্চযেহি মহাৰীরো, সসঙ্ঘো লোকনাযকো.

৪২. উপট্ঠিতো মযা বুদ্ধো, গন্ত্ৰা রেৰতমদ্দস;

ততো জেতৰনং গন্ত্ৰা, এতদগ্গে ঠপেসিমং.

৪৩. লাভীনং সীৰলি অগ্গো, মম সিস্সেসু ভিক্খৰো;

সব্বেলোকহিতো সত্থা, কিত্তযী পরিসাসুমং.

৪৪. কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

৪৫. স্ৰাগতং ৰত মে আসি, বুদ্ধসেট্ঠস্স সন্তিকং;

তিস্সো ৰিজ্জা অনুপ্পত্তো, কতং বুদ্ধস্স সাসনং.

৪৬. পটিসম্ভিদা চতস্সোপি, ৰিমোক্খা পিচ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনন্তি.

ইত্থং সুদং আযস্মা সীৰলিত্থেরো ইমা গাথাযো অভাসিত্থাতি.

৪৭. সুত্ৰান এতং চরিতং মহব্ভুতং,

পুঞ্ঞানুভাৰঞ্চ সিরিং সিরীমতং;

হিত্ৰা কুসীতং কুসলং করোথ,

কামাত্থ কামং ভৰভোগনিব্বুতিং.

সীৰলিত্থেরস্স ৰত্থুং দসমং.

যক্খৰঞ্চিতৰগ্গো ততিযো.