নমো তস্স ভগৰতো অরহতো সম্মাসম্বুদ্ধস্স.

রসৰাহিনী

পণামাদিকথা

১. সত্থুপ্পসত্থচরণং সরণং জনানং,

ব্রহ্মাদিমোল়ি মণিরংসি সমাৰহন্তং,

পঙ্কেরুহাভমুদুকোমলচারুৰণ্ণং;

ৰন্দামি চক্কৰরলক্খণমাদধানং.

২. সিদ্ধং জিনেন চিরকালমতন্দিতেন,

যং ভাৰকো সমধিগচ্ছতি খেমমগ্গং;

যং কপ্পরুক্খ রুচিদান মণিৰ ভাতি,

তং ধম্মমগ্গ মসমং পণমামি নিচ্চং.

৩. সন্তিন্দ্রিযং সুগতসূনুৰরং ৰিসুদ্ধং,

যং দক্খিণেয্যমতদং সুচিপুঞ্ঞখেত্তং;

তাণেসিনং সরণমুজ্ঝিতসব্বদুক্খং,

ৰন্দামি সঙ্ঘ মনঘং সিরসা মহগ্ঘং.

৪. যম্পত্তমেত্থ রতনত্তযথোমনেন,

পুঞ্ঞেন তেন দুরিতং সকলং পণুজ্জ,

ৰক্খামহং সুমধুরং রসৰাহিনিন্তং,

ভো ভো সুণন্তু সুজনা ভিমুদাৰহা সা.

৫. তত্থতত্থূপপন্নানি, ৰত্থূনি অরহা পুরে;

অভাসুং দীপভাসায, ঠপেসুং তং পুরাতনা.

৬. মহাৰিহারে তঙ্গুত্ত, ৰঙ্কপরিৰেণৰাসিকো;

রট্ঠপালোতি নামেন, সীলাচার গুণাকরো.

৭. হিতায পরিৰত্তেসি, পজানং পাল়িভাসতো;

পুনরুত্তাদিদোসেহি, তমাসি সব্বমাকুলং;

অনাকুলং করিস্সামি, তং সুণাথ সমাহিতা.

৮. ৰিতরাগা পুরে ৰোচুং, যস্মা তস্মা হি ভাসিতং;

এতমাদরণীযঞ্হি, সাধু সাধূহি সব্বদাতি.

জম্বুদীপুপ্পত্তি ৰত্থূনি.

ধম্মসোণ্ডকৰগ্গো

১. ধম্মসোণ্ডকস্স ৰত্থুম্হি অযমানুপুব্বীকথা

তত্থ তেসং ৰত্থূন মুপ্পত্তিযো দ্ৰিধা ভৰন্তি জম্বুদীপে সীহল়দীপেচাতি, তত্থ জম্বুদীপে তাল়ীস, সীহল়দীপে তেসট্ঠি, তেসু তাৰ জম্বুদীপুপ্পত্তিৰত্থূনি আৰি ভৰিস্সন্তি, ততোপি ধম্মসোণ্ডকস্স ৰত্থু আদি, কথং, অম্হাকং কির ভগৰতো পুব্বে ইমস্মিংযেৰ ভদ্দকপ্পে কস্সপোনাম সত্থা লোকে উদপাদি, তস্স খো পন ভগৰতো সাসনন্তরধানতো ন চিরেনেৰ কালেন অম্হাকং বোধিসত্তো বারাণসীরঞ্ঞো অগ্গমহেসিযা কুচ্ছিস্মিং নিব্বত্তি, তস্সু প্পত্তি কালসমনন্তরমেৰ সব্বসত্তানং মনসি ধম্মসঞ্ঞা উদপাদি, তস্মাস্স ধম্মসোণ্ডোতিনাম মকংসু, সো পনেসো কুমারো মহন্তেন পরিৰারেন ৰড্ঢেন্তো সব্বসিপ্পেসু নিপ্ফত্তিং পত্ৰা পিতরা উপরজ্জেন পূজিতো হুত্ৰা দানাদযো দসকুসলকম্মপথে পূরেন্তো পিতুঅচ্চযেনামচ্চেহি রজ্জেনাভিসিঞ্চিতো অহোসি, সো পনেস ধম্মসোণ্ডকমহারাজা দেৰনগরসদিসে বারাণসীনগরে চক্কৰত্তিসদিসং বারাণসীরজ্জং কারেন্তো মাসদ্ধমাসচ্চযেন সিরিসযনগতো এৰং চিন্তেসি, মমেৰং রজ্জসিরিমনুভৰনং ন সোভতি ধম্মৰিযোগেন, দিৰাকর ৰিরহিতো নভো ৰিযাতিআদিনা নানাকারণং চিন্তেসি, তেনেত্থ.

১. পুঞ্ঞেন সীলাদিমযেন পুব্বে,

কতেন পত্তোস্মি অতন্দিতেন,

মসক্কসারে ৰিয দেৰরাজা;

রাজত্তমিদ্ধে পুরমুত্তমম্হি.

২. রূপেন হারীনযনুস্সৰেন,

সদ্দেন সম্মা সৰণামতেন,

গন্ধেন ঘানুস্সৰসোভনেন,

রসঞ্ঞপুঞ্ঞেন রসেনচাপি.

৩. ফস্সেন গত্তস্স সুফস্সদেন,

সমিদ্ধিপত্তোস্মি মহিদ্ধিকোহং,

নেৰেত্তকেনেৰ পমাদভাৰ,

মা পজ্জিতুং যুত্তরূপন্তি ঞত্ৰা.

৪. দস্সামি অঙ্গঅপি জীৰিতঞ্চ,

ধঞ্ঞং ধনং চাপি পসন্নচিত্তো,

সোস্সামি ধম্মং সিৰমাদধানং,

জিনেরিতং জাতিজরাপহাণং.

৫. ন সোভতি যথাকাসং, জলং ধামপতিংৰিনা,

রজ্জকরণং তথা ময্হং, ৰিনা ধম্মা ন সোভতি.

৬. ন সোভতি হথা রত্তি, নিসানাথং ৰিনা সদা,

রজ্জকরণং তথা ময্হং, ৰিনা ধম্মা ন সোভতি.

৭. অলঙ্কতোপি চে হত্থী, ৰিনা দাঠা ন সোভতি,

রজ্জকরণং তথা ময্হং, ৰিনা ধম্মা ন সোভতি.

৮. যথা কল্লোলমালীযং,

ৰিনা ৰেলা ন সোভতি,

রজ্জকরণং তথা ময্হং,

ৰিনা ধম্মা ন সোভতি.

৯. যথা সুমণ্ডিতো রাজা,

কুপটো নেৰ সোভতি,

রজ্জকরণং তথা ময্হং,

ৰিনা ধম্মা ন সোভতি.

১০. ধম্মমেৰ সুণিস্সামি, ধম্মে মে রমতী মনো,

ন হি ধম্মা পরং অত্থি, ধম্মমূলং তিসম্পদন্তি.

এৰং চিন্তেত্ৰা পাতোৰ সিরিগব্ভা নিক্খম্ম সুসজ্জিতে সমুস্সিতসেতচ্ছত্তে রাজপল্লেঙ্কে অমচ্চগণ পরিৰুতো নিসীদি দেৰরাজাৰিয ৰিরোচমানো, নিসিন্নো পন রাজা অমচ্চে এৰমাহ, যো পনেত্থ ভোন্তো বুদ্ধভাসিতেসু ধম্মেসু কিঞ্চিধম্মং জানাতি, সো ভাসতু, সোতুমিচ্ছামিধম্মন্তি, তে সব্বেপি মযং দেৰ ন জানামাতি আহংসু, তং সুত্ৰা অ ন ত্ত ম নো রাজা এৰং চিন্তেসি, যন্নূনাহং হত্থিক্খন্ধে সহস্সং ঠপেত্ৰা নগরে ভেরিংচরাপেয্যং, যং অপ্পেৰনাম কোচি ধনলোভেন চাতুপ্পদিকাযপি গাথায ধম্মং দেসেয্য. তং মে দীঘরত্তং হিতায সুখায ভৰিস্সতীতি, ততো সো তথা কত্ৰাপি ধম্মদেসকং অলভন্তো পুন দ্ৰিসহস্সং তিচতুপঞ্চসহস্সন্তিযাৰকোটিপ্পকোটিংদম্মীতি, ততো গাম নিগম জনপদে, ততো সেট্ঠিট্ঠানং সেনাপতি উপরাজট্ঠানা দযোপি, পুন সেতচ্ছত্তং দম্মি, রাজৰেসং পহায অত্তানং দাসং সাৰেত্ৰা ধম্মদেসেন্তস্স দম্মিতি ৰত্ৰা ভেরি চরাপেত্ৰাপি ধম্ম দেসকমলভিত্ৰা সংৰিগ্গো কিম্মে ধম্মৰিযোগেন রজ্জেনাতি অমচ্চানং রজ্জং নীয্যাতেত্ৰা সদ্ধম্মগৰেসকো ধম্মসোণ্ডকমহারাজা মহাৰনং পাৰিসি গাম নিগম রাজধানি পরম্পরায, তেনেত্থ.

১১. পুরে ভেরিং চরাপেত্ৰা,

ধম্মসোণ্ডো নরাধিপো;

সদ্ধম্মজ্ঝেসকং সত্থু,

অলদ্ধা ধনকোটিহি.

১২. দাসো হোমি পহাযাহং,

রাজত্তং দেসকস্স মে;

ইচ্চাহ সো মহীপালো,

অহো ধম্মেসু লোলতা.

১৩. রজ্জং নীয্যাতযিত্ৰান, অমচ্চানং মনোরমং,

ৰনং পাৰিসি সো রাজা, গৰেসং ধম্মমুত্তমন্তি.

মহাৰনং পৰিট্ঠক্খণে পন মহাসত্তস্স পুঞ্ঞতেজেন সক্কস্সাসনং উণ্হাকারং দস্সেসি, অথ দেৰরাজা চিন্তেসি অকামং মে পণ্ডুকম্বল সিলাসনং উণ্হমহোসি, কিন্নুখো কারণন্তি লোকং ওলোকেন্তো সক্কো দেৰরাজা ধম্মসোণ্ডক মহারাজানং সকলজম্বুদীপং ৰিচিনিত্ৰা সদ্ধম্মজ্ঝেসকং অলভিত্ৰা ৰনং পৰিট্ঠভাৰং অদ্দস, ধম্মসোণ্ডকমহারাজা সদ্ধম্মত্থায রজ্জ ধন বন্ধু জীৰিতম্পি পহায অরঞ্ঞং পৰিট্ঠো, ন সো ৰতাযং যোৰা সোৰা সত্তো, ইমস্মিংযেৰ কপ্পে বুদ্ধো ভৰিস্সতি, বুদ্ধবোধিসত্তো চাযং অজ্জেৰ মহারঞ্ঞং পৰিট্ঠো সদ্ধম্মং অলদ্ধা মহাদুক্খং পাপুণেয্য, ন চেতং যুত্তং, অজ্জ মযা তত্থ গন্থব্বং ধম্মামতরসেন তমভিসিঞ্চিত্ৰা রজ্জে পহিট্ঠাপেতুন্তি চিন্তেত্ৰা অত্তভাৰং ৰিজহিত্ৰা ভযানকং মহন্তং রক্খসৰেসং নিম্মিণিত্ৰা মহাসত্তাভিমুখো অৰিদূরে অত্তানং দস্সেসি, তেনেত্থ.

১৪. ব্যগ্ঘচ্ছসীহমহিসো রগহত্থিদীপি,

মিগাকুলং কণ্টকসেলরুক্খং;

নরানমিন্দো পৰিসিত্ৰকাননং,

ইতোচিতো ৰিব্ভমি ধম্মকামো.

১৫. তস্সানুভাৰেন পুরিন্দদস্স,

সিলাসনং উণ্হমহোসি কামং;

তেনেৰ সো লোকমুদিক্খমানো,

অদ্দক্খি ধীরং ৰিপিনে চরন্তং.

১৬. মযজ্জ তং ধম্মরসেন সম্মা,

সন্তপ্পযিত্ৰা গমনং ৰরন্তি;

মন্ত্ৰা সুভীমঞ্জনকূটৰণ্ণং,

মহামুখং নিগ্গত ভীমদাঠং.

১৭. দিত্তগ্গিসঙ্কাস ৰিসালনেত্তং,

মজ্ঝেন ভগ্গং চিপিটগ্গনাসং;

খরতম্বদাঠিং ঘনমস্সুৰন্তং,

নীলোদরং গজ্জিতভীমঘোসং.

১৮. করোরুহং তিক্খসলোহিতাযতং,

ৰিসালধোতাযতখগ্গহত্থং;

গদাযুধেনঙ্কিতমঞ্ঞবাহুং,

দট্ঠোট্ঠভীমং সৰলীললাটং.

১৯. মনুস্সমংসাদনরত্তপানং,

ভযানকং কক্খলযক্খৰণ্ণং;

সুমাপযিত্ৰান ৰনন্তরস্মিং,

দস্সেসি অত্তং স নরাধিপস্সাতি.

অথ মহাসত্তো অত্তনো অৰিদূরে ঠিতং রক্খসং অদ্দক্খি, তং দিস্ৰানাস্স ভযংৰা ছম্ভিতত্তংৰা চিত্থুত্রাসমত্তংৰা নাহোসি, কিমত্র চিন্তেসি, অপিনাম এৰরূপো পিরক্খসো ধম্মং জানেয্য, যন্নূনাহং তস্স সন্তিকে ধম্মং সুণিস্সামি, তম্মে দীঘরত্তং হিতায সুখায ভৰিস্সতীতি চিন্তেসি. চিন্তেত্ৰা চপন অজ্জ মযা তমুপসঙ্কম্ম পুচ্ছিতং ৰট্টতীতি গন্ত্ৰা রক্খসেন সদ্ধিং সল্লপন্তো আহ.

২০. অস্মিং ৰনস্মিং তরুসণ্ড মণ্ডিতে;

সুফুল্লিতানেকলতাকুলাকুলে;

অধিগ্গহীতো সি মহানুভাৰ,

পুচ্ছামি তং দেৰ ৰদেহি কঙ্খং.

২১. ধম্মং গৰেসং ৰনমাগতোম্হি,

পহায রজ্জং অপি ঞাতিসঙ্ঘং;

জানাসি চে সম্ম ৰদেহি ময্হং,

একম্পি গাথং সুগতেন দেসিতং.

ততো যক্খো আহ.

২২. ধম্মং পজানামহমেকদেসং,

জিনেরিতং সাধুতরং রসানং,

দেসেমি চেহং তৰ ধম্ম মগ্গং,

তুৰঞ্হি কিং কাহসি দেসকস্সাতি.

অথ মহাসত্তো আহ.

২৩. রজ্জে ঠিতো অস্সমহং সচে ভো,

অনপ্পরূপং পকরোমি পূজং;

ইদানি একো ৰনমজ্ঝপত্তো,

করোমি কিং দেহমিমং ঠপেত্ৰা.

২৪. যদিচ্ছসি ত্ৰং মম মংসলোহিতং,

করোমহং সঙ্গহমজ্জ তেন,

ন চত্থি অঞ্ঞং তৰ অচ্চনীযং,

দেসেহি ধম্মং সুগত প্পসত্থন্তি.

ততো যক্খো আহ.

২৫. ভুত্ৰান মংসং সুহিতোৰ সন্তো,

হন্ত্ৰা পিপাসং রুধিরং পিৰিত্ৰা;

ধম্মং কথেতুং পভৰামি তুয্হং,

ৰত্তুং ন সক্কোমি খুদাপরেতোতি.

অথ মহাসত্তো আহ.

২৬. ভুত্ৰা তুৰং মং পথমঞ্হি যক্খ,

পচ্ছা তু দেসেস্সসি কস্স ধম্মং;

ধম্মস্স ময্হং তৰ মংসলাভং,

ত্ৰমেৰ জানাহি যথা ভৰেয্যাতি.

এৰং ৰুত্তে সক্কো দেৰানমিন্দো সাধু মহারাজ অহমেৰ যুত্তং জানামীতি ৰত্ৰা তস্সাৰিদূরে তিগাৰুতুব্বেধং অঞ্জনৰণ্ণং মহন্তং পব্বতং মাপেত্ৰা মহারাজ ইমমারুয্হ পব্বতমুদ্ধনিট্ঠিতো মম মুখে পততু, অহং পতন্থস্স তে ধম্মং দেসেস্সামি, এৰং সন্তে তুয্হং ধম্মপটিলাভো, ময্হংচ মংসপটিলাভো ভৰিস্সতীতি. তং সুত্ৰা মহাসত্তো অনমতগ্গে সংসারে সংসরতো মে সীহব্যগ্ঘচ্ছমচ্ছকচ্ছপৰিহঙ্গাদীনং ভক্খভূতস্স জাতীসু পমাণং নত্তি, অজ্জ মযা সম্বুদ্ধস্স ধম্মত্থায জীৰিতং পরিচ্চজিতুং ৰট্টতীতি চিন্তেত্ৰা এৰমাহ.

২৭. সংসারৰট্টেসু ৰিৰট্টমানা,

পপ্পোন্তি দুক্খং জনতা অনেকা;

এতঞ্হি ভো অত্তনো ৰা পরস্স,

অত্থায নাহোসি অহোসি তুচ্ছং.

২৮. ত্ৰমদিন্নহারী তিচ পারদারিকো,

পাণাতিপাতীসি মুসা অভাসি;

ত্ৰ মজ্জপাযীতি অকাসি দোসং,

পগ্গয্হ দুক্খং বহুসো দদন্তি.

২৯. এতঞ্হি ভো অত্তনো ৰা পরস্স,

অত্থায নাহোসি অহোসি তুচ্ছং;

রুক্খা পপাতা পপতিত্ৰকেচি,

দুব্বন্ধিযা দুগ্গৰিসাদনেন.

৩০. ব্যাধীহি নানাখরৰেদনাহি,

মরন্তি সত্তা উতুৰেদনাহি;

এতঞ্হি ভো অত্তনো ৰা পরস্স,

অত্থায নাহোসি অহোসি তুচ্ছং.