২৮. কপণস্স ৰত্থুম্হি অযমানুপুব্বীকথা

অম্হাকং ভগৰতি পরিনিব্বুতে বারাণসীনগরৰাসী একো দুগ্গতপুরিসো পরগেহে ভতিংকত্ৰা জীৰিকং কপ্পেতি, তস্মিং সমযে নগরৰাসিনো যেভুয্যেন তস্মিং তস্মিং ঠানে মণ্ডপাদযো কারাপেত্ৰা মহাদানং দেন্তি, তং দিস্ৰা দুগ্গতো এৰং চিন্তেসি, অহং পুব্বে অকতপুঞ্ঞত্তা পরগেহে ভতিং কত্ৰা কিচ্ছেন কসিরেন জীৰামি. নিৰাসনপারুপনম্পি ৰাসট্ঠানমত্তম্মি দুক্খতো লভামি. ইদানি বুদ্ধুপ্পাদো ৰত্ততি ভিক্খুসঙ্ঘোপি.

সব্বে ইমে দানং দত্ৰা সগ্গমগ্গং সোধেন্তি. মযাপি দানং দাতুং ৰট্টতি. তম্মে দীঘরত্তং হিতায সুখায ভৰিস্সতি. অপি চ ময্হং তণ্ডুলনালিমত্তম্পি নত্থি, অকতৰীরিযেন তং মত্থকং পাপেতুং ন সক্কা, এতদত্থাযাহং উয্যোগং কত্ৰা দানং দস্সামীতি চিন্তেত্ৰা ততো পট্ঠায ভতিং পরিযেসমানো গন্ত্ৰা তত্থ তত্থ ভতিং কত্ৰা লদ্ধনিৰাপে চ ভিক্খাচরিযায লদ্ধতিলতণ্ডুলাদযো চ একত্থ সংহরিত্ৰা মনুস্সে সমাদাপেত্ৰা তস্মিং মণ্ডপং কারাপেত্ৰা ৰনকুসমাদীহি তং অলঙ্করিত্ৰা ভিক্খূ নিমন্তেত্ৰা মণ্ডপে নিসীদাপেত্ৰা সব্বেসং পাযসং [পাযাসং ইতিসব্বত্থ] পটিযাদেত্ৰা ভোজেসি. অথ সো মরণকালে অত্তনা কতং তং দানৰরং অনুস্সরি. সো তেন কুসলকম্মেন সুত্তপ্পবুদ্ধো ৰিয দেৰলোকে নিব্বত্তি. তস্মিং তেন কতপুঞ্ঞানুরূপং মহন্তং কনকৰিমানং নিব্বত্তি. সমন্তা তিগাৰুতট্ঠানে দেৰতা নানা ৰিধানি তুরিযানি গহেত্ৰা উপহারং করোন্তি. নিচ্চং দেৰচ্ছরাসহস্সানি [দেৰচ্ছরাসহস্সং ইতিসব্বত্থ] তং পরিৰারেত্ৰা তিট্ঠন্তি. এৰং সো মহন্তং সম্পত্তিং অনুভৰতি. অথেকদিৰসং সুৰণ্ণসেলৰিহারৰাসী মহাসঙ্ঘরক্খিতত্থেরো পত্তপটিসম্ভিদো দেৰচারিকং চরমানো তং দেৰপুত্তং অনুপমায দেৰসম্পত্তিযা ৰিরোচমানং দিস্ৰা উপসঙ্কম্ম ঠিতো তেন কতকম্মং পুচ্ছি. সোপিস্স যথাভূতং ব্যাকাসি, তেনত্থ.

১. সব্বসোৰণ্ণযো আসি, পাসাদো রতনামযো;

সোণ্ণসিঙ্গসতাকিণ্ণো, দুদ্দিক্খো চ পভস্সরো.

২. কূটাগার সতাকিণ্ণো, সোণ্ণমালাসমাকুলো;

মুত্তাকলাপালম্বন্তি, তত্থ তত্থ মনোরমা.

৩. নেকগব্ভসতাকিণ্ণো, সযনাসনমণ্ডিতো;

ৰিভত্তো ভব্বভাগেহি, পুঞ্ঞৰড্ঢকিনা কতো.

৪. নচ্চন্তি পমদা তত্থ, ভেরিমণ্ডলমজ্ঝগা;

গাযন্তি কাচি কীল়ন্তি, ৰাদেন্তি কাচি তন্তিযো.

৫. ততো তিগাৰুতে ঠানে, পাসাদস্স সমন্ততো;

সহচ্ছরা দেৰপুত্তা, গহেত্ৰা আততাদযো.

৬. মোদন্তি পরিৰারেত্ৰা, নচ্চগীতাদিনা সদা;

উল্লঙ্ঘন্তিচ সেলেন্তি, সিলাঘন্তি সমন্ততো.

৭. এৰং মহিদ্ধিকো দানি, তুৰং ৰন্দোৰ ভাসতি;

পুচ্ছামি তং দেৰপুত্ত, কিং কম্মমকরী পুরা.

দেৰপুত্তো আহ.

৮. অহোসিং দুগ্গতো পুব্বে, বারাণসীপুরুত্তমে;

দানং দেন্তি নরা তত্থ, নিমন্তেত্ৰান ভিক্খৰো.

৯. জীৰন্তো ভতিযা সোহং, দানং দেন্তে মহাজনে;

তুট্ঠহট্ঠে পমুদিতে, এৰং চিন্তেসহং তদা.

১০. সম্পন্নৰত্থালঙ্কারা, দানং দেন্তি ইমে জনা;

পরত্থপি পহট্ঠাৰ, সম্পত্তিমনুভোন্তি তে.

১১. বুদ্ধুপ্পাদো অযং দানি, ধম্মো লোকে পৰত্ততি;

সুসীলা দানি ৰত্তন্তি, দক্খিণেয্যা জিনোরসা.

১২. অনাৰট্ঠিতো [অৰট্ঠিতোচ; অন্ধট্ঠিতোচ ইতিপিকত্তচি] সংসারো, অপাযা খলু পূরিতা;

কল্যাণৰিমুখা সত্তা, কামং গচ্ছন্তি দুগ্গতিং.

১৩. ইদানি দুক্খিতো হুত্ৰা, জীৰামি কসিরেনহং;

দলিদ্দো কপণো দীনো, অপ্পভোগো অনালযো.

১৪. ইদানি বীজং রোপেমি, সুখেত্তে সাধুসম্মতে;

অপ্পেৰনাম তেনাহং, পরত্থ সুখিতো সিযা.

১৫. ইতি চিন্তিয ভিক্খিত্ৰা, ভতিং কত্ৰান নেকধা;

মণ্ডপং তত্থ কারেত্ৰা, নিমন্তেত্ৰান ভিক্খৰো.

১৬. আযাসেন অদাসাহং, পাযসং অমতায সো;

তেন কম্মৰিপাকেন, দেৰলোকে মনোরমে.

১৭. জাতোম্হি দিব্বকামেহি, মোদমানো অনেকধা;

দীঘাযুকো ৰণ্ণৰন্তো, তেজস্সীচ অহোসহন্তি.

এৰং দেৰপুত্তো অত্তনা কতপুঞ্ঞকম্মং ৰিত্তারেন কথেসি, থেরোপি মনুস্সলোকং আগন্ত্ৰা মনুস্সানং অত্তনা পচ্চক্খতো দিট্ঠদিব্বসম্পত্তিং পকাসেসি. তং সুত্ৰা মহাজনো কুসলকম্মং কত্ৰা যেভুয্যেন সগ্গে নিব্বত্তোতি.

১৮. অনালযো দুগ্গতদীনকোপি,

দানং দদন্তো ধিগতো ৰিসেসং;

সগ্গা পৰগ্গং যদি পত্থযৰ্হো,

হন্ত্ৰান মচ্ছেরমলং দদাথাতি.

কপণস্স ৰত্থুং অট্ঠমং.