২৫. কৰীরপট্টন ৰত্থুম্হি অযমানুপুব্বীকথা

জম্বুদীপে কির চোল়রট্ঠে কাৰীরপট্টনং নাম অহোসি. তত্থ মাহিস্সরিকা বহূ মিচ্ছাদিট্ঠিকা ৰসন্তি. তত্থেকস্মিং দেৰালযে চিত্তকম্মং করোন্তা একস্মিং ফলকে ইস্সরস্স ওনমিত্ৰা ৰন্দনাকারং ভগৰতো রূপং অকংসু. তস্মিং সমযে তত্থ বহূ উপাসকা তং দেৰকুলং গন্ত্ৰা তত্থ তত্থ চিত্তকম্মানি ওলোকেন্তা তস্মিং ফলকে তং চিত্তকম্মং অদ্দসংসু. দিস্ৰান তে অহো অম্হেহি অপস্সিতব্বং পস্সিতং. সদেৰকে লোকে সমারকে সব্রহ্মকে সস্সমণব্রাহ্মণিযাসদেৰমনুস্সায পজায চ অপরিমাণেসু চক্কৰাল়েসু ভগৰতো উত্তরিতরং ঠপেত্ৰা সমসমোপি নত্থি. সকলেহি সত্তনিকাযেহি ৰন্দনীযো পূজনীযো ভগৰা. অননুরূপং তস্স এতেহি কতংতি রোদন্তা পরিদেৰন্তা রাজদ্ৰারং গন্ত্ৰা উগ্ঘোসেসুং, তং সুত্ৰা রাজা তে পক্কোসাপেত্ৰা কস্মা তুম্হে উগ্ঘোসেথাতি পুচ্ছি, তে এৰ মাহংসু. দেৰ অম্হাকং ভগৰা দেৰাতিদেৰো সক্কাতিসক্কো ব্রহ্মাতিব্রহ্মা মেরুৰ অচলো সাগরো গম্ভীরো আকাসোৰ অনন্তো পথৰীৰ পত্থটোতিআদীহি ভগৰতো গুণং ৰণ্ণেসুং. তেন ৰুত্তং অপদানে.

১. বত্তিংসলক্খণধরো, সুনক্খত্তোৰ চন্দিমা;

অনুব্যঞ্জনসম্পন্নো, সালরাজাৰ ফুল্লিতো.

২. রংসিজালপরিক্খিত্তো, দিত্তোৰ কনকাচলো;

ব্যামপ্পভাপরিৰুতো, সতরংসি দিৰাকরো.

৩. সোণ্ণা ননো জিনৰরো, সমণীৰ সিলুচ্চযো;

করুণাপুণ্ণহদযো, ৰিৰট্টো ৰিয সাগরো.

৪. লোকৰিস্সুতকিত্তীৰ, সিনেরুৰ নগুত্তমো;

যসসা ৰিততো ধীরো, আকাসসদিসো মুনি.

৫. অসঙ্গচিত্তো সব্বত্থ, অনিলো ৰিয নাযকো;

পতিট্ঠা সব্বভূতানং, মহীৰ মুনিসুত্তমো.

৬. অনূপলিত্তো লোকেন, তোযেন পদুমং যথা;

কুৰাদগচ্ছদহনো, অগ্গিক্খন্ধোৰ সোভতি.

৭. অগদো ৰিয সব্বত্থ, কিলেসৰিসনাসকো;

গন্ধমাদনসেলোৰ, গুণগন্ধৰিভূসিতো.

৮. গুণানং আকরো ধীরো, রতনানংৰ সাগরো;

সিন্ধূৰ ৰনরাজীনং, কিলেসমলহারকো.

৯. ৰিজযীৰ মহাযোধো, মারসেনপ্পমদ্দনো;

চক্কৰত্তীৰ সো রাজা, বোজ্ঝঙ্গরতনিস্সরো.

১০. মহাভিসক্কসঙ্কাসো, দোসব্যাধিতিকিচ্ছকো;

সল্লকত্তো যথা ৰেজ্জা, দিট্ঠিগণ্ডৰিফালকো.

১১. সত্থা নো ভগৰা দেৰ, মহাব্রহ্মেহি ৰন্দিতো;

দেৰিন্দসুরসিদ্ধেহি, ৰন্দনীযো সদা দরা.

১২. সব্বেসু চক্কৰাল়েসু, যে অগ্গা যে চ পূজিতা;

তেসমগ্গো মহারাজ, ভগৰা নো পতাপৰাতি.

অযুত্তং দেৰ দেৰকুলেহি কতংতি আহংসু. তং সুত্ৰা রাজা ভো সব্বেপি মনুস্সা অত্তনো অত্তনো দেৰতানং মহন্তভাৰং কথেন্তি. তুম্হাকং পন সত্থুনো মহন্তভাৰং কথং অম্হাকং জানাপেথাতি, উপাসকা ন গরু ত্ৰং মহারাজ ফলকং আহরাপেত্ৰা সুদ্ধৰত্থেন ৰেঠেত্ৰা তং অত্তনো মুদ্দিকায লঞ্ছিত্ৰা সুরক্খিতসুগোপিতে একস্মিং দেৰকুলে ঠপেত্ৰা সত্তাহচ্চযেন আহরাপেত্ৰা তং ওলোকেথ, তদা নো সত্থুনো মহন্তানুভাৰং জানাথাতি আহংসু, অথ রাজা তেসং ৰুত্তনিযামেনেৰ কারাপেত্ৰা অন্তোদেৰকুলে ঠপেত্ৰা সব্বদ্ৰারানি পিদহিত্ৰা লঞ্ছেত্ৰা রক্খেয্যাথাতি নিযোজেসি. ততো তে উপাসকা সব্বে সন্নিপতিত্ৰা সত্তাহং দানং দেন্তা সীলং রক্খন্তা উপোসথকম্মং করোন্তা সব্বসত্তেসু মেত্তিং ভাৰেন্তা সব্বসত্তানং অত্তনা কতপুঞ্ঞেসু পত্তিং দেন্তা তিণ্ণং রতনানং পূজং করোন্তা এৰং উগ্ঘোসেসুং. অম্হাকং কতকুসলনিস্সন্দেন লোকে মহিদ্ধিকা মহানুভাৰা সব্বে দেৰা চ লোকং পালেন্তা চত্তারো মহারাজানো চ অম্হাকং সত্থুনো উপট্ঠানায [উপট্ঠায ইতিসব্বত্থ] ঠিতভাৰং দস্সেন্তূতি সচ্চকিরিযং অকংসু. অথ তেসং পুঞ্ঞানুভাৰেন তস্মিং খণে সক্কস্স দেৰরঞ্ঞো পণ্ডুকম্বলসিলাসনং উণ্হাকারং দস্সেসি. ততো সো মনুস্সলোকং ওলোকেন্তো মিচ্ছাদিট্ঠীহি কতং তং ৰিপ্পকারং দিস্ৰা সংৰিগ্গো আগন্ত্ৰা ইস্সরং ভগৰতো পাদে ৰন্দিত্ৰা সযিতাকারং কত্ৰা তং পৰত্তিং উপাসকানং কথেত্ৰা সকট্ঠানমেৰ অগমাসি. ততো সত্তমে দিৰসেপাতোৰ তে সব্বেপি রঞ্ঞো সন্তিকং গন্ত্ৰা ৰন্দিত্ৰা এৰমাহংসু. দেৰ ইস্সরো অম্হাকং ভগৰতো পাদে সিরসা ৰন্দিত্ৰা নিপন্নোতি. অথ রাজা তেসং কথং সুত্ৰা নগরে ভেরিং চরাপেত্ৰা মহাজনে সন্নিপাতেত্ৰা তেহি পরিৰুতো দেৰকুলং গন্ত্ৰা লঞ্ছং ভিন্দাপেত্ৰা দ্ৰারং ৰিৰরিত্ৰা ফলকং আহরাপেত্ৰা ৰেঠিতসাটকে মোচাপেসি. অথ রাজা চ মহাজনো চ তং মহন্তং পাটিহারিযং দিস্ৰা মিচ্ছাদিট্ঠিং পহায সব্বে সত্থুনো সরণ মগমংসু. অথ রাজা তং দেৰকুলং ভিন্দাপেত্ৰা মহন্তং রমণীযং ৰিহারং কারাপেত্ৰা যাৰজীৰং পুঞ্ঞকম্মং কত্ৰা দেৰলোকে নিব্বত্তি.

১৩. অনব্ভুতং সত্থু ধরীযমানে,

করোন্তি দিস্ৰা কুসলানি ইদ্ধিং;

যে তং মুনিন্দে পরিনিব্বুতম্হি,

করোন্তি পুঞ্ঞানি মহব্ভূতং যেতি.

কাৰীরপট্টনৰত্থুং পঞ্চমং.