২৬. চোরঘাতকৰত্থুম্হি অযমানুপুব্বীকথা

একস্মিং কির সমযে অম্হাকং ভগৰা সাৰত্থিযং উপনিস্সায জেতৰনে ৰিহরতি ধম্মদেসনায মহাজনস্স সগ্গমোক্খসম্পদং দদমানো. তস্মিংসমযে পঞ্চসতা চোরা অটৰিতো নগরং আগন্ত্ৰা রত্তিভাগে চোরকম্মং কত্ৰা তেন পুত্তদারে পোসেন্তি. অথেকদিৰসং চোরা চোরকম্মত্থায নগরং পৰিসন্তা নগরদ্ৰারে একং দুক্খিতং জনপদমনুস্সং পস্সিত্ৰা হম্ভো কত্থ ৰসতীতি পুচ্ছিংসু, সো অত্তজনা জনপদৰাসিভাৰং পকাসেসি. অথস্স তে কস্মা ভো ইমিনা দুক্খৰাসেন ৰসিস্সসি, এহি অম্হেহি সদ্ধিং চোরকম্মং করোন্তো ৰত্থালঙ্কারসম্পন্নো পুত্তদারং পোসেহি. ইমিনা কপণৰাসেন ন ৰসাতি আহংসু. সো পনিমে যুত্তং কথেন্তীতি তেসং ৰচনং সম্পটিচ্ছি. অথ তে এৰং সতি অম্হেহি সদ্ধিং আগচ্ছাহীতি ৰত্ৰা নং গহেত্ৰা অন্তোনগরং পৰিট্ঠা তত্থ তত্থ ৰিলুম্পন্তা চোরকম্মং অকংসু. তদা জানপদিকো লদ্ধৰিভৰো ইমমেৰ ৰরতরন্তি তেহি সদ্ধিং চোরকম্মং করোন্তো জীৰিকং কপ্পেসি, অথেকদিৰসং রাজপুরিসা কতকম্মে তে সব্বেৰ গহেত্ৰা পচ্ছাবাহং গাল়্হং বন্ধিত্ৰা কোসলরঞ্ঞো দস্সেসুং, রাজা তে দিস্ৰা এৰমাহ, ভণে তুম্হাকং অন্তরে যো এতেসং মারেত্ৰা জীৰিতক্খযং পাপেস্সতি, তস্স জীৰিতদানং দম্মীতি, তং সুত্ৰা তে চোরা সব্বে অঞ্ঞমঞ্ঞঞাতিসুহদসম্বন্ধভাৰেন তং ন ইচ্ছিংসু. সো পন জনপদৰাসী মনুস্সো অহমেতে সব্বে মারেস্সামীতি রঞ্ঞো ৰত্ৰা তেনানুঞ্ঞাতো তে সব্বে মারেসি. তং দিস্ৰা তুট্ঠো রাজা তস্স চোরঘাতকম্মং অদাসি. সো চোরে চ ৰজ্ঝপ্পত্তে চ মারেন্তো পঞ্চৰীসতিৰস্সানি ৰসন্তো অপরভাগে মহল্লকো অহোসি. অথ সো মন্দবলত্তা কতিপযপহারেনাপি চোরং মারেতুং ন সক্কোতি, রাজা তং ঞত্ৰা অঞ্ঞস্স চোরঘাতকম্মং অদাসি. অথ সো চোরঘাতকম্মা [চোরঘাতকম্ম ইতিপিকত্থচি] পরিহীনো অত্তনো গেহে ৰসতি. তদা অঞ্ঞতরো মনুস্সো মন্তং পরিৰত্তেত্ৰা নাসাৰাতেন মনুস্সমারণকমন্তং জানাতি. তথাহি হত্থপাদকণ্ণনাসসীসাদীসু যংকিঞ্চি ছেজ্জভেজ্জং কত্তুকামো মন্তং পরিৰত্তেত্ৰা নাসাৰাতং ৰিস্সজ্জেতি. তং তং ঠানং ছিজ্জতি ভিজ্জতি, এৰং মহানুভাৰো সো মন্তো, অথ সো তং পুরিসং উপট্ঠহিত্ৰা মন্তং লভিত্ৰা রঞ্ঞো সাসনং পেসেসি. অহং ইতো পুব্বে মহল্লকত্তা চোরানং হত্থপাদাদযো দুক্খেন ছেজ্জ ভেজ্জং করোমি, মারেতব্বেপি দুক্খেন মারেমি. ইদানি পনাহং তথা ন করোমি, মম মন্তানুভাৰেন ছেজ্জভেজ্জকম্মং করিস্সামীতি. রাজা তং সাসনং সুত্ৰা সাধূতি তং পক্কোসাপেত্ৰা ঠানন্তরং তস্সেৰ পাকতিক মকাসি. সো ততো পট্ঠায তং কম্মং করোন্তো পুন পঞ্চৰস্সানি অতিক্কামেসি. সো মহল্লকো খীণাযুকো দুব্বলো মরণমঞ্চপরাযণো হুত্ৰা মরণৰেদনাদুক্খেন মহন্তেন ভযানকেন সদ্দেন ৰিস্সরং ৰিরৰন্তো নিমীলিতেন চক্খুনা ভযানকং নরকগ্গিজালাপজ্জলন্তঅযকূটমুগ্গরধরে নিরযপালে চ পস্সন্তো নিপন্নো হোতি, ততো তস্স পটিৰিস্সকগেহে মনুস্সা তস্স ভযানকসদ্দসৰণেন গেহং ছট্টেত্ৰা পলাযিংসু. তস্মিং কির দিৰসে মহাসারিপুত্তত্থেরো দিব্বচক্খুনা লোকং ওলোকেন্তা তং চোরঘাতকং তদহেৰ কালংকত্ৰা নিরযে নিব্বত্তমানং দিস্ৰা মযি তত্থ গতে পনেস মযি পসাদেন সগ্গে নিব্বত্ততীতি ঞত্ৰা অজ্জ মযা তস্সানুগ্গহং কাতুং ৰট্টতীতি পুব্বণ্হসমযং নিৰাসেত্ৰা তস্স ঘরদ্ৰার মগমাসি. অথ সো থেরং দিস্ৰা কুদ্ধো কোপেন তটতটাযমানদেহো অজ্জ তং ৰিজ্ঝিত্ৰা ফালেত্ৰা মারেস্সামীতি নিপন্নোৰ মন্তং পরিৰত্তেত্ৰা নাসাৰাতং ৰিস্সজ্জেসি, থেরো তস্মিং খণে নিরোধসমাপন্নো নিরোধা ৰুট্ঠায সুরিযো ৰিয ৰিরোচমানো অট্ঠাসি, অথ সো থেরস্স তযো ৰারে তথেৰ কত্ৰা কিঞ্চি কাতুং অসক্কোন্তো অতিৰিয ৰিম্হিতচিত্তো থেরে চিত্তং পসাদেত্ৰা অত্তনো পটিযত্তং পাযসং থেরস্স দাপেসি, থেরো মঙ্গলং ৰড্ঢেত্ৰা ৰিহারমেৰ অগমাসি, চোরঘাতকো থেরস্স দিন্নদানং অনুস্সরন্তো তস্মিং খণে কালং কত্ৰা সগ্গে নিব্বত্তি. অহো ৰীতরাগানং বুদ্ধপুত্তানং আনুভাৰো. এৰং নরকে নিব্বত্তমানোপিস্স বলেন সগ্গে নিব্বত্তোতি. তথাহি.

১. দানং তাণং মনুস্সানং, দানং দুগ্গতিৰারণং;

দানং সগ্গস্স সোপানং, দানং সন্তিকরং পরং.

২. ইচ্ছিতিচ্ছিতদানেন, দানং চিন্তামণী ৰিয;

কপ্পরুক্খোৰ সত্তানং, দানং ভদ্দঘটোৰিয.

৩. সীলৰন্তস্স দানেন, চক্কৰত্তিসিরিম্পি চ;

লভন্তি সক্কসম্পত্তিং, তথা লোকুত্তরং সুখং.

৪. পাপকম্মেসু নিরতো, ঠিতোযং নরকাযনে [নরকাৰনে ইতিপিকত্থচি];

সারিপুত্তস্স থেরস্স, পিণ্ডপাতস্স ৰাহসা.

৫. অপাযং পরিৰজ্জেত্ৰা, নেকদুক্খসমাকুলং;

দেৰসঙ্ঘপরিব্বূল়্হো, গতো দেৰপুরং ৰরং.

৬. তস্মা সুখেত্তে সদ্ধায, দেথ দানানি কামদং;

দানং দেন্তেহি সীলম্পি, পালনীযংতিসুন্দরন্তি [পালনংচাতিসুন্দরং ইতিপিকত্থচি].

অথ ভিক্খূ ধম্মসভাযং সন্নিপতিত্ৰা নিসিন্না ভগৰন্তং পুচ্ছিংসু, কিংভন্তে সো পাপো চতূসু অপাযেসু কতরস্মিং নিব্বত্তোতি. অথ সত্থা অজ্জেস ভিক্খৰে সারিপুত্তস্স দিন্নদানানুভাৰেন দেৰলোকে নিব্বত্তো, তস্সেৰ নিস্সন্দেন অনাগতে পচ্চেকবুদ্ধো ভৰিস্সতীতি ব্যাকাসীতি.

৭. ভো সারিপুত্তে নিহিতপ্পদানং,

খণেন পাপেতি হি সগ্গমগ্গং;

তস্মা সুখেত্তেসু দদাথ দানং,

কামত্থ চে সগ্গমোক্খং পরত্থ.

চোরঘাতকৰত্থুং ছট্ঠমং.