৪. পৰারণাক্খন্ধক

পুচ্ছা – ৰস্সং ৰুট্ঠানং আৰুসো ভিক্খূনং তীহি ঠানেহি পৰারিতুং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ অনুঞ্ঞাতং, সম্বহুলা ভন্তে ভিক্খূ সন্দিট্ঠা সম্ভত্তা অন্তোৰস্সং নেৰ আলপিংসু ন সল্লপিংসু, তস্মিং ভন্তে ৰত্থুস্মিং অনুঞ্ঞাতং.

অনুজানামি ভিক্খৰে ৰস্সং ৰুট্ঠানং ভিক্খূনং তীহি ঠানেহি পৰারেতুং, দিট্ঠেৰ ৰা সুতেন ৰা পরিসঙ্কায ৰা.

পুচ্ছা – কতি আৰুসো পৰারণা দিৰসৰসেন চ পুগ্গলৰসেন চ কাতব্বাকারৰসেন চ.

ৰিস্সজ্জনা – দিৰসৰসেন ভন্তে তিস্সো পৰারণা, তথা পুগ্গলৰসেন কাতব্বাকারৰসেনচ.

পুচ্ছা – কতীনং আৰুসো সঙ্ঘে পৰারেতুং ভগৰতা অনুঞ্ঞাতং, কতীনং পনাৰুসো অঞ্ঞমঞ্ঞং পৰারেতুং ভগৰতা অনুঞ্ঞাতং.

ৰিস্সজ্জনা – পঞ্চন্নং ভন্তে ভিক্খূনং সঙ্ঘে পৰারেতুং ভগৰতা অনুঞ্ঞাতং, চতুন্নং ৰা ভন্তে তিণ্ণং ৰা দ্ৰিন্নং ৰা অঞ্ঞমঞ্ঞং পৰারেতুং অনুঞ্ঞাতং.

পুচ্ছা – একেন পনাৰুসো ৰস্সংৰুট্ঠেন ভিক্খুনা কথং পটিপজ্জিতব্বন্তি ভগৰতা অনুঞ্ঞাতং.

ৰিস্সজ্জনা – একেন পন ভন্তে ভিক্খুনা ‘‘অজ্জ মে পৰারণা’’তি অধিট্ঠাতব্বন্তি ভগৰতা অনুঞ্ঞাতং.

পুচ্ছা – পৰারণং পুচ্ছিস্সং, সনিদানং সনিদ্দেসং. সমুক্কট্ঠপদানং আৰুসো কতি আপত্তিযো.

ৰিস্সজ্জনা – পৰারণং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে তিস্সো আপত্তিযো.