৫. চম্মক্খন্ধক

সোণমথের ৰত্থু

পুচ্ছা – উপাহনং আৰুসো ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – রাজগহে ভন্তে আযস্মন্তং সোণং আরব্ভ অনুঞ্ঞাতং, আযস্মতো ভন্তে সোণস্স অচ্চারদ্ধৰীরিযস্স চঙ্কমতো পাদা ভিজ্জিংসু, চঙ্কমো লোহিতেন ফুটো অহোসি, তস্মিং ভন্তে ৰত্থুস্মিং অনুঞ্ঞাতং.

পুচ্ছা – সব্বনীলিকা ৰা আৰুসো সব্বপীতিকা ৰা সব্বলোহিতিকা ৰা সব্বমঞ্জিট্ঠিকা ৰা সব্বকণ্হা ৰা সব্বমহারঙ্গরত্তা ৰা সব্বমহানামরত্তা ৰা উপাহনাযো ধারেন্তস্স দুক্কটং ভগৰতা কত্থ কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – রাজগহে ভন্তে ছব্বগ্গিযে ভিক্খূ আরব্ভ পঞ্ঞত্তং, ছব্বগ্গিযা ভন্তে ভিক্খূ সব্বনীলিকাযো উপাহনাযো ধারেসুং, সব্বপীতিকাযো সব্বলোহিতিকাযো সব্বমঞ্জিট্ঠিকাযো সব্বকণ্হাযো সব্বমহারঙ্গরত্তা সব্বমহানামরত্তাযোপি উপাহনাযো ধারেসুং, তস্মিং ভন্তে ৰত্থুস্মিং পঞ্ঞত্তং.

পুচ্ছা – খল্লকবন্ধা ৰা আৰুসো পুটবন্ধা ৰা পালিগুণ্ঠিমা ৰা তূলপুণ্ণিকা ৰা তিত্তিরপত্তিকা ৰা মেণ্ডৰিসাণৰদ্ধিকা ৰা অজৰিসাণৰদ্ধিকা ৰা ৰিচ্ছিকাল়িকা ৰা মোরপিঞ্ছ পরিসিব্বিকা ৰা চিত্রা ৰা উপাহনাযো ধারেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – রাজগহে ভন্তে ছব্বগ্গিযে ভিক্খূ আরব্ভ পঞ্ঞত্তং, ছব্বগ্গিযা ভন্তে ভিক্খূ খল্লকবন্ধা উপাহনাযোপি ধারেসুং, পুটবন্ধা উপাহনাযোপি ধারেসুং, পালিগুণ্ঠিমা উপাহনাযোপি ধারেসুং, তূলপুণ্ণিকা উপাহনাযোপি ধারেসুং, তিত্তিরপত্তিকা উপাহনাযোপি ধারেসুং, মেণ্ডৰিসাণৰদ্ধিকা উপাহনাযোপি ধারেসুং, অজৰিসাণৰদ্ধিকা উপাহনাযোপি ধারেসুং, ৰিচ্ছিকাল়িকা উপাহনাযোপি ধারেসুং, মোরপিঞ্ছ পরিসিব্বিতা উপাহনাযো ধারেসুং, চিত্রা উপাহনাযোপি ধারেসুং, তস্মিং ভন্তে ৰত্থুস্মিং পঞ্ঞত্তং.

পুচ্ছা – কট্ঠপাদুকাযো আৰুসো ধারেন্তস্স দুক্কটং ভগৰতা কত্থ কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – রাজগহে ভন্তে ছব্বগ্গীযেৰ ভিক্খূ আরব্ভ পঞ্ঞত্তং, ছব্বগ্গিযা ভন্তে ভিক্খূ রত্তিযা পচ্চূসসমযং পচ্চুট্ঠায কট্ঠপাদুকাযো অভিরুহিত্ৰা অজ্ঝোকাসে চঙ্কমন্তি উচ্চাসদ্দা মহাসদ্দা খটখটসদ্দা অনেকৰিহিতং তিরচ্ছানকথং কথেন্তা, তস্মিং ভন্তে ৰত্থুস্মিং পঞ্ঞত্তং.

পুচ্ছা – যানেন আৰুসো যাযন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে ছব্বগ্গিযে ভিক্খূ আরব্ভ পঞ্ঞত্তং, ছব্বগ্গিযা ভন্তে ভিক্খূ যানেন যাযিংসু, তস্মিং ভন্তে ৰত্থুস্মিং পঞ্ঞত্তং.

পুচ্ছা – গিলানস্স আৰুসো যানং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – সাৰত্থিযং ভন্তে অঞ্ঞতরং গিলানং ভিক্খুং আরব্ভ অনুঞ্ঞাতং, অঞ্ঞতরো ভন্তে ভিক্খু কোসলেসু জনপদে সাৰত্থিং গচ্ছন্তো ভগৰন্তং দস্সনায অন্তরামগ্গে গিলানো কুক্কুচ্চাযন্তো যানং নাভিরুহি, তস্মিং ভন্তে ৰত্থুস্মিং অনুঞ্ঞাতং.

পুচ্ছা – উচ্চাসযনমহাসযনানি আৰুসো ধারেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে ছব্বগ্গিযে ভিক্খূ আরব্ভ পঞ্ঞত্তং, ছব্বগ্গিযা ভন্তে ভিক্খূ উচ্চাসযনমহাসযনানি ধারেসুং, তস্মিং ভন্তে ৰত্থুস্মিং পঞ্ঞত্তং.

পুচ্ছা – গোচম্মানি আৰুসো ধারেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে অঞ্ঞতরং পাপভিক্খুং আরব্ভ পঞ্ঞত্তং, অঞ্ঞতরো ভন্তে ভিক্খু পাণাতিপাতে সমাদপেসি, তস্মিং ভন্তে ৰত্থুস্মিং পঞ্ঞত্তং.

পুচ্ছা – পচ্চন্তিমেসু আৰুসো জনপদেসু ৰিনযধরপঞ্চমেন গণেন উপসম্পদা চ গুণঙ্গুণূপহনঞ্চ ধুৰনহানঞ্চ চম্মানি অত্থরণানি চ নিস্সীমগতানং চীৰরদানঞ্চাতি ইমানি পঞ্চ ভগৰতা কত্থ অনুঞ্ঞাতানি, কং আরব্ভ কিস্মিং ৰত্থুস্মিং অনুঞ্ঞাতানি.

ৰিস্সজ্জনা – সাৰত্থিযং ভন্তে আযস্মন্তং সোণং কুটিকণ্ণং আরব্ভ অনুঞ্ঞাতা, আযস্মা ভন্তে সোণো কুটিকণ্ণো এতানি পঞ্চৰত্থূনি আযস্মতো মহাকচ্চানস্স ৰচনেন ভগৰন্তং যাচি, তস্মিং ভন্তে ৰত্থুস্মিং অনুঞ্ঞাতা.

পুচ্ছা – চম্মসঞ্ঞুত্তং পুচ্ছিস্সং, সনিদানং সনিদ্দেসং. সমুক্কট্ঠপদানং আৰুসো কতি আপত্তিযো.

ৰিস্সজ্জনা – চম্মসঞ্ঞুত্তং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে তিস্সো আপত্তিযো.