নমো তস্স ভগৰতো অরহতো সম্মাসম্বুদ্ধস্স
ৰিনযপিটক
সংগাযনস্স পুচ্ছা ৰিস্সজ্জনা
ওকাস দানকথা
সুণাতু মে ভন্তে সঙ্ঘো, মহতী অযং পরিসা, এৰরূপায পরিসায ন সুকরা সব্বসো কথং সাৰেতুং, তস্মা আযস্মতো চ জৰনত্থেরস্স পখুক্কূনগরৰাসিনো আযস্মতো চ ৰিচিত্তসারাভিৰংসস্স তিপিটকধর ধম্মভণ্ডাগারিকস্স ৰিনযপুচ্ছনভারঞ্চ ৰিনযৰিস্সজ্জন ভারঞ্চ আৰহিতুং ওকাসং দম্মি, করোথ তুম্হে আৰুসো ছট্ঠসংগীতিপুব্বঙ্গমানি ৰিনযপুচ্ছন ৰিনযৰিস্সজ্জন কিচ্চানি যথাধম্মং যথাৰিনযং.
অগ্গমহাপণ্ডিত ভদন্তজৰন মহাথেরেন
ঠপিতা
পুচ্ছক সম্মুতি ঞাত্তি
সুণাতু মে ভন্তে সঙ্ঘো, যদি সঙ্ঘস্স পত্তকল্লং, অহং আযস্মন্তং ৰিচিত্তসারাভিৰংসং তিপিটকধর ধম্মভণ্ডাগারিকং ৰিনযং পুচ্ছেয্যং.
তিপিটকধর ধম্মভণ্ডাগারিক
ভদন্তৰিচিত্তসারাভিৰংসেন
ঠপিতা ৰিস্সজ্জক সম্মুতি ঞাত্তি
সুণাতু মে ভন্তে সঙ্ঘো, যদি সঙ্ঘস্স পত্তকল্লং, অহং আযস্মতা জৰনত্থেরেন সঙ্ঘনাযক মহাথেরস্স পটিনিধিভূতেন ৰিনযং পুট্ঠো ৰিস্সজ্জেয্যং.
পঠম পারাজিক সিক্খাপুচ্ছা
পুচ্ছা – যং তেন আৰুসো ভগৰতা জানতা পস্সতা অরহতা সম্মাসম্বুদ্ধেন পঠমং পারাজিকং কত্থ পঞ্ঞত্তং.
ৰিস্সজ্জনা – ৰেসালিযং ভন্তে পঞ্ঞত্তং.
পুচ্ছা – কং আৰুসো আরব্ভ পঞ্ঞত্তং.
ৰিস্সজ্জনা – সুদিন্নং ভন্তে কলন্দপুত্তং আরব্ভ পঞ্ঞত্তং.
পুচ্ছা – কিস্মিং আৰুসো ৰত্থুস্মিং পঞ্ঞত্তং.
ৰিস্সজ্জনা – সুদিন্দো ভন্তে কলন্দপুত্তো পুরাণদুতিযিকায মেথুনং ধম্মং পটিসেৰি, তস্মিং ভন্তে ৰত্থুস্মিং পঞ্ঞত্তং.
পুচ্ছা – অত্থি আৰুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.
ৰিস্সজ্জনা – একা ভন্তে পঞ্ঞত্তি দ্ৰে অনুপঞ্ঞত্তিযো, অনুপ্পন্নপঞ্ঞত্তি তস্মিং নত্থি.
পুচ্ছা – সব্বত্থপঞ্ঞত্তিনুখো আৰুসো পদেসপঞ্ঞত্তিনুখো.
ৰিস্সজ্জনা – সব্বত্থপঞ্ঞত্তি ভন্তে.
পুচ্ছা – সাধারণপঞ্ঞত্তিনুখো আৰুসো অসাধারণপঞ্ঞত্তিনুখো.
ৰিস্সজ্জনা – সাধারণপঞ্ঞত্তি ভন্তে.
পুচ্ছা – একতোপঞ্ঞত্তিনুখো আৰুসো উভতোপঞ্ঞত্তিনুখো.
ৰিস্সজ্জনা – উভতোপঞ্ঞত্তি ভন্তে.
পুচ্ছা – পঞ্চন্নং আৰুসো পাতিমোক্খুদ্দেসানং কত্থোগধং কত্থ পরিযাপন্নং.
ৰিস্সজ্জনা – নিদানোগধং ভন্তে নিদানপরিযাপন্নং.
পুচ্ছা – কতমেন আৰুসো উদ্দেসেন উদ্দেসং আগচ্ছতি.
ৰিস্সজ্জনা – দুতিযেন ভন্তে উদ্দেসেন উদ্দেসং আগচ্ছতি.
পুচ্ছা – চতুন্নং আৰুসো ৰিপত্তীনং কতমা ৰিপত্তি.
ৰিস্সজ্জনা – সীলৰিপত্তি ভন্তে.
পুচ্ছা – কা আৰুসো ৰিপত্তি.
ৰিস্সজ্জনা – অসংৰরো ভন্তে ৰিপত্তি.
পুচ্ছা – কা আৰুসো সম্পত্তি.
ৰিস্সজ্জনা – সংৰরো ভন্তে সম্মত্তি.
পুচ্ছা – কা আৰুসো পটিপত্তি.
ৰিস্সজ্জনা – ন এৰরূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু, অযং ভন্তে পটিপত্তি.
পুচ্ছা – কতি আৰুসো অত্থৰসে পটিচ্চ ভগৰতা পঠমং পারাজিকং পঞ্ঞত্তং.
ৰিস্সজ্জনা – দস ভন্তে অত্থৰসে পটিচ্চ ভগৰতা পঠমং পারাজিকং পঞ্ঞত্তং, ১ - সঙ্ঘসুট্ঠুতায, ২ - সঙ্ঘফাসুতায, ৩ - দুম্মঙ্কূনং পুগ্গলানং নিগ্গহায, ৪ - পেসলানং ভিক্খূনং ফাসুৰিহারায, ৫ - দিট্ঠধম্মিকানং আসৰানং সংৰরায, ৬ - সম্পরাযিকানং আসৰানং পটিঘাতায, ৭ - অপ্পসন্নানং পসাদায, ৮ - পসন্নানং ভিয্যোভাৰায, ৯ - সদ্ধম্মট্ঠিতিযা, ১০ - ৰিনযানুগ্গহায.
পুচ্ছা – কে আৰুসো সিক্খন্তি.
ৰিস্সজ্জনা – সেক্খাচ ভন্তে পুথুজ্জনকল্যাণকাচ সিক্খন্তি.
পুচ্ছা – কে আৰুসো সিক্খিতসিক্খা.
ৰিস্সজ্জনা – অরহন্তো ভন্তে সিক্খিতসিক্খা.
পুচ্ছা – কত্থ আৰুসো ঠিতং.
ৰিস্সজ্জনা – সিক্খাকামেসু ভন্তে ঠিতং.
পুচ্ছা – কে আৰুসো ধারেন্তি.
ৰিস্সজ্জনা – যেসং ভন্তে ৰত্ততি তে ধারেন্তি.
পুচ্ছা – কস্স আৰুসো ৰচনং.
ৰিস্সজ্জনা – ভগৰতো ভন্তে ৰচনং অরহতো সম্মাসম্বুদ্ধস্স.
পুচ্ছা – কেনাৰুসো আভতং.
ৰিস্সজ্জনা – পরম্পরায ভন্তে আভতং.
সংগাযনত্থায সঙ্ঘস্স ঞাপনং
সুণাতু মে ভন্তে সঙ্ঘো অহং ভন্তে আযস্মন্তং ৰিচিত্থসারাভিৰংসং তিপিটকধর ধম্মভণ্ডাগারিকং পঠমস্স পারাজিকস্স নিদানম্পি পুচ্ছিং, পুগ্গলম্পি পুচ্ছিং, ৰত্থুম্পি পুচ্ছিং, পঞ্ঞত্তি অনুপঞ্ঞত্তিআদীনিপি পুচ্ছিং, পুট্ঠো পুট্ঠোচ সো আযস্মাৰিচিত্তসারাভিৰংসো ৰিস্সজ্জেসি, ইতিহিদং ভন্তে পঠমং পারাজিক সিক্খাপদং নিম্মলং সুপরিসুদ্ধং তস্সেৰ ভগৰতো ৰচনং অরহতো সম্মাসম্বুদ্ধস্স, তস্মা যথাপুরে মহাকস্সপাদযো মহাথেরৰরা পোরাণসংগীতিকারা ব্রহ্মচরিয সঙ্খাতস্স বুদ্ধসাসনস্স চিরট্ঠিতিযা বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং ধম্মৰিনযং সঙ্গাযিংসুচেৰ অনুসঙ্গাযিংসুচ, এৰমেৰ মযম্পি দানি সব্বেৰ ছট্ঠসংগীতিমহাধম্মসভাপরিযাপন্না ইদং পঠম পারাজিক সিক্খাপদং একতোসজ্ঝাযনৰসেন সংগাযেয্যাম.
রেৰতাভি পণ্ডিতধজ সাসনৰংস মহাধম্মরাজগুরুনো
অভিধজমহারট্ঠগুরুনোচ সঙ্ঘনাযক মহাথেরস্স
ওকাস দানকথা
সুণাতু মে ভন্তে সঙ্ঘো, মহতী অযং পরিসা, এৰরূপায পরিসায ন সুকরা সব্বসো কথং সাৰেতুং, তস্মা আযস্মতোচ সোভনস্স সাসনরি সারামাধিৰাসিনো আযস্মতোচ ৰিচিত্তসারাভিৰংসস্স তিপিটকধর ধম্মভণ্ডাগারিকস্স ৰিনযপুচ্ছনভারঞ্চ ৰিনযৰিস্সজ্জনভারঞ্চ আৰহিতুং ওকাসং দম্মি, করোথ তুম্হে আৰুসো ছট্ঠসংগীতিপুব্বঙ্গমানি ৰিনযপুচ্ছন ৰিনযৰিস্সজ্জন কিচ্চানি যথাধম্মং যথাৰিনযং.
অগ্গমহাপণ্ডিত ভদন্ত সোভনত্থেরেন
ঠপিতা পুচ্ছক সম্মুতি ঞাত্তি
সুণাতু মে ভন্তে সঙ্ঘো, যদি সঙ্ঘস্স পত্তকল্লং, অহং আযস্মন্তং ৰিচিত্তসারাভিৰংসং তিপিটকধর ধম্মভণ্ডাগারিকং ৰিনযং পুচ্ছেয্যং.
তিপিটকধর ধম্মভণ্ডাগারিক
ভদন্তৰিচিত্তসারাভিৰংসেন
ঠপিতা ৰিস্সজ্জক সম্মুতি ঞাত্তি
সুণাতু মে ভন্তে সঙ্ঘো, যদিসঙ্ঘস্স পত্তকল্লং, অহং আযস্মতা সোভনত্থেরেন সঙ্ঘনাযক মহাথেরস্স পটিনিধিভূতেন ৰিনযং পুট্ঠো ৰিস্সজ্জেয্যং.
দুতিয পারাজিক সিক্খাপুচ্ছা
পুচ্ছা – যং তেন আৰুসো ভগৰতা জানতা পস্সতা অরহতা সম্মাসম্বুদ্ধেন দুতিযং পারাজিকং কত্থ পঞ্ঞত্তং.
ৰিস্সজ্জনা – রাজগহে ভন্তে পঞ্ঞত্তং.
পুচ্ছা – কং আৰুসো আরব্ভ পঞ্ঞত্তং.
ৰিস্সজ্জনা – ধনিযং ভন্তে কুম্ভকারপুত্তং আরব্ভ পঞ্ঞত্তং.
পুচ্ছা – কিস্মিং আৰুসো ৰত্থুস্মিং পঞ্ঞত্তং.
ৰিস্সজ্জনা – ধনিযো ভন্তে কুম্ভকারপুত্তো রঞ্ঞো দারূনি অদিন্নং আদিযি, তস্মিং ৰত্থুস্মিং পঞ্ঞত্তং.
পুচ্ছা – অত্থি আৰুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.
ৰিস্সজ্জনা – একা ভন্তে পঞ্ঞত্তি একা অনুপঞ্ঞত্তি অনুপ্পন্নপঞ্ঞত্তি তস্মিং নত্থি.
পুচ্ছা – কা আৰুসো তত্থ মূলপঞ্ঞত্তি.
ৰিস্সজ্জনা – যো পন ভিক্খু অদিন্নং থেয্যসঙ্খাতং আদিযেয্য, যথারূপে অদিন্নাদানে রাজানো চোরং গহেত্ৰা হনেয্যুংৰা বন্ধেয্যুংৰা পব্বাজেয্যুংৰা চোরোসি বালোসি মুল়্হোসি থেনোসীতি তথারূপং ভিক্খু অদিন্নং আদিযমানো অযম্পি পারাজিকো হোতি অসংৰাসোতি অযং ভন্তে তত্থ মূলপঞ্ঞত্তি.
পুচ্ছা – কা আৰুসো তত্থ অনুপঞ্ঞত্তি.
ৰিস্সজ্জনা – গামাৰা অরঞ্ঞাৰাতি অযং ভন্তে তত্থ অনুপঞ্ঞত্তি.
পুচ্ছা – কা আৰুসো তত্থ পরিপুণ্ণপঞ্ঞত্তি.
ৰিস্সজ্জনা – যো পন ভিক্খু গামাৰা অরঞ্ঞাৰা অদিন্নং থেয্যসঙ্খাতং আদিযেয্য, কথারূপে অদিন্নাদানে রাজানো চোরং গহেত্ৰা হনেয্যুংৰা বন্ধেয্যুংৰা পব্বাজেয্যুংৰা চোরোসি বালোসি মূল়্হোসি থেনোসীতি তথারূপং ভিক্খু অদিন্নং আদিযমানো অযম্পি পারাজিকো হোতি অসংৰাসোতি অযং ভন্তে তত্থ পরিপুণ্ণপঞ্ঞত্তি.
পুচ্ছা – সব্বত্থপঞ্ঞত্তি নুখো আৰুসো পদেসপঞ্ঞত্তিনুখো.
ৰিস্সজ্জনা – সব্বত্থপঞ্ঞত্তি ভন্তে.
পুচ্ছা – সাধারণপঞ্ঞত্তিনুখো আৰুসো অসাধারণপঞ্ঞত্তি নুখো.
ৰিস্সজ্জনা – সাধারণপঞ্ঞত্তি ভন্তে.
পুচ্ছা – একতোপঞ্ঞত্তিনুখো আৰুসো উভতোপঞ্ঞত্তিনুখো.
ৰিস্সজ্জনা – উভতোপঞ্ঞত্তি ভন্তে.
পুচ্ছা – তস্মিং আৰুসো দুতিয পারাজিকে অদিন্নং আদিযন্তো কতি আপত্তিযো আপজ্জতি ৰিভজিত্ৰা ৰিস্সজ্জেহি.
ৰিস্সজ্জনা – অদিন্নং ভন্তে আদিযন্তো তিস্সো আপত্তিযো আপজ্জতি, পঞ্চ মাসকংৰা অতিরেক পঞ্চ মাসকংৰা অগ্ঘনকং অদিন্নং থেয্যসঙ্খাতং আদিযতি আপত্তি পারাজিকস্স, ঊনপঞ্চমাসকংৰা অতিরেকমাসকংৰা অদিন্নং থেয্যসঙ্খাতং আদিযতি আপত্তি থুল্লচ্চযস্স, মাসকংৰা ঊনমাসকৰা অগ্ঘনকং অদিন্নং থেয্যসঙ্খাতং আদিযতি আপত্তি দুক্কটস্স, অদিন্নং ভন্তে আদিযন্তো ইমা তিস্সো আপত্তিযো আপজ্জতি.
পুচ্ছা – কেসং আৰুসো অনাপত্তি.
ৰিস্সজ্জনা – দসন্নং ভন্তে পুগ্গলানং অনাপত্তি, সকসঞ্ঞিস্স, ৰিস্সাসগ্গাহেন গণ্হন্তস্স, তাৰকালিকং গণ্হন্তস্স, পেতপরিগ্গহং গণ্হন্তস্স, তিরচ্ছানগতপরিগ্গহং গণ্হন্তস্স, পংসুকূলসঞ্ঞিস্স, উম্মত্তকস্স, খিত্তচিত্তস্স, ৰেদনাট্টস্স, আদিকম্মিকস্সাতি.
পুচ্ছা – পঞ্চন্নং আৰুসো পাতিমোক্খুদ্দেসানং কত্থোগধং কত্থপরিযাপন্নং.
ৰিস্সজ্জনা – নিদানোগধং ভন্তে নিদানপরিযাপন্নং.
পুচ্ছা – কতমেন আৰুসো উদ্দেসেন উদ্দেসং আগচ্ছতি.
ৰিস্সজ্জনা – দুতিযেন ভন্তে উদ্দেসেন উদ্দেসং আগচ্ছতি.
পুচ্ছা – চতুন্নং আৰুসো ৰিপত্তীনং কতমা ৰিপত্তি.
ৰিস্সজ্জনা – সীলৰিপত্তি ভন্তে.
পুচ্ছা – সত্তন্নং আৰুসো আপত্তিক্খন্ধানং কতমো আপত্তিক্খন্ধো.
ৰিস্সজ্জনা – পারাজিকাপত্তিক্খন্ধো ভন্তে.
পুচ্ছা – ছন্নং আৰুসো আপত্তিসমুট্ঠানানং কতিহি সমুট্ঠানেহি সমুট্ঠাতি.
ৰিস্সজ্জনা – তীহি ভন্তে সমুট্ঠানেহি সমুট্ঠাতি, সিযা কাযতোচ চিত্ততোচ সমুট্ঠাতি, ন ৰাচাতো, সিযা ৰাচাতোচ
চিত্ততোচ সমুট্ঠাতি, ন কাযতো, সিযা কাযতোচ ৰাচাতোচ চিত্ততোচ সমুট্ঠাতি.
পুচ্ছা – চতুন্নং আৰুসো অধিকরণানং কতমং অধিকরণং.
ৰিস্সজ্জনা – আপত্তাধিকরণং ভন্তে.
পুচ্ছা – সত্তন্নং আৰুসো সমথানং কতিহি সমথেহি সম্মতি.
ৰিস্সজ্জনা – দ্ৰিহি ভন্তে সমথেহি সম্মতি সম্মুখাৰিনযেনচ পটিঞ্ঞাত করণেনচ.
পুচ্ছা – কো আৰুসো তত্থ ৰিনযো, কো তত্থ অভিৰিনযো.
ৰিস্সজ্জনা – পঞ্ঞত্তি ভন্তে ৰিনযো ৰিভত্তি অভিৰিনযো.
পুচ্ছা – কিংআৰুসো তত্থ পাতিমোক্খং কিং তত্থ অধিপাতিমোক্খং.
ৰিস্সজ্জনা – পঞ্ঞত্তি ভন্তে পাতিমোক্খং, ৰিভত্তি অধিপাতিমোক্খং.
পুচ্ছা – কা আৰুসো ৰিপত্তি.
ৰিস্সজ্জনা – অসংৰরো ভন্তে ৰিপত্তি.
পুচ্ছা – কা আৰুসো সম্পত্তি.
ৰিস্সজ্জনা – সংৰরো ভন্তে সম্পত্তি.
পুচ্ছা – কা আৰুসো পটিপত্তি.
ৰিস্সজ্জনা – ন এৰরূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু অযং ভন্তে তত্থ পটিপত্তি.
পুচ্ছা – কতি আৰুসো অত্থৰসে পটিচ্চ ভগৰতা দুতিযং পারাজিকং পঞ্ঞত্তং.
ৰিস্সজ্জনা – দস ভন্তে অত্থৰসে পটিচ্চ ভগৰতা দুতিযং পারাজিকং পঞ্ঞত্তং. সঙ্ঘসুট্ঠুতায সঙ্ঘফাসুতায দুম্মঙ্কূনং পুগ্গলানং নিগ্গহায পেসলানং ভিক্খূনং ফাসুৰিহারায দিট্ঠধম্মিকানং আসৰানং সংৰরায সম্পরাযিকানং আসৰানং পটিঘাতায অপ্পসন্নানং পসাদায পসন্নানং ভিয্যোভাৰায সদ্ধম্মট্ঠিতিযা ৰিনযানুগ্গহায.
পুচ্ছা – কো আৰুসো সিক্খন্তি.
ৰিস্সজ্জনা – সেক্খাচ ভন্তে পুথুজ্জনকল্যাণকাচ সিক্খন্তি.
পুচ্ছা – কে আৰুসো সিক্খিতসিক্খা.
ৰিস্সজ্জনা – অরহন্তো ভন্তে সিক্খিতসিক্খা.
পুচ্ছা – কত্থ আৰুসো ঠিতং.
ৰিস্সজ্জনা – সিক্খাকামেসু ভন্তে ঠিতং.
পুচ্ছা – কে আৰুসো ধারেন্তি.
ৰিস্সজ্জনা – যেসং ভন্তে ৰত্ততি তে ধারেন্তি.
পুচ্ছা – কস্স আৰুসো ৰচনং.
ৰিস্সজ্জনা – ভগৰতা ভন্তে ৰচনং অরহতো সম্মাসম্মুদ্ধস্স.
পুচ্ছা – কেনাৰুসো আভতং.
ৰিস্সজ্জনা – পরম্পরায ভন্তে আভতং.
পুচ্ছা – অত্থি নু খো আৰুসো তত্থ উপনেতব্বং ৰা অপনেতব্বং ৰা অক্খরপদপচ্চাভট্ঠং ৰা ৰিরদ্ধপদব্যঞ্জনং ৰা.
ৰিস্সজ্জনা – নত্থি ভন্তে.
‘‘সংগাযনত্থায সঙ্ঘস্স ঞাপনং’’
সুণাতু মে ভন্তে সঙ্ঘো অহং ভন্তে আযস্মন্তং ৰিচিত্তসারাভিৰংস তিপিটকধরধম্মভণ্ডাগারিকং দুতিযস্স পারাজিকস্স নিদানম্পি পুচ্ছিং, পুগ্গলম্পি পুচ্ছিং, ৰত্থুম্পি পুচ্ছিং, পঞ্ঞত্তিম্পি পুচ্ছিং, অনুপঞ্ঞত্তিম্পি পুচ্ছিং, আপত্তিম্পি পুচ্ছিং, অনাপত্তিম্পি পুচ্ছিং, অঞ্ঞানিপি ঈদিসানি পুচ্ছিতব্বট্ঠানানি অনেকানি পুচ্ছিং, পুট্ঠো পুট্ঠোচ সো আযস্মা ৰিচিত্তসারাভিৰংসো ৰিস্সজ্জেসি. ইতি হিদং ভন্তে ইদং দুতিযং পারাজিক সিক্খাপদং নিম্মলং, সুপরিসুদ্ধং, তস্সেৰ ভগৰতো ৰচনং অরহতো সম্মাসম্বুদ্ধস্স, তস্মা যথা পুরে মহাকস্স পাদযো মহাথেরৰরা পোরাণসংগীতিকারা ব্রহ্মচরিযসঙ্খাতস্স বুদ্ধসাসনস্স চিরট্ঠিতিযা, বহুজনহিতায, বহুজনসুখায লোকানুকম্পায অত্থায, হিতায, সুখায, দেৰমনুস্সানং ধম্মৰিনযং সঙ্গাযিংসুচেৰ অনুসঙ্গাযিংসুচ, এৰমেৰ মযম্পি দানি সব্বেৰ ছট্ঠসংগীতিমহাধম্মসভাপরিযাপন্না ইদং দুতিয পারাজিক সিক্খাপদং একতো গণসজ্ঝাযং কত্ৰা সমগ্গা সম্মোদমানা হুত্ৰা সঙ্গাযেয্যাম.
ততিয পারাজিক সিক্খাপুচ্ছা
পুচ্ছা – যং তেন আৰুসো ভগৰতা (প) সম্মাসম্বুদ্ধেন ততিযং পারাজিকং কত্থ পঞ্ঞত্তং.
ৰিস্সজ্জনা – ৰেসালিযং ভন্তে পঞ্ঞত্তং.
পুচ্ছা – কং আৰুসো আরব্ভ পঞ্ঞত্তং.
ৰিস্সজ্জনা – সম্বহুলে ভন্তে ভিক্খূ আরব্ভ পঞ্ঞত্তং.
পুচ্ছা – কিস্মিং আৰুসো ৰত্থুস্মিং পঞ্ঞত্তং.
ৰিস্সজ্জনা – সম্বহুলা ভন্তে ভিক্খু অঞ্ঞমঞ্ঞং জীৰিতা ৰোরোপেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – অত্থি নুখো আৰুসো তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তি.
ৰিস্সজ্জনা – একা ভন্তে পঞ্ঞত্তি, একা অনুপঞ্ঞত্তি, অনুপ্পন্নপঞ্ঞত্তি তস্মিং নত্থি.
পুচ্ছা – কা আৰুসো তত্থ মূলপঞ্ঞত্তি.
ৰিস্সজ্জনা – যোপন ভিক্খু সঞ্চিচ্চ মনুস্সৰিগ্গহং জীৰিতা ৰোরোপেয্য, সত্থহারকংৰাস্স পরিযেসেয্য অযম্পি পারাজিকো হোতি অসংৰাসোতি অযং ভন্তে তত্থ মূলপঞ্ঞত্তি.
পুচ্ছা – কা আৰুসো তত্থ অনুপঞ্ঞত্তি.
ৰিস্সজ্জনা – মরণৰণ্ণং ৰা সংৰণ্ণেয্য মরণায ৰা সমাদপেয্য অম্ভোপুরিস কিং তুয্হিমিনা পাপকেন দুজ্জীৰিতেন মতন্তে জীৰিতা
সেয্যাতি ইতি চিত্তমনো চিত্তসঙ্কপ্পো অনেকপরিযাযেন মরণৰণ্ণং ৰা সংৰণ্ণেয্য মরণায ৰা সমাদপেয্যাতি অযং ভন্তে তত্থ অনুপঞ্ঞত্তি.
পুচ্ছা – কা আৰুসো তত্থ পরিপুণ্ণপঞ্ঞত্তি.