মহাৰগ্গপাল়ি
সংগাযনস্স পুচ্ছা ৰিস্সজ্জনা
পুচ্ছা – উভতো ৰিভঙ্গানন্তরং আৰুসো পোরাণকেহি সংগীতিকারমহাথেরেহি কং নাম পাৰচনং সংগীতং.
ৰিস্সজ্জনা – উভতো ৰিভঙ্গানন্তরং ভন্তে পোরাণকেহি সংগীতিকারমহাথেরেহি খন্ধকা সংগীতা.
পুচ্ছা – তে পন আৰুসো খন্ধকা ৰগ্গভেদেন কতিৰিধা.
ৰিস্সজ্জনা – তে পন ভন্তে খন্ধকা দুৰিধা ৰগ্গভেদেন মহাৰগ্গো চূল়ৰগ্গোতি.
পুচ্ছা – মহাৰগ্গে আৰুসো কতি খন্ধকা পরিযাপন্না.
ৰিস্সজ্জনা – মহাৰগ্গে ভন্তে দসখন্ধকা পরিযাপন্না, সেয্যথিদং, মহাখন্ধকো উপোসথক্খন্ধকো ৰস্সূপনাযিকক্খন্ধকো পৰারণাক্খন্ধকো চম্মক্খন্ধকো ভেসজ্জক্খন্ধকো কথিনক্খন্ধকো চীৰরক্খন্ধকো চম্পেয্যক্খন্ধকো কোসম্বকক্খন্ধকোতি.
পুচ্ছা – মহাখন্ধকে আৰুসো বহূ কথাযো, কতমা তাসং আদিকথা.
ৰিস্সজ্জনা – মহাখন্ধকে ভন্তে বোধিকথা আদি.
মহাখন্ধক
মহাবোধিপুচ্ছা
পুচ্ছা – তস্মাতিহ আৰুসো ততো পট্ঠায তং পুচ্ছিস্সামি, ভগৰা আৰুসো পঠমাভিসম্বুদ্ধকালে কত্থ কীৰচীরং কেনাকারেন ৰিহাসি.
ৰিস্সজ্জনা – ভগৰা ভন্তে পঠমাভিসম্বুদ্ধো বোধিরুক্খমূলে সত্তাহং একপল্লঙ্কেন ৰিহাসি ৰিমুত্তিসুখং পটিসংৰেদী.
পুচ্ছা – তদা আৰুসো ভগৰা কীদিসং ধম্মং মনসিকত্ৰা কীদিসং উদানং উদানেসি.
ৰিস্সজ্জনা – তদা ভন্তে ভগৰা রত্তিযা পঠমং যামং রত্তিযা মজ্ঝিমং যামং রত্তিযা পচ্ছিমং যামং পটিচ্চসমুপ্পাদং অনুলোমং পটিলোমং মনসিকত্ৰা তীণি উদানানি উদানেসি.
অজপাল
পুচ্ছা – তস্স আৰুসো সত্তাহস্স অচ্চযেন ভগৰা কত্থ ৰিহাসি.
ৰিস্সজ্জনা – তস্স ভন্তে সত্তাহস্স অচ্চযেন ভগৰা অজপাল নিগ্রোধমূলে ৰিহাসি, সত্তাহং একপল্লঙ্কেন ৰিহাসি ৰিমুত্তিসুখং পটিসংৰেদী.
মুচলিন্দা
পুচ্ছা – তস্সপি আৰুসো সত্তাহস্স অচ্চযেন ভগৰা কত্থ ৰিহাসি.
ৰিস্সজ্জনা – তস্স ভন্তে সত্তাহস্স অচ্চযেন ভগৰা মুচলিন্দমূলে সত্তাহং একপল্লঙ্কেন নিসীদি.
পুচ্ছা – তস্সপি আৰুসো সত্তাহস্স অচ্চযেন ভগৰা কত্থ ৰিহাসি.
ৰিস্সজ্জনা – তস্সপি ভন্তে সত্তাহস্স অচ্চযেন ভগৰা রাজাযতনমূলে সত্তাহং একপল্লঙ্কেন নিসীদি ৰিমুত্তিসুখং পটিসংৰেদী.
পুচ্ছা – তস্সপি আৰুসো সত্তাহস্স অচ্চযেন ভগৰা কত্থ ৰিহাসি.
ৰিস্সজ্জনা – তস্স ভন্তে সত্তাহস্স অচ্চযেন ভগৰা পুনদেৰ অজপালনিগ্রোধমূলে ৰিহাসি.
পুচ্ছা – তস্মিং পন আৰুসো অজপালনিগ্রোধে ৰিহরন্তস্স ভগৰতো কথং চেতসো পরিৰিতক্কো উদপাদি.
ৰিস্সজ্জনা – তস্মিং পন ভন্তে অজপালনিগ্রোধে ৰিহরন্তস্স ভগৰতো রহোগতস্স পটিসল্লীনস্স ধম্মগম্ভীরতাপটিসংযুত্তো চেতসো পরিৰিতক্কো উদপাদি.
অধিগতো খো ম্যাযং ধম্মো গম্ভীরো দুদ্দসো অরনুবোধো সন্তো পণীতো অতক্কাৰচরা নিপুণো পণ্ডিতৰেদনীযো.
আলযরামাখো পনাযং পজা আলযরতা আলযসম্মুদিতা,
সহম্পতি ব্রহ্মা
পুচ্ছা – কথং আৰুসো তদা ধম্মদেসনায ব্রহ্মযাচনা চ ভগৰতো পটিঞ্ঞাচ অহোসি.
ৰিস্সজ্জনা – দেসেতু ভন্তে ভগৰা ধম্মং, দেসেতু সুগতো ধম্মং, সন্তি সত্তা অপ্পরজক্খজাতিকা অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারোতি ইতি ভন্তে ব্রহ্মুনো ধম্মদেসনায যাচনা অহোসি,
‘‘অপারুতা তেসং অমতস্স দ্ৰারা,
যে সোতৰন্তো পমুঞ্চন্তু সদ্ধং;
ৰিহিংসসঞ্ঞী পগুণং নভাসিং,
ধম্মং পণীতং মনুজেসু ব্রহ্মে’’তি.
এৰং খো ভন্তে ভগৰতো ধম্মদেসনায পটিঞ্ঞা চ অহোসি.
নস্সতি ৰত লোকো…
দেসেতু ভন্তে ভগৰা ধম্মং…
অপারুতা তেসং অমতস্স দ্ৰারা,
যে সোতৰন্তো পমুঞ্চন্তু সদ্ধং.
পুচ্ছা – এৰং খো আৰুসো ভগৰা ধম্মদেসনায পটিঞ্ঞং কত্ৰা পঠমং ধম্মং দেসেন্তো কত্থ কীদিসং ধম্মং কস্স দেসেসি.
ৰিস্সজ্জনা – বারাণসিযং ভন্তে ইসিপতনে মিগদাযে পঞ্চৰগ্গিয ভিক্খুপমুখানং ব্রহ্মগণানং ধম্মচক্কপৰত্তনসুত্তং দেসেসি.
পুচ্ছা – তস্মিং খো পন আৰুসো ধম্মচক্কপৰত্তনসুত্তে দেসিযমানে মনুস্সলোকে কস্স ধম্মাভিসমযো অহোসি.
ৰিস্সজ্জনা – আযস্মতো ভন্তে কোণ্ডঞ্ঞস্স ধম্মাভিসমযো অহোসি.
পুচ্ছা – কথং নু খো আৰুসো ইমস্মিং বুদ্ধসাসনে পঠমং পব্বজ্জা চ উপসম্পদা চ অহোসি.
ৰিস্সজ্জনা – ইমস্মিং ভন্তে বুদ্ধসাসনে পঠমং এহিভিক্খুপসম্পদা অহোসি.
লভেয্যাহং ভন্তে ভগৰতো সন্তিকে পব্বজং, লভেয্যং উপসম্পদং.
এহি ভিক্খু স্ৰাখাতো ধম্মো, চর ব্রহ্মচরিযং সম্মা দুক্খস্স অন্তকিরিযায.
পুচ্ছা – ইতরেসং পন আৰুসো চতুন্নং পঞ্চৰগ্গিযানং কদা ধম্মাভিসমযো অহোসি.
ৰিস্সজ্জনা – পাটিপদে ভন্তে দিৰসে আযস্মতো ৰপ্পস্স, দুতিযে ভন্তে দিৰসে আযস্মতো ভদ্দিযস্স, ততিযে ভন্তে দিৰসে আযস্মতো মহানামস্স, চতুত্থে ভন্তে দিৰসে আযস্মতো অস্সজিস্স ধম্মাভিসমযো অহোসি.
পুচ্ছা – সব্বেসম্পি আৰুসো তেসং পঞ্চৰগ্গিযানং ভিক্খূনং কদা অরহত্তপত্তি হোতি.
ৰিস্সজ্জনা – সব্বেসম্পি ভন্তে তেসং পঞ্চৰগ্গিযানং ভিক্খূনং পক্খস্স পঞ্চমিযং অনত্তলক্খণসুত্তে দেসিযমানে অরহত্তপত্তি হোতি.
পুচ্ছা – কদা আৰুসো ভগৰতা ভিক্খূ তত্থ তত্থ চারিকং চরিত্ৰা ধম্মদেসনত্থায পেসিতা.
ৰিস্সজ্জনা – যসপ্পমুখানং ভন্তে চতুপঞ্ঞাস সহাযকানং পব্বজিতকালে ভগৰতা ভিক্খূ তত্থ তত্থ চারিকং চরিত্ৰা ধম্মদেসনত্থায পেসিতা.
সরণগমন
পুচ্ছা – কদা আৰুসো ভগৰতা তীহি সরণগমনেহি পব্বজ্জূপ সম্পদা অনুঞ্ঞাতো অহোসি.
ৰিস্সজ্জনা – যসপ্পমুখানং ভন্তে চতুপঞ্ঞাসায গিহি সহাযকানং পব্বজিত্ৰা তত্থ তত্থ চারিকং চরিত্ৰা ধম্মদেসনত্থায পেসিতকালে ভগৰতা তীহি সরণগমনেহি পব্বজ্জা চ উপসম্পদা চ অনুঞ্ঞাতা.
অনুজানামি ভিক্খৰে তুম্হেৰ দানি তাসু তাসু দিসাসু তেসু তেসু জনপদেসু পব্বাজেথ উপসম্পাদেথ.
পুচ্ছা – ভগৰতা আৰুসো ভিক্খূনং আরামো পটিগ্গণ্হিতুং কত্থ কিস্মিং ৰত্থুস্মিং অনুঞ্ঞাতো.
ৰিস্সজ্জনা – ভগৰতা ভন্তে ভিক্খূনং আরামং পটিগ্গণ্হিতুং রাজগহে অনুঞ্ঞাতো, রাজা ভন্তে মাগধো সেনিযো বিম্বিসারো বুদ্ধপ্পমুখস্স ভিক্খুসঙ্ঘস্স ৰেল়ুৰনং উয্যানং অদাসি, তস্মিং ভন্তে ৰত্থুস্মিং অনুঞ্ঞাতো.
এতাহং ভন্তে ৰেল়ুৰনং উয্যানং বুদ্ধপ্পমুখস্স ভিক্খুসঙ্ঘস্স দম্মি –
অনুজানামি ভিক্খৰে আরামং.
পুচ্ছা – কথঞ্চ আৰুসো দ্ৰিন্নং অগ্গসাৰকানং পব্বজ্জূপসম্পদা অহোসি.
ৰিস্সজ্জনা – দ্ৰিন্নং ভন্তে অগ্গসাৰকানং এহি ভিক্খুপসম্পদা অহোসি.
ৰিপ্পসন্নানি খো তে আৰুসো ইন্দ্রিযানি.
কংসি ত্ৰং আৰুসো উদ্দিস্স পব্বজিতো.
কো ৰা তে সত্থা.
কস্স ৰা ত্ৰং ধম্মং রোচেসি.
অত্থাৰুসো মহাসমণো সক্যপুত্তো সক্যকুলা পব্বজিতো.
কিং ৰাদী পনাযস্মতো সত্থা কিমক্খাযী.
যে ধম্মা হেতুপ্পভৰা, তেসং হেতুং তথাগতো;
আহ তেসঞ্চ যো নিরোধো, এৰং ৰাদী মহাসমণো.
অলং আৰুসো মা অগমিত্থ.
এতে ভিক্খৰে দ্ৰে সহাযকা আগচ্ছন্তি কোলিতো উপতিস্সো চ এতং মে সাৰকযুগং ভৰিস্সতি অগ্গং ভদ্দযুগং.
লভেয্যাম মযং ভন্তে ভগৰতো সন্তিকে পব্বজ্জং লভেয্যাম উপসম্পদং.
এথ ভিক্খৰো স্ৰাখাতো ধম্মো, চরথ ব্রহ্মচরিযং সম্মা দুক্খস্স অন্তকিরিযায.
পুচ্ছা – উপজ্ঝাযো আৰুসো গণ্হিতুং ভগৰতা কত্থ অনুঞ্ঞাতো, কং আরব্ভ কিস্মিং ৰত্থুস্মিং অনুঞ্ঞাতো.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ অনুঞ্ঞাতো, সম্বহুলা ভন্তে ভিক্খূ অনুপজ্ঝাযকা অনাচরিযকা অনোৰদিযমানা অননুসাসিযমানা দুন্নিৰত্থা দুপ্পারুতা অনোকপ্পসম্পন্না পিণ্ডায চরিংসু, তস্মিং ভন্তে ৰত্থুস্মিং অনুঞ্ঞাতো.
পুচ্ছা – উপজ্ঝাযম্হি আৰুসো ন সম্মাৰত্তন্তস্স দুক্কটং কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহে ভন্তে সম্বহুলে সদ্ধিৰিহারিকে আরব্ভ পঞ্ঞত্তং, সম্বহুলা ভন্তে সদ্ধিৰিহারিকা উপজ্ঝাযম্হি ন সম্মাৰত্তিংসু, তস্মিং ভন্তে ৰত্থুস্মিং পঞ্ঞত্তং.
পুচ্ছা – কদা আৰুসো ভগৰতা তীহি সরণগমনেহি উপসম্পদং পটিক্খিপিত্ৰা ঞাতিচতুত্থেন কম্মেন উপসম্পদা অনুঞ্ঞাতা.
ৰিস্সজ্জনা – রাধব্রাহ্মণস্স ভন্তে পব্বজিতকালে ভগৰতা তীহি সরণগমনেহি উপসম্পদং পটিক্খিপিত্ৰা ঞাত্তিচতুত্থেন কম্মেন উপসম্পদা অনুঞ্ঞাতা.
কোনু খো ভিক্খৰে তস্স ব্রাহ্মণস্স অধিকারং সরতি.
অহং খো ভন্তে তস্স ব্রাহ্মণস্স অধিকারং সরামি.
সাধু সাধু সারিপুত্ত, কতঞ্ঞুনো হি সারিপুত্ত সপ্পুরিসা কতৰেদিনো.
কথাহং ভন্তে তং ব্রাহ্মণং উপসম্পাদেমি.
যাসা ভিক্খৰে মযা তীহি সরণগমনেহি উপসম্পদাঅনুঞ্ঞাতা, তং অজ্জতগ্গে পটিক্খিপামি.
অনুজানামি ভিক্খৰে ঞাত্তিচতুত্থেন কম্মেন উপসম্পাদেতুং.
পুচ্ছা – অযাচিতকং আৰুসো উপসম্পদাপেক্খং উপসম্পাদেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহে ভন্তে অঞ্ঞতরং ভিক্খুং আরব্ভ পঞ্ঞত্তং, অঞ্ঞতরো ভন্তে ভিক্খু উপসম্পন্নসমনন্তরং অনাচারং অচরি, তস্মিং ভন্তে ৰত্থুস্মিং পঞ্ঞত্তং.
পুচ্ছা – চতুন্নং আৰুসো নিস্সযানং আচিক্খণা ভগৰতা কত্থ অনুঞ্ঞাতা, কং আরব্ভ কিস্মিং ৰত্থুস্মিং অনুঞ্ঞাতা.
ৰিস্সজ্জনা – রাজগহে ভন্তে অঞ্ঞতরং ভিক্খুং আরব্ভ অনুঞ্ঞাতা, অঞ্ঞতরো ভন্তে ভিক্খু উদরস্স কারণা পব্বজি, তস্মিং ভন্তে ৰত্থুস্মিং অনুঞ্ঞাতা.
এহি দানি আৰুসো পিণ্ডায চরিস্সাম.
কথঞ্হি নাম ভিক্খু এৰং স্ৰাক্খাতে ধম্মৰিনযে উদরস্স কারণা পব্বজিস্সতি.
পুচ্ছা – ঊনদসৰস্সেন আৰুসো উপসম্পাদেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহে ভন্তে আযস্মন্তং উপসেনং ৰঙ্গন্তপুত্তং আরব্ভ পঞ্ঞত্তং, আযস্মা ভন্তে উপসেনো ৰঙ্গন্তপুত্তো একৰস্সো সদ্ধিৰিহারিকং উপসম্পাদেসি, তস্মিং ভন্তে ৰত্থুস্মিং পঞ্ঞত্তং.
পুচ্ছা – বালেন আৰুসো অব্যত্তেন উপসম্পাদেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ ‘‘দসৰস্সম্হা দসৰস্সম্হা’’তি বালা অব্যত্তা উপসম্পাদেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – আচরিযো আৰুসো গণ্হিতুং ভগৰতা কত্থ অনুঞ্ঞাতো, কং আরব্ভ কিস্মিং ৰত্থুস্মিং অনুঞ্ঞাতো.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ অনুঞ্ঞাতো, সম্বহুলা ভন্তে ভিক্খূ উপজ্ঝাযেসু পক্কন্তেসুপি ৰিব্ভন্তেসুপি কালঙ্কতেসুপি পক্খসঙ্কন্তেসুপি অনাচরিযকা অনোৰদিযমানা অননুসাসিযমানা দুন্নিৰত্থা দুপ্পারুতা অনাকপ্পসম্পন্না পিণ্ডায চরিংসু, তস্মিং ভন্তে ৰত্থুস্মিং অনুঞ্ঞাতো.
পুচ্ছা – পঞ্চহি আৰুসো আবাধেহি ফুট্ঠং পব্বাজেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ পঞ্চহি আবাধেহি ফুট্ঠং পব্বাজেসুং, তস্মিং ভন্তে ৰত্থুস্মিং পঞ্ঞত্তং.
সাধু ভন্তে অয্যা পঞ্চহি আবাধেহি ফুট্ঠং ন পব্বাজেয্যুং…
পুচ্ছা – রাজভটং আৰুসো পব্বাজেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ রাজভটে পব্বাজেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – ধজবন্ধং আৰুসো চোরং পব্বাজেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহেযেৰ ভন্তে অঙ্গুলিমালং চোরং আরব্ভ পঞ্ঞত্তং, অঙ্গুলিমালো ভন্তে চোরো ভিক্খূসু পব্বজিতো হোতি, তস্মিং ভন্তে ৰত্থুস্মিং পঞ্ঞত্তং.
পুচ্ছা – কারভেদকং আৰুসো চোরং পব্বাজেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহেযেৰ ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ কারভেদকচোরং পব্বাজেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – ইণাযিকং আৰুসো পব্বাজেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহেযেৰ ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ ইণাযিকং পব্বাজেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – দাসং আৰুসো পব্বজেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – রাজগহেযেৰ ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ দাসং পব্বাজেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – ভণ্ডুকম্মায আৰুসো অপলোকনং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.
ৰিস্সজ্জনা – রাজগহেযেৰ ভন্তে অঞ্ঞতরং কম্মারভণ্ডুপুত্তং আরব্ভ অনুঞ্ঞাতং অঞ্ঞতরো ভন্তে কম্মারভণ্ডুপুত্তো মাতাপিতূহি সদ্ধিং ভণ্ডিত্ৰা ভিক্খূসু পব্বজিতো হোতি, তস্মিং ভন্তে ৰত্থুস্মিং অনুঞ্ঞাতং.
পুচ্ছা – ঊনৰীসতিৰস্সস্স আৰুসো পুগ্গলস্স উপসম্পদা ভগৰতা কত্থ পটিক্খিত্তা, কং আরব্ভ কিস্মিং ৰত্থুস্মিং পটিক্খিত্তা.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ পটিক্খিত্তা, সম্বহুলা ভন্তে ভিক্খূ ঊনৰীসতিৰস্সং পুগ্গলং উপসম্পাদেসুং, তস্মিং ভন্তে ৰত্থুস্মিং পটিক্খিত্তা.
ন ভিক্খৰে জানং ঊনৰীসতিৰস্সো পুগ্গলো উপসম্পাদেতব্বো, যোউপসম্পাদেয্য, যথাধম্মো কারেতব্বো.
পুচ্ছা – মাতাপিতূহি আৰুসো অননুঞ্ঞাতং পুত্তং পব্বাজেন্তস্স দুক্কটং ভগৰতা কত্থ পঞ্ঞত্তং, কিস্মিং ৰত্থুস্মিং পঞ্ঞত্তং.
ৰিস্সজ্জনা – সক্কেসু ভন্তে পঞ্ঞত্তং, রাজা ভন্তে সুদ্ধোদনো ভগৰন্তং উপসঙ্কমিত্ৰা ৰরং যাচি, সাধু ভন্তে অয্যাঅননুঞ্ঞাতং মাতাপিতূহি পুত্তং পব্বাজেয্যুন্তি, তস্মিং ভন্তে ৰত্থুস্মিং পঞ্ঞত্তং.
ন ভিক্খৰে অননুঞ্ঞাতো মাতাপিতূহি পুত্তো পব্বাজেতব্বো, যো পব্বাজেয্য, আপত্তিদুক্কটস্স.
পুচ্ছা – থেয্যসংৰাসকস্স আৰুসো উপসম্পদা ভগৰতা কত্থ পটিক্খিত্তা, কং আরব্ভ কিস্মিং ৰত্থুস্মিং পটিক্খিত্তা.
ৰিস্সজ্জনা – সাৰত্থিযং ভন্তে অঞ্ঞতরং পুরাণকুলপুত্তং আরব্ভ পটিক্খিত্তা, অঞ্ঞতরো ভন্তে পুরাণকুলপুত্তো খীণ কোলঞ্ঞো সামং পত্তচীৰরং পটিযাদেত্ৰা কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা আরামং গন্ত্ৰা ভিক্খূহি সদ্ধিং সংৰসি, ভন্তে ৰত্থুস্মিং পটিক্খিত্তা.
পুচ্ছা – তিরচ্ছানগতস্স আৰুসো উপসম্পদা ভগৰতা কত্থ পটিক্খিত্তা, কং আরব্ভ কিস্মিং ৰত্থুস্মিং পটিক্খিত্তা.
ৰিস্সজ্জনা – সাৰত্থিযং ভন্তে অঞ্ঞতরং নাগং আরব্ভ পটিক্খিত্তা, অঞ্ঞতরো ভন্তে নাগো মাণৰকৰণ্ণেন ভিক্খূ উপসঙ্কমিত্ৰা পব্বজ্জং যাচি, তং ভিক্খূ পব্বাজেসুং উপসম্পাদেসুং, তস্মিং ভন্তে ৰত্থুস্মিং পটিক্খিত্তা.
পুচ্ছা – মাতুঘাতকস্স চ আৰুসো পিতুঘাতকস্স চ উপসম্পদা ভগৰতা কত্থ পটিক্খিত্তা, কং আরব্ভ কিস্মিং ৰত্থুস্মিং পটিক্খিত্তা.
ৰিস্সজ্জনা – সাৰত্থিযংযেৰ ভন্তে অঞ্ঞতরং মাণৰকং আরব্ভ পটিক্খিত্তা, অঞ্ঞতরো চ ভন্তে মাণৰকো অঞ্ঞতরো চ মাণৰকো মাতরং জীৰিতা ৰোরোপেসি পিতরং জীৰিতা ৰোরোপেসি, তস্মিং ভন্তে ৰত্থুস্মিং পটিক্খিত্তা.
মাতুঘাতকো ভিক্খৰে অনুপসম্পন্নো নউপসম্পাদেতব্বো, উপসম্পন্নো নাসেতব্বো, পিতুঘাতকো ভিক্খৰে অনুপসম্পন্নো নউপসম্পাদেতব্বো, উপসম্পন্নো নাসেতব্বো.
পুচ্ছা – অপত্তচীৰরকং ৰা আৰুসো যাচিতপত্তচীৰরকং ৰা উপসম্পাদেন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ পঞ্ঞত্তং, সম্বহুলা ভন্তে ভিক্খূ অপত্তচীৰরকং উপসম্পাদেসুং, যাচিতকেন পত্তচীৰরেন উপসম্পাদেসুং, তস্মিং ভন্তে ৰত্থুস্মিং পঞ্ঞত্তং.
পুচ্ছা – উপসম্পদং পুচ্ছিস্সং, সনিদানং সউদ্দেসং. সমুক্কট্ঠপদানং আৰুসো কতি আপত্তিযো.
ৰিস্সজ্জনা – উপসম্পদং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে দ্ৰে আপত্তিযো.
২. উপোসথক্খন্ধক
পুচ্ছা – চাতুদ্দসে চ আৰুসো পন্নরসে চ পক্খস্স চ অট্ঠমিযা সন্নিপতিত্ৰা ধম্মং ভাসিতুং ভগৰতা কত্থ অনুঞ্ঞাতং, কিস্মিং ৰত্থুস্মিং অনুঞ্ঞাতং.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ অনুঞ্ঞাতা, সম্বহুলা ভন্তে ভিক্খূ চাতুদ্দেস পন্নরসে অট্ঠমিযা চ পক্খস্স সন্নিপতিত্ৰা তুণ্হী নিসীদিংসু, তস্মিং ভন্তে ৰত্থুস্মিং অনুঞ্ঞাতা.
অনুজানামি ভিক্খৰে চাতুদ্দসে পন্নরসে অট্ঠমিযা চ পক্খস্স সন্নিপতিতুং.
ননু নাম সন্নিপতিতেহি ধম্মো ভাসিতব্বো.
পুচ্ছা – কদা আৰুসো ভিক্খূনং পাতিমোক্খুদ্দেসো ভগৰতা অনুঞ্ঞাতো.
ৰিস্সজ্জনা – যদা ভন্তে ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি ‘‘যংনূনাহং যানি মযা ভিক্খূনং পঞ্ঞত্তানি সিক্খাপদানি, তানি নেসং পাতিমোক্খুদ্দেসং অনুজানেয্যং, সো নেসং ভৰিস্সতি উপোসথকম্ম’’ন্তি তদা ভন্তে ভগৰতা ভিক্খূনং পাতিমোক্খুদ্দেসো অনুঞ্ঞাতো.
পুচ্ছা – সীমং আৰুসো সম্মনিতুং ভগৰতা কত্থ অনুঞ্ঞাতং, কিস্মিঞ্চ ৰত্থুস্মিং অনুঞ্ঞাতং.
ৰিস্সজ্জনা – রাজগহে ভন্তে অনুঞ্ঞাতং, রাজগহে ভন্তে ভগৰতি ৰিহরতি ভিক্খূনং এতদহোসি ‘‘ভগৰতা পঞ্ঞত্তং এত্তাৰতা সামগ্গী, যাৰতা একাৰাসোতি কিত্তাৰতানুখো একাৰাসো হোতী’’তি, তস্মিং ভন্তে ৰত্থুস্মিং অনুঞ্ঞাতং.
পুচ্ছা – কতি আৰুসো উপোসথা দিৰসৰসেন চ কারকপুগ্গলৰসেন চ কাতব্বাকারৰসেন চ.
ৰিস্সজ্জনা – দিৰসৰসেন ভন্তে তযো উপোসথা, পুগ্গলৰসেন চ ভন্তে তযো উপোসথা, কাতব্বাকারৰসেন চ ভন্তে তযো উপোসথা.
পুচ্ছা – কতি আৰুসো উপোসথকম্মানি তেসু চ কীদিসং উপোসথকম্মং ভগৰতা অনুঞ্ঞাতং, কীদিসং অননুঞ্ঞাতং.
ৰিস্সজ্জনা – চত্তারিমানি ভন্তে উপোসথকম্মানি, অধম্মেন ৰগ্গং উপোসথকম্মং, অধম্মেন সমগ্গং উপোসথকম্মং, ধম্মেন ৰগ্গং উপোসথকম্মং, ধম্মেন সমগ্গং উপোসথকম্মং. তত্র ভন্তে যদিদং অধম্মেন ৰগ্গং উপোসথকম্মং, অধম্মেন সমগ্গং উপোসথকম্মং ধম্মেন ৰগ্গং উপোসথকম্মং, এৰরূপং ভন্তে উপোসথকম্মং অননুঞ্ঞাতং, তত্র ভন্তে যদিদং ধম্মেন সমগ্গং উপোসথকম্মং, এৰরূপং ভন্তে উপোসথকম্মং অনুঞ্ঞাতং.
পুচ্ছা – উপোসথং পুচ্ছিস্সং, সনিদানং সনিদ্দেসং. সমুক্কট্ঠপদানং আৰুসো কতি আপত্তিযো.
ৰিস্সজ্জনা – উপোসথং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে তিস্সো আপত্তিযো.