৭৮. এয্যা

অঞ্ঞত্রাপীতি ভৰেয্যামুভৰেয্যামইচ্চত্রাপি.

ইতি মোগ্গল্লানপঞ্চিকাটীকাযং সারত্থৰিলাসিনিযং

ছট্ঠকণ্ডৰণ্ণনা নিট্ঠিতা.

নিট্ঠিতা চ সব্বথা সারত্থৰিলাসিনী টীকেতি.

নিগম

১. সব্বদা সুভদাযিত্তা, সত্তানন্তনিসেৰিতে;

পসত্থে-ন্ৰত্থসঞ্ঞায, পঞ্ঞাতে সুভসঞ্ঞিতে.

২. চাগৰিক্কমপঞ্ঞানুদ্দযাদিগুণসালিনা;

সুভসেনাধিনাথেন, কারিতে ৰসতা সতা.

৩. পটিসল্লানসারুপ্পে, ৰিহারে সাধুগোচরে;

মনোনুকূলে যোগীনং, ৰরে ৰিক্কমসুন্দরে.

৪. থেরেন রচিতা সাযং, সাসনুজ্জোতনত্থিনা;

টীকা গুরুপদম্ভোজ, রজোমত্থকসেৰিনা.

৫. বহুস্সুতানং ৰিঞ্ঞূনং, পরমত্থাৰগাহিনং.

পৰত্ততু চিরং চেতো, রঞ্জযন্তী নিরন্তরং.

৬. যেসং ন সঞ্চিতা পঞ্ঞা, নেকসত্তন্তরোচিতা;

সম্মোহব্ভহতাৰেতে, নাৰবুজ্ঝন্তি কিঞ্চিপি.

৭. কিন্তেহি পাদসুস্সূসা, যেসং নত্থি গুরূনিহ;

যে তপ্পাদরজোকিণ্ণা, তেৰ সাধূৰিৰেকিনো.

৮. পুঞ্ঞেন সত্থরচনাজনিতেন তেন,

সম্বুদ্ধসাসনৰরোদযকারণেন;

লোকামিসেসুপি কিলেসমলা অলগ্গো,

সম্বুদ্ধসাসনৰরোদযমাচরেয্যং.

৯. যে-নন্ততন্তরতনাকরমন্থনেন,

মন্থাচ লোল্লসিতঞাণৰরেন লদ্ধা;

সারামথাতি সুখিতা সুখযন্তি চঞ্ঞে,

তেমে জযন্তি গুরৰা গুরৰো গুণেহি.

১০. টীকাযো ৰিনসাদিনং ৰিরচযী যো কণ্ঠভূসাপরো,

ৰিঞ্ঞূনং জিনসাসনামলমতীসো-কাসি চানাকুলং;

সন্তোসক্কমনোমনোমকমনো সব্ভাৰনীযো মহা,

সামী মে গুরুপুঙ্গৰো ৰিজযতে সারীসুতো-যং ভুৰি.

১১. রাজা ৰিক্কমবাহু বাহিতরিপূ তাত্ৰস্স [ভাতাস্স] লোকিস্সরো,

সম্মিত্তানিহনো তিসীহল়পতী যোযং মহাৰিক্কমো;

নিব্ভীতো [তিসূরো] ৰিজযাদিবাহু ৰিজযী সো আসি লঙ্কিস্সরো,

তং নিস্সায ফলং চিরায ফলতঞ্চেতং সতং সন্ততং.

সিদ্ধি রত্থু

১. অগ্গম্মোতিৰংসেন, অভযারামসামিনা;

পঞ্চিকাৰণ্ণনাভূতা, সা সারত্থৰিলাসিনী.

২. ম্রম্মক্খরমারোপেত্ৰা, ৰিসোধেত্ৰা যথাবলং;

সকিযব্যৰহারেন, তিথীৰসু করিন্দুনা.

৩. যুত্তে ৰস্সে লঙ্কাদীপা, সরট্ঠমাহতা পুন;

ভাস্সপ্পদীপকাতন্ত, কাসিকাপঞ্চিকাদিহি.

৪. সংসন্দিত্ৰা ৰিচারেত্ৰা, ৰাচেত্ৰাচ পুনপ্পুনং;

ঊনাধিকাদি দোসানি, অপনেত্ৰা সিনেসিনে.

৫. সুদ্ধট্ঠকে চ ৰস্সেসা, পাপিতা পকতিট্ঠিতিং;

সুদ্ধাসুদ্ধংৰ দস্সেন্তী, সোধেতু পাঠসুদ্ধিযা.