৩. অনেকত্থৰগ্গৰণ্ণনা

৭৭৭. ইদানি সংকিণ্ণৰগ্গতো অনন্তরং গাথাতো, গাথায অদ্ধতো, পাদতো চাতি ইমেহি তীহি পকারেহি অনেকত্থে নানত্থে সমযাদিকে সদ্দে কমা কমতো পৰক্খামি. এত্থ অনেকত্থৰগ্গে একস্স ভূতসদ্দাদিকস্স যা পুনরুত্ততা, সা থীপুন্নপুংসকসঙ্খাতলিঙ্গৰিসেসত্থং কতা.

৭৭৮. সমৰাযত্থাদিৰাচকে বহৰো সমযসদ্দে জাতিযা সঙ্গয্হ ‘‘সমযো’’তি একৰচননিদ্দেসো কতো. তত্র ‘‘কালঞ্চ সমযঞ্চ উপাদাযা’’ত্যাদীসু [দী. নি. ১.৪৪৭] সমৰাযে পচ্চযসামগ্গিযং. ‘‘মহাসমযো পৰনস্মিং, দেৰকাযা সমাগতা’’ত্যাদীসু সমূহে. ‘‘সমযোপি খো তে ভদ্দালি অপ্পটিৰিদ্ধো’’ত্যাদীসু [ম. নি. ২.১৩৫] কারণে. ‘‘একোযেৰ চ খো খণো চ সমযো চা’’ত্যাদীসু [অ. নি. ৮.২৯] খণে ওকাসে. ‘‘অভিসমযত্থো’’ত্যাদীসু পটিৰেধে. ‘‘একং সমযং ভগৰা’’ত্যাদীসু [দী. নি. ১.১] কালে. ‘‘সম্মা মানাভিসমযা’’ত্যাদীসু [ম. নি. ১.২৮] পহানে. ‘‘অত্থাভিসমযা ধীরো’’ত্যাদীসু লাভে [সং. নি. ১.১২৯]. ‘‘সমযপ্পৰাদকে তিন্দুকাচিরে’’ত্যাদীসু [ম. নি. ২.২০৮] দিট্ঠিযং.

তত্থ সহকারীকারণতায সন্নিজ্ঝং সমেতি সমৰেতীতি সমযো, সমৰাযো. সমং, সহ ৰা অৰযৰানং অযনং পৰত্তি অৰট্ঠানন্তি সমযো, সমূহো, যথা – সমুদাযোতি অৰযৰসহাৰত্থানমেৰ হি সমূহোতি. অৰসেসপচ্চযানং সমাগমে এতি ফলং এতস্মা উপ্পজ্জতি পৰত্ততি চাতি সমযো, কারণং, যথা ‘‘সমুদাযো’’তি. সমেতিসমাগচ্ছতি এত্থ মগ্গব্রহ্মচরিযং তদাধারপুগ্গলেহীতি সমযো, খণো. অভিমুখং ঞাণেন সম্মা এতব্বো অৰগন্তব্বোতি অভিসমযো, ধম্মানং অৰিপরীতো সভাৰো. অভিমুখভাৰেন সম্মা এতি গচ্ছতি বুজ্ঝতীতি অভিসমযো, ধম্মানং অৰিপরীতসভাৰাৰবোধো. সমেতি এত্থ, এতেন ৰা সঙ্গচ্ছতি সত্তো, সভাৰধম্মো ৰা সহজাতাদীহি, উপ্পাদাদীহি ৰাতি সমযো, কালো, ধম্মপ্পৰত্তিমত্ততায অত্থতো অভূতোপি হি কালো ধম্মপ্পৰত্তিযা অধিকরণং ৰিয, করণং ৰিয চ পরিকপ্পনামত্তসিদ্ধেন রূপেন ৰোহরীযতীতি. সমস্স নিরোধস্স যানং, সম্মা ৰা যানং অপগমোতি সমযো, পহানং. সমিতি সঙ্গতি সমোধানন্তি সমযো, পটিলাভো, সমেতি সম্বন্ধো এতি অত্তনো ৰিসযে পৰত্ততি, দল়্হগ্গহণভাৰতো ৰা সম্পযুত্তা অযন্তি পৰত্তন্তি সত্তা যথাভিনিৰেসং এতেনাতি সমযো, দিট্ঠি. দিট্ঠিসংযোজনেন হি সত্তা অতিৰিয বজ্ঝন্তীতি, এৰং তস্মিং তস্মিং অত্থে সমযসদ্দস্স পৰত্তি ৰেদিতব্বা. সমযসদ্দস্স অত্থুদ্ধারে অভিসমযসদ্দস্স উদাহরণং সোপসগ্গো, অনুপসগ্গো চ সমযসদ্দো সমৰাযাদ্যত্থৰাচকো হোতীতি দস্সনত্থং. এৰং সব্বত্র উদাহরণং তংতদত্থানুরূপনিব্বচনাদযো দট্ঠব্বা.

৭৭৯. সণ্ঠানং দীঘরস্সাদি. রূপং রূপাযতনং, জাতি খত্তিযাদিকুলং. ছৰি বহিচম্মং, পমাণং মরিযাদো. অক্খরং অকারাদি, যসো পরিৰারো, কিত্তি চ. গুণো সীলাদি, তপনিযেপি ৰণ্ণো.

৭৮০. পাতিমোক্খস্স ভিক্খুভিক্খুনীনং ৰসেন দুৰিধস্স পাতিমোক্খস্স উদ্দেসে ‘‘সঙ্ঘো উপোসথং করেয্যা’’তি [মহাৰ. ১৩৪]. পণ্ণত্তিযং ‘‘উপোসথো নাম নাগরাজা’’তি [দী. নি. ২.২৪৬]. উপৰাসো ৰুত্তো. অট্ঠঙ্গো ‘‘পাণাতিপাতা ৰেরমণি’’আদি. উপোসথদিনং ‘‘অজ্জুপোসথো পন্নরসো’’ত্যাদীসু [মহাৰ. ১৬৮].

৭৮১-৭৮২. রথঙ্গং চক্কদ্ৰযং. লক্খণং চক্কলক্খণং. ‘‘মযা পৰত্তিতং চক্ক’’ন্ত্যাদীসু [সু. নি. ৫৬২] ধম্মচক্কে. উরচক্কং নাম খুরচক্কং ‘‘চক্কং ভমতি মত্থকে’’তি [জা. ১.১.১০৪; ১.৫.১০০]. ‘‘চতুচক্কং নৰদ্ৰার’’ন্ত্যাদীসু [সং. নি. ১.২৯] ইরিযাপথচক্কে. ‘‘চত্তারিমানি, ভিক্খৰে, চক্কানি, যেহি সমন্নাগতানং দেৰমনুস্সানং চতুচক্কং ৰত্ততী’’ত্যাদীসু [অ. নি. ৪.১৩১] সম্পত্তিচক্কে. ‘‘পিতরা পৰত্তিতং চক্কং অনুৰত্তেতী’’ত্যাদীসু [অ. নি. ৫.১৩২] চক্করতনে. মণ্ডলং ‘‘অলাতচক্ক’’ন্ত্যাদীসু ‘‘অসনিৰিচক্ক’’ন্তি [দী. নি. ৩.৬১; সং. নি. ২.১৬২] চ. বলং থামো. কুলালো কুম্ভকারো, তস্স ভণ্ডে কুলালচক্কন্তি. আণাযং ‘‘চক্কং ৰত্তযতি পাণীন’’ন্তি [জা. ১.৭.১৪৯]. আযুধে চক্কাকারে আযুধে. দানং দেয্যধম্মো. রাসি খন্ধো. সদ্ধগাথাপি গাথাযেৰ.

‘‘দণ্ডকা চণ্ডৰুট্ঠ্যাদি, পাদেহি ছহি তীহি তু;

গাথাতি চ পরত্থেৰং, ছন্দোসঞ্ঞা পকাসিতা.

অনন্তরোদিতং চঞ্ঞ-মেতং সামঞ্ঞনামতো;

গাথাইচ্চেৰ নিদ্দিট্ঠং, মুনিন্দৰচনে পনা’’তি [ৰুত্তোদয ১৪-১৫ গাথা] হি ৰুত্তং.

৭৮৩. ‘‘কিং তে ৰতং কিং পন ব্রহ্মচরিযং,

কিস্স সুচিণ্ণস্স অযং ৰিপাকো;

ইদ্ধিজুতিবলৰিরিযূপপত্তি,

ইদঞ্চ তে নাগ মহাৰিমানং.

অহঞ্চ ভরিযা চ মনুস্সলোকে,

সদ্ধা উভো দানপতী অহুম্হ;

ওপানভূতং মে ঘরং তদাসি,

সন্তপ্পিতা সমণব্রাহ্মণা চ.

তং মে ৰতং তং পন ব্রহ্মচরিযং,

তস্স সুচিণ্ণস্স অযং ৰিপাকো;

ইদ্ধিজুতিবলৰিরিযূপপত্তি,

ইদঞ্চ মে ধীর মহাৰিমান’’ন্তি [জা. ২.২২.১৫৯২, ১৫৯৩, ১৫৯৫]

ইমস্মিং ৰিধুরপণ্ডিতজাতকে দানস্মিং আগতো.

‘‘তং খো পন পঞ্চসিখ ব্রহ্মচরিযং নেৰ নিব্বিদায ন ৰিরাগায যাৰদেৰ ব্রহ্মলোকূপপত্তিযা’’তি [দী. নি. ২.৩২৯] ইমস্মিং মহাগোৰিন্দসুত্তে অপ্পমঞ্ঞাসু. ‘‘তযিদং ব্রহ্মচরিযং ইদ্ধঞ্চেৰ ফীতঞ্চ ৰিত্থারিকং বাহুজঞ্ঞং পুথুভূতং যাৰদেৰ মনুস্সেসু সুপ্পকাসিত’’ন্তি [দী. নি. ৩.১৭৪] পাসাদিকসুত্তে সিক্খত্তযসঙ্গহে সকলস্মিং সাসনে. ‘‘পরে অব্রহ্মচারী ভৰিস্সন্তি, মযমেত্থ ব্রহ্মচারিনো ভৰিস্সামা’’তি [ম. নি. ১.৮৩] ইমস্মিং সল্লেখসুত্তে মেথুনা ৰিরতিযং.

‘‘কেন পাণি কামদদো, কেন পাণি মধুস্সৰো;

কেন তে ব্রহ্মচরিযেন, পুঞ্ঞং পাণিম্হি ইজ্ঝতি.

তেন পাণি কামদদো, তেন পাণি মধুস্সৰো;

তেন মে ব্রহ্মচরিযেন, পুঞ্ঞং পাণিম্হি ইজ্ঝতী’’তি [পে. ৰ. ২৭৫]. –

ইমস্মিং অঙ্কুরপেতৰত্থুম্হি ৰেয্যাৰচ্চে.

‘‘মযঞ্চ ভরিযা নাতিক্কমাম,

অম্হে চ ভরিযা নাতিক্কমন্তি;

অঞ্ঞত্র তা ব্রহ্মচরিযং চরাম,

তস্মা হি অম্হং দহরা ন মিয্যরে’’তি [জা. ১.১০.৯৭]. –

মহাধম্মপালজাতকে সদারতুট্ঠিযং.

‘‘এৰং খো তং, ভিক্খৰে, তিত্তিরিযং নাম ব্রহ্মচরিযং অহোসী’’তি [চূল়ৰ. ৩১১] ইমস্মিং তিত্তিরজাতকে পঞ্চসীলে.

‘‘ইদং খো পন পঞ্চসিখ ব্রহ্মচরিযং একন্তনিব্বিদায ৰিরাগায…পে… অযমেৰ অরিযো অট্ঠঙ্গিকো মগ্গো’’তি [দী. নি. ২.৩২৯] মহাগোৰিন্দসুত্তেযেৰ অরিযমগ্গে.

‘‘হীনেন ব্রহ্মচরিযেন, খত্তিযে উপপজ্জতি;

মজ্ঝিমেন চ দেৰত্তং, উত্তমেন ৰিসুজ্ঝতী’’তি [জা. ১.৮.৭৫]. –

নিমিজাতকে অত্তদমনৰসেন কতে অট্ঠঙ্গুপোসথে.

‘‘অভিজানামি খো পনাহং, সারিপুত্ত, চতুরঙ্গসমন্নাগতং ব্রহ্মচরিযং চরিত্ৰা তপস্সি সুদং হোমী’’তি [ম. নি. ১.১৫৫] লোমহংসসুত্তে ধিতিসঙ্খাতে ৰীরিযে.

৭৮৪. সভাৰো অৰিপরীতত্থো. পরিযত্তি পরিযাপুণিতব্বা ৰিনযাভিধম্মসুত্তন্তা. ঞাযো যুত্তি, সপ্পটিপদা ৰা মগ্গাদযো. ঞেয্যে সঙ্খারৰিকারলক্খণনিব্বানপঞ্ঞত্তিৰসেন পঞ্চৰিধে ঞেয্যে. নিস্সত্ততা সত্তসভাৰস্স অভাৰতা. আপত্তিযং ‘‘পারাজিকং ধম্ম’’ন্তি. ‘‘সহ ধম্মেন নিগ্গয্হা’’ত্যাদীসু কারণে. আদিনা সমযঞ্ঞূপমাহিংসাদীসুপি ধম্মো.

৭৮৫. পযোজনং ফলং. সদ্দাভিধেয্যে সদ্দত্থে. ৰুড্ঢিযং ৰড্ঢনে. ৰত্থুম্হি দব্বে. নাসে ৰিনাসে. পচ্ছিমপব্বতে অত্থগিরিম্হি. নিৰত্তিৰিসযুপ্পত্তিসভাৰাদীসুপি.

৭৮৬. যেভুয্যতা বাহুল্যতা. অব্যামিস্সং অসম্মিস্সং. ৰিসংযোগে ৰিপ্পযোগে. দল়্হত্থে দল়্হসদ্দস্স অত্থে. অনতিরেকে অতিরেকাভাৰে. অনৰসেসম্হি সব্বস্মিং, তং কেৰলৰচনং তীসু লিঙ্গেসু.

৭৮৭. পটলং ‘‘দিগুণং সঙ্ঘাটিং পারুপিত্ৰা’’ত্যাদীসু [মহাৰ. ৩৪৮]. ‘‘ৰযোগুণা অনুপুব্বং জহন্তী’’তি [সং. নি. ১.৪] রাসিম্হি. ‘‘সতগুণা দক্খিণা পাটিকঙ্খিতব্বা’’তি [ম. নি. ৩.৩৭৯] আনিসংসে. বন্ধনং কামগুণং. অপ্পধানে ৰিসেসনে. জিযায ধনুনো.

৭৮৮-৭৮৯. রুক্খাদো দুমাদিম্হি. ৰিজ্জমানে ভূতগুণে. অরহন্তে ‘‘যো চ কালঘসো ভূতো, সভূতপচিনিং পচী’’তি [জা. ১.২.১৯০]. খন্ধপঞ্চকে ‘‘ভূতমিদং, সারিপুত্ত, সমনুপস্সথা’’তি [ম. নি. ১.৪০১]. সত্তে পাণিম্হি. মহাভূতে পথৰাদিকে. অমনুস্সো দেৰরক্খসাদি. ৰিজ্জমানত্থৰজ্জিতে রুক্খাদো নারিযং ন ভৰতি, ৰিজ্জমানত্থে, পন অতীতাদীসু চ ৰাচ্চলিঙ্গো. পত্তে সম্পত্তে. সমে তুল্যত্থে.

৭৯০. সজ্জনে সপ্পুরিসে.

৭৯১. পদপূরণে ‘‘সুত্তন্ত ৰনন্তা’’ত্যাদীসু. দেহাৰযৰে ‘‘অন্তং অন্তগুণ’’ন্ত্যাদীসু [খু. পা. ৩.দ্ৰত্তিংসাকার]. দেহো চ অৰযৰো চাতি একে. কোট্ঠাসে ‘‘অযমেকো অন্তো’’ত্যাদীসু [অ. নি. ৬.৬১]. লামকং নিহীনকং.

৭৯২. নিকাযো সধম্মীনং গণো. সন্ধি পটিসন্ধি. সামঞ্ঞে ৰিসেসাধারে. পসূতি মাতুকুচ্ছিতো নিক্খমনং, কুলং খত্তিযাদিকুলং. ভৰো ভৰনক্রিযা. ৰিসেস্যো উপাধি, যস্স ৰসেন ভিন্নেসু সবলাদীসু অভিন্না ধীসদ্দা ৰত্তন্তে. সুমনাযং মালতিযং. সঙ্খতলক্খণে সঙ্খতধম্মানং লক্খণে.

৭৯৩. ভৰভেদো কামভৰাদি. পতিট্ঠাযং নিস্সযে. নিট্ঠা নিপ্ফত্তি. অজ্ঝাসযো অধিপ্পাযো. বুদ্ধি ঞাণং. ৰাসট্ঠানং ৰসনট্ঠানং. ৰিসরত্তং ৰিসরণভাৰো. ‘‘ৰিসদত্থে’’তিপি পাঠো, তদা সদধাতুস্স ৰিসরণত্থতা দট্ঠব্বা.

৭৯৪. ফলে সোতাপত্তাদিকে. অনিচ্চাদিঅনুপস্সনা ৰিপস্সনা নাম. মগ্গে সোতাপত্তিমগ্গাদিকে.

৭৯৫. কম্মারুদ্ধনং কম্মারানং উদ্ধনং, কম্মারানং যথা উক্কাতি. অঙ্গারকপল্লং অঙ্গারানং ভাজনং. দীপিকা নাম মধুচ্ছিট্ঠাদিমযা পদীপকিচ্চকারিকা. সুৰণ্ণকারমূসা মত্তিকমযা একা ভাজনৰিকতি. ৰাযুনো ৰেগে চ উক্কাসদ্দো, যো ‘‘দেৰদুদ্রভী’’তি ৰুত্তো.

৭৯৬. কেসোহারণং কেসানং লৰনং. জীৰিতৰুত্তি জীৰিতস্স ৰত্তনং. ৰপনং বীজস্স ৰপনং. ৰাপসমকরণং ৰপিতস্স বীজস্স সমকরণং. পৰুত্তভাৰো বন্ধনা মুত্তি.

৭৯৭-৭৯৮. সুতো ৰিস্সুতে পাকটে. অৰধারিতে উপলক্খিতে. উপচিতে রাসীকতে. অনুযোগো পুচ্ছা. কিলিন্নে তিন্তে. সোতৰিঞ্ঞেয্যং সদ্দাযতনং. সত্থং সদ্দসত্থাদি, সুতনামকো ৰা একো সত্থৰিসেসো. এতেসু দ্ৰীসু অত্থেসু সুতং নপুংসকং. পুত্তে সুতো পুল্লিঙ্গো, রাজিনিপি সুতো.

৭৯৯. যুগে কতাদিচতুক্কে. লেসো অনুমানঞাণৰিসযো. পঞ্ঞত্তিযং ‘‘কপ্পত্থেরো’’তি. পরমাযুম্হি ‘‘কপ্পং সগ্গম্হি মোদতী’’তি. অঞ্ঞত্র কপ্পাদীসু পুল্লিঙ্গে. সদিসে পন তীসু লিঙ্গেসু. সমণৰোহারো ৰিনযাগতো সমণানং ৰোহারো. কপ্পবিন্দু চীৰরে কতবিন্দু. সমন্তত্তে সমন্তভাৰে. অন্তরকপ্পো মহাকপ্পস্স অসীতিমো ভাগো. আদিসদ্দেন অসঙ্খ্যেয্যমহাকপ্পে সঙ্গণ্হাতি. তক্কে ৰিতক্কে. ৰিধি ৰিধানং.

৮০০. ৰিরতি ৰিরতিত্তযং. সপথো অক্কোসো. তচ্ছে তথভাৰে. অরিযসচ্চম্হি দুক্খসচ্চাদিকে. দিট্ঠি মিচ্ছাদিট্ঠি.

৮০১. সঞ্জাতিদেসো ‘‘কম্বোজো অস্সাযতন’’ন্তি. ৰাসট্ঠানং নিৰাসট্ঠানং ‘‘দেৰানং দেৰাযতন’’ন্তি. আকরোতি যত্থ সুৰণ্ণরজতাদযো উপ্পজ্জন্তি. সমোসরণট্ঠানং বহূনং সন্নিপাতট্ঠানং. পদপূরণে ‘‘কম্মাযতনং, সিপ্পাযতন’’ন্তি.

৮০২. ৰত্থং অম্বরং. অঞ্ঞো যো সকো ন হোতি. ওধি মরিযাদো. ভেদো ৰিসেসো. মনসিপি চিত্তেপি.

৮০৩. ৰিপাকে ইট্ঠৰিপাকে কুসলো. অনৰজ্জাদীসু ৰাচ্চলিঙ্গিকো.

৮০৪. দ্রৰো মধ্ৰাদি. মধুরাদীসু ছসু রসেসু. পারদো সূতো. সিঙ্গারাদো নৰ নাট্যরসে. রসরত্তমংসমেদট্ঠিসুক্কট্ঠিমিঞ্জৰসেন সত্ত ধাতৰো, তব্ভেদে. কিচ্চে ফস্সাদিধম্মানং সঙ্ঘট্টনাদিকিচ্চে. সম্পত্তি তেসংযেৰ.

৮০৫. বোধিসদ্দো ঞাণদ্ৰযে নারিযং, বোধিরাজকুমারাদিপঞ্ঞত্তিযং পুমে. অস্সত্থরুক্খে পুমিত্থিযং.

৮০৬. যেন কত্তুভূতেন যো কম্মভূতো নিচ্চসেৰিতো, তত্থাপি কম্মভূতে. ৰিসযো অনঞ্ঞথাভাৰো. জনপদে কুরুআদিকে. গোচরে তব্বহুলাচারে.

৮০৭. সত্তাযং ৰিজ্জমানতাযং.

৮০৮. বন্ধৰে সো পুমে. অত্তনি সং নপুংসকে. ধনস্মিং সো সং অনিত্থিযং. সুনখে সা পুমে ৰুত্তো. অত্তনিযে সো তিলিঙ্গিকো.

৮০৯. ছৰিসম্পত্তিযং ছৰিযা সম্পত্তিযং.

৮১০. জামাতা ধীতুসামিকো. মন্দপ্পিযে অপ্পপিযে ৰরং অব্যযং.

৮১১. মকুলে অৰিকাসসম্পত্তে. নেত্তিংসাদিপিধানে খগ্গাদীনং গেহে.

৮১২. পিতামহো ব্রহ্মা. পিতূসু মাতাপিতূসু. তথা পক্খন্তরে. তপসি সীলে.

৮১৩-৮১৪. মজ্ঝবন্ধে উরোবন্ধনে. পকোট্ঠো কপ্পরস্সাধোভাগো. কচ্ছবন্ধনং অধোম্বরস্স দল়্হবন্ধনং. মেখলাযঞ্চাতি কচ্ছা চতূস্ৰত্থেসু. কচ্ছো লতাদীসু. কচ্ছো বাহুমূলম্হি পরূল়্হকচ্ছনখলোমে, ‘‘কচ্ছেহি সেদা মুঞ্চন্তী’’তি. অনূপো বহূদকদেসো.

৮১৫. মানং তুলাপত্থঙ্গুলীহি. পমাতরি পমাণস্স কত্তরি.

৮১৬. দব্বং ধনং. অত্তভাৰো পঞ্চক্খন্ধসমূহো. পাণো জীৰিতিন্দ্রিযং. দব্বাদীসু চতূসু সত্তং. সত্তাযং ৰিজ্জমানতাযং সত্তা. জনে সত্তো. সো সত্তসদ্দো, আসত্তে লগ্গিতে তিলিঙ্গিকো.

৮১৭. সেম্হাদো তিদোসে. রসরত্তাদি পুব্বেৰুত্তো. পভাদিকে রূপধাতুম্হি. চক্খাদিকে ৰিসযধাতুম্হি.

৮১৮. অমচ্চাদিকা সত্ত পকতিযো ৰুত্তা. সত্তাদিসাম্যৰত্থা সত্তরজতমভূতানং তিণ্ণং গুণানং সাম্যৰত্থা. পচ্চযা ণপচ্চযাদিতো পঠমে পঠমসণ্ঠিতে করোত্যাদিধাতুম্হি.

৮১৯. পরিত্তাণং রক্খণং. ৰত্থুম্হি ওকাসে. তল্লঞ্ছনং পাদস্স ঠানং.

৮২০. লোহমুগ্গরে লোহমযে মুগ্গরে. তাল়াদিকে সম্মতাল়কংসতাল়াদিকে. কঠিনে কক্খল়ে.

৮২১. মক্খিকা নীলমক্খিকাদিকা. তাসং ভেদা সৰিসা মধুকতা পিঙ্গলমক্খিকা. মধুম্হি খুদ্দং অপ্পকাদীসু চতূস্ৰত্থেসু ৰত্তমানং তীসু লিঙ্গেসু. অধমো নিহীনো. কপণো একচারী.

৮২২. তক্কে গোরসৰিসেসে. মরণলিঙ্গে মরণঞাপকলক্খণে. অসুভে, সুভে চাতি চতূস্ৰত্থেসু অরিট্ঠং. আসৰো মজ্জৰিসেসো. ফেণিলদ্দুমো ‘‘বডী-য্ौ-খো’’.

৮২৩. গেহানং দারুবন্ধপ্পযোজনং পীঠিকা নাম. পক্খন্দদ্ৰযস্স, কণ্ণিকাদীনঞ্চ নিস্সযভূতা পীঠিকা.

৮২৪. মিত্তাকারে অমিত্তস্সাপি মিত্তসণ্ঠানে. বলে, রাসিম্হি, ৰিপত্তিযঞ্চ, ‘‘বলস্স রাসী’’তিপি একে.

৮২৫. খন্ধে রূপক্খন্ধে. ভৰে রূপভৰে. নিমিত্তম্হি কারণে. ৰপু সরীরং.

৮২৬. ৰত্থুকিলেসকামেসূতি ৰত্থুকামকিলেসকামেসু. মদনে মারদেৰপুত্তে. রতে মেথুনে. নিকামে ইচ্ছারহিতে কামং নপুংসকে. অনুঞ্ঞাযং কামমব্যযং ভৰে.

৮২৭. ৰজ্জভণ্ডমুখে ৰীণাদোণিমুখে. মাতঙ্গস্স হত্থিনো করকোটি হত্থগ্গং.

৮২৮. রম্ভো সঠ্যং, কেতৰন্ত্যত্থো. অসচ্চং মুসা. অযোঘনং যেন পহরতি. গিরিসিঙ্গম্হি গিরগ্গে. সীরঙ্গে ফালঙ্গে. যন্তে কূটযন্তে.

৮৩০. পটিৰাক্যে পটিৰচনে. উত্তরাসঙ্গে উপরিৰত্থে. সেট্ঠাদীসু উত্তরো তীসু, পরস্মিং উপরিস্মিঞ্চ ঈরিতো.

৮৩১. ৰিমুত্তি অরহত্তফলং মগ্গনিব্বানানিপি.

৮৩২. সঙ্খতে পচ্চযাভিসঙ্খতে ধম্মে. পুঞ্ঞাভিসঙ্খারো, অপুঞ্ঞাভিসঙ্খারো, আনেঞ্জাভিসঙ্খারোতি পুঞ্ঞাভিসঙ্খারাদি. পযোগো উস্সাহো. কাযসঙ্খারো, ৰচীসঙ্খারো, চিত্তসঙ্খারোতি কাযসঙ্খারাদি. অভিসঙ্খরণং অভিসঙ্খরণক্রিযা.

৮৩৩. তব্ভাৰে দিট্ঠিসহগতং.

৮৩৪. পতিরূপে যুত্তে. ছাদিতে তিণাদীহি. রহো সুঞ্ঞট্ঠানং. পঞ্ঞত্তিযং ছন্নো ভিক্খু, পঞ্ঞত্তিযংযেৰ পুমে.

৮৩৫. বুদ্ধচক্খু বুদ্ধানং চক্খু. সমন্তচক্খু সব্বঞ্ঞুতঞাণং. ধম্মচক্খু হেট্ঠামগ্গত্তযে ঞাণং.

৮৩৬. অভিক্কমো অভিক্কমনীযো.

৮৩৭. ৰেৰচনং অভিন্নত্থো সদ্দো. পকারস্মিং ভেদে. অৰসরো অৰকাসো.

৮৩৮. চিত্তকম্মং চিত্তকারানং কম্মং. ৰিচিত্তে নানাৰিধে. পঞ্ঞত্তিযং চিত্তো ধনুধরোযেৰ. চিত্তমাসো পুণ্ণেন্দুযুত্তেন চিত্তেন নক্খত্তেন লক্খিতো মাসো. তারন্তরে চিত্তনক্খত্তে. থিযং নারিযং.

৮৩৯. সামলে নীলে. সযমত্থে সযংসদ্দস্স অত্থে. সারিৰা উপাসকা.

৮৪০. ‘‘পুমে’’ত্যাদিনা পুব্বদ্ধেন গুরুসদ্দস্স অত্থা ৰুত্তা, অপরদ্ধেন গরুসদ্দস্স, ‘‘একদেসেকত্তমনঞ্ঞংৰে’’তি ন্যাযেন দ্ৰিন্নম্পি একত্তমঞ্ঞমানেন গাথানেকত্থৰগ্গে কথিতা. মহন্তে বহুত্তে. দুজ্জরে জীরাপেতুমসক্কুণেয্যে, দুক্করে ৰা.

৮৪১. অচ্চিতে পূজিতে. খিন্নে কিলমথপ্পত্তে. সমিতে উপসমিতে.

গাথানেকত্থৰগ্গৰণ্ণনা নিট্ঠিতা.

৮৪২. ৰিসুদ্ধিদেৰো, সম্মুতিদেৰো, উপপত্তিদেৰো চাতি ৰিসুদ্ধিদেৰাদি. নভং আকাসো.

তরুণাদীসু তীস্ৰত্থেসু মাণৰো.

৮৪৩. আদ্যত্থাদীসু অগ্গং. ৰরে সেট্ঠে তীসু.

পচ্চনীকো সত্তু. অঞ্ঞে অঞ্ঞত্থে. পচ্ছাভাগে ‘‘ধাতুলিঙ্গেহি পরা পচ্চযা’’তি.

৮৪৪. যোনি ইত্থীনং যোনিমগ্গো. কামো ইচ্ছা. সিরী পঞ্ঞা, পুঞ্ঞো চ. ইস্সরং পভুতা. ধম্মো সীলাদি. উয্যামো ৰীরিযং. যসো পরিৰারো, কিত্তি চ.

৮৪৫. সমঙ্গিনি সমন্নাগতে.

৮৪৬. ঠিতি ঠানক্রিযা.

৮৪৮. খন্ধকোট্ঠাসো অণ্ডজাদিচতুক্কং. পস্সাৰমগ্গো ইত্থীনং যোনি. সো পুল্লিঙ্গো. কূলে তীরে.

৮৪৯. নাগোতুনাগসদ্দো তু. উরগে সপ্পে, হত্থিনি চ.

৮৫০. সঙ্খ্যা গণনা. ‘‘অঞ্ঞত্থে’’ত্যেকে ৰদন্তি.

৮৫১. ভে নক্খত্তৰিসেসে. সন্তিকে সমীপে. মূলমূলে লোভাদিকে. পাভতে মূলধনে. অংসো সরীরাৰযৰো. পকণ্ডে রুক্খাদীনং সরীরে.

৮৫২. কম্মে ক্রিযাযং. ৰিকোপনং ৰিদ্ধংসনং.

৮৫৩. পচ্ছাতাপো ৰিপ্পটিসারো. অনুবন্ধো পুনপ্পুনং পৰত্তনং. রাগাদো সত্তকে. মাতঙ্গস্স মুদ্ধনি পিণ্ডদ্ৰযে কুম্ভো.

৮৫৪. খগ্গকোসে খগ্গপিধানে. পটিচ্ছদে সমন্ততো ছাদনে. সারম্ভে কোলাহলে.

৮৫৫. কালৰিসেসো দসচ্ছরকালো. নিব্যাপারট্ঠিতি অচিরট্ঠিতি, অচিরট্ঠিতীতি দসচ্ছরতোপি ঊনট্ঠিতি.

উপ্পত্তিভূমি জাতিভূমি.

৮৫৬. কবল়ীকারাহারাদীসু চতূসু.

৮৫৭. সদ্ধায অপরপ্পচ্চযে. চীৰরাদীসু চতূসু. আধারো নিস্সযো.

দিব্বৰিহারো, অরিযৰিহারো, ব্রহ্মৰিহারো চাতি দিব্বৰিহারাদি. সুগতালযে ভিক্খূনমাৰাসে.

৮৫৮. সমত্তনে নিট্ঠাযং. চকারেন নিযমাদিকে সঙ্গণ্হাতি.

সঙ্গে লগ্গে. কামাদো চতুক্কে.

৮৫৯. সপ্পফণঙ্গেসূতি সপ্পস্স ফণে, অঙ্গে চ সরীরে. কোটিল্লে কুটিলতায. ভুঞ্জনং ভোজনক্রিযা.

ভূমিভাগে রাজঙ্গণাদিম্হি. কিলেসে সংকিলেসে. মলে রাগাদিকে.

৮৬০. ধনাদিদপ্পেতি ধনাদিকে পটিচ্চ উপ্পন্নে দপ্পে.

নিমিত্তে কারণে. ছলে সঠ্যে.

৮৬১. সো পুল্লিঙ্গো. পরমত্তনি দিট্ঠীনং গাহলদ্ধে অত্তনি. থম্ভস্মিং গেহাদীনং থম্ভে. বলসজ্জনং যুদ্ধকালে বলস্স সজ্জনং.

৮৬২. কুসূলো ধঞ্ঞাদীনং গেহং.

সোপানঙ্গম্হি সোপানসীসে.

৮৬৩. নিয্যাসে সিলেসে. সেখরে সীসে. নাগদন্তকে ভিত্তিআদীসু পৰেসিতে নাগদন্তাকারে দণ্ডে.

সিখণ্ডো পিঞ্ছং. তূণীরে উসুনিধিম্হি. নিকরে সমূহে.

৮৬৪. সংযতকেসেসু বন্ধিতকেসেসু.

কম্বু জলজন্তুৰিসেসো. নলাটট্ঠি নলাটে জাতট্ঠি. গোপ্ফকে পাদগণ্ঠিম্হি.

৮৬৫. কালে পঞ্চদসীদিৰসপরিমাণে. সাধ্যে পত্তসাধনীযে. সখী সহাযো. ৰাজো পত্তং. পঙ্গুল়ো পীঠসম্পী.

দেসে দেসৰিসেসে. অণ্ণৰে সমুদ্দে, এতে পুমে. সো সিন্ধুসদ্দো সরিতাযং নদিযং ভৰে.

৮৬৬. করেণুসদ্দো গজে হত্থিম্হি, পুরিসে পুল্লিঙ্গে ৰত্ততি. হত্থিনিযং তু ইত্থিযং.

রতনে রতনৰিসেসে. মণিৰেধো নাম যং লোকে ‘‘চিন’’ ইতি ৰুচ্চতি. ইন্দহেতি ইন্দাৰুধো.

৮৬৭. কোটিযং অন্তে. ৰাদিত্তৰাদনে ৰীণাদিৰাদিত্তৰাদনোপাযে.

‘‘কোণো ৰজ্জপ্পভেদে চ,

কোণো সেলগুল়ে ইজে;

ৰীণাদিৰাদনোপাযে,

একদেসে গতস্স চে’’তি. –

তিকণ্ডসেসো [তিকণ্ডসেস ৩.৩.১২৫].

৮৬৮. ৰণিপ্পথে ৰাণিজানং ৰোহারকম্মপথে. ৰেদে ৰেদৰিসেসে, ৰাণিজেপি নিগমো.

ৰিৰাদাদো ‘‘ৰিৰাদাধিকরণ’’ [পাচি. ৩৯৪] ন্ত্যাদীসু. আধারো কারকৰিসেসো, নিস্সযো চ. কারণে ‘‘যত্ৰাধিকরণমেন’’ন্তি [ধ. স. ১৩৫৪].

৮৬৯. পসুম্হি গোণে. ৰসুধা পথৰী. ৰাচা ৰচনং. আদিনা সগ্গরংসিৰজিরচন্দজলাদযো গহিতা.

হরিতে সুকপত্তসদিসে ৰণ্ণৰিসেসে. ৰাসুদেৰে কণ্হে.

৮৭০. আযত্তে নিস্সযে.

কণ্ণপূরো কণ্ণালঙ্কারো. সেখরে অগ্গে. এতে দ্ৰিন্নম্পি অত্থা.

৮৭১. ৰিজ্জুযং চঞ্চলাযং. ইত্থিপুরিসে পুরিসিত্থিযং.

কোণে অস্সে. সঙ্খ্যাৰিসেসো ‘‘কোটিপকোটী’’ত্যাদীসু. উক্কংসে পরিযোসানে.

৮৭২. জালা অগ্গিজালা. অগ্গং কোটি.

নারী আসীসদ্দো সপ্পদাঠাযং. ইট্ঠস্স ৰত্থুনো আসীসনাযং পত্থনাযম্পি ইত্থী এৰ.

৮৭৩. ৰিলীনতেলে ৰিসরণতেলে. ৰসগা ৰসং গচ্ছন্তী নারী. ৰঞ্চ্যগাৰী অনৰচ্ছা সোরভেযী.

অভিলাসে ইচ্ছাযং. কিরণে রংসিম্হি. অভিসঙ্গে লগ্গনে.