৯. সুনেত্তসুত্তং

৭৩. [অ. নি. ৬.৫৪; ৭.৬৬] ‘‘ভূতপুব্বং, ভিক্খৰে, সুনেত্তো নাম সত্থা অহোসি তিত্থকরো কামেসু ৰীতরাগো. সুনেত্তস্স খো পন, ভিক্খৰে, সত্থুনো অনেকানি সাৰকসতানি অহেসুং. সুনেত্তো সত্থা সাৰকানং ব্রহ্মলোকসহব্যতায ধম্মং দেসেসি. যে খো পন, ভিক্খৰে [যে খো ভিক্খৰে (সী. স্যা.)], সুনেত্তস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি নপ্পসাদেসুং তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিংসু. যে খো পন, ভিক্খৰে, সুনেত্তস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পরং মরণা সুগতিং সগ্গং লোকং উপপজ্জিংসু.

‘‘ভূতপুব্বং, ভিক্খৰে, মূগপক্খো নাম সত্থা অহোসি…পে… অরনেমি নাম সত্থা অহোসি…পে… কুদ্দালকো [কুদ্দালো (সী. স্যা.)] নাম সত্থা অহোসি…পে… হত্থিপালো নাম সত্থা অহোসি…পে… জোতিপালো নাম সত্থা অহোসি…পে… অরকো নাম সত্থা অহোসি তিত্থকরো কামেসু ৰীতরাগো. অরকস্স খো পন, ভিক্খৰে, সত্থুনো অনেকানি সাৰকসতানি অহেসুং. অরকো নাম সত্থা সাৰকানং ব্রহ্মলোকসহব্যতায ধম্মং দেসেসি. যে খো পন, ভিক্খৰে, অরকস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি নপ্পসাদেসুং, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিংসু. যে খো পন, ভিক্খৰে, অরকস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি পসাদেসুং, তে কাযস্স ভেদা পরং মরণা সুগতিং সগ্গং লোকং উপপজ্জিংসু.

‘‘তং কিং মঞ্ঞথ, ভিক্খৰে, যো ইমে সত্ত সত্থারে তিত্থকরে কামেসু ৰীতরাগে অনেকসতপরিৰারে সসাৰকসঙ্ঘে পদুট্ঠচিত্তো অক্কোসেয্য পরিভাসেয্য, বহুং সো অপুঞ্ঞং পসৰেয্যা’’তি? ‘‘এৰং, ভন্তে’’. ‘‘যো, ভিক্খৰে, ইমে সত্ত সত্থারে তিত্থকরে কামেসু ৰীতরাগে অনেকসতপরিৰারে সসাৰকসঙ্ঘে পদুট্ঠচিত্তো অক্কোসেয্য পরিভাসেয্য, বহুং সো অপুঞ্ঞং পসৰেয্য. যো একং দিট্ঠিসম্পন্নং পুগ্গলং পদুট্ঠচিত্তো অক্কোসতি পরিভাসতি, অযং ততো বহুতরং অপুঞ্ঞং পসৰতি. তং কিস্স হেতু? নাহং, ভিক্খৰে, ইতো বহিদ্ধা এৰরূপিং খন্তিং ৰদামি যথামং সব্রহ্মচারীসু’’.

‘‘তস্মাতিহ, ভিক্খৰে, এৰং সিক্খিতব্বং – ‘ন নো সব্রহ্মচারীসু [ন ত্ৰেৰ অম্হং সব্রহ্মচারীসু (স্যা.) অঙ্গুত্তরনিকাযে অঞ্ঞথা দিস্সতি] চিত্তানি পদুট্ঠানি ভৰিস্সন্তী’তি. এৰঞ্হি ৰো, ভিক্খৰে, সিক্খিতব্ব’’ন্তি. নৰমং.