৫. পারিচ্ছত্তকসুত্তং

৬৯. ‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো পণ্ডুপলাসো হোতি, অত্তমনা, ভিক্খৰে, দেৰা তাৰতিংসা তস্মিং সমযে হোন্তি – ‘পণ্ডুপলাসো দানি পারিচ্ছত্তকো কোৰিল়ারো নচিরস্সেৰ দানি পন্নপলাসো ভৰিস্সতী’’’তি.

‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো পন্নপলাসো হোতি, অত্তমনা, ভিক্খৰে, দেৰা তাৰতিংসা তস্মিং সমযে হোন্তি – ‘পন্নপলাসো দানি পারিচ্ছত্তকো কোৰিল়ারো নচিরস্সেৰ দানি জালকজাতো ভৰিস্সতী’’’তি.

‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো জালকজাতো হোতি, অত্তমনা, ভিক্খৰে, দেৰা তাৰতিংসা তস্মিং সমযে হোন্তি – ‘জালকজাতো দানি পারিচ্ছত্তকো কোৰিল়ারো নচিরস্সেৰ দানি খারকজাতো ভৰিস্সতী’’’তি.

‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো খারকজাতো হোতি, অত্তমনা, ভিক্খৰে, দেৰা তাৰতিংসা তস্মিং সমযে হোন্তি – ‘খারকজাতো দানি পারিচ্ছত্তকো কোৰিল়ারো নচিরস্সেৰ দানি কুটুমলকজাতো [কুডুমলকজাতো (সী. স্যা. পী.)] ভৰিস্সতী’’’তি.

‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো কুটুমলকজাতো হোতি, অত্তমনা, ভিক্খৰে, দেৰা তাৰতিংসা তস্মিং সমযে হোন্তি – ‘কুটুমলকজাতো দানি পারিচ্ছত্তকো কোৰিল়ারো নচিরস্সেৰ দানি কোরকজাতো [কোকাসকজাতো (সী. স্যা.), কোসকজাতো (ক.)] ভৰিস্সতী’’’তি.

‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো কোরকজাতো হোতি, অত্তমনা, ভিক্খৰে, দেৰা তাৰতিংসা তস্মিং সমযে হোন্তি – ‘কোরকজাতো দানি পারিচ্ছত্তকো কোৰিল়ারো নচিরস্সেৰ দানি সব্বফালিফুল্লো [সব্বপালিফুল্লো (সী. পী.)] ভৰিস্সতী’’’তি.

‘‘যস্মিং, ভিক্খৰে, সমযে দেৰানং তাৰতিংসানং পারিচ্ছত্তকো কোৰিল়ারো সব্বফালিফুল্লো হোতি, অত্তমনা, ভিক্খৰে, দেৰা তাৰতিংসা পারিচ্ছত্তকস্স কোৰিল়ারস্স মূলে দিব্বে চত্তারো মাসে পঞ্চহি কামগুণেহি সমপ্পিতা সমঙ্গীভূতা পরিচারেন্তি.

‘‘সব্বফালিফুল্লস্স খো পন, ভিক্খৰে, পারিচ্ছত্তকস্স কোৰিল়ারস্স সমন্তা পঞ্ঞাসযোজনানি আভায ফুটং হোতি, অনুৰাতং যোজনসতং গন্ধো গচ্ছতি, অযমানুভাৰো পারিচ্ছত্তকস্স কোৰিল়ারস্স.

‘‘এৰমেৰং খো, ভিক্খৰে, যস্মিং সমযে অরিযসাৰকো অগারস্মা অনগারিযং পব্বজ্জায চেতেতি, পণ্ডুপলাসো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘যস্মিং, ভিক্খৰে, সমযে অরিযসাৰকো কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিতো হোতি, পন্নপলাসো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘যস্মিং, ভিক্খৰে, সমযে অরিযসাৰকো ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি, জালকজাতো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘যস্মিং, ভিক্খৰে, সমযে অরিযসাৰকো ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি, খারকজাতো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘যস্মিং, ভিক্খৰে, সমযে অরিযসাৰকো পীতিযা চ ৰিরাগা…পে… ততিযং ঝানং উপসম্পজ্জ ৰিহরতি, কুটুমলকজাতো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘যস্মিং, ভিক্খৰে, সমযে অরিযসাৰকো সুখস্স চ পহানা দুক্খস্স চ পহানা…পে… চতুত্থং ঝানং উপসম্পজ্জ ৰিহরতি, কোরকজাতো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘যস্মিং, ভিক্খৰে, সমযে অরিযসাৰকো আসৰানং খযা…পে… সচ্ছিকত্ৰা উপসম্পজ্জ ৰিহরতি, সব্বফালিফুল্লো, ভিক্খৰে, অরিযসাৰকো তস্মিং সমযে হোতি দেৰানংৰ তাৰতিংসানং পারিচ্ছত্তকো কোৰিল়ারো.

‘‘তস্মিং, ভিক্খৰে, সমযে ভুম্মা দেৰা সদ্দমনুস্সাৰেন্তি – ‘এসো ইত্থন্নামো আযস্মা ইত্থন্নামস্স আযস্মতো সদ্ধিৰিহারিকো অমুকম্হা গামা ৰা নিগমা ৰা অগারস্মা অনগারিযং পব্বজিতো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’তি. ভুম্মানং দেৰানং সদ্দং সুত্ৰা চাতুমহারাজিকা দেৰা…পে… তাৰতিংসা দেৰা… যামা দেৰা… তুসিতা দেৰা… নিম্মানরতী দেৰা… পরনিম্মিতৰসৰত্তী দেৰা… ব্রহ্মকাযিকা দেৰা সদ্দমনুস্সাৰেন্তি – ‘এসো ইত্থন্নামো আযস্মা ইত্থন্নামস্স আযস্মতো সদ্ধিৰিহারিকো অমুকম্হা গামা ৰা নিগমা ৰা অগারস্মা অনগারিযং পব্বজিতো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’তি. ইতিহ তেন খণেন তেন মুহুত্তেন যাৰ ব্রহ্মলোকা সদ্দো [সাধুকারসদ্দো (সী. অট্ঠ., ক. অট্ঠ.)] অব্ভুগ্গচ্ছতি, অযমানুভাৰো খীণাসৰস্স ভিক্খুনো’’তি. পঞ্চমং.